Tufa’a 54
E heheura’a tei hōro’ahia mai nā roto ia Iosepha Semita te peropheta, ia Newel Knight, i Kirtland, i Ohio, i te 10 nō Tiunu 1831. ’Ua ’āmahamaha te mau melo nō te ’Ēkālesia e ora ra i Thompson, i Ohio, nō ni’a i te mau ture nō te ha’amo’ara’a i te mau faufa’a. ’Ua ’itehia te peu pipiri ’e te nounou. I muri mai i tāna misiōni i te pupu ra Shakers (hi’o i te upo’o parau o te tufa’a 49), ’ua ’ōfati Leman Copley i tāna fafaura’a ’ia ha’amo’a i tōna fenua fa’a’apu rahi ’ei vāhi fa’aeara’a nō te feiā mo’a e tae mai ra nā Colesville mai, i New York. Nō te reira, ’ua haere mai ra ’o Newel Knight (te ta’ata fa’atere nō te mau melo i Thompson) ’e te tahi atu mau peresibutero i te peropheta ma te ani mai e nāhea rātou i te reira. ’Ua ani atu te peropheta i te Fatu ’e ’ua fāri’ihia mai teie heheura’a ’o tē fa’aue nei i te mau melo i Thompson ’ia fa’aru’e i te fenua fa’a’apu o Leman Compley ’e ’ia tere atu i Missouri.
1–6, E mea ti’a i te feiā mo’a ’ia ha’apa’o i te fafaura’a nō te ’evanelia nō te fāri’i i te aroha ; 7–10, E mea ti’a ia rātou ’ia fa’a’oroma’i i roto i te ’ati rahi.
1 Inaha, tē nā ’ō mai ra te Fatu, ’oia ’o Alepha ’e ’o Omega, te ha’amatara’a ’e te fa’ahope’a, ’o ’oia ho’i ’o tei fa’asātaurohia nō te mau hara a tō te ao nei—
2 Inaha, ’oia mau, ’oia mau, tē parau atu nei au ia ’oe na, e tō’u tāvini e Newel Knight, ’a ti’a pāpū i roto i te tōro’a tā’u i fa’ata’a nō ’oe na.
3 ’E mai te mea ’ua hina’aro tō ’oe mau taea’e ’ia ora atu rātou i tō rātou ra mau ’enemi, ’ia tātarahapa ïa rātou i tā rātou ra mau hara ato’a, ’e ’ia riro ho’i ’ei feiā ha’eha’a mau i mua iā’u nei, ma te ’ā’au tātarahapa.
4 ’E nō te mea ē ’ua ’ōfatihia te fafaura’a tā rātou i fafau mai iā’u nei, nō reira ’ua riro ïa ’ei mea faufa’a ’ore ’e te mana ’ore ho’i.
5 ’E e ’ati tōna ’o tei fa’atupu i teie nei hapa, nō te mea e mea maita’i a’e ’āhiri ’oia i paremo atu i roto i te hōhonura’a nō te moana ra.
6 E ao rā tō rātou ’o tei ha’apa’o i te fafaura’a e tei ha’apa’o ho’i i te fa’auera’a, nō te mea e roa’a ia rātou te aroha.
7 Nō reira, ’a haere atu i teienei ’e ’a horo atu i rāpae i te fenua, ’oi tae mai ai tō ’outou mau ’enemi i ni’a ia ’outou ; ’a haere i tō ’outou tere, ’e ’a mā’iti i tā ’outou i hina’aro ’ei fa’atere nō ’outou, ’e nō te ’aufau atu ho’i i te moni nā ’outou.
8 ’E e nā reira ’outou i te tere i te mau tufa’a fenua ra i te pae tō’o’a o te rā, i te fenua Missouri, i te mau hiti fenua nō te ’āti Lamana ra.
9 ’E ’ia oti tō ’outou terera’a ra, inaha, tē parau atu nei au ia ’outou na, ’a ’imi ïa ’outou i te orara’a mai tā te mau ta’ata ato’a ra, ē tae noa atu i te taime au e fa’aineine ai i te hō’ē vāhi nō ’outou.
10 ’E teie fa’ahou ā, ’a fa’a’oroma’i i roto i te ’ati rahi ē tae noa atu i te taime au e tae mai ai ; ’e inaha, e tae ’oi’oi mai au, ’e tā’u utu’a maita’i ra tei iā’u nei ïa, ’e ’o rātou ’o tei ’imi iā’u i te mātāmua ra, e ’itea mai ïa te fa’aeara’a nō tō rātou ra mau vārua. ’Oia ïa. ’Āmene.