Tufa’a 83
E heheura’a tei hōro’ahia mai nā roto ia Iosepha Semita te peropheta, i Independence, i Missouri, i te 30 nō ’Ēperēra 1832. ’Ua fāri’ihia teie nei heheura’a ’a pārahi ai te peropheta i roto i te hō’ē ’āpo’ora’a i pīha’i iho i tōna ra mau taea’e.
1–4, E ti’ara’a tō te mau vahine ’ia tītau i tā rātou tāne fa’aipoipo ’e tō te mau tamari’i ’ia tītau i tō rātou metua tāne i te tauturura’a nō tō rātou orara’a ; 5–6, E ti’ara’a tō te mau vahine ’ivi ’e tō te mau tamari’i ’ōtare ’ia fāri’i i te tauturura’a a te ’Ēkālesia nō tō rātou orara’a.
1 ’Oia mau, tē nā ’ō mai ra te Fatu, ta’a ’ē atu i te mau ture a te ’ēkālesia nō ni’a i te mau vahine ’e te mau tamari’i, ’o rātou i roto i te ’ēkālesia, ’o tei mo’e atu tā rātou tāne fa’aipoipo ’e ’aore rā tō rātou metua tāne :
2 E ti’ara’a tō te mau vahine ’ia tītau i tā rātou tāne fa’aipoipo i te tauturura’a nō tō rātou orara’a ē tae noa atu i te taime e rave-’ē-hia atu ai tā rātou tāne fa’aipoipo ; ’e mai te mea ’aore rātou i ’itehia ’ei feiā ’ōfati ture, e vai noa ïa tō rātou autaea’era’a i roto i te ’ēkālesia.
3 ’E mai te mea e ’ere rātou i te mea ha’apa’o maita’i, ’aita ïa tō rātou e autaea’era’a i roto i te ’ēkālesia ; e ti’a rā ia rātou ’ia fa’aea noa i ni’a iho i tō rātou mau ’āi’a, mai te au i te mau ture nō te fenua nei.
4 E ti’ara’a tō te mau tamari’i ato’a ’ia tītau i tō rātou mau metua i te tauturura’a nō tō rātou orara’a ē tae noa atu i te taime e naeahia ai tō rātou ra matahiti.
5 ’E i muri iho i te reira, e ti’ara’a tō rātou ’ia tītau i te ’ēkālesia, ’oia ho’i i te fare vaira’a tao’a a te Fatu, mai te mea ē ’aita tā tō rātou metua e faufa’a nō te hōro’a atu nā rātou.
6 ’E e ha’apa’ohia te fare vaira’a tao’a nā roto i te mau ha’amo’ara’a a te ’ēkālesia ; ’e e tauturuhia te mau vahine ’ivi ’e te mau tamari’i ’ōtare, ’e ’oia ato’a ho’i te feiā veve. ’Āmene.