Pāpa’ira’a mo’a
Te Ha’api’ira’a Tumu ’e te mau Fafaura’a 38


Tufa’a 38

E heheura’a tei hōro’ahia mai nā roto ia Iosepha Semita te peropheta, i Fayette, i New York, i te 2 nō Tēnuare 1831. Te tumu nō te hō’ē ïa ’āmuira’a a te ’Ēkālesia.

1–6, Nā te Mesia i hāmani i te mau mea ato’a ; 7–8, Tei rotopū ’oia i tōna feiā mo’a, ’o tē ’ite ’oi’oi atu iāna ; 9–12, E mea vi’ivi’i te mau ta’ata ato’a i mua iāna ; 13–22, ’Ua fa’ata’a ’oia i te hō’ē fenua i fafauhia nō tōna feiā mo’a i teie tau ’e nō te tau mure ’ore ; 23–27, ’Ua fa’auehia te feiā mo’a ’ia riro ’ei hō’ē ’e ’ia fa’ariro i te tahi ’e te tahi ’ei taea’e ; 28–29, ’Ua tohuhia te parau nō te mau tama’i ; 30–33, E hōro’ahia mai te mana nō ni’a mai i te feiā mo’a ’e ’ua tītauhia rātou ’ia haere atu i rotopū i te mau nūna’a ato’a ; 34–42, ’Ua fa’auehia te ’Ēkālesia ’ia ha’apa’o i te feiā veve ’e te nava’i ’ore ’e ’ia tītau i te mau tao’a rahi nō te ora mure ’ore.

1 Tē nā ’ō mai nei te Fatu ra tō ’outou Atua, ’oia ’o Iesu Mesia, Tē Vai Nei Au Rahi, ’o Alepha ’e Omega, te ha’amatara’a ’e te fa’ahope’a, ’o ’oia ïa ’o tei hi’o atu i te ’ā’anora’a o te mure ’ore, ’e i te mau nu’u melahi ho’i o te ra’i ra, hou teie nei ao i hāmanihia ai ;

2 ’O ’oia ho’i ’o tei ’ite i te mau mea ato’a ra, nō te mea tei mua i tō’u nei mata te mau mea ato’a ;

3 ’O vau ho’i ïa ’o tei parau atu, ’e ’ua hāmanihia te ao nei, ’e ’ua fa’atupuhia te mau mea ato’a nā roto iā’u nei.

4 ’O vau ho’i ïa ’o tei rave mai i te Ziona nō Enoha i roto i tō’u iho nei ’ōuma ; ’e ’oia mau tā’u e parau atu nei, ’o rātou ato’a ho’i ’o tei ti’aturi i tō’u nei i’oa, nō te mea ’o vau ho’i te Mesia, ’e i roto i tō’u iho nei i’oa, nā roto i tō’u iho nei toto tā’u i ha’amani’i, i tāparu atu ai au i te Metua nō rātou ra.

5 ’E inaha, te toe’a o te feiā parauti’a ’ore ra ’ua ru’uru’u ïa vau ia rātou i te mau fifi nō te pōiri ē tae noa atu i te ha’avāra’a i te mahana rahi ra, ’o tē tae mai i te hope’a nō teie nei ao ;

6 ’E e nā reira noa vau i te tāpe’a i te feiā parauti’a ’ore, ’o tē ’ore e fa’aro’o mai i tō’u nei reo ’e ’o tē fa’a’eta’eta i tō rātou ’ā’au, e ’ati, e ’ati, e ’ati ho’i ïa tā rātou utu’a.

7 ’E inaha, ’oia mau, ’oia mau, tē parau atu nei au ia ’outou na, ’e tei ni’a tō’u nei mata ia ’outou na. Tei rotopū vau ia ’outou na ’e ’aita ho’i ’outou e ’ite mai nei iā’u ;

8 ’Āre’a rā tē fātata mai nei te mahana e ’ite mai ai ’outou iā’u nei, ’e e ’ite ai ho’i ē tē vai nei au ; ’e ’aita e maoro e pāhaehia te pāruru nō te pōiri, e ’ore ho’i ’oia ’o tei ’ore i tāmāhia e ora i te reira mahana.

9 Nō reira, ’a tātua na i tō ’outou mau tau’upu, ’e ’ia fa’aineinehia ho’i ’outou. Inaha, nō ’outou te bāsileia, ’e e ’ore roa te ’enemi e upo’oti’a.

10 ’Oia mau tē parau atu nei au ia ’outou na, ’ua mā ’outou, ’e ’eiaha rā te tā’āto’ara’a ; ’e ’aita atu e feiā tā’u i māuruuru roa ;

11 Nō te mea e mea vi’ivi’i te mau mea tāhuti ato’a i mua iā’u nei ; ’e tē vai tāmau noa nei ā te mau mana nō te pōiri i ni’a i te ao nei, i rotopū i te mau tamari’i a te ta’ata nei, i mua i te aro o te mau nu’u ato’a nō te ra’i ra—

12 ’O tei fa’atupu i te māniania ’ore i reira, ’e ’ua ha’amāuiuihia tō te ao mure ’ore ato’a ra, ’e tē tīa’i nei te mau melahi i te fa’auera’a rahi ’ia ’ō’oti atu i tō te ao nei, ’ia ha’aputu mai i te mau zīzānia ’ia tūtu’ihia rātou i te auahi ra ; ’e, inaha, ’ua tāhō’ēhia te ’enemi.

13 ’E i teienei tē fa’a’ite atu nei au i te hō’ē parau ’aro ia ’outou na, te hō’ē mea ’o tē ravehia nei i roto i te mau piha huna ra, nō te fa’atupu i te ha’amou-roa-ra’a ia ’outou ’ia tae i te tau, ’e ’aita ho’i ’outou i ’ite i te reira ;

14 ’E i teienei tē fa’a’ite atu nei au i te reira ia ’outou na, ’e ’ua ha’amaita’ihia ’outou, ’eiaha rā nō tō ’outou parauti’a ’ore, ’eiaha ato’a nō tō ’outou mau ’ā’au ti’aturi ’ore ; nō te mea ’oia mau, ’ua hape te tahi pae o ’outou i mua iā’u nei ; terā rā, e aroha atu ho’i au i tō ’outou huru paruparu.

15 Nō reira, ’a fa’aitoito ’outou mai teie taime atu ā ; ’eiaha e mata’u, nō ’outou ho’i te bāsileia.

16 ’E nō te fa’aorara’a ia ’outou, tē hōro’a atu nei au i te hō’ē fa’auera’a, nō te mea ’ua fa’aro’o vau i tā ’outou ra mau pure, ’e ’ua amuamu mai te feiā veve i mua iā’u nei, ’e nā’u ho’i te feiā tao’a i hāmani, ’e nō’u nei ho’i te mau ta’ata ato’a, ’e ’aita ho’i au e ha’apa’o i te huru o te ta’ata.

17 ’E ’ua fa’ariro vau i te ao nei ’ei mea tao’a rahi, ’e inaha ’o tō’u ïa ta’ahira’a ’āvae ; nō reira, e ti’afa’ahou ā vau i ni’a iho i te reira.

18 ’E tē fa’atere noa nei ā vau, ’e tē hina’aro nei ho’i i te hōro’a atu ia ’outou i te tao’a rahi a’e, ’oia te hō’ē fenua i fafauhia ra, te hō’ē fenua tei reira te ū ’e te meli i te tahe-noa-ra’a, ’e i ni’a iho i te reira e ’ore roa e ’itehia te ’anatema ’ia tae mai te Fatu ;

19 ’E e hōro’a atu vau i te reira ia ’outou ’ei fenua ’āi’a nō ’outou, mai te mea e tītau ’outou i te reira ma tō ’outou ’ā’au ato’a.

20 ’E teie tā’u fafaura’a ia ’outou na, e fāri’i ’outou i te reira ’ei fenua ’āi’a nō ’outou, ’e ’ei ’āi’a ho’i nō tā ’outou mau tamari’i ē a muri noa atu, ’a vai noa ai te fenua nei, ’e e fāri’i fa’ahou ’outou i te reira i te ao mure ’ore, ’e e ’ore roa e mou fa’ahou.

21 ’Ē, ’oia mau tē parau atu nei au ia ’outou na, ’eiaha roa ’outou e rave i te hō’ē ari’i ’eiaha ato’a i te ta’ata fa’atere hau, nō te mea e riro vau ’ei ari’i nō ’outou ’e e tīa’i māite ho’i au ia ’outou.

22 Nō reira, ’a fa’aro’o mai i tō’u nei reo ’e ’a pe’e mai iā’u nei, ’e e riro ’outou ’ei feiā ti’amā, ’e ’eiaha roa ’outou e fa’atupu noa i te mau ture maori rā i tā’u nei mau ture ’ia tae mai au ra, nō te mea ’o vau tō ’outou hōro’a ture, ’e e aha tē ti’a ’ia tāpe’a atu i tō’u nei rima ?

23 ’Oia mau tē parau atu nei rā vau ia ’outou na, ’a ha’api’i atu te tahi i te tahi mai te au i te tōro’a tā’u i fa’ata’a nō ’outou na ;

24 ’E ’ia fa’atura atu te ta’ata tāta’itahi ato’a i tōna ra taea’e mai iāna iho, ’e ’ia tāmau noa i te vi’ivi’i ’ore ’e te mea mo’a i mua iā’u nei.

25 ’E tē parau fa’ahou atu nei au ia ’outou na, ’ia fa’atura atu te ta’ata tāta’itahi ato’a i tōna taea’e mai iāna iho ra.

26 ’O vai ho’i te ta’ata i rotopū ia ’outou na, hō’ē ’ahuru ma piti tāna tamari’i tamāroa, ’e ’aita ho’i ’oia i ha’apa’o i tō rātou ra huru, ’e e tāvini noa rātou iāna ma te ha’apa’o maita’i, ’e tē parau atu ra ’oia i te hō’ē ra : ’Ia fa’a’ahuhia ’oe i te ’ahu maitata’i ’e ’a pārahi i’ō nei ; ’e i te tahi ra : ’Ia fa’a’ahuhia ’oe i te ’ahu motumotu ’e ’a pārahi ’oe i’ō a’e—’e e hi’o atu i ni’a iho i tāna ra mau tamari’i tamāroa ’e ’a parau atu ai ē, e ta’ata parauti’a vau ?

27 Inaha, ’ua hōro’a atu vau i teie nei mea ’ei parabole, ’e mai te reira ato’a vau. Tē parau atu nei au ia ’outou, ’ia tāhō’ē ; ’e mai te mea ’aita ’outou e riro ’ei hō’ē ra, e ’ere ïa ’outou nā’u nei.

28 ’E teie fa’ahou ā, tē parau atu nei au ia ’outou na ē, tē ’imi nei te ’enemi i roto i te mau piha huna ’ia ha’apohe ia ’outou.

29 E fa’aro’o ’outou i te parau nō te mau tama’i i te mau fenua ātea ra, ’e e parau ’outou ē e tupu vave te mau tama’i rarahi i te mau fenua ātea ra, ’aita rā ’outou i ’ite i te ’ā’au o te mau ta’ata i tō ’outou iho na fenua.

30 Tē fa’a’ite atu nei au i teie mau mea ia ’outou nō tā ’outou mau pure ; nō reira, ’a ha’aputu mai na i te pa’ari i roto i tō ’outou ’ōuma, ’oi fa’a’ite mai te parauti’a ’ore o te ta’ata nei i teie mau mea nā roto i tō rātou ra parauti’a ’ore, nā roto i te hō’ē huru ’o tē parau atu i roto i tō ’outou tari’a mai te hō’ē reo pūai a’e i te reira ’o tē fa’a’āueue roa i te fenua ; mai te mea rā ’ua vai ineine noa ’outou, ’aita ïa ’outou e mata’u.

31 ’E ’ia ora mai ’outou i te mana o te ’enemi, ’e ’ia ha’aputuputuhia mai ho’i iā’u nei ’ei feiā parauti’a, ma te pōra’o ’ore ’e te hapa ’ore ho’i—

32 Nō reira, ’o teie te tumu vau i hōro’a atu ai i te fa’auera’a ’ia haere atu ’outou i Ohio ; ’e i reira vau e hōro’a atu ai i tā’u nei ture ia ’outou ; ’e i reira ho’i e noa’a ai ia ’outou te mana nō ni’a mai ra ;

33 ’E mai reira atu, ’o rātou ato’a tā’u i hina’aro ra e haere atu ïa rātou i rotopū i te mau nūna’a ato’a ra, ’e e fa’a’itehia atu ho’i ia rātou i tā rātou e rave ; nō te mea e ’ohipa rahi tā’u e ’ōpua nei, nō te mea e fa’aorahia ’Īserā’ela, ’e e arata’i atu vau ia rātou i te mau vāhi ato’a tā’u i hina’aro, ’e ’aita roa e mana e ti’a ’ia tāpe’a i tō’u nei rima.

34 ’E i teienei, tē hōro’a atu nei au i te hō’ē fa’auera’a i tō te ’ēkālesia i teie nei mau vāhi, ’oia ho’i, ’ia fa’ata’ahia te tahi mau ta’ata i rotopū ia rātou, ’e ’ia fa’ata’ahia rātou nā roto i te reo o tō te ’ēkālesia ra ;

35 ’E e ha’apa’o atu ho’i rātou i te feiā veve ’e te nava’i ’ore, ’e e tauturu ia rātou ’ia ’ore rātou ’ia vai noa i roto i te ’ati ; ’e e tono atu ho’i ia rātou i te vāhi tā’u i fa’aue ia rātou ra ;

36 ’E ’o teie tā rātou ra ’ohipa, ’ia fa’atere i te mau ’ohipa nō te faufa’a a teie ’ēkālesia.

37 ’E ’o rātou ato’a e fa’a’apu tā rātou ’o tē ’ore e ti’a ’ia ho’ohia atu, ’ia vaiihohia ïa ’e ’aore rā ’ia tārahuhia atu mai te au i tō rātou ra hina’aro.

38 ’A mata na ’ia fa’ahereherehia te mau mea ato’a ; ’e ’ia noa’a i te ta’ata te mana nō ni’a mai ra ’e ’ia tonohia atu ho’i, e mea ti’a ’ia ha’aputuputuhia mai teie nei mau mea i te ’ōuma nō te ’ēkālesia.

39 ’E mai te mea e tītau ’outou i te mau tao’a rahi ’o tā te Metua i hina’aro i te hōro’a atu ia ’outou na, e riro ïa ’outou ’ei feiā tao’a rahi a’e i te mau ta’ata ato’a, nō te mea e noa’a ia ’outou te mau tao’a nō te tau mure ’ore ; ’e nā’u te mau tao’a rahi o te ao nei e hōro’a atu ; terā rā, ’a ara na i te te’ote’o, ’o te riro ’outou mai te mau ’āti Nephi i tahito ra.

40 ’E teie fa’ahou ā, tē parau atu nei au ia ’outou na, ’e tē hōro’a atu nei au i te hō’ē fa’auera’a ia ’outou, ’ia haere te mau ta’ata ato’a, te peresibutero, te tahu’a, te ha’api’i, ’e te melo ato’a ho’i, ma tōna pūai ato’a, nā roto i te ’ohipa a tōna ra rima, ’ia fa’aineine ’e ’ia fa’aoti ho’i i te mau mea tā’u i fa’aue atu.

41 ’E ’ia riro tā ’outou a’ora’a ’ei reo fa’aarara’a, te ta’ata ato’a i tōna ra ta’ata tupu, nā roto i te hau ’e te marū.

42 ’E ’a haere ’ē atu ’outou mai rotopū atu i te feiā parauti’a ’ore. ’A fa’aora ia ’outou iho. ’Ia mā ’outou ’o tē amo i te mau fāri’i a te Fatu ra. ’Oia ïa. ’Āmene.