Benneg 33
Paltiing a naited kada Ezra Thayre ken Northrop Sweet babaen ni Joseph Smith a Propeta, iti Fayette, Nueva York, idi Oktubre 1830 (History of the Church, 1:126–127). Iti panangisurat ti Propeta iti daytoy a paltiing, pinasingkedanna a “ti… Apo kanayon a sisasagana a mangiwanwan kadagiti naregta a mangtunton iti pammati” (History of the Church, 1:126).
1–4, Maawagan dagiti agtartrabaho a mangipakdaar iti ebanghelio iti maikasangapulo-ket-maysa nga oras; 5–6, Maipasdek ti Simbaan, ket maummong dagiti pili; 7–10, Agbabawikayo, ta asidegen ti pagarian ti langit; 11–15, Mabangon ti Simbaan iti panuli ti ebanghelio; 16–18, Agsaganakayo iti yaay ti Nobio.
1 Adtoy, kunak kadakayo, katulongak nga Ezra ken Northrop, luktanyo dagiti lapayagyo ket denggenyo ti timek ti Apo a Diosyo, a ti balikasna napartak ken nabileg, natadtadem ngem ti dua ti tademna nga espada, a mamagsisina kadagiti susuop ken pata, kararua ken espiritu; ken isu ti mannukod kadagiti panunot ken panggep ti puso.
2 Ta pudno, pudno, kunak kadakayo a naawagankayo a mangipigsa iti timekyo a kas iti aweng ti trumpeta, a mangipakdaar iti ebangheliok kadagiti killo ken barusngi a kaputotan.
3 Ta adtoy, purawen ti kataltalonan a pagapitan; ken maikasangapulo-ket-maysan nga oras, ken ti maudi a gundaway a panagayabko iti agtrabaho iti bangkagko.
4 Ket nadadaelen a namimpinsan ti bangkagko; ket sumagmamano laeng ti agar-aramid iti nasayaat; ket nagbiddutda iti namin-adu a gundaway gapu kadagiti panaginsasaserdote, nga addaan amin iti narugit a pampanunot.
5 Ket pudno, pudno, kunak kadakayo, nga impasdekko daytoy a simbaan ken inyawagko manipud iti langalang.
6 Ken kasta met nga ummongek dagiti pilik manipud iti uppat a suli ti daga, a kas iti kaadu ti mamatinto kaniak, ken dumngeg iti timekko.
7 Wen, pudno, pudno, kunak kadakayo, a purawen ti kataltalonan a pagapitan; gapuna, ipakanyo dagiti kumpayyo, ket aganikayo iti amin a kabaelan, panunot ken pigsayo.
8 Ungapenyo dagiti ngiwatyo ket mapunnodanto, ket agbalinkayonto a kas iti daydi nagkauna a Nephi, a nagdaliasat iti langalang manipud iti Jerusalem.
9 Wen, ungapenyo dagiti ngiwatyo ket saankayo nga aggudeng, ket agbaklaykayonto iti binettek, ta ngarud, addaak kadakayo.
10 Wen, ungapenyo dagiti ngiwatyo ket mapunnodanto, nga agkuna: Agbabawikayo, agbabawikayo, ket isaganayo ti dalan nga agturong iti Apo, ket aramidenyo a nalinteg dagiti danana; ta asidegen ti pagarian ti langit;
11 Wen, agbabawi ken agpabuniagkayo, tunggal maysa kadakayo, para iti pannakaugas ti basbasolyo; wen, agpabuniagkayo iti danum, sa kalpasanna umay ti pannakabuniag iti apuy ken iti Espiritu Santo.
12 Adtoy, pudno, pudno, kunak kadakayo, daytoy ti ebangheliok; ket laglagipenyo a mamatidanto kaniak wenno awanto a pulos ti pannakaisalakanda;
13 Ket iti daytoy a bato bangonekto ti simbaanko; wen, iti daytoy a bato ti bangonenkayo, ket no agtultuloykayo, saanto nga agballigi kadakayo dagiti ruangan ti impierno.
14 Ket malagipyonto dagiti sinurat ken katulagan ti simbaan a tungpalenyo.
15 Ket asino man nga addaan iti pammati patalgedanyonto iti simbaanko, babaen ti panangipatay kadagiti dakulap, ket isagutkonto kadakuada ti sagut ti Espiritu Santo.
16 Ket intedko ti Libro ni Mormon ken dagiti nasantuan a kasuratan a mangiwanwan kadakayo; ket tignayen ti bileg ti Espirituk amin a banag.
17 Gapuna, agbalinkayo a napudno, a kanayon nga agkararag, a sigagangat ken agdardarang dagiti silawyo, ken seddenyo, tapno sisasaganakayo iti yaay ti Nobio—
18 Ta adtoy, pudno, pudno, kunak kadakayo, nga umayakto a di agtantan. Pudno a kasta. Amen.