Pāpa’ira’a mo’a
Te Ha’api’ira’a Tumu ’e te mau Fafaura’a 88


Tufa’a 88

E heheura’a tei hōro’ahia mai nā roto ia Iosepha Semita te peropheta, i Kirtland, i Ohio, i te 27 ’e 28 nō Tītema 1832, ’e i te 3 nō Tēnuare 1833. ’Ua parauhia te reira e te peropheta, te « ‘rau’ere ’ōlive’ pōfa’ihia nō ni’a mai i te tumu rā’au Pāradaiso, te parau poro’i a te Fatu nō te hau ia tātou nei ». ’Ua hōro’ahia te heheura’a i roto i te hō’ē ’āmuira’a ’a pure ai te mau tahu’a rahi « terā ta’ata tōna pae ’e terā ta’ata tōna pae ma te pi’i i te Fatu ’ia heheu mai i tōna hina’aro ia rātou ra nō ni’a i te fa’atupura’a ia Ziona ».

1–5, E fāri’i te feiā mo’a i taua Fa’aa’o ra, ’oia ho’i te fafaura’a nō te ora mure ’ore ; 6–13, E fa’atītī’aifarohia ’e e fa’aterehia te mau mea ato’a nā roto i te Māramarama o te Mesia ; 14–16, ’Ua tae mai te Ti’afa’ahoura’a nā roto i te Tāra’ehara ; 17–31, Nā te ha’apa’ora’a i te ture tiretiera, teretetiera, ’e tiretia e fa’aineine i te mau ta’ata nō te mau bāsileia ’e te mau hanahana tāta’itahi ; 32–35, E vai noa te feiā ’o tē rave i te hara i roto i te vi’ivi’i ; 36–41, Tē fa’aterehia nei te mau bāsileia ato’a e te ture ; 42–45, ’Ua hōro’a mai te Atua i te ture nō te mau mea ato’a ; 46–50, E māramarama te ta’ata mai te Atua ; 51–61, Te parabole nō te ta’ata i tono atu i tōna mau tāvini i roto i te ’āua ’e ’o tei haere atu e fārerei ia rātou i muri iho ; 62–73, ’A ha’afātata atu i te Fatu, ’e e ’ite atu ’outou i tōna mata ; 74–80, ’A ha’amo’a ia ’outou iho ’e ’a ha’api’i i te tahi ’e te tahi i te mau ha’api’ira’a tumu nō te bāsileia ; 81–85, ’Ia fa’aara atu te ta’ata tāta’itahi i fa’aarahia i tōna ta’ata tupu ; 86–94, Tē fa’aineine nei te mau tāpa’o, te mau ’ārepurepura’a o te nātura, ’e te mau melahi i te ’ē’a nō te haerera’a mai o te Fatu ; 95–102, E tae mai te pi’ira’a nō te mau pū a te mau melahi i te feiā pohe mai te au i tō rātou fa’anahora’a ; 103–116, E fa’a’ite mai te mau pū a te mau melahi i te fa’aho’ira’a mai nō te ’evanelia, te topara’a o Babulonia, ’e te ’arora’a a te Atua rahi ; 117–126, ’A tītau i te ’ite, ’a fa’anahonaho i te hō’ē fare nō te Atua (te hō’ē hiero), ’e ’a fa’a’ahu ia ’outou iho i te ru’uru’ura’a nō te aroha ; 127–141, ’Ua fa’a’itehia mai te huru nō te Fare ha’api’ira’a a te mau peropheta, ē tae noa atu i te ’ōro’a nō te horoira’a i te ’āvae.

1 ’Oia mau, tē nā ’ō mai ra te Fatu ia ’outou ’o tei ha’aputuputu mai ia ’outou iho nō te fāri’i i tōna ra hina’aro ia ’outou na :

2 Inaha, e mea au teie i tō ’outou Fatu, ’e tē ’oa’oa nei te mau melahi ia ’outou na ; ’ua tae mai te mau parau aroha ’o tā ’outou mau pure i ni’a i te tari’a o te Fatu Sabaota ra, ’e ’ua pāpa’ihia ho’i i roto i te buka nō te mau i’oa ’o tei ha’amo’ahia ra, ’oia ’o rātou nō te ao tiretiera.

3 Nō reira, te tono atu nei au i te tahi atu ā Fa’aa’o i teie nei i ni’a ia ’outou, ’oia ïa i ni’a iho ia ’outou e tō’u mau hoa, ’ia vai noa te reira i roto i tō ’outou ’ā’au, ’oia te Vārua Mo’a nō te fafaura’a ; ’o te reira Fa’aa’o ’ē atu ïa tā’u i fafau atu i tā’u mau pipi, mai te au i tei pāpa’ihia i roto i te ’itera’a pāpū o Ioane.

4 Teie Fa’aa’o ’o te fafaura’a ïa ’o tā’u e hōro’a atu nei ia ’outou nō te ora mure ’ore, ’oia ïa te hanahana nō te bāsileia tiretiera ;

5 ’O te reira hanahana ra, ’o te hanahana ïa nō te ’ēkālesia a te Matahiapo, ’oia ïa te Atua, tei mo’a roa i te mau mea ato’a, nā roto ia Iesu Mesia tāna Tamaiti—

6 ’O ’oia ’o tei haere atu i ni’a, mai te au ato’a i tāna i pou mai i raro a’e i te mau mea ato’a, mai tāna i ’ite i te mau mea ato’a, ’ia ti’a iāna ’ia vai i roto i te mau mea ato’a ’e nā roto ato’a i te mau mea ato’a, te māramarama nō te parau mau ;

7 ’O te parau mau te reira ’o tē ’ana’ana mai nei. Teie te māramarama o te Mesia. ’E tei roto ato’a ’oia i te mahana, ’e ’o ’oia te māramarama nō te mahana, ’e ’o ’oia ho’i te mana nā roto i te reira te mahana i hāmanihia ai.

8 ’E tei roto ato’a ’oia i te marama, ’e ’o ’oia te māramarama nō te marama, ’e ’o ’oia ho’i te mana nā roto i te reira te marama i hāmanihia ai ;

9 ’E ’o ’oia ato’a te māramarama nō te mau feti’a, ’e ’o ’oia ho’i te mana nā roto i te reira te mau feti’a i hāmanihia ai ;

10 ’E ’o ’oia ato’a te māramarama nō te fenua, ’e te mana ho’i nō te reira, ’oia te fenua e ti’ahia nei e ’outou na.

11 ’E te māramarama ’o tē ’ana’ana mai ra, ’o tē hōro’a nei i te māramarama ia ’outou na, nā roto ïa iāna ra ’o tē ha’amāramarama mai nei i tō ’outou mata, hō’ē ā te reira māramarama ’o tē fa’arahi nei i tō ’outou ’ite ;

12 Nō ’ō mai te reira māramarama i te aro o te Atua nō te fa’a’ī i te tā’āto’ara’a o te mau vāhi ato’a—

13 Te māramarama ’o tē vai nei i roto i te mau mea ato’a, ’o tē hōro’a mai nei i te ora i te mau mea ato’a, ’o te ture ho’i ïa nā roto i te reira te mau mea ato’a e fa’aterehia ai, ’oia te mana o te Atua ’o tē pārahi nei i ni’a i tōna ra terōno, ’o tei roto i te ’ōuma nō te tau mure ’ore, ’o tei rotopū ho’i i te mau mea ato’a ra.

14 I teienei, ’oia mau tē parau atu nei au ia ’outou na, ’e nā roto i te fa’aorara’a ’o tei fa’atupuhia nō ’outou na i fa’atupuhia ai te ti’afa’ahoura’a mai roto mai i te pohe.

15 ’E te vārua ’e te tino ra, ’o te vārua tā’āto’a ïa o te ta’ata nei.

16 ’E te ti’afa’ahoura’a mai te pohe mai ra, ’o te fa’aorara’a ïa i te vārua tā’āto’a.

17 ’E te fa’aorara’a o te vārua tā’āto’a o te ta’ata, nā roto ïa iāna ’o tei hōro’a i te ora i te mau mea ato’a, ’e tei roto i tōna ’ōuma i parau-mana-hia ai ē, e fatu te feiā veve ’e te feiā marū o te fenua nei i te reira.

18 Nō reira, ’ia tāmāhia te reira i te mau mea parauti’a ’ore ato’a e ti’a ai, ’ia ineine te reira nō te hanahana tiretiera.

19 Nō te mea i muri iho i tōna rave-fa’aoti-ra’a i te ’ōpuara’a nō tōna hāmanira’ahia, ’ei reira te fenua nei e fa’akoronahia ai i te hanahana, ’oia ho’i i te aro o te Atua te Metua ;

20 ’Ia ti’a i te mau tino nō te bāsileia tiretiera ’ia fatu i te reira ē a muri ē a muri noa atu ; nō te mea, ’o teie te tumu te fenua nei i hāmanihia ai ’e i fa’anahonahohia ai, ’e nō reira ho’i rātou e ha’amo’ahia ai.

21 ’E ’o rātou ’o tē ’ore e ha’amo’ahia nā roto i te ture tā’u i hōro’a atu ia ’outou na, ’oia te ture a te Mesia ra, e fāri’i ïa rātou i te tufa’a nō te tahi bāsileia ’ē atu, ’oia nō te bāsileia teretetiera, ’e ’aore rā nō te bāsileia tiretia.

22 Nō te mea ’o ’oia ’o tē ’ore e ti’a ’ia ha’apa’o i te ture nō te bāsileia tiretiera, e ’ore ato’a ïa e ti’a iāna ’ia fa’aea i roto i te hanahana tiretiera.

23 ’E ’o ’oia ’o tē ’ore e ti’a ’ia ha’apa’o i te ture nō te bāsileia teretetiera, e ’ore ato’a ïa e ti’a iāna ’ia fa’aea i roto i te hanahana teretetiera.

24 ’E ’o ’oia ’o tē ’ore e ti’a ’ia ha’apa’o i te ture nō te bāsileia tiretia, e ’ore ato’a ïa e ti’a iāna ’ia fa’aea i roto i te hanahana tiretia ; nō reira, e ’ere ho’i i te mea ti’a nōna te hō’ē bāsileia hanahana. Nō reira, ’ia fa’aea ’oia i roto i te hō’ē bāsileia ’aita tōna e hanahana e ti’a ai.

25 ’E teie fa’ahou ā, ’oia mau tē parau atu nei au ia ’outou na ē, tē ha’apa’o nei te fenua nei i te ture nō te bāsileia tiretiera, nō te mea ’ua rave fa’aoti te reira i te ’ōpuara’a nō tōna hāmanira’ahia, e ’aore ho’i i ’ōfati i te ture—

26 Nō reira, e ha’amo’ahia te reira ; ’oia ïa, noa atu ē e pohe atu te reira, e fa’aora-fa’ahou-hia ïa, ’e e fa’aea ho’i i roto i te mana nā roto i te reira i fa’aorahia ai, ’e e fatu te feiā parauti’a i te reira.

27 Noa atu ho’i e pohe atu rātou, e ti’a fa’ahou mai ā rātou, ’ei tino vārua.

28 ’O rātou nō te vārua tiretiera e fāri’i ïa rātou i te reira iho tino, e huru tāhuti tōna nā mua ; ’oia e fāri’i ’outou i tō ’outou iho tino, ’e tō ’outou hanahana ra ’o te hanahana ïa i fa’aorahia ai tō ’outou ra tino.

29 ’O ’outou ’o tei fa’aorahia e te hō’ē tufa’a o te hanahana tiretiera, e fāri’i ato’a ïa ’outou i te reira, ’oia i te tā’āto’ara’a.

30 ’E ’o rātou ’o tei fa’aorahia e te hō’ē tufa’a o te hanahana teretetiera, e fāri’i ato’a ïa rātou i te reira, ’oia i te tā’āto’ara’a.

31 ’E ’o rātou ato’a ho’i ’o tei fa’aorahia e te hō’ē tufa’a o te hanahana tiretia, e fāri’i ato’a ïa rātou i te reira, ’oia i te tā’āto’ara’a.

32 ’E ’o rātou ’o tē toe mai, e fa’aora-ato’a-hia rātou ; noa atu rā i te reira, e ho’i fa’ahou atu rātou i tō rātou iho vāhi, ’ia ’oa’oa i tei au ia rātou ’ia fāri’i, nō te mea ho’i, ’aore rātou i hina’aro ’ia ’oa’oa i te mea i ti’a ia rātou ’ia fāri’i.

33 Nō te mea e aha ihora ïa te ta’ata e faufa’ahia ai mai te mea e tu’uhia mai te tao’a hōro’a iāna, ’e ’aita ’oia e fāri’i mai i te reira ? Inaha, e ’ore roa ’oia e ’oa’oa i te reira mea ’o tei hōro’ahia mai iāna ra, ’e e ’ore ato’a e māuruuru iāna ’o tei tu’u mai i te tao’a hōro’a.

34 ’E teie fa’ahou ā, ’oia mau tē parau atu nei au ia ’outou na ē, ’o tei fa’aterehia e te ture ra, ’ua pāruru-ato’a-hia ïa e te ture, ’e ’ua ha’amaita’i-roa-hia ’e ’ua ha’amo’ahia ho’i e te reira.

35 ’O te mea ’o tē ’ōfati i te ture, ’e ’o tē ’ore ho’i e ha’apa’o i te ture, ’o tē tītau rā ’ia riro ’ei ture iāna ihora, ’e ’o tē hina’aro ’ia fa’aea i roto i te hara, ’e ’o tē fa’aea roa ho’i i roto i te hara ra, e ’ore roa ïa e ti’a ’ia ha’amo’ahia e te ture, e ’ore ato’a e te aroha, te parauti’a ’e te parau mau. Nō reira, e vai vi’ivi’i noa ā rātou e ti’a ai.

36 ’Ua hōro’ahia te ture i te mau bāsileia ato’a ra ;

37 ’E tē vai nei e rave rahi bāsileia ; nō te mea ’aore e ārea ’aita e bāsileia tō roto ; ’e ’aore ho’i e bāsileia ’aita e ārea tō roto, te bāsileia rahi a’e ’e ’aore rā te bāsileia iti iho.

38 ’E i te mau bāsileia ato’a ’ua hōro’ahia te hō’ē ture ; ’e i te mau ture ato’a tē vai ra te mau ’ōti’a ’e te mau tītaura’a ato’a.

39 ’E te mau ta’ata ato’a ’o tē ’ore e ha’apa’o i taua mau tītaura’a ra, ’aore roa rātou e fa’ati’ahia.

40 Nō te mea tē ’ati atu nei te ’ite i te ’ite ; tē fāri’i mai nei te pa’ari i te pa’ari ; tē tauahi atu nei te parau mau i te parau mau ; tē here nei te vi’ivi’i ’ore i te vi’ivi’i ’ore ; tē ’ati atu nei ho’i te māramarama i te māramarama ; tē aroha atu nei te aroha i te aroha, ’e tē tītau nei ho’i i tāna iho ; tē haere noa nei te parauti’a i tōna haere’a ’e tē tītau nei ho’i i tāna iho ; tē haere nei te parau mau nā mua i te aro nōna nō tei pārahi i ni’a i te terōno ’e ’o tē fa’atere nei ’e ’o tē rave nei ho’i i te mau mea ato’a ra.

41 ’Ua māramarama ’oia i te mau mea ato’a, ’e tei mua iāna te mau mea ato’a, ’e tē fa’aati nei te mau mea ato’a iāna ; ’e tei ni’a a’e ’oia i te mau mea ato’a, ’e tei roto ho’i i te mau mea ato’a ra, ’e tē fa’aa’ti atu nei ho’i i te mau mea ato’a ra ; ’e nāna te mau mea ato’a, ’e nōna ho’i, ’oia ’o te Atua, ē a muri ē a muri noa atu.

42 ’E teie fa’ahou ā, ’oia mau tē parau atu nei au ia ’outou na, ’ua hōro’a ’oia i te hō’ē ture i te mau mea ato’a, nā roto i te reira rātou e tere ai i roto i tō rātou iho mau taime ’e tō rātou ho’i mau tau ;

43 ’E ’ua ha’amauhia ho’i tō rātou mau haere’a, ’oia te mau haere’a o te mau ra’i ’e te fenua nei, tei roto i te reira te fenua nei ’e te mau palaneta ato’a ra.

44 ’E tē hōro’a nei rātou i te māramarama i te tahi ’e i te tahi i tō rātou ra mau taime ’e i tō rātou ra mau tau, i tō rātou ra mau minuti, i tō rātou ra mau hora, i tō rātou ra mau mahana, i tō rātou ra mau hepetoma, i tō rātou ra mau ’āva’e, i tō rātou ra ho’i mau matahiti—hō’ē noa iho ra matahiti teie mau mea i te Atua, ’eiaha rā i te ta’ata nei.

45 Tē ’ohu nei te fenua nei i ni’a i tōna nā pererau, ’e tē hōro’a mai nei te mahana i tōna māramarama i te ao, ’e tē hōro’a mai nei te ’āva’e i tōna māramarama i te pō, ’e tē hōro’a ato’a mai nei te mau feti’a i tō rātou ra māramarama, ’a ’ohu atu ai rātou i ni’a i tō rātou mau pererau i roto i tō rātou ra hanahana, i rōpū i te mana o te Atua ra.

46 Nāfea vau ’ia fa’aau i teie nei mau bāsileia, ’ia pāpū maita’i ia ’outou ?

47 Inaha, e mau bāsileia ana’e teie, ’e te ta’ata ’o tei hi’o i te hō’ē ’e ’aore rā i tei iti a’e i teie mau mea, ’ua ’ite ïa i te Atua i te ha’ara’a i roto i tōna ra hanahana ’e tōna ra mana.

48 Tē parau atu nei au ia ’outou ē, ’ua ’ite ’oia iāna ; noa atu rā i te reira, ’o ’oia ’o tei haere mai i tōna ihora, ’aore ïa ’oia i ’itehia.

49 Tē ’ana’ana mai ra te māramarama i roto i te pōiri, ’e ’aore te pōiri i ’ite atu i te reira ; noa atu rā i te reira, e tae mai te mahana e ’ite ai ’outou i te Atua mau, nō te mea e fa’aorahia ’outou e ana, ’e nā roto ho’i iāna.

50 ’Ei reira ’outou e ’ite ai ē, ’ua ’ite mata iho ā ’outou iā’u nei, ’e tē vai nei au, ’e ’o vau nei ā ho’i te māramarama mau e vai nei i roto ia ’outou na, ’e tei roto ā ho’i ’outou iā’u nei ; ’āhiri ’aita rā, ’aore ïa i ti’a ia ’outou ’ia ora noa.

51 Inaha, e fa’aau vau i teie nei mau bāsileia i te hō’ē ta’ata e ’āua tāna ra, ’e ’ua tono atu ra ’oia i tōna mau tāvini i roto i te ’āua nō te ’ūtaru i roto i te ’āua ra.

52 ’E ’ua parau atu ra ’oia i te mātāmua : ’A haere atu na ’oe ’e ’a rave i te ’ohipa i roto i te ’āua, ’e i roto i te hora mātāmua vau e tae atu ai ia ’oe na, ’e e ’ite mai ’oe i te ’oa’oa o tō’u mata.

53 ’E ’ua parau atu ra ’oia i te piti : ’A haere ato’a atu na ’oe i roto i te ’āua, ’e i te piti o te hora vau e fārerei ai ia ’oe ma te mata ’oa’oa.

54 ’E i te toru ato’a, ’ua nā ’ō atu ’oia : E fārerei atu vau ia ’oe ;

55 ’E i te maha, e nā reira noa ē tae roa atu i te ’ahuru ma piti ra.

56 ’E ’ua haere atu ra te fatu nō te ’āua i te tāvini mātāmua i te hora mātāmua, ’e ’ua fa’aea noa i pīha’i iho iāna i te reira hora tā’āto’a, ’e ’ua fa’a’oa’oahia ’oia e te māramarama o te mata o tōna ra fatu.

57 ’E i reira fa’aru’e ihora ’oia i te tāvini mātāmua, ’ia ti’a iāna ’ia fārerei ato’a i te piti, ’e te toru, ’e te maha ho’i, ’e nā reira noa ē tae roa atu i te ’ahuru ma piti.

58 ’E nā roto i te reira ’ua fāri’i rātou pā’āto’a i te māramarama nō te mata o tō rātou ra fatu, te ta’ata tāta’itahi i tōna ra hora, ’e i tōna ra taime, ’e i tōna ra tau—

59 Ma te ha’amata i te mātāmua ra, e nā reira noa ē tae roa atu i te hope’a ra, ’e mai te hope’a ē tae roa atu i te mātāmua, e mai te mātāmua ho’i ē tae roa atu i te hope’a ra ;

60 Te ta’ata tāta’itahi i tōna ihora ti’ara’a, ē tae roa atu i te taime i hope ai tōna ra hora, mai te au i tā tōna fatu i fa’aue atu iāna ra, ’ia fa’ahanahanahia ho’i tōna fatu iāna ra, ’e ’o ’oia ho’i i tōna ra fatu, ’ia ti’a ia rātou pā’āto’a ’ia fa’ahanahanahia.

61 Nō reira, e fa’aau vau i teie mau bāsileia ato’a i teie nei parabole, ’e te mau ta’ata ho’i nō reira—te bāsileia tāta’itahi i roto i tōna iho hora, ’e i tōna iho taime, ’e i tōna iho tau, ’oia ïa mai te au i te fa’auera’a mana tā te Atua i ha’apa’o.

62 ’E teie fa’ahou ā, ’oia mau tē parau atu nei au ia ’outou na, e tō’u mau hoa, tē vaiiho atu nei au i teie nei mau parau ia ’outou na ’ia feruri māite i roto i tō ’outou na ’ā’au, ’e tē hōro’a atu nei au i teie fa’auera’a ia ’outou, ’ia ti’aoro mai ’outou iā’u nei ’a pārahi fātata noa mai ai au—

63 ’A ha’afātata mai iā’u nei ’e e ha’afātata atu vau ia ’outou na ; ’a ’imi māite noa mai iā’u nei ’e e ’itehia vau ia ’outou na ; ’a ani mai, ’e e fāri’i ïa ’outou ; ’a pātōtō mai, ’e e ’īritihia atu ïa ia ’outou na.

64 Te mau mea ato’a tā ’outou e ani atu i te Metua nā roto i tō’u nei i’oa, e hōro’ahia atu ïa ia ’outou na, i tei au nō ’outou na ;

65 ’E mai te mea e ani mai ’outou i te hō’ē mea ’aita i au nō ’outou na, e riro ïa ’ei fa’ahapara’a ia ’outou na.

66 Inaha, ’o tā ’outou e fa’aro’o nei mai te reo o te hō’ē i te pi’ira’a mai i roto i te mēdēbara—i te mēdēbara, nō te mea e’ita e nehenehe ia ’outou ’ia ’ite mata atu iāna—’o tō’u nei ïa reo, nō te mea e Vārua tō’u nei reo ; e parau mau tō’u nei Vārua ; ’e e vai noa ho’i te parau mau ’e ’aita ho’i tō te reira e hope’a ; ’e mai te mea tei roto ia ’outou na, e fa’arahihia ïa.

67 ’E mai te mea ’ua rōtahi tō ’outou mata i tō’u nei hanahana, e fa’a’īhia ïa tō ’outou tino tā’āto’a i te māramarama, ’e e ’ore roa ho’i te pōiri i roto ia ’outou na ; ’e taua tino ra ’o tei fa’a’īhia i te māramarama ra, e ’ite ïa i te mau mea ato’a.

68 Nō reira, ’a ha’amo’a na ia ’outou iho ’ia rōtahi tō ’outou mana’o i te Atua ra, ’e e tae mai ïa te mau mahana e ’ite ai ’outou iāna ra ; nō te mea e ’īriti mai ’oia i te pāruru o tōna mata ia ’outou na, ’e e nā-reira-hia i tōna ihora tau mau, ’e i tāna iho rāve’a, ’e mai te au ho’i i tōna iho hina’aro.

69 ’A ha’amana’o na i te fafaura’a rahi ’e te hope’a tā’u i fafau atu ia ’outou na ; ’a fa’aru’e ’ē atu i tō ’outou mau mana’o faufa’a ’ore ’e tā ’outou ’atara’a rahi i te ātea ’ē roa ia ’outou.

70 ’A tīa’i ri’i ’outou, ’a tīa’i ri’i ’outou i teie nei vāhi, ’e ’a fa’atupu i te ’āmuira’a mo’a, ’oia nō rātou o te mau rave ’ohipa mātāmua i roto i teie bāsileia hope’a nei.

71 ’A parau ia rātou ’o tei fa’aarahia i tō rātou haerera’a, ’ia ti’aoro mai i te Fatu, ’e ’ia feruri māite i te fa’aarara’a tā rātou i fāri’i, i roto i tō rātou ’ā’au, nō te hō’ē tau poto.

72 Inaha, ’e ’a hi’o na, nā’u e ha’apa’o i tā ’outou mau nana, ’e nā’u ho’i e fa’aineine i te mau peresibutero ’e a tono atu ai ia rātou ra.

73 Inaha, e rave ’oi’oi au i tā’u ’ohipa i te tau mau nō te reira.

74 ’E tē hōro’a atu nei au ia ’outou, e te mau rave ’ohipa mātāmua i roto i teie bāsileia hope’a nei, te fa’auera’a ’ia ha’aputuputu ’āmui mai ’outou ia ’outou iho, ’e ’ia fa’anahonaho ia ’outou iho, ’e ’ia fa’aineine ia ’outou iho, ’e ’ia ha’amo’a ia ’outou iho ; ’oia ïa, ’ia tāmā i tō ’outou ’ā’au, ’e ’ia horoi tāmā ho’i i tō ’outou mau rima ’e tō ’outou mau ’āvae i mua iā’u nei, ’ia ti’a iā’u nei ’ia tāmā atu ia ’outou na ;

75 ’Ia ti’a iā’u nei ’ia fa’a’ite pāpū atu i tō ’outou Metua, ’e tō ’outou Atua, ’e tō’u Atua ho’i ē, ’ua mā ’outou i te toto o teie nei u’i parauti’a ’ore ; ’ia ti’a iā’u ’ia fa’atupu i teie fafaura’a, teie fafaura’a rahi ’e te hope’a ho’i ’o tā’u i fa’aau atu ia ’outou na, i te taime au iā’u nei.

76 ’E teie ato’a, tē hōro’a atu nei au i te hō’ē fa’auera’a ia ’outou, ’ia tāmau noa ’outou i te pure ’e te ha’apaera’a mā’a, mai teie taime atu ā.

77 ’E tē hōro’a atu nei au i te hō’ē fa’auera’a ia ’outou ’ia ha’api’i atu ’outou te tahi i te tahi i te mau ha’api’ira’a tumu nō te bāsileia.

78 ’A ha’api’i māite atu ’outou, ’e e vai noa tō’u maita’i ia ’outou na, ’ia ti’a ia ’outou ’ia ha’api’i-maita’i-hia atu ā i te mau mea i mana’ohia, i te mau ferurira’a tumu, i te mau ha’api’ira’a tumu, i te ture nō te ’evanelia, i roto i te mau mea ato’a nō ni’a i te bāsileia o te Atua, ’o tei au ia ’outou ia ’ite ;

79 Nō te mau mea i roto i te ra’i ’e i roto i te fenua nei, ’e i raro a’e i te fenua nei ; te mau mea ’o tei vai na, te mau mea ’o tē vai nei, te mau mea ho’i ’o tē fātata i te tupu mai ; te mau mea ’o tē vai nei i’ō nei, te mau mea i te ātea ’ē ra ; te mau tama’i ’e te mau ’ārepurepura’a o te mau nūna’a, ’e te mau fa’autu’ara’a ’o tē vai nei i ni’a i te fenua ; ’e te ’ite ho’i nō te mau fenua ’e nō te mau bāsileia—

80 ’Ia ineine ’outou i roto i te mau mea ato’a i te taime au e tono fa’ahou atu ai ia ’outou nō te fa’a’ohipa māite i te pi’ira’a ’o tā’u i pi’i atu ia ’outou na, ’e i te ’ohipa tā’u i ha’amana ia ’outou ’ia rave.

81 Inaha, ’ua tono atu vau ia ’outou nō te fa’a’ite pāpū i te parau ’e nō te fa’aara ho’i i te mau ta’ata, ’e e mea ti’a roa i te ta’ata tāta’itahi ’o tei fa’aarahia ’ia fa’aara atu i tōna ra ta’ata tupu.

82 Nō reira, ’aita atu ra tā rātou e ’ōtohera’a, ’e tei ni’a iho ïa tā rātou mau hara i tō rātou iho upo’o.

83 ’O ’oia ’o tē ’imi ’oi’oi mai iā’u nei, e ’ite ïa ’oia iā’u, ’e e ’ore roa ’oia e fa’aru’ehia.

84 Nō reira, ’a tīa’i ri’i ’outou, ’e ’a rave itoito i te ’ohipa, ’ia ti’a ia ’outou ’ia ha’amaita’i-roa-hia i roto i tā ’outou ’ohipa mo’a nō te haere atu i rotopū i te mau ’Ētene nō te taime hope’a, ’o rātou ato’a ’o tā te vaha o te Fatu e fa’ahiti mai, nō te ru’uru’u mai i te ture ’e nō te tā’ati mai ho’i i te ’itera’a pāpū, ’e nō te fa’aineine ho’i i te feiā mo’a nō te hora o te ha’avāra’a ’o tē tae mai ra ;

85 ’Ia ora atu tō rātou mau vārua i te riri ’ū’ana o te Atua, te fa’aanora’a o te ’ohipa ’ino rahi ’o tē tīa’i mai ra i te feiā parauti’a ’ore, i roto i teie nei ao ’e i roto ho’i i te ao e tae mai ra. ’Oia mau, tē parau atu nei au ia ’outou na, ’a parau atu ia rātou e ’ere i te mau peresibutero mātāmua ra ’ia tāmau ā i te rave i te ’ohipa i roto i te ’ō vine ē tae noa atu i te taime te vaha o te Fatu e pi’i mai ai ia rātou ra, nō te mea ’aita ā tō rātou taime i tae mai ; ’aore ho’i tō rātou ’ahu i mā i te toto nō teie nei u’i.

86 ’A fa’aea noa na ’outou i roto i te ti’amā i fa’ati’amāhia ai ’outou na ; ’eiaha ho’i e fa’atāfifi ia ’outou iho i roto i te hara, ’ia mā noa rā tō ’outou rima, ē tae noa atu i te taime te Fatu e tae mai ai.

87 Nō te mea ’aore e rahi te mahana mai teie nei atu ā taime, e rurutaina ai te fenua nei ’e e turorirori haere mai te ta’ata ta’ero ’ava ra ; ’e e huna atu ho’i te mahana i tōna ra mata, ’e e ’ore roa e hōro’a mai i te māramarama ; ’e e fa’ahopuhia te marama i te toto ; ’e e riri roa te mau feti’a, ’e e fa’atopa atu ia rātou iho i raro, mai te suke ’o tē topa mai mai ni’a mai i te tumu suke ra.

88 ’E i muri a’e i tā ’outou parau fa’a’ite pāpū ra, e tae mai ai te riri ’ū’ana ’e te au ’ore rahi i ni’a i te ta’ata nei.

89 Nō te mea i muri a’e i tā ’outou parau fa’a’ite pāpū ra, e tae mai te parau fa’a’ite pāpū nō te ’āueuera’a fenua, ’o tē fa’atupu mai i te ’ū’urura’a i roto iāna, ’e e topa te ta’ata nei i ni’a i te fenua ’e e ’ore roa e ti’a ia rātou ’ia ti’a fa’ahou i ni’a.

90 ’E e tae ato’a mai ho’i te parau fa’a’ite pāpū nō te reo o te mau pātiri, ’e te reo o te mau uira, ’e te reo o te mau vero rahi, ’e te reo o te mau ’are miti i te ha’amā’era’a ia rātou iho i ni’a roa a’e i tō rātou ra mau ’ōti’a.

91 ’E e ’ārepurepu noa te mau mea ato’a ra ; ’e ’oia mau, e ’āhuehue te ’ā’au o te mau ta’ata ; nō te mea ē e tae mai te mata’u i ni’a i te mau ta’ata ato’a.

92 ’E e ma’ue te mau melahi nā rōpū i te reva, i te pi’ira’a ma te reo rahi, i te fa’a’otora’a i te pū a te Atua, i te nā-’ō-ra’a mai ē : ’A fa’aineine ’outou, ’a fa’aineine ’outou, ’o ’outou te mau ta’ata i ni’a i te fenua nei ; nō te mea ’ua tae mai te ha’avāra’a a tō tātou Atua. Inaha, ’e inaha, tē haere mai ra te Tāne fa’aipoipo ’āpi ; ’a haere atu na ’outou e fārerei iāna.

93 ’E i te reira taime iho e ’itea te hō’ē tāpa’o rahi i ni’a i te ra’i, ’e e ’ite ’āmui te mau ta’ata ato’a i te reira.

94 ’E e fa’a’oto te tahi atu ā melahi i tāna pū, i te nā-’ō-ra’a mai ē : ’O te reira ’ēkālesia rahi, te metua vahine nō te mau ’ohipa vi’ivi’i, ’o tē fa’ainu i te mau nūna’a ato’a i te uaina nō te riri ’ū’ana o tōna ra fa’aturi, ’o tei hāmani ’ino i te feiā mo’a o te Atua, ’o tei ha’amani’i atu i tō rātou ra toto—’o ’oia ’o tē pārahi nei i ni’a iho i te mau pape e rave rahi, ’e i ni’a iho ho’i i te mau motu o te moana ra—inaha, ’o ’oia ïa te mau zīzānia o te fenua nei ; ’ua ru’uru’uhia ’oia i roto i te mau ruru ra ; ’ua fa’a’eta’etahia tōna mau tā’amu, e ’ore roa te reira e matara i te hō’ē noa atu ta’ata ; nō reira, ’ua ineine ’oia ’ia tūtu’ihia i te auahi. ’E e fa’a’oto mai ’oia i tāna pū ’ei fa’a’otora’a maoro ’e te pūai ho’i, ’e e fa’aro’o te mau nūna’a ato’a i te reira.

95 ’E ’aita hō’ē a’e māniania i ni’a i te ra’i nō te hō’ē ’āfa hora te maoro ; ’e i muri noa iho i te reira e ha’amahorahia mai te pāruru o te ra’i, mai te parau ’ōtarohia i ha’amāhorahorahia i muri a’e i te ’ōtarora’ahia, ’e e ’īritihia atu te pāruru i mua i te mata o te Fatu ;

96 ’E te feiā mo’a i ni’a i te fenua nei, ’o tē ora noa ra, e fa’aorahia rātou ’e e fa’atahitihia atu i ni’a nō te fārerei iāna.

97 ’E ’o rātou ’o tei ta’oto i roto i tō rātou ra mau mēnema, e haere mai ïa rātou i ni’a, nō te mea e ’īritihia tō rātou ra mau mēnema ; ’e e fa’atahiti-ato’a-hia rātou i ni’a nō te fārerei iāna i rōpū i te pou nō te ra’i—

98 Nō te Mesia rātou, te mau hotu mātāmua, ’o rātou ho’i te pou mātāmua mai i pīha’i iho iāna, ’e ’o rātou ho’i ’o tei ni’a noa ā i te fenua nei ’e i roto i tō rātou ra mau mēnema, ’o tē fa’atahiti-mātāmua-hia atu i ni’a nō te fārerei iāna ; ’e ’o teie mau mea ato’a nei nā roto ïa i te reo o te ’otora’a o te pū a te melahi a te Atua.

99 ’E i muri a’e i teie, e fa’a’oto mai ai te tahi atu ā melahi i tāna pū, ’o te pitira’a ïa o te pū ; ’ei reira e tae mai ai te fa’aorara’a o te feiā o te Mesia i tōna ra taera’a mai ; ’o tei fāri’i i tā rātou tufa’a i roto i te fare tāpe’ara’a ’o tei fa’aineinehia nō rātou ra, ’ia ti’a ia rātou ’ia fāri’i i te ’evanelia, ’e ’ia ha’avāhia ho’i mai te au i te ta’ata i te tino nei.

100 ’E teie fa’ahou ā, e fa’a’otohia mai te tahi atu ā pū, ’o te toru ïa o te pū, ’e i reira e haere mai ai te mau vārua o te mau ta’ata ’o tē ha’avāhia, ’e ’ua ’itehia i raro a’e i te fa’ahapara’a ;

101 ’E ’o te toe’a teie o te feiā pohe ; ’e e ’ore roa rātou e ora fa’ahou ē tae noa atu i te taime e hope ai te tauatini matahiti, ’oia ho’i, ē tae noa atu i te hope’a o te ao nei.

102 ’E e fa’a’otohia mai te tahi atu ā pū, ’o te maha ïa o te pū, i te nā-’ō-ra’a mai ē : ’Ua ’itehia i rotopū ia rātou ’o tē fa’aea noa ē tae noa atu i te reira mahana rahi ’e te hope’a ho’i, ’o rātou ’o tē vai vi’ivi’i noa ra.

103 ’E e fa’a’otohia mai te tahi atu ā pū, ’o te pae ïa o te pū, ’o te pae ïa o te melahi ’o tē hōro’a mai i te ’evanelia mure ’ore—i te ma’uera’a nā rōpū i te reva nei, i te mau nūna’a ato’a, i te mau ’ōpū ato’a, i te mau reo ato’a, ’e i te mau ta’ata ato’a ;

104 ’E ’o teie te ’otora’a o tāna pū, i te nā-’ō-ra’a atu i te mau ta’ata ato’a, tō ni’a i te ra’i ’e tō ni’a ho’i i te fenua nei, ’e i tō raro a’e ho’i i te fenua nei—’e e fa’aro’o te mau tari’a ato’a i te reira, ’e e pi’o te mau turi ’āvae ato’a, ’e e fā’i mai te mau arero ato’a, ’a fa’aro’o ai rātou i te ’otora’a o te pū, i te nā-’ō-ra’a mai ē : ’A mata’u i te Atua, ’e ’a fa’ahanahana atu iāna ’o tē pārahi nei i ni’a i te terōno, ē a muri ē a muri noa atu ; nō te mea ’ua tae i te hora fa’autu’ara’a nāna ra.

105 ’E teie fa’ahou ā, e fa’a’oto mai te tahi atu ā melahi i tāna pū, ’o te ono ïa o te melahi, i te nā-’ō-ra’a mai ē : ’Ua ma’iri ’oia ’o tei fa’ainu i te mau nūna’a ato’a i te uaina riri ’ū’ana o tōna ra fa’aturi ; ’ua ma’iri ’oia, ’ua ma’iri !

106 ’E teie fa’ahou ā, e fa’a’oto mai te tahi atu ā melahi i tāna pū, ’o te hitu ïa o te melahi, i te nā-’ō-ra’a mai ē : ’Ua oti ; ’ua oti ! ’Ua upo’oti’a te ’Ārenio a te Atua ’e ’ua ta’ata’ahi ’oia ana’e i te nene’ira’a vine, ’oia te nene’ira’a vine nō te pūai o te riri ’ū’ana o te Atua Manahope.

107 ’E i reira te mau melahi e fa’akoronahia ai i te hanahana o tōna ra pūai, ’e e fa’a’īhia te feiā mo’a i tōna ra hanahana, ’e e fāri’i ho’i i tō rātou ra ’āi’a ’e e fa’arirohia ’ei mea ’aifāito iāna ra.

108 ’E i reira te melahi mātāmua e fa’a’oto fa’ahou ai i tāna pū i roto i te tari’a o te feiā ora ato’a, ma te fa’a’ite mai i te mau ’ohipa huna a te ta’ata nei, ’e te mau ’ohipa rarahi a te Atua i roto i te tauatini matahiti mātāmua.

109 ’E i reira te piti o te melahi e fa’a’oto mai ai i tāna pū, ma te fa’a’ite mai i te mau ’ohipa huna a te ta’ata nei, ’e te mau mana’o ’e te mau ’ōpuara’a a tō rātou ra mau ’ā’au, ’e te mau ’ohipa rarahi a te Atua i roto i te piti o te tauatini matahiti—

110 ’E nā reira noa, ē tae roa atu i te taime te hitu o te melahi e fa’a’oto mai ai i tāna pū ; ’e e ti’a mai ’oia i ni’a i te fenua ’e i ni’a i te moana, ’e e tapu mai nā roto i te i’oa nōna ’o tei pārahi i ni’a i te terōno ē, ’aore roa e taime fa’ahou ā ; ’e e ru’uru’uhia Sātane, taua ’ōphī tahito ra, ’o tei pi’ihia o te diabolo, ’e e ’ore roa ’oia e tu’uhia atu nō te ārea hō’ē tauatini matahiti.

111 ’E i muri iho e tu’uhia ’oia nō te hō’ē tau poto noa, ’ia ti’a iāna ’ia ha’aputuputu mai i tōna mau nu’u fa’ehau.

112 ’E e ha’aputuputu mai ’o Mihaela, te hitu o te melahi, ’oia te melahi rahi, i tōna mau nu’u fa’ehau, ’oia ïa te mau nu’u o te ra’i ra.

113 ’E e ha’aputuputu mai te diabolo i tōna mau nu’u fa’ehau ; ’oia te mau nu’u o hade, ’e e haere mai i ni’a nō te ’aro ia Mihaela ’e tōna mau nu’u fa’ehau.

114 ’E i reira e tupu mai ai te ’arora’a a te Atua rahi ; ’e e huri-’ē-hia atu te diabolo ’e tōna mau nu’u fa’ehau i roto i tō rātou iho vāhi, ’e ’aita roa tō rātou e mana fa’ahou i ni’a a’e i te feiā mo’a.

115 Nō te mea nā Mihaela e ’aro atu i tā rātou ra mau ’arora’a, ’e e ha’avī atu iāna ’o tē tītau ra i te terōno nōna ’o tē pārahi ra i ni’a i te terōno, ’oia te ’Ārenio.

116 ’O teie ho’i te hanahana o te Atua, ’e nō rātou ’o tei ha’amo’ahia ra ; ’e e ’ore roa rātou e ’ite fa’ahou i te pohe.

117 Nō reira, ’oia mau tē parau atu nei au ia ’outou na, e tō’u mau hoa, ’a fa’atupu i tā ’outou ’āmuira’a mo’a, mai te au i tā’u i fa’aue atu ia ’outou na.

118 ’E nō te mea ’aore i noa’a i te ta’ata ato’a te fa’aro’o, ’a ’imi itoito ’outou ’e ’a ha’api’i atu te tahi i te tahi i te mau parau nō te pa’ari ; ’oia ïa, ’a ’imi na ’outou i roto i te mau buka maita’i roa a’e i te mau parau nō te pa’ari ; ’a ’imi ho’i i te ’ite, ’oia ïa nā roto i te ha’api’i ’e nā roto ato’a i te fa’aro’o.

119 ’A fa’anahonaho na ia ’outou iho ; ’a fa’aineine i te mau mea ato’a e maita’i ai ’outou ; ’e ’a fa’ati’a i te hō’ē fare, ’oia ’ei fare nō te pure, ’ei fare nō te ha’apaera’a mā’a, ’ei fare nō te fa’aro’o, ’ei fare nō te ha’api’ira’a, ’ei fare nō te hanahana, ’ei fare nahonaho maita’i, ’ei fare ho’i nō te Atua ;

120 ’Ia nā roto i te i’oa o te Fatu tā ’outou mau tomora’a i roto ; ’ia nā roto i te i’oa o te Fatu tā ’outou mau haerera’a i rāpae ; ’ia nā roto i te i’oa o te Fatu tā ’outou mau arohara’a, ma te ’āfa’i i te rima i ni’a i Tei Teitei Roa ra.

121 Nō reira, ’a ha’apae roa ’outou i tā ’outou mau parau faufa’a ’ore, i tā ’outou ’ata paoho, i tō ’outou mau hina’aro ānāfero ato’a ra, i tō ’outou te’ote’o ato’a ’e te mana’o faufa’a ’ore ho’i, ’e i tā ’outou mau ’ohipa ’ī’ino ato’a.

122 ’A fa’ata’a na i te hō’ē ’orometua i rotopū ia ’outou na, ’e ’eiaha te pā’āto’ara’a ’ia parau i te taime hō’ē ra ; ’a tu’u rā i te hō’ē ’ia parau mai i te taime hō’ē, ’e ’ia fa’aro’o ho’i te pā’āto’ara’a i tāna ra mau parau, ’e ’ia oti te ta’ata pā’āto’a i te parau mai, ’ua māramarama ïa te pā’āto’ara’a te tahi i te tahi, ’e ’ia ’aifāito te ti’ara’a o te mau ta’ata ato’a te tahi i te tahi.

123 ’A mata na ’outou i te here te tahi i te tahi ; ’a fa’a’ore roa i te nounou ; ’a ha’api’i i te hōro’a atu te tahi i te tahi mai te au i te tītaura’a nō te ’evanelia.

124 ’Eiaha e fa’aea noa ma te ’ohipa ’ore ; ’a fa’a’ore roa i te vi’ivi’i ; ’a ha’apae roa i te fa’ahapa te tahi i te tahi ; ’a ha’apae i te ta’oto maoro a’e i tei au i te tino ; ’a haere vave atu i ni’a i tō ’outou ro’i, ’ia ’ore ’outou ’ia rohirohi ; ’a ti’a vave mai i ni’a i te po’ipo’i, ’ia fa’aitoitohia tō ’outou mau tino ’e tō ’outou mau ferurira’a.

125 ’E ’o tei hau roa a’e i te mau mea ato’a, ’a fa’a’ahu na ia ’outou iho i te ru’uru’u o te aroha, mai te ’ahu tāpo’i ra, ’o te ru’uru’u ïa nō te maita’i roa ’e te hau.

126 ’A pure tāmau noa, ’ia ’ore ’outou ’ia paruparu, ē tae noa atu i te taime au e haere mai ai. Inaha, ’e inaha, e haere ’oi’oi mai au, ’e e fāri’i ho’i ia ’outou nō’u iho nei. ’Āmene.

127 ’E teie fa’ahou ā, te huru nō te ha’apa’ora’a i te fare e fa’aineinehia nō te peresidenira’a nō te fare ha’api’ira’a a te mau peropheta ra, i fa’ati’ahia nō te ha’api’ira’a ia rātou i te mau mea ato’a e faufa’ahia ai rātou ra, ’oia nō te mau ta’ata tōro’a ato’a nō te ’ēkālesia, ’oia ho’i, ’o rātou ato’a ’o tei mā’itihia nō te ’ohipa mo’a i roto i te ’ēkālesia, ma te ha’amata i te mau tahu’a rahi ē tae roa mai i raro i te mau diakono ra—

128 ’E e riro teie te huru nō te ha’apa’ora’a i te fare o te peresidenira’a nō te fare ha’api’ira’a : ’O ’oia ’o tē fa’ata’ahia ’ei peresideni ’e ’aore rā ’ei ’orometua, e ’itehia ïa i te ti’ara’a i tōna iho vāhi, i roto i te fare ’o tē fa’aineinehia nōna ra.

129 Nō reira, ’ia riro ’oia te ta’ata mātāmua i roto i te fare nō te Atua, i te vāhi e ti’a ai i te ’āmuira’a ta’ata i roto i te fare ’ia fa’aro’o māite ma te pāpū maita’i i tāna mau parau, ’eiaha i te reo pūai ra.

130 ’E ’ia tae mai ’oia i roto i te fare o te Atua, nō te mea e mea ti’a roa ïa ’ia nā mua mai ’oia i roto i te fare—inaha, e mea nehenehe roa teie, ’ia riro ho’i ’oia ’ei hi’ora’a.

131 ’A vaiiho iāna ’ia pūpū atu iāna iho nā roto i te pure i ni’a i tōna turi ’āvae i mua i te Atua, ’ei tokene ’e ’aore rā ’ei ha’amana’ora’a nō te fafaura’a mure ’ore.

132 ’E ’ia tae mai te tahi i roto nā muri iho iāna ra, ’ia ti’a mai te ’orometua i ni’a, ma te ’āfa’i i nā rima i ni’a roa i te ra’i ra, ’oia ïa, ’ia ’āfa’i-ti’a-mau-hia i ni’a, ’a aroha atu i tōna taea’e ’e ’aore rā i tōna mau taea’e, i teie nei mau parau :

133 E taea’e ānei ’oe ’e ’aore rā e mau taea’e ānei ’outou ? Tē aroha atu nei au ia ’outou i roto i te i’oa o te Fatu ra ’o Iesu Mesia, ’ei tokene ’e ’aore rā ’ei ha’amana’ora’a nō te fafaura’a mure ’ore, i roto i te reira fafaura’a vau e fāri’i ai ia ’outou i roto i te autaea’era’a, i roto i te ’ōpuara’a pāpū, te ’āueue ’ore, ’e te taui ’ore, ’ia riro ’ei hoa ’e ’ei taea’e nō ’outou, nā roto i te aroha o te Atua i roto i te mau ru’uru’ura’a nō te here, ’ia haere atu i roto i te mau fa’auera’a ato’a a te Atua ma te hapa ’ore, ’e nā roto i te ha’amāuruurura’a, a muri ē a muri noa atu. ’Āmene.

134 ’E ’o ’oia ’o tei ’itehia ’e ’aore i au i teie arohara’a, ’aore ïa e ti’a iāna ’ia fāri’i i te vāhi i rotopū ia ’outou na ; nō te mea ’eiaha roa ’outou e fa’ati’a i tō’u nei fare ’ia ha’avi’ivi’ihia e ana.

135 ’E ’o ’oia ’o tē tomo mai i roto ra ’e ’ua ha’apa’o maita’i ho’i i mua iā’u nei, ’e e taea’e ho’i ’oia, ’e ’aore rā mai te mea e mau taea’e rātou, e aroha mai rātou i te peresideni ’e ’aore rā i te ’orometua, ma te ’āfa’i i te rima i ni’a i te ra’i, nā roto i taua iho pure ’e te fafaura’a ho’i, ’e ’aore rā nā roto i te paraura’a mai ē, ’Āmene, ’ei tokene nō te reira.

136 Inaha, ’oia mau, tē parau atu nei au ia ’outou na, e hi’ora’a teie nō ’outou nō te arohara’a atu te tahi i te tahi i roto i te fare o te Atua, i roto i te fare ha’api’ira’a a te mau peropheta.

137 ’E ’ua parauhia ’outou ’ia rave i te reira nā roto i te pure ’e te ha’amāuruurura’a ho’i, mai te au i tā te Vārua e hōro’a mai ’ia parau i roto i tā ’outou mau ’ohipa ato’a i roto i te fare o te Fatu, i roto ho’i i te fare ha’api’ira’a a te mau peropheta, ’ia riro ho’i te reira ’ei vāhi mo’a, ’ei sēkene nō te Vārua Mo’a ’e ’ei ha’amaita’ira’a nō ’outou.

138 ’E ’eiaha ’outou e fāri’i mai i te hō’ē i rotopū ia ’outou i roto i teie nei fare ha’api’ira’a maori rā e mea mā ’oia i te toto nō teie nei u’i ;

139 ’E e fāri’ihia ’oia nā roto i te ’ōro’a nō te horoira’a ’āvae ra, nō te mea ho’i nō te reira te ’ōro’a nō te horoira’a ’āvae i fa’atupuhia ai.

140 ’E teie fa’ahou ā, e fa’aterehia te ’ōro’a nō te horoira’a ’āvae e te peresideni, ’e ’aore rā e te peresibutero peresideni nō te ’ēkālesia.

141 E ha’amatahia te reira nā roto i te pure ; ’e i muri a’e i te ravera’a i te pāne ’e te uaina ra, e tātua ai ’oia iāna iho mai te au i te hōho’a i hōro’ahia mai i roto i te pene ’ahuru ma toru nō tō Ioane ’itera’a pāpū nō ni’a iā’u nei. ’Āmene.