Tufa’a 75
E heheura’a tei hōro’ahia mai nā roto ia Iosepha Semita te peropheta, i Amherst, i Ohio, i te 25 nō Tēnuare 1832. E piti heheura’a ta’a ’ē i roto i teie tufa’a (te mātāmua mai te ’īrava 1 ē tae atu i te 22 ’e te piti mai te ’īrava 23 ē tae atu i te 36) tei hōro’ahia i te hō’ē ā mahana. Te tumu, nō te hō’ē ïa ’āmuira’a i reira te pāturura’ahia ’e te fa’atōro’ara’ahia Iosepha Semita ’ei peresideni nō te Autahu’ara’a teitei. ’Ua hina’aro te tahi mau peresibutero ’ia ha’api’i pāpū maita’i mai i te ’ohipa e ti’a ia rātou ’ia rave i terā iho taime. ’Ua hōro’ahia mai ïa teie nei mau heheura’a.
1–5, E roa’a te ora mure ’ore i te mau peresibutero ha’apa’o maita’i ’o tei poro haere i te ’evanelia ; 6–12, ’A pure nō te fāri’i i te Fa’aa’o, ’o tē ha’api’i mai i te mau mea ato’a ; 13–22, E ha’avā te mau peresibutero i te feiā tei pāto’i i tā rātou parau poro’i ; 23–36, E fāri’i te mau ’utuāfare o te mau misiōnare i te tauturura’a nō ’ō mai i te ’Ēkālesia.
1 ’Oia mau, ’oia mau, tē parau atu nei au ia ’outou na, ’o vau nei ’o tē parau atu nei nā roto i te reo o tō’u Vārua, ’oia ’o Alepha ’e Omega, tō ’outou Fatu ’e tō ’outou Atua—
2 ’A fa’aro’o mai na, ’o ’outou ’o tei hōro’a mai i tō ’outou i’oa nō te haere atu e poro haere i tā’u nei ’evanelia, ’e nō te tope ho’i i tā’u ’ō vine.
3 Inaha, tē parau atu nei au ia ’outou na, ’o tō’u ïa hina’aro ’ia haere atu ’outou, ’eiaha e ha’amarirau, ’eiaha ato’a e fa’aea noa ; ’a rave rā i te ’ohipa ma tō ’outou pūai—
4 Ma te fa’ateitei i tō ’outou reo mai te ’otora’a o te pū ra, i te porora’a atu i te parau mau mai te au i te mau heheura’a ’e te mau fa’auera’a tā’u i hōro’a atu ia ’outou na.
5 ’E nō reira, mai te mea e ha’apa’o maita’i noa ’outou, e fa’ateiahahia ’outou i te mau ruru e rave rahi ra, ’e e fa’akoronahia ho’i i te tura, ’e te hanahana, ’e te tāhuti ’ore, ’e te ora mure ’ore ho’i.
6 Nō reira, ’oia mau tē parau atu nei au i tō’u tāvini ra ia William E. McLellin, tē fa’a’ore nei au i te ’ohipa tā’u i hōro’a atu iāna ’ia haere atu i te mau fenua i te hiti’a o te rā ;
7 ’E tē hōro’a atu nei au i te hō’ē ’ohipa ’āpī ’e te hō’ē fa’auera’a ’āpī iāna, i roto i te reira e fa’autu’a vau, ’o te Fatu, iāna, nō te mau amuamura’a o tōna ra ’ā’au ;
8 ’E ’ua hara ’oia ; noa atu rā, tē fa’a’ore nei au i tāna mau hara, ’e tē parau fa’ahou atu nei au iāna, ’A haere atu ’oe i te mau fenua i te pae apato’a ra.
9 ’E ’ia haere atu tō’u tāvini ra ’o Luke Johnson nā muri iho iāna, ’e ’ia poro haere i te mau mea tā’u i fa’aue atu ia rāua—
10 Ma te ti’aoro i te i’oa o te Fatu ’ia noa’a te Fa’aa’o, ’o tē ha’api’i mai ia rāua i te mau mea ato’a e au nō rāua—
11 Ma te pure tāmau noa ’ia ’ore rāua ’ia ha’aparuparuhia ; ’e mai te mea e nā reira rāua, e pārahi ïa vau i pīha’i iho ia rāua ē tae noa atu i te hope’a.
12 Inaha, ’o teie te hina’aro o te Fatu tō ’ōrua Atua ia ’ōrua na. ’Oia ïa. ’Āmene.
13 ’E teie fa’ahou ā, ’oia mau, tē nā ’ō mai ra te Fatu, ’a tu’u atu i tō’u tāvini ra ia Orson Hyde ’e tō’u tāvini ra ia Samuel H. Smith ’ia tere atu i te mau fenua i te hiti’a o te rā, ’e ’ia poro haere i te mau mea tā’u i fa’aue atu ia rāua ; ’e mai te mea e ha’apa’o maita’i noa rāua, inaha, e pārahi ïa vau i pīha’i iho ia rāua ē tae noa atu i te hope’a.
14 ’E teie fa’ahou ā, ’oia mau tē parau atu nei au i tō’u tāvini ra ia Lyman Johnson, ’e i tō’u tāvini ra ia Orson Pratt, ’ia tere ato’a atu rāua i te mau fenua i te hiti’a o te rā ; ’e inaha, e pārahi ato’a ïa vau i pīha’i iho ia rāua ē tae noa atu i te hope’a.
15 ’E teie fa’ahou ā, tē parau atu nei au i tō’u tāvini ra ia Asa Dodds, ’e i tō’u tāvini ra ia Calves Wilson, ’e ’ia haere ato’a atu rāua i te mau fenua i te tō’o’a o te rā, ’e ’ia poro haere i tā’u ’evanelia, mai te au ho’i i tā’u i fa’aue ia rāua.
16 ’E ’o ’oia ’o tē ha’apa’o maita’i noa, e upo’oti’a ïa i te mau mea ato’a, ’e e fa’ateiteihia ho’i i te mahana hope’a.
17 ’E teie fa’ahou ā, tē parau atu nei au i tō’u tāvini ra ia Major N. Ashley, ’e i tō’u tāvini ra ia Burr Riggs, ’ia haere ato’a atu rāua i te fenua i te pae apato’a.
18 ’Oia ïa, ’ia haere atu rātou ato’a i tō rātou tere, mai te au i tā’u i fa’aue atu ia rātou, ma te haere i terā fare ’e i terā fare, ’e i terā ’oire iti ’e i terā ’oire iti, ’e i terā ’oire rahi ’e i terā ’oire rahi.
19 ’E i roto i te ’utuāfare ato’a tā ’outou e tomo atu i roto, ’e ’ua fāri’i mai rātou ia ’outou na, ’a vaiiho atu ïa i tā ’outou ha’amaita’ira’a i ni’a i te reira ’utuāfare.
20 ’E i roto i te ’utuāfare ato’a tā ’outou e tomo atu i roto, ’e ’aita rātou e fāri’i mai ia ’outou na, e fa’aru’e ’oi’oi atu ïa ’outou i te reira ’utuāfare, ’e ’a ueue atu i te repo o tō ’outou ’āvae ’ei fa’a’itera’a i te fa’ahapara’a ia rātou ra.
21 ’E e fa’a’īhia ’outou i te ’oa’oa ’e te poupou ; ’e ’ia ’ite ’outou i teie, ’ia tae i te mahana ha’avāra’a, e riro ’outou ’ei mau ha’avā nō te reira ’utuāfare, ’e e fa’ahapa ho’i ia rātou ra.
22 ’E e riro ïa e fāri’i-maita’i-hia a’e te mau ’etene ’ia tae i te mahana ha’avāra’a, i tō te reira ’utuāfare ; nō reira, ’a tātua na i tō ’outou tau’upu ’e ’a ha’apa’o maita’i, ’e e upo’oti’a ’outou i te mau mea ato’a, ’e e fa’ateiteihia ho’i ’ia tae i te mahana hope’a. ’Oia ïa. ’Āmene.
23 ’E teie fa’ahou ā, tē nā ’ō mai ra te Fatu ia ’outou, ’o ’outou e te mau peresibutero nō tā’u nei ’ēkālesia, ’o tei hōro’a mai i tō ’outou mau i’oa ’ia ’ite ’outou i tōna hina’aro ia ’outou na—
24 Inaha, tē parau atu nei au ia ’outou na, ’e e ’ohipa ïa nā te ’ēkālesia ’ia tauturu i te pāturura’a i tō rātou ra mau ’utuāfare, ’e ’ia pāturu ato’a ho’i i te mau ’utuāfare nō rātou ’o tei pi’ihia ’e tei tītauhia ’ia tonohia atu i roto i te ao nei nō te poro haere i te ’evanelia i tō te ao nei.
25 Nō reira, tē hōro’a atu nei au, ’o te Fatu, i teie nei fa’auera’a ia ’outou na, ’ia ’imi ’outou i te mau vāhi fa’aeara’a nō tō ’outou mau ’utuāfare, mai te au i tei ti’a i tō ’outou mau taea’e, ’ia tauturu mai ma te ’ā’au tae.
26 ’E ia rātou ato’a ’o tei fāri’i i te mau vāhi fa’aeara’a nō tō rātou mau ’utuāfare, ’e i te tauturura’a a te ’ēkālesia ia rātou, ’ia haere iho ā rātou, ’eiaha ’ia ’ore, i tō te ao nei, i te hiti’a o te rā ’e ’aore rā i te tō’o’a o te rā, ’e ’aore rā i te apato’erau, ’e ’aore rā i te apato’a.
27 ’Ia ani mai rātou, e fāri’i ïa rātou, ’ia pātōtō mai ho’i e ’īritihia atu ïa ia rātou, ’e e fa’a’itehia atu mai ni’a mai, nā roto i te Fa’aa’o iho, te vāhi tā rātou e haere.
28 ’E teie fa’ahou ā, ’oia mau tē parau atu nei au ia ’outou na, ’o te ta’ata ato’a ’o tē tītauhia ’ia ’imi i te orara’a nō tōna iho ’utuāfare ra, e mea ti’a ïa iāna ’ia ’imi, ’e e ’ore ho’i ’oia e ’ere i tōna korona ; ’e e mea ti’a iāna ’ia rave i te ’ohipa i roto i te ’ēkālesia.
29 ’Ia itoito noa ho’i te ta’ata ato’a i te ravera’a i te mau mea ato’a. ’E ’aita tō te ta’ata fa’atau e vāhi i roto i te ’ēkālesia, maori rā ’ia tātarahapa ’oia ’e ’ia fa’a’āfaro i tōna haerera’a.
30 Nō reira, ’ia tāhō’ēhia tō’u tāvini ra ’o Simeon Carter ’e tō’u tāvini ra o Emer Harris i roto i te ’ohipa mo’a ;
31 ’E tō’u ato’a tāvini ra o Ezra Thayre ’e tō’u tāvini ra ’o Thomas B. Marsh ;
32 Tō’u ato’a tāvini ra ’o Hyrum Smith ’e tō’u tāvini ra ’o Reynolds Cahoon ;
33 ’E tō’u ato’a tāvini ra ’o Daniel Stanton ’e tō’u tāvini ra ’o Seymour Brunson ;
34 ’E tō’u ato’a tāvini ra ’o Sylvester Smith ’e tō’u tāvini ra ’o Gideon Carter ;
35 ’E tō’u ato’a tāvini ra ’o Ruggles Eames ’e tō’u tāvini ra ’o Stephen Burnett ;
36 ’E tō’u ato’a tāvini ra ’o Micah B. Welton ’e tō’u tāvini ra ’o Eden Smith. ’Oia ïa. ’Āmene.