Pāpa’ira’a mo’a
Te Ha’api’ira’a Tumu ’e te mau Fafaura’a 9


Tufa’a 9

E heheura’a tei hōro’ahia mai nā roto ia Iosepha Semita te peropheta ia Oliver Cowdery, i Harmony, i Pennsylvania, i te ’āva’e nō ’Ēperēra 1829. ’Ua a’ohia Oliver ’ia fa’a’oroma’i ’e ’ua tītauhia ’oia ’ia tāmau noa i te pāpa’i i te parau, i teie taime, mai te au i te parau e parauhia mai e te ta’ata ’īriti parau ; ’eiaha rā ’oia e tāmata i te ’īriti i te parau.

1–6, Tē vai ra te tahi mau pāpa’a parau tahito i tītauhia ’ia ’īriti ; 7–14, ’Ua ’īritihia te Buka a Moromona nā roto i te ha’api’ira’a ’e te fa’a’itera’a pāpū a te vārua.

1 Inaha, tē parau atu nei au ia ’oe na, e tā’u tamaiti, nō te mea ’aita ’oe i ’īriti i te parau mai te au i tā ’oe i tītau mai iā’u nei, ’e ’ua ha’amata fa’ahou ho’i ’oe i te pāpa’i i te parau nā tō’u tāvini ra, ’o Iosepha Semita, tamaiti, nō reira, tē hina’aro nei au ’ia nā reira noa ’oe ē ’ia oti roa ia ’oe teie nei pāpa’a parau tā’u i hōro’a ti’aturi atu iāna.

2 ’E i reira, inaha, e mau pāpa’a parau atu ā tā’u, ’e e hōro’a atu vau i te mana ia ’oe ’ia ti’a ia ’oe ’ia tauturu i te ’īritira’a.

3 ’A fa’a’oroma’i, e tā’u tamaiti, tei roto ho’i iā’u nei te pa’ari, ’e e ’ere ho’i i te mea ti’a ’ia ’īriti ’oe i te parau i teie nei taime.

4 Inaha, te ’ohipa i fa’ata’ahia nā ’oe na, ’o te pāpa’ira’a ïa i te parau nā tō’u tāvini ra ’o Iosepha.

5 ’E, inaha, nō te mea ’aita ’oe i rave noa mai te au i tā ’oe i ha’amata, ’a ha’amata ai ’oe i te ’īriti i te parau, nō reira vau i rave ’ē atu ai i te reira mana mai ia ’oe na.

6 ’Eiaha e amuamu, e tā’u tamaiti, tei roto ho’i iā’u nei te pa’ari i nā reira ai au ia ’oe na.

7 Inaha, ’aita ’oe i māramarama ; ’ua mana’o noa ’oe ē, e hōro’a noa vau i te reira ia ’oe, ma tō ’oe feruri ’ore, maori rā ’ia ani noa mai iā’u nei.

8 ’Āre’a rā, inaha, tē parau atu nei au ia ’oe na, ’ia ’imi māite ’oe i te reira i roto i tō ’oe ferurira’a ’e i roto i tō ’oe ’ā’au e ti’a ai ; ’e i reira ’oe e ani mai ai iā’u nei ē ’ua ti’a ānei, ’e mai te mea ’ua ti’a ra, e fa’atupu ïa vau i te ahu i roto i tō ’oe ’ōuma ; ’ei reira ’oe e ’ite ai ’e ’ua ti’a iho ā.

9 Mai te mea rā e ’ere i te mea ti’a, e ’ore roa ïa e noa’a ia ’oe te reira huru ahu i roto ia ’oe na, e ha’apōirihia rā tō ’oe mana’o, ’e nā te reira e ha’amo’e i te mea hape i roto i tō ’oe mana’o ; nō reira, e ’ore roa e ti’a ia ’oe ’ia pāpa’i i te mau mea mo’a maori rā ’ia hōro’ahia atu ia ’oe e au.

10 I teienei, ’āhiri ’oe i ’ite i te reira ’ua ti’a ïa ia ’oe ’ia ’īriti i te parau ; ’ātīrā noa atu rā, e ’ere i te mea ti’a ia ’oe ’ia ’īriti i te parau i teienei.

11 Inaha, ’ua ti’a ïa i te taime ’oe i ha’amata ai ; ’ua taiā rā ’oe ’e ’ua ma’iri te taime ; ’e ’aita ho’i i ti’a i teienei ;

12 ’Aita ānei ho’i ’oe i ’ite ē, ’ua hōro’a atu vau i tō’u tāvini ra ia Iosepha i te pūai e au nō te reira, i oti ai ho’i iāna te ’ohipa i hina’arohia ra ? ’E ’aita atu ra te hō’ē o ’ōrua i fa’ahapahia e au nei.

13 ’A rave i teie nei mea tā’u i fa’aue atu ia ’oe ra, ’e e manuia iho ā ’oe. ’A fa’aitoito noa, ’e ’eiaha e topa i roto i te hō’ē noa atu fa’ahemara’a.

14 ’A rave māite i te ’ohipa tā’u i hōro’a atu nā ’oe, ’e e ’ore roa te hō’ē a’e rouru nō tō ’oe na upo’o e mo’e, ’e e fa’ateiteihia ’oe ’ia tae i te mahana hope’a ra. ’Āmene.