Pāpa’ira’a mo’a
Te Ha’api’ira’a Tumu ’e te mau Fafaura’a 78


Tufa’a 78

E heheura’a tei hōro’ahia mai nā roto ia Iosepha Semita te peropheta, i Kirtland, i Ohio, i te 1 nō Māti 1832. I terā ra mahana, ’ua putuputu te peropheta ’e te tahi mau feiā fa’atere nō te paraparau nō ni’a i te ’ohipa o te ’Ēkālesia. ’Ua fa’aue nā mua teie heheura’a i te peropheta ’e ia Sidney Rigdon ’e ia Newel K. Whitney ’ia tere atu i Missouri nō te fa’anahonaho i te mau tauto’ora’a tapiho’ora’a ’e ha’apararera’a a te ’Ēkālesia ma te ha’amau roa i te tahi « taiete » e ha’apa’o i te reira, ’e ’ia ’ī te tahi ’āfata moni nō te fa’ati’ara’a ia Ziona ’e nō te maita’i o te feiā veve. ’Ua ha’amauhia te reira taiete tei topahia te i’oa United Firm i te ’āva’e ’Ēperēra 1832 ē tae noa atu i te matahiti 1834 i fa’a’orehia ai te reira (hi’o i te tufa’a 82). ’E i muri mai i te fa’a’orera’ahia te reira, i raro a’e i te fa’aterera’a a Iosepha Semita, ’ua monohia te parau « fare ho’ora’a e ha’apararera’a » ma te parau « te mau ’ohipa o te fare vaira’a tao’a nō te feiā veve » i roto i te heheura’a, ’e ’ua mono-ato’a-hia te ta’o « taiete » e te ta’o « ha’apa’ora’a ».

1–4, ’Ua tītauhia i te feiā mo’a ’ia fa’anahonaho ’e ’ia fa’ati’a i te fare vaira’a tao’a ; 5–12, Nā te fa’a’ohipara’a tano i tā rātou mau faufa’a e arata’i ia rātou i te fa’aorara’a ; 13–14, ’Aita te ’Ēkālesia e fa’aō i roto i te mau ’ohipa nō te mau mana pae tino ; 15–16, E tāvini Mihaela (Adamu) i raro a’e i te fa’aterera’a a Tei Mo’a (te Mesia) ; 17–22, E ao tō tei ha’apa’o maita’i, e fāri’i rātou i te mau mea ato’a.

1 ’Ua parau mai te Fatu ia Iosepha Semita, tamaiti i te nā-’ō-ra’a mai ē : ’A fa’aro’o mai na iā’u nei, tē nā reira mai ra te Fatu ra ’o tō ’outou Atua, ’outou ’o tei fa’atōro’ahia i te autahu’ara’a rahi nō tā’u nei ’ēkālesia, ’o tei ha’aputuputu mai ia ’outou iho i te vāhi hō’ē ra ;

2 ’E ’a fa’aro’o i te a’ora’a nāna ’o tei fa’atōro’a ia ’outou nā ni’a mai ra, ’o tē parau atu i roto i tō ’outou na mau tari’a te mau parau pa’ari, ’ia noa’a ia ’outou te fa’aorara’a i te ’ohipa tā ’outou i tu’u mai i mua iā’u nei, tē nā reira mai ra te Fatu ra o te Atua.

3 Nō te mea ’oia mau tē parau atu nei au ia ’outou na, ’ua tae i te taime, ’e tei ’ō nei ho’i ; ’e inaha, ’e inaha, e mea ti’a ïa ’ia fa’anahonahohia tō’u mau ta’ata, nō te fa’aterera’a ’e te fa’ati’ara’a ho’i i te mau ’ohipa nō te fare vaira’a tao’a nō te feiā veve o tō’u nei mau ta’ata, i teie vāhi ’e i te fenua nō Ziona ato’a—

4 ’Ei fa’ati’ara’a ’e ’ei ha’apa’ora’a vai noa ’e te mea mure ’ore ho’i i roto i tā’u nei ’ēkālesia, nō te fa’ahaere i mua te ’ohipa tumu tā ’outou i fāri’i na, nō te fa’aorara’a o te ta’ata nei, ’e nō te fa’ahanahana ho’i i tō ’outou Metua i te ra’i ra ;

5 ’Ia vai ’aifāito ’outou i roto i te mau ru’uru’ura’a nō te mau mea o te ao ra, ’oia ïa, ’e i te mau mea ho’i o te fenua nei, ’ia noa’a mai te mau mea o te ao ra.

6 Nō te mea, ’ia ’ore ’outou ’ia ’aifāito i roto i te mau mea nō te fenua nei, ’aore roa ïa ’outou e ’aifāito i te fāri’ira’a i te mau mea nō te ao ra ;

7 Mai te mea ho’i e hina’aro ’outou ’ia hōro’a atu vau i te hō’ē vāhi nō ’outou i roto i te ao tiretiera, e mea ti’a ïa ’ia fa’aineine ’outou ia ’outou iho nā roto i te ravera’a i te mau mea tā’u i fa’aue atu ia ’outou ’e i tītau ho’i ia ’outou na.

8 ’E i teienei, ’oia mau, tē nā ’ō mai ra te Fatu, e mea ti’a ïa ’ia ravehia te mau mea ato’a nō tō’u nei hanahana, e ’outou ’o tei tāhō’ēhia i roto i teie nei ha’apa’ora’a ;

9 ’Oia ho’i, ’ia pārahi tō’u tāvini ra ’o Newel K. Whitney ’e tō’u tāvini ra ’o Iosepha Semita, tamaiti, ’e tō’u tāvini ’o Sidney Rigdon i roto i te ’āpo’ora’a i pīha’i iho i te feiā mo’a i Ziona ra ;

10 ’Ia ’ore rā, tē tītau nei Sātane ’ia fa’afāriu ’ē atu i tō rātou ’ā’au i te parau mau, ’ia ha’amatapōhia rātou ’e ’ia ’ore ho’i ’ia ’ite pāpū i te mau mea i fa’aineinehia nō rātou.

11 Nō reira, e fa’auera’a tā’u e hōro’a atu nei ia ’outou na, ’ia fa’aineine ’e ’ia fa’anahonaho ho’i ia ’outou iho nā roto i te ru’uru’ura’a, ’oia ho’i te fafaura’a mure ’ore ’o tē ’ore roa e ti’a ’ia ’ōfatihia.

12 ’E ’o ’oia ’o tē ’ōfati i te reira, e ’ere ïa ’oia i tōna tōro’a ’e tōna ti’ara’a i roto i te ’ēkālesia, ’e e tu’uhia atu ho’i ’oia i te mau ha’amāmaera’a rahi a Sātane ē tae noa atu i te mahana nō te fa’aorara’a.

13 Inaha, ’o teie te fa’aineinera’a nā roto i te reira e fa’aineine ai au ia ’outou, ’e te niu, ’e te hi’ora’a tā’u e hōro’a atu ia ’outou na, e ti’a ai ia ’outou ’ia ha’apa’o i te mau fa’auera’a ’o tei hōro’ahia atu ia ’outou na ;

14 ’E nā roto i tō’u aroha, noa atu te mau ’ati rahi ’o tē topa atu i ni’a ia ’outou na, ’ia ti’a i te ’ēkālesia ’ia vai ti’amā noa i ni’a a’e i te mau mea ora ato’a i raro a’e i te ao tiretiera ;

15 ’Ia ti’a ia ’outou ’ia haere mai i ni’a i te korona i fa’aineinehia nō ’outou, ’e ’ia fa’arirohia ho’i ’ei mau fa’atere hau i ni’a i te mau bāsileia e rave rahi ra, tē nā reira mai ra te Fatu ra ’o te Atua, Tei Mo’a nō Ziona, ’o tei fa’ati’a i te mau niu nō Adamu-onidi-Amana ;

16 ’O tei fa’ata’a ia Mihaela tō ’outou ra tamaiti ari’i, ’e ’o tei ha’apāpū i tōna ’āvae, ’e ’o tei fa’ati’a iāna i ni’a i te vāhi teitei ra, ’e ’o tei hōro’a atu iāna i te mau tāviri nō te fa’aorara’a i raro a’e i te a’ora’a ’e te fa’aterera’a a Tei Mo’a ra, ’aore tōna e ha’amatara’a o te mahana, ’aore ato’a e hope’a nō te orara’a.

17 ’Oia mau, ’oia mau, tē parau atu nei au ia ’outou na, e mau tamari’i ri’i ’outou, ’e ’aita ā i noa’a ia ’outou te ’ite nō te rahira’a o te mau ha’amaita’ira’a tā te Metua e tāpe’a ra i roto i tōna iho nā rima ’e tei fa’aineinehia ho’i nō ’outou ;

18 ’E ’aita e ti’a ia ’outou ’ia fa’a’oroma’i i te mau mea ato’a i teienei ; noa atu rā, ’a fa’aitoito, nō te mea nā’u e arata’i atu ia ’outou. Nō ’outou te bāsileia, ’e te mau ha’amaita’ira’a nō te reira ra, nō ’outou ïa, ’e nā ’outou ho’i te mau tao’a rahi mure ’ore ra.

19 ’E ’o ’oia ’o tē fāri’i mai i te mau mea ato’a ma te māuruuru, e fa’ahanahanahia ïa ; ’e e ’āmuihia te mau mea nō teie nei ao iāna ra, ’e ’ia hānere a’e, ’oia ïa, ’e ’ia rahi noa atu.

20 Nō reira, ’a rave i te mau mea ato’a tā’u i fa’aue atu ia ’outou na, tē nā reira mai ra tō ’outou Tāra’ehara, ’oia te Tamaiti o Amana ra, ’o tei fa’aineine ho’i i te mau mea ato’a hou ’oia e rave atu ai ia ’outou na ;

21 ’O ’outou ho’i te ’ēkālesia a te Matahiapo ra, ’e e ’āfa’i atu ’oia ia ’outou i ni’a, i roto i te ata, ’e e fa’ata’a i tā te ta’ata tāta’itahi ra tufa’a.

22 ’E ’o ’oia ’o tei riro ’ei ti’a’au ha’apa’o maita’i ’e te pa’ari ho’i, e noa’a ïa iāna te mau mea atoa ra. ’Āmene.