1 Tē ti’aturi nei mātou ē ’ua fa’ati’ahia te mau hau fenua e te Atua nō te maita’i o te ta’ata nei, ’e e fa’autu’a ’oia i te ta’ata nei nō tā rātou mau ’ohipa i roto i taua mau hau fenua ra, i te ha’amaura’a i te mau ture, ’e te fa’aterera’a i te reira, nō te maita’i ’e nō te pāruru i te mau ta’ata ato’a o te fenua.

2 Tē ti’aturi nei mātou ē e’ita roa e ti’a i te hō’ē hau fenua ’ia vai noa i roto i te hau, maori rā ’ua fa’atupuhia ’e ’ua ha’apa’o-mau-hia ho’i te mau ture ’o tē ha’apāpū i te ta’ata tāta’itahi i te ti’amāra’a ’ia rave i te mau mea ti’a tāna i hina’aro, te ti’ara’a ho’i ’ia tāpe’a ’e ’ia fa’atere i te faufa’a, ’e te pārurura’a i te ora.

3 Tē ti’aturi nei mātou ē e mea ti’a ïa ’ia tītauhia i roto i te mau hau fenua ato’a te mau ta’ata tōro’a ’e te mau ha’avā nō te ha’amana i te mau ture nō taua mau hau fenua ra ; ’e e mea ti’a ho’i ’ia ’imihia te ta’ata ’o tē fa’atere i te ture ma te fāito ti’a ’e te parauti’a ’e ’ia pāturuhia ho’i taua huru ta’ata nā roto i te hina’aro ’āmui o te mau ta’ata mai te mea e hau rēpūpirīta ïa, ’e ’aore rā nā roto i te hina’aro o te ari’i.

4 Tē ti’aturi nei mātou ē ’ua fa’atupuhia te ha’apa’ora’a fa’aro’o e te Atua ; ’e e ha’avāhia te ta’ata nei e ana, ’e e ana ana’e iho, mai te au i tō rātou ha’apa’ora’a i te reira, maori rā nā roto i tō rātou mau ferurira’a i te pae fa’aro’o e tāfifi ai rātou i te ti’ara’a ’e te ti’amāra’a o vetahi ’ē ra ; terā rā ’aita mātou i ti’aturi ē e ti’ara’a tō te ture a te ta’ata nei ’ia tāfifi i te mana’o o te ta’ata nā roto i te fa’atupura’a i te mau ture nō te ha’amorira’a, ’e ’ia fa’ata’a i te huru o te ha’amorira’a, i te vāhi ta’ata ’e i te vāhi ta’ata ’ore ato’a ho’i ; ’ia fa’a’ore te ha’avāra’a tīvira i te hara, ’eiaha roa rā e fa’atere i te mana’o o te ta’ata nei ; ’ia fa’autu’a atu i te hara, ’eiaha roa rā ’ia tāpe’a atu i te ti’amāra’a o te ta’ata nei.

5 Tē ti’aturi nei mātou ē e mea ti’a i te mau ta’ata ato’a ’ia pāturu ’e ’ia tauturu i te mau hau fenua tei reira rātou i te pārahira’a, ’a pāruruhia ai rātou i roto i tō rātou mau ti’ara’a ’e te mau ture tumu nō taua mau hau fenua ra ; ’e e ’ere i te mea ti’a i te mau ta’ata ato’a i pāruruhia e taua mau hau fenua ra ’ia ti’arepu ’e ’ia ’ōrurehau, ’e e mea ti’a ’ia fa’autu’ahia rātou nō te reira ; ’e e ti’ara’a tō te mau hau fenua ato’a ’ia ha’amana i te mau ture ’o tei mana’ohia ē e ha’amaita’i te reira i te mau ta’ata ato’a ; terā rā, i taua ato’a ra taime, ’ia fa’ariro i te ti’amāra’a o te mana’o ’ei mea mo’a.

6 Tē ti’aturi nei mātou ē e mea ti’a i te ta’ata tāta’itahi ’ia fa’aturahia i roto i tōna ti’ara’a, ’e ’ia nā reira-ato’a-hia te mau fa’atere hau ’e te mau ha’avā, nō te mea ’ua mā’itihia rātou nō te pāruru i te feiā hara ’ore ’e nō te fa’autu’a i te feiā rave hara ; ’e ’ia fa’atura ’e ’ia auraro te mau ta’ata ato’a i te mau ture ma te ha’apa’o i te reira, nō te mea ’ia ’ore te ture, e monohia mai te hau ’e te marū, i te ’ōrurehau ’e te ri’ari’a ; ’ua ha’amauhia ho’i te mau ture a te ta’ata nei nō te fa’atere i te mau mea e maita’i ai te mau ta’ata tāta’itahi ’e te mau nūna’a, i rōpū i te ta’ata ’e te ta’ata ; ’e ’ua ha’amauhia te mau ture mo’a i hōro’ahia mai mai te ra’i mai, nō te fa’ata’a i te mau ture nō ni’a i te mau mea nō te pae vārua, nō te fa’aro’o ’e te ha’amorira’a, ’e ’ia ha’avāhia te ta’ata e Tei Hamani iāna mai te au i tōna ha’apa’ora’a i nā ture to’opiti.

7 Tē ti’aturi nei mātou ē e ti’ara’a tō te mau fa’atere hau, te mau tufa’a fenua, ’e te mau hau fenua ’ia ha’amana i te mau ture nō te pāruru i te mau ta’ata ato’a o te fenua i roto i tō rātou ti’amāra’a nō te fa’a’ohipa i tō rātou ti’aturira’a pae fa’aro’o ; ’aita rā mātou e ti’aturi nei ē e ti’ara’a tō rātou i roto i te parauti’a ’ia fa’a’ore i taua ti’ara’a ra i te mau ta’ata, ’e ’aore rā ’ia ’ōpani ia rātou ’ia fa’a’ite i tō rātou mau mana’o, ’a ha’apa’o-noa-hia ai ’e ’a fa’atura-noa-hia ai te mau ture, ’e ’ia ’ore taua mau mana’o nō te pae fa’aro’o i fa’a’itehia ’ia fa’atupu i te ’ōrurehau ’e te pāto’ira’a i te mana o te ture.

8 Tē ti’aturi nei mātou ē e mea ti’a i te feiā i ’ōfati i te ture ’ia fa’autu’ahia mai te au i te huru o te hape i ravehia ; ’e e mea ti’a ho’i i te ’ohipa taparahi ta’ata, te ’ōrurehau, te ’eiā, te ’eiā haru, ’e te ha’ape’ape’ara’a i te fa’aeara’a hau o te mau ta’ata, noa atu te huru, ’ia fa’autu’ahia mai te au i te rahira’a o te ’ino ’e te pinepine o tō rātou ravera’a i te ’ino i rotopū i te ta’ata ; ’e nō te hau ’e nō te mana’o hau marū o te ta’ata nei, e mea ti’a ïa i te ta’ata ’ia ti’a mai i mua ’e ’ia fa’a’ohipa i tō rātou itoito nō te horo i te feiā tei fa’ahapa i te mau ture maita’i, ’ia fa’autu’ahia.

9 ’Aita mātou e ti’aturi nei ē e mea ti’a ’ia ’āmui i te mana nō te ha’apa’ora’a fa’aro’o i tō te hau fenua, nā roto i te reira e pāturuhia ai te hō’ē ha’apa’ora’a fa’aro’o, ’e e ’ōpanihia ai te tahi i te ravera’a i te mau ’ohipa pae vārua, ’e e pāto’ihia ai te ti’ara’a o te mau ta’ata tāta’itahi, i roto i tō rātou ti’ara’a melo nō taua hau fenua ra.

10 Tē ti’aturi nei mātou ē e ti’ara’a tō te mau sōtaiete fa’aro’o ato’a ’ia ha’avā i tō rātou mau melo ha’apa’o ’ore mai te au i te mau ture ’e te mau fa’ata’ara’a nō te reira huru sōtaiete ; mai te mea ’ua ha’apa’ohia taua huru ha’avāra’a ra nō ni’a i te autaea’era’a ’e te ti’ara’a maita’i ; ’aita rā mātou e ti’aturi nei ē e mana tō te hō’ē noa atu sōtaiete nō te pae ha’apa’ora’a ’ia ha’avā i te ta’ata nei nō ni’a i te tao’a ’e te orara’a, ’ia rave ’ē atu mai ia rātou te mau faufa’a o teie nei ao ’e ’aore rā ’ia fa’atapitapi ia rātou nō ni’a i te orara’a ’e te tino, ’e ’aore rā ’ia fa’autu’a ia rātou i te utu’a i ni’a i te tino. E ti’ara’a ana’e tō taua mau sōtaiete ra ’ia huri atu i te ta’ata i rāpae i tā rātou sōtaiete, ’e ’ia fa’a’ore i tō rātou autaea’era’a.

11 Tē ti’aturi nei mātou ē e mea ti’a i te ta’ata nei ’ia tītau atu i te ture o te hau fenua nō te fa’a’āfaro i te mau hape ’e te mau pe’ape’a, mai te mea ’ua hāmani-’ino-hia e te ta’ata, ’e ’aore rā ’ua ha’ape’ape’ahia tō rātou ti’ara’a ’ia mau i te faufa’a, ’e ’aore rā ’ua fa’a’inohia rātou, mai te mea tē vai nei te ture nō te pārurura’a ia rātou ; terā rā tē ti’aturi ato’a nei mātou ē e mea ti’a i te mau ta’ata ato’a ’ia pāruru ia rātou iho, i tō rātou mau hoa, i tā rātou faufa’a, ’e i te hau fenua ho’i, i te mau hāmani-’ino-ra’a ’e te mau ha’ape’ape’ara’a a te mau ta’ata ato’a ’o tei ’ore i au i te ture, i te mau taime ’ati, i te taime ’aore e rāve’a ’ia tītau ’oi’oi atu i te ture, nō te fāri’i i te tauturura’a.

12 Tē ti’aturi nei mātou ē e mea tano ’ia poro haere i te ’evanelia i te mau nūna’a o te fenua nei, ’e ’ia fa’aara atu i te feiā parauti’a ’ia fa’aora mai ia rātou iho i te mau mea vi’ivi’i o te ao nei ; terā rā ’aita mātou e ti’aturi nei ē e mea tano ’ia ha’ape’ape’a atu i te mau tāvini e vai nei i roto i te tītīra’a, ’eiaha ho’i ’ia a’o atu i te ’evanelia ia rātou, ’eiaha ato’a ’ia bāpetizo ia rātou mai te mea e mea au ’ore te reira i te hina’aro ’e te ti’aturira’a o tō rātou mau fatu, ’eiaha ato’a ho’i ’ia ha’ape’ape’a ’e ’aore rā ’ia fa’ahepo ia rātou i te hō’ē vāhi iti a’e nō te fa’atupu i tō rātou au ’ore i tō rātou ti’ara’a i roto i teie orara’a nei, nā roto i te reira e fifi ai te ora o te mau ta’ata ; tē ti’aturi nei mātou ē e mea au ’ore i te ture te reira huru ha’ape’ape’ara’a ’e e mea parauti’a ’ore, ’e e mea pe’ape’a rahi i te hau o te mau hau fenua ato’a ’o tei fa’ati’a i te ta’ata ’ia tāpe’ahia i roto i te tītīra’a.