Tufa’a 129
Te mau arata’ira’a i hōro’ahia mai e Iosepha Semita te peropheta, i Nauvoo, i Illinois, i te 9 nō Fepuare 1843, ma te fa’a’ite mai i nā tāviri rahi e toru ra nā roto i te reira e ’itehia ai te huru mau nō te mau melahi utuutu ’e te mau vārua utuutu.
1–3, Tē vai nei te mau tino i ti’afa’ahou mai ’e te mau tino vārua i te ao ra ; 4–9, ’Ua hōro’ahia mai te mau tāviri nā roto i te reira e nehenehe ai ’ia fa’ata’a ’ē i te huru o te mau ve’a nō te tahi pae mai o te pāruru.
1 Tē vai nei e piti huru ta’ata i te ao ra, ’oia ho’i : Te mau melahi, e mau ta’ata teie i fa’ati’afa’ahouhia mai, e tino ’i’o ’e te ivi ho’i tō rātou—
2 Mai teie te huru, tē nā ’ō ra Iesu ē : ’A fāfā mai na ’ia ’ite ; ’aita o te vārua e ’i’o ’e te ivi mai tō’u nei, tā ’outou e hi’o mai nei.
3 Te piti : Te mau vārua o te mau ta’ata parauti’a i ha’amaita’i-roa-hia, ’o rātou ’o tei ’ore ā i fa’ati’afa’ahouhia mai, ’āre’a rā ’ua fāri’i rātou i te ’āi’a i roto i te reira iho hanahana.
4 ’Ia tae mai te hō’ē ve’a i te nā-’ō-ra’a mai ē, e parau poro’i tāna nō ’ō mai i te Atua, ’a fa’atoro atu i tō ’oe rima iāna, ’e ’a ani atu iāna ’ia aroha rima mai ia ’oe na.
5 Mai te mea e melahi ’oia, e nā reira iho ā ’oia, ’e e nehenehe tā ’oe ’ia fāfā i tōna rima.
6 Mai te mea e vārua ’oia nō te hō’ē ta’ata parauti’a i ha’amaita’i-roa-hia ra e haere mai ïa ’oia i roto i tōna hanahana ; nō te mea ’o te reira ana’e te rāve’a e nehenehe ai iāna ’ia fā mai—
7 ’A ani atu iāna ’ia aroha rima mai ia ’oe, terā rā ’aita roa ’oia e ha’uti, nō te mea ’aita te ture nō te ao ra e fa’ati’a i te ta’ata parauti’a ’ia ha’avare ; terā rā e fa’a’ite noa mai ’oia i tāna parau poro’i.
8 Mai te mea ’o te diabolo ’oia mai te huru o te hō’ē melahi nō te māramarama, ’ia ani atu ’oe iāna ’ia aroha rima mai, e fa’atoro mai ’oia i tōna rima ia ’oe na, ’e ’aita roa e ti’a ia ’oe ’ia tāpe’a i te hō’ē mea ; nō reira e ti’a ïa ia ’oe ’ia ’ite ē ’o vai ’oia.
9 ’O teie te mau tāviri rahi e toru nā roto i te reira e ’ite ai ’oe ē nō ’ō mai ānei te hō’ē fa’a’itera’a i te Atua ra.