Pāpa’ira’a mo’a
Te Ha’api’ira’a Tumu ’e te mau Fafaura’a 25


Tufa’a 25

E heheura’a tei hōro’ahia mai nā roto ia Iosepha Semita te peropheta, i Harmony, Pennsylvania, i te ’āva’e Tiurai 1830 (Hi’o i te upo’o parau nō te tufa’a 24). Tē fa’a’ite ra teie heheura’a i te hina’aro o te Fatu ia Emma Smith, te vahine fa’aipoipo a te peropheta.

1–6, ’Ua pi’ihia Emma Smith, te vahine mā’itihia, ’ia tauturu ’e ’ia tāmāhanahana i tāna tāne ; 7–11, ’Ua pi’i-ato’a-hia ’oia ’ia pāpa’i, ’ia a’o i te mau pāpa’ira’a mo’a, ’e ’ia mā’iti i te mau hīmene ; 12–14, ’Ua riro te hīmene a te feiā parauti’a ’ei pure i te Fatu ; 15–16, ’Ua tano te mau parau tumu nō te ha’apa’o maita’i i roto i teie heheura’a nō te mau ta’ata ato’a.

1 ’A ha’apa’o mai na i te reo o te Fatu ra tō ’oe Atua, ’a parau atu ai au ia ’oe, e Emma Smith, tā’u tamāhine ; nō te mea ’oia mau tā’u e parau atu nei ia ’oe na, ’ua riro rātou ato’a ’o tei fāri’i i tā’u nei ’evanelia ’ei mau tamari’i tamāroa ’e ’ei mau tamari’i tamāhine ho’i i roto i tō’u nei bāsileia.

2 E heheura’a tā’u e hōro’a atu ia ’oe nō ni’a i tō’u nei hina’aro ; ’e mai te mea e ha’apa’o maita’i ’oe ’e e haere ho’i nā te mau ’ē’a o te parauti’a i mua iā’u nei, e pāruru vau i tō ’oe ora, ’e e fāri’i ’oe i te hō’ē ’āi’a i Ziona ra.

3 Inaha, ’ua fa’a’orehia tā ’oe mau hara, ’e e vahine mā’itihia ’oe, ’e nā’u ’oe i pi’i.

4 ’Eiaha e amuamu nō te mau mea tei ’ore i ’ite-mata-hia e ’oe na, nō te mea ’ua tāpe’ahia atu te reira mau mea ia ’oe e i tō te ao nei ho’i, nō te pa’ari e vai nei i roto iā’u, nō te tahi taime i mua nei.

5 ’E e riro te tōro’a i pi’ihia ai ’oe ’ei tāmāhanahana i tō’u tāvini ra, ’ia Iosepha Semita, tamaiti, tā ’oe tāne fa’aipoipo, i roto i tōna ra mau ’ati, ma te parau atu i te mau parau tāmāhanahana, nā roto i te vārua ha’eha’a.

6 ’E e haere ’oe nā muri iho iāna i te taime ’oia e haere ai, ’e e fa’ariro ’oe ia ’oe ’ei pāpa’i parau nōna, i te mau taime ’aita tōna e pāpa’i parau, ’ia ti’a iā’u ’ia tono atu i tō’u tāvini ra, ia Oliver Cowdery, i terā vāhi ’e i terā vāhi mai te au i tō’u ra hina’aro.

7 ’E e fa’atōro’ahia ’oe i raro a’e i tōna ra rima nō te ha’amāramarama atu i te mau pāpa’ira’a mo’a ’e nō te fa’aitoito i te ’ēkālesia, mai te au i te hōro’ahia atu ia ’oe e tō’u nei Vārua.

8 E tu’u atu ho’i ’oia i tōna pu’e rima i ni’a iho ia ’oe, ’e e fāri’i ’oe i te Vārua Maita’i, ’e e hōro’a ’oe i tō ’oe taime nō te pāpa’ira’a, ’e nō te ha’api’ira’a mai i te tahi mau mea e rave rahi.

9 ’E ’aita e faufa’a ia ’oe ’ia mata’u, nō te mea e turu tā ’oe tāne fa’aipoipo ia ’oe i roto i te ’ēkālesia ; nō te mea nō rātou ho’i ’oia i pi’ihia ai, ’ia heheuhia mai te mau mea ato’a ia rātou ra, te mau mea ato’a tā’u i hina’aro, mai te au i tō rātou ra fa’aro’o.

10 ’E ’oia mau, tē parau atu nei au ia ’oe na ’ia ha’apae ’oe i te mau mea nō teie nei ao, ’e ’ia tītau ho’i i te mau mea nō te ao maita’i a’e.

11 ’E e ’ohipa atu ā tē hōro’ahia ia ’oe, ’ia mā’iti i te tahi mau hīmene mo’a, mai te au i te hōro’ahia atu ia ’oe, ’o tē riro ’ei ha’amāuruurura’a iā’u, ’e ’ia vai te reira i roto i tā’u nei ’ēkālesia.

12 Nō te mea e ’oa’oa tō’u nei vārua i te hīmene o te ’ā’au ; ’oia ïa, ’ua riro te hīmene a te feiā parauti’a ’ei pure iā’u nei, ’e e pāhonohia te reira nā roto i te ha’amaita’ira’a i ni’a iho i tō rātou ra mau upo’o.

13 Nō reira, ’a poupou tō ’oe ’ā’au ’e ’a ’oa’oa, ’e ’a ha’apa’o i te mau fafaura’a tā ’oe i fafau.

14 ’A tāmau noa i te vārua ha’eha’a, ’e ’a ara noa i te te’ote’o. ’Ia oaoa tō ’oe ’ā’au i tā ’oe tāne fa’aipoipo, ’e i te hanahana ho’i ’o tē tae mai i ni’a iāna ra.

15 ’A tāmau noa i te ha’apa’ora’a i tā’u mau fa’auera’a, ’e e korona parauti’a tā ’oe e fāri’i. ’E ’ia ’ore ’oe ’ia rave i taua mau mea ra, ’aita roa ïa ’oe e tae mai i te vāhi tā’u e pārahi nei.

16 ’E ’oia mau, ’oia mau, tē parau atu nei au ia ’oe na, ’e ’o teie tō’u reo i te mau ta’ata ato’a. ’Āmene.