Pāpa’ira’a mo’a
Te Ha’api’ira’a Tumu ’e te mau Fafaura’a 70


Tufa’a 70

E heheura’a tei hōro’ahia mai nā roto ia Iosepha Semita te peropheta, i Hiram, i Ohio, i te 12 nō Novema 1831. Tē fa’ati’a ra te ’ā’amu nō te peropheta ē, ’ua fa’atupuhia e maha ’āmuira’a rahi ta’a ’ē, mai te mahana mātāmua ē tae noa atu i te 12 nō Novema. I roto i te putuputura’a hope’a, ’ua hi’o-māite-hia te faufa’a rahi nō te mau heheura’a tei ha’apararehia i muri iho i raro a’e i te i’oa, te Book of Commandments (Buka nō te mau fa’auera’a), ’e i muri iho, te Ha’api’ira’a Tumu ’e te mau Fafaura’a. ’Ua hōro’ahia mai teie heheura’a i muri mai i tō te ’āmuira’a mā’itira’a ē, ’ua riro teie mau heheura’a « ’ei mea hau roa atu i te faufa’a nō te ’Ēkālesia i te mau tao’a o te ao tā’āto’a nei ». I roto i te ’ā’amu nō Iosepha Semita, tē parauhia ra teie mau heheura’a mai « te niu ïa nō te ’Ēkālesia i teie mau mahana hope’a nei, ’e ’ei maita’i nō te ao nei, ’o tē hōro’ahia mai nei ē, ’ua hōro’ahia-fa’ahou-hia mai te mau tāviri nō te mau parau ’aro nō te bāsileia o tō tātou Fa’aora, i te ta’ata nei ».

1–5, ’Ua fa’ata’ahia te mau ti’a’au nō te nene’i i te mau heheura’a ; 6–13, Te feiā ’o tē ha’a i roto i te mau mea pae vārua ra ’ua au ho’i ïa tā rātou utu’a ; 14–18, ’Ia ’aifāito te feiā mo’a i roto i te mau mea pae tino.

1 Inaha, ’a ha’apa’o mai na ’o ’outou e te mau ta’ata ’o tē pārahi nei i Ziona, ’e ’o ’outou ho’i e te mau ta’ata ato’a nō tā’u nei ’ēkālesia ’o tei te ātea ’ē ra, ’e ’a fa’aro’o i te parau a te Fatu tā’u e hōro’a atu nei i tō’u tāvini nei ia Iosepha Semita, tamaiti, ’e i tō’u tāvini ia Martin Harris ato’a, ’e i tō’u tāvini ra ia Oliver Cowdery ato’a, ’e i tō’u tāvini ra ia John Whitmer ato’a, ’e i tō’u tāvini ra ia William W. Phelps ato’a, nā roto i te fa’auera’a ia rātou ra.

2 Tē hōro’a atu nei ho’i au i te fa’auera’a ia rātou ra ; nō reira, ’a ha’apa’o mai na ’e ’a fa’aro’o mai ho’i, nō te mea tē nā ’ō mai ra te Fatu ia rātou ra—

3 ’Ua fa’ata’a vau, ’o te Fatu, ia rātou, ’e ’ua fa’atōro’a ho’i ia rātou ’ia riro ’ei mau ti’a’au i ni’a i te mau heheura’a ’e te mau fa’auera’a ho’i tā’u i hōro’a atu ia rātou ra, ’e ’o tā’u ho’i e hōro’a atu ia rātou a muri atu ;

4 ’E e tītau vau ’ia hōro’a mai rātou i te tuatāpapara’a nō teie nei ti’a’aura’a i te mahana ha’avāra’a ra.

5 Nō reira, ’ua fa’ata’a vau ia rātou, ’e ’o teie ho’i tā rātou ’ohipa i roto i te ’ēkālesia a te Atua, ’ia ha’apa’o i taua mau mea ra ’e te mau ’ohipa ho’i nō te reira, ’oia ïa, te mau maita’i nō te reira.

6 Nō reira, e fa’auera’a tā’u e hōro’a atu nei ia rātou, ’eiaha rātou e hōro’a atu i teie nei mau mea i te ’ēkālesia, ’eiaha ato’a i tō te ao nei ;

7 Noa atu rā, mai te mea e hau a’e tā rātou e fāri’i i tei tītauhia nō tō rātou orara’a, e hōro’ahia atu te reira i roto i tō’u fare vaira’a tao’a ;

8 ’E e ha’amo’ahia te mau faufa’a ’āpī nō tō Ziona, ’e nō tō rātou ra mau u’i, mai te mea e riro rātou ’ei fatu ’āi’a mai te au i te mau ture nō te bāsileia.

9 Inaha, ’o teie ho’i tā te Fatu e tītau nei i te ta’ata tāta’itahi i roto i tōna ra ti’a’aura’a, mai te au ho’i i tā’u, tā te Fatu, i fa’ata’a na ’e ’aore rā e fa’ata’a a muri atu nō te hō’ē noa atu ta’ata.

10 ’E inaha, ’aore roa te hō’ē ta’ata ’o tei riro ’ei melo nō te ’ēkālesia a te Atua ora e fa’a’erehia i teie nei ture ;

11 ’Oia ïa, ’eiaha te ’episekōpo, ’eiaha ato’a te ta’ata ha’apa’o ’o tē ha’apa’o i tō te Fatu fare vaira’a tao’a, ’eiaha ato’a ho’i ’o ’oia ’o tei fa’ata’ahia nō te hō’ē ti’a’aura’a i ni’a i te mau mea o te pae tino nei.

12 ’O ’oia ’o tei fa’ata’ahia atu ’ia ha’apa’o i te mau mea nō te pae vārua ra, ’ua au ho’i ïa tāna ra utu’a mai ia rātou ato’a ho’i ’o tei fa’ata’ahia i te ti’a’aura’a ’ia ha’apa’o i te mau mea nō te pae tino nei ;

13 ’Oia ïa, ’ia rahi atu ā, ’e ’o te reira rahira’a ’ua fa’arahihia ïa ia rātou nā roto i te mau fa’a’itera’a a te Vārua.

14 Noa atu rā i te reira, e ’aifāito ’outou i roto i te mau mea nō te pae tino nei, ’e ’eiaha ’ia nā-reira-hia nā roto i te ’ā’au mi’imi’i, ’o te tāpe’ahia atu te mau fa’a’itera’a a te Vārua.

15 I teienei, tē hōro’a atu nei au i teie fa’auera’a i tō’u mau tāvini, ’ei maita’i nō rātou, ’a pārahi noa ai rātou, ’ei fa’a’itera’a nō tā’u mau ha’amaita’ira’a i ni’a i tō rātou ra mau upo’o, ’e ’ei utu’a maita’i nō tō rātou itoito ’e nō tō rātou ora-maita’i-ra’a ;

16 Nō te mā’a ’e nō te ’ā’ahu ; nō te ’āi’a ; nō te mau fare ’e nō te mau fenua ho’i, i roto i te mau huru ti’ara’a tā’u, tā te Fatu, e tu’u ia rātou ra, ’e i te mau vāhi ho’i tā’u, tā te Fatu, e tono atu ia rātou ra.

17 ’Ua ha’apa’o maita’i ho’i rātou i te mau mea e rave rahi, ’e ’ua rave maita’i ho’i rātou ’e ’aore rātou i rave i te hara.

18 Inaha, e aroha tō’u, tō te Fatu, ’e e ha’amaita’i au ia rātou, ’e e ō rātou i roto i te ’oa’oa o teie mau mea nei. ’Oia mau ïa. ’Āmene.