Tufa’a 34
E heheura’a tei hōro’ahia mai nā roto ia Iosepha Semita te peropheta, ’ia Orson Pratt, i Fayette, i New York, i te 4 nō Novema 1830. Hō’ē ’ahuru ma iva tō te taea’e Paraita matahiti i taua taime ra. ’Ua fa’afāriuhia mai ’oia ’e ’ua bāpetizohia i tōna fa’aro’o-mātāmua-ra’a i te a’ora’a nō te ’evanelia i fa’aho’ihia mai nā roto i tōna ra tua’ana ia Parley P. Pratt, e ono noa hepetoma nā mua a’e. ’Ua fāri’ihia teie heheura’a i roto i te fare o Peter Whitmer, metua.
1–4, E riro mai te feiā ha’apa’o maita’i ’ei mau tamari’i tamāroa nā te Atua nā roto i te Tāra’ehara ; 5–9, Nā te porora’a i te ’evanelia e fa’aineine i te ’ē’a nō te Tae-Piti-Ra’a Mai ; 10–12, E fāri’ihia te parau tohu nā roto i te mana o te Vārua Maita’i.
1 E tā’u tamaiti e Orson, ’a ha’apa’o ’e ’a fa’aro’o mai ’e ’a hi’o māite i te mau mea tā’u e parau atu ia ’oe na ; ’o vau ho’i te Fatu ra te Atua, ’oia ’o Iesu Mesia, tō ’oe Tāra’ehara ;
2 Te māramarama ’e te ora ho’i nō te ao nei, te māramarama ’o tē ’ana’ana nei i roto i te pōiri, ’e ’aita ho’i te pōiri i māramarama i te reira ;
3 ’O tei here roa i tō te ao nei ’e ’ua hōro’a mai i tōna iho ora, ’ia riro rātou ato’a ’o tē ti’aturi mai ’ei mau tamaiti nā te Atua. Nō reira e tamaiti ’oe nā’u nei ;
4 E ao tō ’oe nō te mea ’ua ti’aturi ’oe ;
5 ’E e ao rahi a’e ho’i tō ’oe nō te mea ’ua mā’itihia ’oe e au nō te poro haere i tā’u nei ’evanelia—
6 ’A fa’ateitei i tō ’oe reo mai te ’otora’a o te pū ra, ’ia maoro ’e ’ia pūai ho’i, ’e ’a poro atu ho’i i te parau nō te tātarahapa i te hō’ē u’i pi’o ’e te ha’apa’o ’ore ho’i, i te fa’aineinera’a i te ’ē’a o te Fatu nō tōna tae-piti-ra’a mai.
7 Inaha ho’i, ’oia mau, ’oia mau, tē parau atu nei au ia ’oe na, tē fātata mai nei te taime e haere mai ai au i roto i te hō’ē ata ma te mana ’e te hanahana rahi.
8 E riro ho’i te reira ’ei mahana rahi i te taime nō tō’u taera’a mai, ’e e rurutaina ho’i te mau nūna’a ato’a.
9 Terā rā hou taua mahana rahi ra e tae mai ai, e ha’apōirihia te rā, ’e e fa’arirohia te marama mai te toto ra ; ’e e ’ore roa te mau feti’a e ’ana’ana mai, ’e e ma’iri te tahi pae i raro, ’e e ha’amoura’a rahi te tīa’i mai i te feiā parauti’a ’ore.
10 Nō reira, ’a fa’ateitei i tō reo ’e ’eiaha e tāpe’a atu, nō te mea ’ua parau mai ho’i te Fatu ra te Atua ; nō reira ’a tohu, ’e e hōro’ahia mai ïa ia ’oe nā roto i te mana o te Vārua Maita’i.
11 ’E mai te mea e ha’apa’o maita’i noa ’oe, inaha tei pīha’i iho ïa vau ia ’oe ē tae noa atu i te taime au e haere mai ai—
12 ’E ’oia mau, ’oia mau, tē parau atu nei au ia ’oe na, e haere ’oi’oi mai au. ’O vau nei tō ’oe Fatu ’e tō ’oe Tāra’ehara. ’Oia ïa. ’Āmene.