Tufa’a 12
E heheura’a tei hōro’ahia mai nā roto ia Iosepha Semita te peropheta, ia Joseph Knight, metua, i Harmony, i Pennsylvania, i te ’āva’e nō Mē 1829. ’Ua ti’aturi o Joseph Knight i te mau parau fa’a’ite a Iosepha Semita nō ni’a i te mau ’api nō te Buka a Moromona i roto i tōna rima, ’e nō te ’ohipa ’īritira’a parau ’o tē ravehia ra, ’e ’ua hōro’a ho’i ’oia i te tahi mau tauturura’a ia Iosepha Semita ’e i tōna pāpa’i parau ato’a ho’i, ’e nā roto i te reira ’ua ti’a ia rāua ’ia tāmau noa i te ’ohipa ’īritira’a parau. Nā roto i te anira’a a Joseph Knight, ’ua ani atu te peropheta i te Fatu ’e ’ua fāri’ihia mai teie heheura’a.
1–6, E fāri’i te feiā rave ’ohipa i roto i te ’ō vine i te fa’aorara’a ; 7–9, ’O rātou ato’a ’o tei hina’aro ’e ’o tei tano maita’i e nehenehe ia rātou ’ia tauturu i te ’ohipa a te Fatu.
1 Tē fātata mai nei te hō’ē ’ohipa rahi ’e te mea māere ho’i i te tupu mai i rotopū i te tamari’i a te ta’ata nei.
2 Inaha, ’o vau te Atua ; ’a ha’apa’o na i tā’u nei parau, e mea ora ’e te pūai ho’i, e mea ’oi a’e i te ’o’e mata piti, i te fa’ata’a-’ē-ra’a i te mau pona ivi ’e te puo ho’i ; nō reira, ’a ha’apa’o na i tā’u nei parau.
3 Inaha, ’ua teatea te ’āua ’e ’ua ineine roa nō te tau ’auhune ; nō reira, ’o tē hina’aro i te ’ō’oti ra, e māo’a ïa ’oia i tāna mauha’a ’ō’oti ma tōna pūai, ’e ’a ’ō’oti ai ’oi vai a’e te ao, ’ia ti’a iāna ’ia fāri’i mai i te fa’aorara’a mure ’ore nō tōna vārua i roto i te bāsileia o te Atua.
4 ’Oia ïa, ’o tē māo’a i tāna mauha’a ’ō’oti ’e ’a ’ō’oti ai, ’ua mā’itihia mai ïa ’oia e te Atua.
5 Nō reira, mai te mea e ani mai ’oe iā’u nei, e fāri’i ïa ’oe ; mai te mea e pātōtō mai ’oe, e ’īritihia atu ïa ia ’oe.
6 I teienei, nō te mea ’ua ani mai ’oe, inaha, tē parau atu nei au ia ’oe, ’a ha’apa’o i tā’u mau fa’auera’a, ’e ’a ’imi i te mau rāve’a nō te fa’atupu ’e nō te ha’amau i te parau tumu nō Ziona.
7 Inaha, tē parau atu nei au ia ’oe, ’e ’ia rātou ato’a ho’i ’o tei hina’aro ’ia fa’atupu ’e ’ia ha’amau i teie nei ’ohipa ;
8 ’E ’aita e ti’a i te hō’ē ta’ata ’ia tauturu i teie nei ’ohipa maori rā ’ia ha’eha’a ’oia ’e ’ia ’ī roa ho’i i te here, ’ia vai iāna te fa’aro’o, te ti’aturi, ’e te aroha, ma te hitahita ’ore i te mau mea ato’a, noa atu i te mea e tu’u-ti’aturi-hia iāna ra.
9 Inaha, ’o vau nei te māramarama ’e te ora o te ao nei, ’o tē parau atu nei i teie nei mau parau, nō reira, ’a ha’apa’o mai na ma tō pūai, ’ei reira ïa ’oe e pi’ihia ai. ’Āmene.