Tufa’a 39
E heheura’a tei hōro’ahia mai nā roto ia Iosepha Semita te peropheta, ia James Covel, i Fayette, i New York, i te 5 nō Tēnuare 1831. ’Ua fafau ’o James Covel ē e ha’apa’o ’oia i te fa’auera’a ato’a tā te Fatu e hōro’a mai iāna nā roto ia Iosepha te peropheta, i riro na ho’i ’oia i te mātāmua ’ei ’orometua nō te ha’apa’ora’a methodi e maha ’ahuru matahiti te maoro.
1–4, ’Ua fāri’i te feiā mo’a i te mana ’ia riro ’ei mau tamari’i tamāroa nā te Atua ; 5–6, ’ia fāri’i tātou i te ’evanelia tē fāri’i ato’a ra ïa tātou i te Mesia ; 7–14, ’Ua fa’auehia James Covel ’ia bāpetizohia ’e ’ia tāvini i roto i te ’ō vine a te Fatu ; 15–21, ’Ua tītauhia i te mau tāvini o te Fatu ’ia poro i te ’evanelia nā mua i te Tae-Piti-Ra’a mai ; 22–24, E ha’aputuputuhia te feiā i fāri’i i te ’evanelia i teie tau ’e i te tau mure ’ore.
1 ’A ha’apa’o mai na ’e ’a fa’aro’o mai na ho’i i te reo nōna ’o tē vai nei mai te tau mure ’ore ē tae noa atu i te mau tau mure ’ore, Te Vai Nei Au Rahi, ’oia ’o Iesu Mesia—
2 Te māramarama ’e te ora ho’i nō te ao nei ; te māramarama ’o tē ’ana’ana nei i roto i te pōiri, ’e ’aita ho’i te pōiri i māramarama i te reira ;
3 ’O vau ā teie ’o tei haere mai i te ’āfa ti’a o te mau tau i tō’u ihora mau ta’ata, ’e ’aita tō’u iho mau ta’ata i fāri’i mai iā’u nei ;
4 Terā rā ia rātou ato’a ’o tei fāri’i mai iā’u nei, ’ua hōro’a atu ïa vau i te mana ’ia riro ’ei mau tamari’i tamāroa nā’u ; ’e e nā reira ato’a ho’i au i te hōro’a atu i te mana ia rātou ato’a ’o tē fāri’i mai iā’u nei, ’ia riro rātou ’ei mau tamari’i tamāroa nā’u nei.
5 ’E ’oia mau, ’oia mau, tē parau atu nei au ia ’oe na, ’o ’oia ’o tei fāri’i i tā’u nei ’evanelia, ’ua fāri’i ïa iā’u nei ; ’e ’o ’oia ’o tei ’ore i fāri’i i tā’u nei ’evanelia, ’aita ato’a ’oia i fāri’i mai iā’u nei.
6 ’E ’o teie tā’u nei ’evanelia—te tātarahapara’a ’e te bāpetizora’a nā roto i te pape, ’e i reira e tae mai ai te bāpetizora’a i te auahi ’e te Vārua Maita’i, ’oia te Fa’aa’o, ’o tē fa’a’ite mai i te mau mea ato’a, ’e ’o tē ha’api’i mai ho’i i te mau mea hau nō te bāsileia.
7 ’E i teienei, inaha, tē parau atu nei au ia ’oe na, e tō’u nei tāvini e James, ’ua hi’o atu vau i tā ’oe na mau ’ohipa, ’e ’ua ’ite au i tō ’oe na huru.
8 ’E ’oia mau, tē parau atu nei au ia ’oe na, ’ua ti’a ïa tō ’oe ’ā’au i mua iā’u i teie nei taime ; ’e inaha, ’ua tu’u atu vau i te mau ha’amaita’ira’a rahi i ni’a i tō ’oe na upo’o ;
9 Noa atu i te reira, ’ua ’ite ’oe i te ’oto rahi, nō te mea ’ua fa’aru’e mai ’oe iā’u nei e rave rahi taime nō te te’ote’o ’e te mau mana’o pe’ape’a nō teie nei ao.
10 ’E, inaha, ’ua tae mai te mau mahana e fa’aorahia ai ’oe ra, mai te mea e ha’apa’o ’oe i tō’u nei reo, ’o tē parau atu nei ia ’oe na ē : ’A ti’a mai ’e ’ia bāpetizohia, ’e ’a horoi ’ē atu i tā ’oe ra mau hara, ma te ti’aoro mai i tō’u nei i’oa, ’e e fāri’i ïa ’oe i tō’u nei Vārua, ’e te ha’amaita’ira’a rahi mai tei ’ore i ’itea ia ’oe na.
11 ’E mai te mea e nā reira ’oe, ’ua fa’aineine ïa vau ia ’oe nō te hō’ē ’ohipa rahi a’e. E a’o atu ’oe i te ’īra’a nō tā’u nei ’evanelia, ’o tā’u i fa’atae atu i teie mau mahana hope’a nei, ’o te fafaura’a ïa tā’u i fa’atae atu nō te fa’aho’i mai i tō’u feiā nō te ’utuāfare o ’Īserā’ela.
12 ’E a muri a’era, e vai mai te mana i ni’a ia ’oe ; e noa’a ia ’oe te fa’aro’o rahi, ’e i pīha’i iho ïa vau ia ’oe, ’e e haere ho’i au nā mua i tō ’oe na mata.
13 ’Ua pi’ihia ’oe ’ia rave i te ’ohipa i roto i tā’u nei ’ō vine, ’e ’ia fa’arahi i tā’u nei ’ēkālesia, ’e ’ia fa’atupu ia Ziona, ’e ’ia ’oa’oa te reira i ni’a i te mau ’āivi ’e ’ia ruperupe ho’i.
14 Inaha, ’oia mau, ’oia mau, tē parau atu nei au ia ’oe na, ’aita ’oe i pi’ihia ’ia haere i te mau tufa’a fenua i te hiti’a o te rā, ’ua pi’ihia rā ’oe ’ia haere i te Ohio ra.
15 ’E mai te mea e ha’aputuputu atu tō’u ra mau ta’ata ia rātou iho i te Ohio ra, ’ua ha’aputu ïa vau i te hō’ē ha’amaita’ira’a i te vāhi ’o tei ’ore ā i ’itehia i rotopū i te mau tamari’i a te ta’ata nei, ’e e nīni’ihia atu te reira i ni’a iho i tō rātou mau upo’o. ’E mai reira atu ho’i te mau ta’ata i te haere atu i te mau nūna’a ato’a.
16 Inaha, ’oia mau, ’oia mau, tē parau atu nei au ia ’oe na, tē ti’aoro mai nei te mau ta’ata i Ohio iā’u ma te fa’aro’o rahi, ma te mana’o ē, e tāpe’a vau i tō’u nei rima i te fa’autu’ara’a i te mau nūna’a ; ’aita rā e ti’a iā’u ’ia fa’a’ore i tā’u parau.
17 Nō reira, ’a haere atu ma tō pūai ato’a ’e ’a parau atu i te mau rave ’ohipa ha’apa’o maita’i ’ia haere i roto i tā’u nei ’ō vine, ’ia tope-māite-hia te reira nō te taime hope’a.
18 ’E mai te mea e tātarahapa mau ā rātou ’e e fāri’i ho’i i te ’īra’a nō tā’u nei ’evanelia, ’e ’ia riro ’ei feiā ha’amo’ahia ra, e tāpe’a ïa vau i tō’u nei rima i te fa’autu’ara’a.
19 Nō reira, ’a haere atu, i te ti’aorora’a atu ma te reo pūai, i te nā-’ō-ra’a atu ē : Tē fātata mai nei te bāsileia o te ao ra ; ma te pi’ira’a atu ē : Hosana ! ’ia ra’a te i’oa o te Atua Teitei Roa.
20 ’A haere atu na ma te bāpetizo i te pape, i te fa’aineinera’a i te ’ē’a nā mua i tō’u nei aro nō te taime nō tō’u taera’a mai ;
21 Tē fātata mai nei ho’i te taime ; ’aore e ta’ata i ’ite i te mahana ’e te hora ; e tae mai iho ā rā te reira.
22 ’E ’o ’oia ’o tē fāri’i i teie nei mau mea ra, ’ua fāri’i mai ïa iā’u nei ; ’e e ha’aputuputuhia mai rātou iā’u nei i teie tau ’e i te tau mure ’ore ho’i.
23 ’E teie fa’ahou ā, a muri a’era, i ni’a ia rātou ato’a tā ’oe e bāpetizo i te pape ra, e tu’u atu ïa ’oe i tō ’oe pu’e rima, ’e e fāri’i rātou i te hōro’a a te Vārua Maita’i, ’e e tīa’i rātou i te mau tāpa’o nō tō’u taera’a mai, ’e e ’ite ho’i rātou iā’u nei.
24 Inaha, e tae ’oi’oi atu vau. ’Oia ïa. ’Āmene.