Tufa’a 97
E heheura’a tei hōro’ahia mai nā roto ia Iosepha Semita te peropheta, i Kirtland, i Ohio, i te 2 nō ’Ātete 1833. Teie heheura’a nō ni’a ïa i te mau ’ohipa a te feiā mo’a i Ziona, i te mata’eina’a nō Jackson, i Missouri, ’ei pāhonora’a i te anira’a a te peropheta i te Fatu nō te ha’amāramaramara’a. I teie taime tei raro a’e te mau melo nō te ’Ēkālesia i Missouri i te hāmani-’ino-ra’a rahi ’e i te 23 nō Tiurai 1833, ’ua ha’avīhia rātou ’ia tārima i te hō’ē parau fa’aau nō te fa’aru’e i te mata’eina’a nō Jackson.
1–2, ’Ua ha’amaita’ihia e rave rahi feiā mo’a i Ziona (i te Mata’eina’a nō Jackson, i Missouri) nō tō rātou ha’apa’o maita’i ; 3–5, ’Ua fāri’i Parley P. Pratt i te parau ha’amāuruurura’a nō tāna mau ’ohipa i rave i roto i te fare ha’api’ira’a i Ziona ; 6–9, ’O rātou ’o tei ha’apa’o i tā rātou mau fafaura’a ’ua fāri’ihia rātou e te Fatu ; 10–17, E patuhia te hō’ē fare i Ziona i reira tei mā te ’ā’au e ’ite ai i te Atua ; 18–21, Ziona ’o tei mā te ’ā’au ; 22–28, E fa’aorahia tō Ziona i te ’ati ri’ari’a rahi o te Fatu mai te mea e ha’apa’o maita’i rātou.
1 ’Oia mau tē parau atu nei au ia ’outou, e tō’u mau hoa, tē parau atu nei au ia ’outou ma tō’u nei reo, ’oia ho’i te reo o tō’u nei Vārua, ’ia fa’a’ite atu vau ia ’outou na i tō’u hina’aro nō ni’a i tō ’outou mau taea’e i te fenua nō Ziona, e rave rahi ho’i rātou ’o tei ha’eha’a mau ra, ’e tē tītau itoito nei ho’i ’ia ha’api’i mai i te pa’ari ’e ’ia ’imi i te parau mau.
2 ’Oia mau, ’oia mau tē parau atu nei au ia ’outou na, e ao tō te reira huru ta’ata, nō te mea e fāri’i ho’i rātou ; nō te mea e fa’a’ite atu vau, ’o te Fatu, i te aroha i tei marū ra, ’e ’ia rātou ato’a ho’i o tā’u i hina’aro ra, ’ia ’itehia tō’u parauti’a i te taime rātou e hōpoihia ai e au i te ha’avāra’a.
3 Inaha, tē parau atu nei au ia ’outou na, nō ni’a i te fare ha’api’ira’a i Ziona, ’ua māuruuru roa vau, ’o te Fatu, ’ia vai mai te hō’ē fare ha’api’ira’a i Ziona, ’e i tō’u tāvini ra ia Parley P. Pratt, nō te mea tei iā’u nei ra ’oia.
4 ’E mai te mea tei roto noa ā ’oia iā’u nei, e peresideni noa ā ïa ’oia i ni’a i te fare ha’api’ira’a i te fenua nō Ziona ē tae noa atu i te taime au e hōro’a atu ai i te tahi atu ā mau fa’auera’a ’ē iāna.
5 ’E e ha’amaita’i atu vau iāna i te mau ha’amaita’ira’a e rave rahi, i te tātarara’a atu i te mau pāpa’ira’a mo’a ato’a ’e te mau parau ’aro ’ei maita’i nō te fare ha’api’ira’a, ’e te ’ēkālesia i Ziona.
6 ’E i te toe’a o te fare ha’api’ira’a ra, ’ua ti’a iā’u i te Fatu, ’ia fa’a’ite atu i te aroha ; ’āre’a rā, tē vai nei ho’i rātou ’o tē ti’a roa ’ia fa’atītī’aifarohia ’e e fa’a’itehia mai ho’i tā rātou ra mau ’ohipa.
7 Tē vai nei ho’i te ’ōpahi i te a’a o te mau tumu rā’au ra ; ’e ’o te tumu rā’au ’o tē ’ore e fa’ahotu mai i te hotu maita’i ra, e tāpūhia atu ïa i raro ’e e hurihia atu ho’i i roto i te auahi. Nā’u, nā te Fatu, i parau i te reira.
8 ’Oia mau tē parau atu nei au ia ’outou na, ’o rātou ato’a ho’i i rotopū ia rātou ra ’o tei ’ite ē, ’ua ti’a tō rātou ’ā’au, ’e ’ua ha’eha’a ho’i, ’e ’ua tātarahapa mau tō rātou vārua, ’e ’ua fāri’i ho’i rātou ’ia ha’apa’o i tā rātou mau fafaura’a nā roto i te tusia—’oia ïa, i te mau tusia ato’a tā’u, tā te Fatu, e fa’aue atu—’ua fāri’ihia ïa rātou e au nei.
9 Nō te mea nā’u, nā te Fatu, e fa’ahotu mai ia rātou, mai te tumu rā’au hotu rahi roa ra ’o tei tanuhia i roto i te repo maita’i, i pīha’i iho i te pape tahe ateate ra, ’o tē fa’ahotu mai i te mā’a faufa’a rahi ’e ’ia rahi roa te hotura’a.
10 ’Oia mau tē parau atu nei au ia ’outou na, ’o tō’u ïa hina’aro ’ia patuhia te hō’ē fare nō’u nei i te fenua nō Ziona, mai te au i te hōho’a tā’u i hōro’a atu ia ’outou na.
11 ’Oia ïa, ’ia patu-’oi’oi-hia ïa, nā roto i te tufa’a ’ahuru a tō’u mau ta’ata.
12 Inaha, ’o teie ho’i te tufa’a ’ahuru ’e te tusia tā’u, tā te Fatu, e tītau nei i tō rātou ra rima, ’ia patuhia mai te hō’ē fare nō’u nō te fa’aorara’a i tō Ziona—
13 ’Ei vāhi ha’amāuruurura’a nō te feiā mo’a ato’a, ’e ’ei vāhi ha’api’ira’a ho’i nō rātou ato’a ’o tei pi’ihia i te ’ohipa mo’a i roto i tō rātou mau pi’ira’a ’e mau tōro’a e rave rahi ;
14 ’Ia maita’i roa rātou i roto i tō rātou ’ite i tā rātou ’ohipa mo’a, i roto i te mana’o, ’e te parau tumu, ’e te mau ha’api’ira’a tumu, i roto ho’i i te mau mea ato’a nō ni’a i te bāsileia o te Atua i ni’a i te fenua nei, ’o tei ha’amauhia atu te mau tāviri nō te reira bāsileia i ni’a ia ’outou na.
15 ’E mai te mea e patu tō’u mau ta’ata i te hō’ē fare iā’u nei i roto i te i’oa o te Fatu, ma te fa’ati’a ’ore i te hō’ē mea vi’ivi’i ’ia tomo i roto i te reira, ’ia ’ore ho’i te reira ’ia ha’avi’ivi’ihia ra, e fa’aea ïa tō’u hanahana i ni’a i te reira ;
16 ’Oia ïa, ’e ’ei reira iho ā vau, nō te mea e tomo mai au i roto i te reira ; ’e ’o rātou ato’a ’o tei mā te ’ā’au, ’o tē tomo i roto i te reira, e ’ite rātou i te Atua.
17 Terā rā, mai te mea e ha’avi’ivi’ihia te reira, e ’ore roa vau e tomo i roto i te reira, ’e e ’ore roa tō’u hanahana e tae i reira ; nō te mea, e ’ore roa vau e tomo i roto i te mau hiero mo’a ’ore.
18 ’Ē, i teienei, inaha, mai te mea e rave Ziona i taua mau mea ra, e manuia ’oia, ’e e parare atu ho’i ’oia ’e e riro ho’i ’ei mea hanahana roa, ’ei mea rahi roa, ’e ’ei mea mata’u-roa-hia.
19 ’E e fa’atura mai te mau nūna’a o te fenua nei iāna, i te nā-’ō-ra’a mai ē : ’Oia mau ’o Ziona ho’i te ’oire nō tō tātou Atua, ’e ’oia mau e ’ore roa Ziona e ma’iri atu i raro, e ’ore ato’a ho’i e fa’anu’u-’ē-hia atu i tōna iho ra vāhi, nō te mea tei reira te Atua, ’e tei reira ho’i te rima o te Fatu ;
20 ’E ’ua tapu ho’i ’oia nā roto i te mana o tōna pūai ’ia riro ’ei fa’aora nōna ’e ’ei pare teitei nōna.
21 Nō reira, ’oia mau, te nā ’ō mai ra te Fatu, ’a tu’u atu ia Ziona ’ia ’oa’oa, nō te mea o teie ho’i Ziona—TEI MĀ TE ’Ā’AU ; nō reira, ’a tu’u atu ia Ziona ’ia ’oa’oa, ’a ’oto noa mai ai te feiā parauti’a ’ore ato’a.
22 Inaha ho’i, ’e inaha, e tae ’oi’oi mai te tāho’ora’a i ni’a i te feiā paieti ’ore mai te pūāhiohio ra ; ’e ’o vai ho’i tē ora atu i te reira ?
23 ’E e tae mai ho’i te fa’autu’ara’a a te Fatu i ni’a ia rātou i te pō ’e te ao, ’e nā te ro’o o te reira e fa’aehuehu atu i te mau ta’ata ato’a ; ’oia ïa, e ’ore roa te reira e tāpe’ahia ē tae noa atu i te taime te Fatu e tae mai ai ;
24 Nō te mea ’ua tahuhia te au ’ore rahi o te Fatu nō tā rātou mau ’ohipa ’ino rahi ’e tā rātou mau ’ohipa vi’ivi’i.
25 Noa atu rā ïa, e fa’aorahia Ziona mai te mea e ha’apa’o ’oia i te rave i te mau mea ato’a tā’u i fa’aue atu iāna ra.
26 Terā rā, ’ia ’ore ’oia e ha’apa’o i te rave i te mau mea ato’a tā’u i fa’aue atu iāna, e tāho’o atu ïa vau iāna mai te au i tāna mau ’ohipa ato’a, i te ’ati rahi, i te ma’i pohe, i te ma’i pe’e, i te ’o’e, i te tāho’o, ’e i te auahi ha’apau ra.
27 Noa atu rā i te reira, ’ia tai’ohia teie tai’ora’a hō’ē taime i roto i tōna tari’a, ’e ’ua fāri’i au, ’o te Fatu, i tāna ō ; ’e mai te mea ho’i ē ’aita roa ’oia e hara fa’ahou, e ’ore roa te hō’ē o taua mau mea ra e tae mai i ni’a iāna ra ;
28 ’E e ha’amaita’i au iāna i te mau ha’amaita’ira’a, ’e e fa’arahi i te mau ha’amaita’ira’a e rave rahi i ni’a iāna, ’e i ni’a ho’i i tōna ra mau u’i ē a muri ē a muri noa atu, tē nā reira mai ra te Fatu ’o tō ’outou Atua. ’Āmene.