Tufa’a 55
E heheura’a tei hōro’ahia mai nā roto ia Iosepha Semita te peropheta, ia William W. Phelps, i Kirtland, i Ohio, i te 14 nō Tiunu 1831. Nō tae noa mai nei ’o William W. Phelps, te ta’ata nene’i parau, ’e tōna ra ’utuāfare i Kirtland ; ’e ’ua tītau atu ra te peropheta i te Fatu i te parau nō ni’a iāna.
1–3, ’Ua pi’ihia ’e ’ua mā’itihia ’o William W. Phelps ’ia bāpetizohia, ’ia fa’atōro’ahia ’ei peresibutero, ’e ’ia poro haere i te ’evanelia ; 4, ’Ua tītau-ato’a-hia ’oia ’ia pāpa’i i te mau buka nā te mau tamari’i nō roto i te mau fare ha’api’ira’a a te ’Ēkālesia ; 5–6, ’Ua tītau-ato’a-hia ’oia ’ia tere atu i Missouri, ’o te reira ho’i te vāhi i fa’ata’ahia nō te rave i tāna mau ’ohipa.
1 Inaha, tē nā ’ō mai ra te Fatu ia ’oe, e tō’u tāvini ra e William, ’oia ïa, ’o ’oia te Fatu nō te ao pā’āto’a nei, ’ua pi’ihia ’oe ’e ’ua mā’itihia ho’i ; ’e ’ia oti ’oe i te bāpetizohia i te pape, ’e mai te mea e rave ’oe i te reira ma te mata rōtahi i tō’u hanahana, e ha’amatarahia ïa tā ’oe ra mau hara ’e e fāri’i ho’i ’oe i te Vārua Mo’a nā roto i te tu’ura’a rima ;
2 ’E i reira ’oe e fa’atōro’ahia e te rima o tō’u tāvini ra ’o Iosepha Semita, tamaiti, ’ia riro ho’i ’ei peresibutero nō teie nei ’ēkālesia, ’ia a’o atu i te parau nō te tātarahapara’a ’e nō te ha’amatarara’a i te mau hara nā roto i te bāpetizora’a nā roto i te i’oa o Iesu Mesia, te Tamaiti a te Atua ora.
3 ’E i ni’a iho ia rātou ato’a ’o tā ’oe e tu’u atu i tō ’oe rima, mai te mea e mea ha’eha’a rātou i mua iā’u nei, e mana ïa tō ’oe ’ia hōro’a atu i te Vārua Mo’a.
4 ’E teie fa’ahou ā, e fa’atōro’ahia ’oe ’ia tauturu i tō’u tāvini ra ia Oliver Cowdery nō te rave i te ’ohipa nene’ira’a parau, ’e nō te mā’itira’a ’e te pāpa’ira’a ho’i i te mau buka nō te mau fare ha’api’ira’a i roto i teie nei ’ēkālesia, ’ia noa’a ato’a mai i te mau tamari’i ri’i te ha’api’ira’a i mua iā’u nei mai tei au roa iā’u nei.
5 ’E teie fa’ahou ā, ’oia mau tē parau atu nei au ia ’oe na, nō teie nei ’ohipa e haere ai ’oe nā muri iho i tō’u nā tāvini ra ia Iosepha Semita, tamaiti, ’e ia Sidney Rigdon, ’e ’ia fa’aea tumu ’oe i ni’a i te fenua nō tō ’oe na ’āi’a nō te rave i teie nei ’ohipa.
6 ’E teie fa’ahou ā, ’ia haere ato’a tō’u tāvini ra ’o Joseph Coe i tōna tere nā muri iho ia rātou. E fa’a’itehia atu te toe’a i muri iho, mai te au i tā’u i hina’aro ra. ’Āmene.