Tufa’a 59
E heheura’a tei hōro’ahia mai nā roto ia Iosepha Semita te peropheta, i Ziona, i te mata’eina’a nō Jackson, i Missouri, i te 7 nō ’Ātete 1831. Nā mua i teie heheura’a, ’ua ha’amo’ahia te fenua, mai te au i tā te Fatu i fa’ata’a, ’e ’ua ha’amo’ahia te vāhi nō te hiero e ti’a mai i reira. I te mahana iho teie heheura’a i fāri’ihia, ’ua fa’aru’e mai ’o Polly Knight, te vahine a Joseph Knight, metua, te melo mātāmua o te ’Ēkālesia tei pohe i Ziona. ’Ua parau te mau melo mātāmua ē, ’ua riro teie heheura’a ’ei « arata’ira’a nō te feiā mo’a nō ni’a i te huru e ha’apa’o i te sābati ’e te huru e ha’apae i te mā’a ’e e pure ho’i ».
1–4, E ha’amaita’ihia te feiā mo’a ha’apa’o maita’i i Ziona ; 5–8, ’Ua tītauhia rātou ’ia here ’e ’ia tāvini i te Fatu ’e ’ia ha’apa’o i tāna mau fa’auera’a ; 9–19, Nā roto i te ha’apa’ora’a i te mahana o te Fatu ’ei mahana mo’a, e ha’amaita’ihia te feiā mo’a i te pae tino ’e i te pae vārua ; 20–24, ’Ua fafauhia e fāri’i te feiā parauti’a i te hau i roto i teie ao ’e te ora mure ’ore i roto i te ao a muri atu.
1 Inaha, tē nā ’ō mai ra te Fatu, e ao tō rātou ’o tei haere mai i teie nei fenua ma te mata rōtahi i tō’u nei hanahana, mai te au i tā’u mau fa’auera’a.
2 ’O rātou ato’a ho’i ’o tē ora ra, e fāri’i rātou i te fenua nei, ’e ’o rātou ’o tē pohe, e fa’aea ïa rātou i te rave i tā rātou mau ’ohipa ato’a, ’e e pe’e ho’i tā rātou mau ’ohipa ia rātou ra ; ’e e fāri’i rātou i te korona i roto i te mau aora’i o tō’u ra Metua, ’o tā’u i fa’aineine nō rātou ra.
3 ’Oia ïa, e ao tō rātou ’o tē ti’a ra tō rātou ’āvae i ni’a i te fenua nō Ziona, ’o tei ha’apa’o i tā’u nei ’evanelia ; nō te mea e fāri’i rātou i tā rātou utu’a nō te mau mea maita’i nō te fenua nei, ’e e fa’ahotu mai te fenua ma tōna ra pūai.
4 ’E e fa’akoronahia ho’i rātou i te mau ha’amaita’ira’a nō ni’a mai, ’oia ïa, ’e i te mau fa’auera’a e rave rahi, ’e i te mau heheura’a i tō rātou ra taime mau—’o rātou ato’a ho’i ’o tei ha’apa’o maita’i ’e ’o tei itoito ho’i i mua iā’u nei.
5 Nō reira, tē hōro’a atu nei au i te hō’ē fa’auera’a ia rātou, i te nā-’ō-ra’a atu ē : ’Ia here ’oe i te Fatu ra i tō ’oe Atua ma tō ’ā’au ato’a, ma tō pūai ato’a, ma tō mana’o ato’a, ’e ma tō itoito ato’a ; ’e nā roto i te i’oa o Iesu Mesia ’oe e tāvini atu ai iāna.
6 ’Ia here ’oe i tō ta’ata tupu mai tō ’oe here ia ’oe iho na. ’Eiaha ’oe e ’eiā ; ’eiaha ato’a e fa’aturi, ’eiaha ato’a e taparahi, ’eiaha ato’a e rave i te hō’ē mea mai te reira te huru.
7 ’Ia ha’amāuruuru ’oe i te Fatu ra i te Atua nō te mau mea ato’a ra.
8 ’Ia pūpū ’oe i te tusia i te Fatu ra i tō ’oe Atua nā roto i te parauti’a, ’oia ho’i i te ’ā’au ’oto ’e te vārua ha’eha’a.
9 ’E ’ia ti’a ia ’oe ’ia pāruru ia ’oe iho ’ia ’ore ’oe ’ia vi’ivi’i i te mau mea nō te ao nei, e haere ïa ’oe i te fare purera’a ’a pūpū atu ai i tā ’oe ra mau ’ōro’a i tō’u ra mahana mo’a ;
10 Nō te mea ’oia mau, e mahana teie i fa’ata’ahia ia ’oe ’ia fa’aea i tā ’oe mau ’ohipa, ’e ’ia ha’amori i tei Teitei Roa ra ;
11 ’Ātīrā noa atu rā, e pūpūhia mai ho’i tā ’oe mau tapura’a nā roto i te parauti’a i te mau mahana ato’a ’e i te mau taime ato’a ho’i ;
12 ’A ha’amana’o rā ē, i teie, i te mahana o te Fatu ra, e pūpū mai ’oe i tā ’oe ra mau tusia ’e tā ’oe ra mau ’ōro’a i tei Teitei Roa ra, ma te fa’i i tā ’oe mau hara i tō mau taea’e, ’e i mua ho’i i te Fatu.
13 ’E i teie mahana, ’eiaha ’oe e rave i te hō’ē mea ’ē atu, maori rā ’ia fa’aineinehia tā ’oe mā’a ma te ’ā’au rōtahi, ’ia ti’a roa tā ’oe ha’apaera’a mā’a, ’oia ho’i, ’ia ’ī roa ’oe i te ’oa’oa.
14 ’Oia mau, ’o teie ho’i te ha’apaera’a mā’a ’e te pure, ’oia ho’i, te ’oa’oa ’e te pure ho’i.
15 ’E mai te mea e rave ’outou i teie nei mau mea ma te mana’o māuruuru, ma te ’ā’au ’e te mata ’oa’oa ho’i, ’eiaha ma te ’ata paho, nō te mea e hara te reira, ma te ’ā’au ’ana’anatae rā, ’e te mata ’oa’oa ho’i—
16 ’Oia mau tē parau atu nei au ē, mai te mea e ha’apa’o ’outou i te reira, nā ’outou ïa te ’īra’a o te fenua nei, te mau ’ānimara ’āvae maha o te ’āua ’e te mau manu ho’i nō te reva, ’e te mau mea ’o tē pa’uma i ni’a i te mau tumu rā’au ’e ’o tē hāhaere i ni’a i te fenua nei ;
17 ’Oia ïa, ’e te mau rā’au ri’i, ’e te mau mea maita’i ’o tei tupu mai i te fenua nei, ’ei mā’a ’e ’aore rā ’ei ’ā’ahu, ’e ’aore rā nō te mau fare, ’e ’aore rā nō te mau fare ha’apu’era’a mā’a, ’e ’aore rā nō te mau uru rā’au mā’a hotu, ’e ’aore rā nō te mau fa’a’apura’a mā’a ri’i, ’e ’aore rā nō te mau ’ō vine.
18 ’Oia ïa, te mau mea ato’a ’o tei tupu mai i te fenua nei, i roto i te tau mau ra, ’ua hāmanihia ïa nō te maita’i ’e te fa’a’ohipara’a a te ta’ata nei, nō te ha’amāuruuru i te mata ’e nō te fa’aoaoa i te ’ā’au ;
19 ’Oia ïa, nō te mā’a ’e nō te ’ā’ahu, nō te tāmata ’e nō te hau’a, nō te ha’apūai i te tino ’e nō te fa’aitoito i te vārua.
20 ’E nā te reira i ha’amāuruuru i te Atua i te mea ē ’ua hōro’a mai ’oia i teie nei mau mea ato’a i te ta’ata nei ; nō reira ho’i teie nei mau mea i hāmanihia ai nō te fa’a’ohipa, nā roto i te mana’o au, ’eiaha ma te fa’arahi roa, ’eiaha ato’a ma te tītaura’a ti’a ’ore.
21 ’E ’aore roa te ta’ata nei e fa’a’ino i te Atua i te hō’ē mea, ’e ’aita roa tōna riri e tupu i ni’a i te ta’ata, maori rā ia rātou ’o tē ’ore i fā’i mai i tōna rima i roto i te mau mea ato’a, ’e ’o tē ’ore ho’i e ha’apa’o i tāna ra mau fa’auera’a.
22 Inaha, ’ua au teie i te ture ’e te mau peropheta ; nō reira, ’eiaha e ha’ape’ape’a fa’ahou mai iā’u nei nō ni’a i teie nei mea.
23 ’Ia ’ite rā ē, ’o ’oia ’o tē rave i te mau ’ohipa parauti’a ra, e fāri’i ’oia i tāna utu’a maita’i, ’oia ïa i te hau i roto i teie nei ao, ’e te ora mure ’ore i roto i te ao a muri atu.
24 ’O vau, ’o te Fatu, tei parau atu i te reira, ’e tē fa’a’ite pāpū atu nei te Vārua. ’Āmene.