Pāpa’ira’a mo’a
Te Ha’api’ira’a Tumu ’e te mau Fafaura’a 108


Tufa’a 108

E heheura’a tei hōro’ahia mai nā roto ia Iosepha Semita te peropheta, i Kirtland, i Ohio, i te 26 nō Tītema 1835. ’Ua fāri’ihia teie tufa’a nā roto i te anira’a a Lyman Sherman, ’o tei fa’atōro’ahia i te mātāmua ’ei hitu ’ahuru ’e ’o tei haere mai e fārerei i te peropheta nō te ani i te hō’ē heheura’a nō ni’a i tāna ’ohipa.

1–3, ’Ua fa’a’orehia tā Lyman Sherman mau hara ; 4–5, ’Ua tai’ohia ’oia i rotopū i te mau peresibutero fa’atere o te ’Ēkālesia ; 6–8, ’Ua pi’ihia ’oia nō te poro i te ’evanelia ’e nō te ha’apūai i tōna mau taea’e.

1 ’Oia mau, tē nā ’ō mai nei te Fatu ia ’oe, e tō’u tāvini e Lyman : ’Ua fa’a’orehia tā ’oe mau hara, nō te mea ’ua ha’apa’o ’oe i tō’u nei reo nā roto i te haerera’a mai i teie nei vāhi i teie po’ipo’i nō te fāri’i i te a’ora’a nō ’ō iāna ’o tā’u i fa’ata’a.

2 Nō reira, ’ia vai te hau i roto i tō ’oe ’ā’au nō ni’a i tō ’oe ti’ara’a i te pae vārua, ’e ’eiaha e pāto’i fa’ahou i tō’u nei reo.

3 ’E ’a ti’a mai i ni’a ’e ’a mata na i te ha’apa’o maita’i i te mau tapura’a, tā ’oe i tapu na ’e tā ’oe ho’i e tapu, ’e e ha’amaita’ihia ’oe i te mau ha’amaita’ira’a rahi roa.

4 ’A tīa’i ma te fa’a’oroma’i ē tae noa atu i te taime e fa’atupuhia ai te ’āmuira’a mo’a e tō’u mau tāvini, ’ei reira ’oe e ha’amana’ohia ai i pīha’i iho i te mau peresibutero mātāmua o tō’u mau peresibutero, ’e e fāri’i i te ti’ara’a nā roto i te fa’atōro’ara’a i pīha’i iho i te toe’a o tā’u mau peresibutero tā’u i mā’iti.

5 Inaha, ’o teie ho’i te fafaura’a a te Metua ia ’oe na mai te mea e ha’apa’o maita’i noa ’oe.

6 ’E e fa’atupuhia ïa i ni’a ia ’oe i te mahana e noa’a ai ia ’oe te ti’ara’a ’ia a’o i tā’u ’evanelia i te mau vāhi ato’a tā’u e tono atu ia ’oe na, mai te reira taime atu ā.

7 Nō reira, ’a fa’aitoito i tō ’oe mau taea’e i roto i tā ’oe mau paraparaura’a ato’a, i roto i tā ’oe mau pure ato’a, i roto i tā ’oe mau a’ora’a ato’a, ’e i roto i te mau mea ato’a tā ’oe e rave.

8 ’E inaha, ’e ’a hi’o na, tei pīha’i iho vau ia ’oe nō te ha’amaita’i ia ’oe ’e nō te fa’aora mai ia ’oe ē a muri noa atu. ’Āmene.