1 ’A ha’apa’o mai na, e te mau ta’ata nō tā’u nei ’ēkālesia, tē nā reira mai nei te Fatu ra tō ’outou Atua, ’e ’a fa’aro’o mai na i te parau a te Fatu nō ni’a ia ’outou na—

2 Te Fatu ’o tē tae ’oi’oi mai i tōna ra hiero ; te Fatu ’o tē tae mai i raro nei i ni’a i te ao nei ma te ’anatema ’e te ha’avāra’a ; ’oia ïa, i ni’a i te mau nūna’a ato’a ’o tē ha’amo’e i te Atua, ’e i ni’a i te feiā paieti ’ore i rotopū ia ’outou na.

3 E fa’a’ite mai ho’i ’oia i tōna rima mo’a i mua i te mata o te mau nūna’a ato’a, ’e e ’ite mai te mau hope’a ato’a o te fenua nei i te fa’aorara’a a tō rātou Atua.

4 Nō reira, ’a fa’aineine na ’outou, ’a fa’aineine na ’outou, e tō’u nei mau ta’ata ; ’a ha’amo’a na ia ’outou iho ; ’a ha’aputuputu ’āmui mai na ’outou, e te mau ta’ata nō tā’u nei ’ēkālesia, i ni’a i te fenua nō Ziona, ’o ’outou ato’a ’o tei ’ore i fa’auehia ’ia fa’aea ā.

5 ’A fa’aru’e na ’outou ia Babulonia. ’Ia mā ’outou ’o tē hōpoi i te mau fāri’i a te Fatu.

6 ’A fa’atupu i tā ’outou mau ’āmuira’a mo’a, ’e ’a parau pinepine te tahi i te tahi. ’E ’ia pi’i mai ho’i te mau ta’ata ato’a i te i’oa o te Fatu.

7 ’Oia ïa, ’oia mau tē parau fa’ahou atu nei au ia ’outou na, ’ua tae mai te taime e fa’ataehia atu ai te reo o te Fatu ia ’outou na : ’A fa’aru’e na ’outou ia Babulonia ; ’a ha’aputuputu mai na ’outou mai roto mai i te mau nūna’a, mai nā ’āpo’o mata’i e maha ra, mai te tahi hope’a mai o te ra’i ē tae roa atu i te tahi hope’a o te ra’i.

8 ’A tono atu i te mau peresibutero nō tā’u nei ’ēkālesia i te mau nūna’a i te ātea ’ē ra ; i te mau motu o te moana ra ; ’a tono atu i te mau fenua ’e’ē ; ’a ti’aoro atu i te mau nūna’a ato’a, i te mau ’Ētene nā mua, ’e i muri iho i te mau ’āti Iuda.

9 ’E inaha, ’e ’a hi’o na, teie tā rātou parau poro’i, ’e te reo o te Fatu i te mau ta’ata ato’a : ’A haere atu na ’outou i te fenua nō Ziona, ’ia fa’arahihia te mau ’ōti’a nō tō’u nei feiā, ’e ’ia ha’apūaihia tōna mau titi, ’e ’ia haere atu Ziona i te mau fenua ē ’ati noa a’e.

10 ’Oia ïa, ’a fa’atae atu i te parau poro’i i rotopū i te mau ta’ata ato’a : ’A ara mai na, ’a ti’a mai na, ’e ’a haere atu na nō te fārerei i te Tāne Fa’aipoipo ’Āpī ; inaha, ’e ’a hi’o na, tē haere mai nei te Tāne Fa’aipoipo ’Āpī ; ’a haere atu na ’outou e fārerei iāna. ’A fa’aineine na ’outou ia ’outou iho nō te mahana rahi o te Fatu.

11 Nō reira, ’a ara, ’aore ho’i ’outou i ’ite i te mahana ’e te hora.

12 Nō reira, ’a tu’u atu ia rātou ’o tei rotopū i te mau ’Ētene ra ’ia horo atu i Ziona.

13 ’E ’a tu’u atu ia rātou nō Iuda ra ’ia horo atu i Ierusalema, i te mau mou’a nō te fare o te Fatu.

14 ’A haere atu na ’outou i rāpae i te mau nūna’a, ’oia mai roto atu ia Babulonia, mai rotopū atu i te ’ino rahi, ’oia ho’i te Babulonia pae vārua.

15 ’Āre’a rā ’oia mau, tē nā ’ō mai nei te Fatu ē, ’eiaha ’ia nā roto i te rū noa tā ’outou horora’a, ’ia fa’aineinehia rā te mau mea ato’a i mua ia ’outou na ; ’e ’o ’oia ’o tē haere ra, ’eiaha ’oia ’ia hi’o i muri, ’o te tae mai te ha’amoura’a ’oi’oi i ni’a iāna ra.

16 ’A ha’apa’o ’e ’a fa’aro’o mai na, ’o ’outou e te mau ta’ata o te fenua nei. ’A fa’aro’o ’āmui mai na ’outou, e te mau peresibutero nō tā’u nei ’ēkālesia, ’e ’a fa’aro’o ho’i i te reo o te Fatu ; nō te mea tē ti’aoro mai nei ’oia i te mau ta’ata ato’a, ’e tē fa’aue mai nei ’oia i te mau ta’ata ato’a i te mau vāhi ato’a ’ia tātarahapa.

17 Inaha ho’i, ’ua tono mai te Fatu ra te Atua i te melahi i te ti’aorora’a nā roto i te reva, i te nā-’ō-ra’a ē : ’A fa’aineine na ’outou i te ’ē’a o te Fatu, ’e ’a fa’atītī’aifaro na i tōna mau haere’a, nō te mea tē fātata mai nei te hora nō tōna taera’a mai—

18 ’A ti’a mai ai te ’Ārenio i ni’a i te mou’a nō Ziona, ’e i pīha’i iho ho’i iāna, hō’ē hānere ’e e maha ’ahuru ma maha i te tauatini, ma te i’oa o tōna Metua i te pāpa’ira’ahia i ni’a iho i tō rātou mau rae.

19 Nō reira, ’a fa’aineine na ’outou nō te taera’a mai o te Tāne Fa’aipoipo ’Āpī ; ’a haere atu na ’outou, ’a haere na ’outou nō te fārerei iāna.

20 Inaha ho’i, e ti’a mai ’oia i ni’a i te mou’a nō ’Ōliveta, ’e i ni’a i te moana rahi, ’oia te moana hōhonu ra, ’e i ni’a i te mau motu o te moana, ’e i ni’a i te fenua nō Ziona.

21 ’E e parau mai ’oia i tōna reo mai roto mai ia Ziona, ’e e parau mai ’oia mai roto mai ia Ierusalema, ’e e fa’aro’ohia tōna reo i rotopū i te mau ta’ata ato’a ;

22 ’E e riro te reira ’ei reo mai te reo o te mau pape e rave rahi, ’e ’ei reo nō te pātiri rahi ’o tē ha’apararī i te mau mou’a, ’e e ’ore te mau peho e ’itehia mai.

23 E fa’aue ’oia i te moana hōhonu ra, ’e e fa’ahorohia atu te reira i te mau fenua i te pae apato’erau ra, ’e e riro te mau motu ’ei fenua hō’ē ;

24 E fa’aho’ihia atu te fenua nō Ierusalema ’e te fenua nō Ziona i tō rāua iho vāhi, ’e e riro te fenua nei mai te huru mātāmua hou te reira i vāhihia ai.

25 ’E e ti’a mai te Fatu, ’oia te Fa’aora, i rotopū i tōna iho feiā, ’e e fa’atere hau ’oia i ni’a i te mau ta’ata ato’a ra.

26 ’E ’o rātou i te mau fenua i te pae apato’erau ra e ha’amana’o te Fatu ia rātou ; ’e e fa’aro’o tō rātou mau peropheta i tōna reo, ’e e ’ore e tāpe’a fa’ahou ā ia rātou iho, ’e e tā’iri atu rātou i te mau mato, ’e e tahe atu te pape pa’ari i mua i tō rātou aro.

27 ’E e fa’ati’ahia mai te hō’ē purūmu rahi i rōpū i te moana hōhonu.

28 ’E e riro tō rātou mau ’enemi ’ei a’ua’ura’a nā rātou ;

29 ’E i roto i te mau vāhi ano e tahe mai te mau roto pape ora ; ’e e ’ore roa te fenua marō roa e po’ihā fa’ahou.

30 ’E e ’āfa’i mai rātou i tā rātou mau tao’a rahi i te mau tamari’i a Epheraima, ’oia tō’u mau tāvini.

31 ’E e rurutaina te mau ’ōti’a o te mau ’āivi mure ’ore i mua i tō rātou aro.

32 ’E i te reira vāhi rātou e topa atu ai i raro ’e e fa’akoronahia ai ho’i i te hanahana, ’oia i roto ia Ziona, ’e te rima o te mau tāvini o te Fatu, ’oia te mau tamari’i a Epheraima.

33 ’E e fa’a’īhia rātou i te mau hīmene nō te ’oa’oa mure ’ore.

34 Inaha, ’o teie te ha’amaita’ira’a a te Atua mure ’ore i ni’a i te mau ’ōpū nō ’Īserā’ela, ’e te ha’amaita’ira’a rahi a’e i ni’a i te upo’o o Epheraima ’e tōna mau taea’e.

35 ’E ’o rātou ato’a nō te ’ōpū nō Iuda, i muri a’e i te ha’amo’ara’ahia tō rātou mamae i roto i te huru mo’a i mua i te Fatu, nō te pārahi i mua i tōna aro, i te ao ’e te ru’i, ē a muri ē a muri noa atu.

36 ’E i teienei ’oia mau tā te Fatu e parau atu nei, ’ia ti’a i teie nei mau mea ’ia ’itehia i rotopū ia ’outou, e te mau ta’ata nō te fenua nei, ’ua tono atu vau i tā’u melahi i te ma’uera’a nā rōpū i te reva, ma te ’evanelia mure ’ore, ’o tei fā mai i te tahi mau ta’ata ’e ’ua hōro’a atu i te reira i te ta’ata nei, ’o tē fā mai ho’i i te ta’ata nei e rave rahi ’o tē pārahi nei i ni’a i te fenua nei.

37 ’E e porohia atu teie nei ’evanelia i te mau nūna’a ato’a, i te mau ’ōpū ato’a ’e i te mau reo ato’a, ’e i te mau ta’ata ato’a.

38 ’E e haere atu te mau tāvini o te Atua, i te paraura’a ma te reo rahi ē : ’A mata’u atu i te Atua ’e ’a fa’ahanahana atu iāna, ’ua tae ho’i i te hora fa’autu’ara’a nāna ra ;

39 ’E ’a ha’amori iāna ’o tei hāmani i te ra’i, ’e te fenua, ’e te moana, ’e te mau pape piha’a—

40 I te pi’ira’a atu i te i’oa o te Fatu i te ao ’e i te ru’i i te nā-’ō-ra’a atu ē : ’Āhiri ’oe e hahae mai i te mau ra’i, ’e ’a haere mai ai i raro nei ; ’ia tahe mai te mau mou’a i raro i mua i tō ’oe aro.

41 ’E e pāhonohia te reira i ni’a i tō rātou mau upo’o ; nō te mea e riro te aro o te Fatu mai te auahi fa’atahe ’o tē ’ama ra, ’e mai te auahi ha’apiha’a pape ra.

42 E te Fatu ē, e haere mai ’oe i raro nei nō te fa’a’ite atu i tō ’oe i’oa i tō ’oe mau ’enemi, ’e e rurutaina te mau nūna’a ato’a i mua i tō ’oe aro—

43 ’Ia rave ’oe i te mau mea i mata’uhia ra, te mau mea ’aore i tīa’ihia e rātou ra ;

44 ’Oia ïa, ’ia tae mai ’oe i raro nei, ’e ’ia tahe te mau mou’a i raro i mua i tō ’oe aro, e fārerei ai ’oe iāna ’o tē ’oa’oa nei ’e ’o tē rave nei i te mea parauti’a, ’o tē ha’amana’o nei ia ’oe i roto i tō ’oe mau haere’a.

45 Nō te mea mai te ha’amatara’a mai ā o te ao nei ’aore ā te mau ta’ata i fa’aro’o ’e ’aore rā i āputa mai nā roto i te tari’a, ’e ’aore ato’a ho’i te hō’ē mata i ’ite, e te Atua ē, maori rā ’o ’oe, i te huru rahi o te mau mea tā ’oe i fa’aineine nōna ’o tei tīa’i ia ’oe na.

46 ’E e parauhia ïa ē : ’O vai teie ’o tē haere mai nei i raro nei nō ’ō mai i te Atua i te ra’i ra, ma te ’ahu i ’ūhia ra, ’oia ïa, mai te mau retioni ’ite-’ore-hia ra, ma te fa’a’ahuhia i tōna ’ahu hanahana, i te haerera’a nā roto i tōna pūai rahi ?

47 ’E e parau mai ’oia ē : ’O vau nei ïa ’o tei parau mai nā roto i te parauti’a, ma te pūai nō te fa’aora.

48 ’E e riro e mea ’ute’ute tō te Fatu ra ’ahu, ’e mai tō te ta’ata i ta’ata’ahi i roto i te fāri’i fa’ahopuera’a vine tōna ra mau ’ahu.

49 ’E nō te rahi o te hanahana o tōna aro e huna atu te mahana i tōna mata nō te ha’amā, ’e e tāpe’a atu te ’āva’e i tōna māramarama, ’e e hurihia atu te mau feti’a mai ni’a mai i tō rātou ra mau vāhi.

50 ’E e fa’aro’ohia tōna reo : ’O vau ana’e tei ta’ata’ahi i te nene’ira’a vine, ’e ’ua fa’atae au i te ha’avāra’a i ni’a i te mau ta’ata ato’a ; ’e ’aita hō’ē a’e ta’ata i pīha’i iho iā’u nei ;

51 ’E ’ua ta’ata’ahi au ia rātou i roto i tō’u riri ’ū’ana, ’e ’ua ta’ata’ahi au i ni’a ia rātou i roto i tō’u riri, ’e ’ua pīpī au i tō rātou toto i ni’a i tō’u mau ’ahu, ’e ’ua tāfetafeta tō’u ’ahu ato’a ; ’e ’o teie te mahana tāho’ora’a i roto i tō’u ’ā’au.

52 ’E i teienei ’ua tae mai te matahiti nō tō’u feiā i fa’aorahia ra ; ’e e fa’ahiti mai ho’i rātou i te here marū o tō rātou ra Fatu, ’e te mau mea ato’a ho’i tāna i hōro’a atu nā rātou ra mai te au i tōna maita’i, ’e mai te au i tōna here marū, ē a muri ē a muri noa atu.

53 I roto i tō rātou ato’a ra mau ’ati ’ua ’ati ato’a ho’i ’oia. ’E nā te melahi nō mua mai i tōna ra aro i fa’aora ia rātou ; ’e nā roto i tōna here ’e tōna aroha i fa’aora ai ’oia ia rātou, ’e i rave ai ia rātou, ’e i hōpoi noa ai ho’i ia rātou i te mau mahana tahito ato’a ra ;

54 ’Oia ïa, ’e ’o Enoha ato’a, ’e ’o rātou tei ’āmui mai iāna ra ; te mau peropheta nā mua a’e iāna ra ; ’e ’o Noa ato’a, ’e ’o rātou tei nā mua a’e iāna ra ; ’e ’o Mose ato’a, ’e ’o rātou tei nā mua a’e iāna ra ;

55 ’E mai ia Mose ē tae noa mai ia Eliaha te peropheta, ’e mai ia Eliaha te peropheta ē tae noa mai ia Ioane, i pīha’i iho i te Mesia i te taime nō tōna ti’afa’ahoura’a, ’e te mau ’āpōsetolo mo’a, i pīha’i iho ia Aberahama, Isaaka, ’e Iakoba, e ti’a atu rātou pā’āto’a i mua i te aro o te ’Ārenio.

56 ’E e ’īritihia mai ho’i te mau mēnema o te feiā mo’a ; ’e e ti’a mai rātou i ni’a ma te ti’a atu i te pae rima ’atau o te ’Ārenio, i te taime ’oia e ti’a mai ai i ni’a i te mou’a Ziona, ’e i ni’a i te ’oire mo’a, te Ierusalema ’āpī ; ’e e hīmene mai rātou i te hīmene a te ’Ārenio, i te ao ’e i te ru’i ē a muri ē a muri noa atu.

57 ’E nō te reira ho’i, ’ia noa’a i te ta’ata te mau hanahana ’o tei ’ōpuahia ’ia fa’a’itehia mai, ’ua fa’atae mai te Fatu i te ’īra’a nō tāna ’evanelia, tāna fafaura’a mure ’ore, ’a paraparau mai ai ma te māramarama ’e te ’ōhie—

58 Nō te fa’aineine i te feiā paruparu nō te mau mea ’o tē tae mai i ni’a i te fenua nei, ’e nō te tere o te Fatu i te mahana e fa’aha’amā ai te feiā paruparu i te feiā ’aravihi ra, ’e e riro ai te mea iti haiha’i ra ’ei nūna’a pūai roa, ’e e fa’ahoro ’ē atu nā ta’ata to’opiti i tā rāua mau ’ahuru i te mau tauatini ra.

59 ’E nā roto i te mau mea paruparu o te fenua nei te Fatu e tā’iri ai i te mau nūna’a nā roto i te mana o tōna Vārua.

60 ’E ’o teie ho’i te tumu teie nei mau fa’auera’a i hōro’ahia mai ai ; ’ua fa’auehia rātou ’ia tāpe’a noa i te reira i te mahana i hōro’ahia mai ai ’e ’eiaha ’ia fa’atae atu i tō te ao nei ; i teienei rā e fa’ataehia atu taua mau mea ato’a ra i te mau ta’ata ato’a—

61 ’E mai te au ho’i teie i te mana’o ’e te hina’aro o te Fatu, ’o tē fa’atere nei i ni’a a’e i te mau ta’ata ato’a.

62 ’E ’o ’oia ’o tei tātarahapa ’e ’o tei ha’amo’a iāna iho i mua i te aro o te Fatu e hōro’ahia atu ïa te ora mure ’ore.

63 ’E i ni’a iho ia rātou ’o tē ’ore e ha’apa’o i te reo o te Fatu ra e fa’atupuhia ai te mau mea i pāpa’ihia e te peropheta ra Mose, ’oia ho’i, e tāpū-’ē-hia atu rātou mai rotopū atu i te mau ta’ata.

64 ’E te reira ato’a ’o tei pāpa’ihia e te peropheta ra Malaki : Inaha ho’i, tē fātata mai ra te mahana mai te umu ra i te ’amara’a ; ’e te feiā te’ote’o ato’a, ’oia ïa, te feiā ato’a i rave i te ’ohipa ’ino ra, e riro ïa ’ei ’aihere ; e ’ama rātou ’ia tae i taua mahana ra, tē nā reira mai ra Iehova sabaota ra ; e ’ore roa e fa’atoehia tō rātou a’a ’e te ’āma’a ato’a.

65 Nō reira, teie ïa te pāhonora’a a te Fatu ia rātou ra :

66 I taua mahana ra i haere mai ai au i tō’u ihora, ’aita te hō’ē ta’ata i rotopū ia ’outou i fāri’i mai iā’u, ’e ’ua tīahi-’ē-hia atu ’outou.

67 Iā’u ho’i i ti’aoro fa’ahou atu ai, ’aore te hō’ē o ’outou i pāhono mai ; noa atu rā i te reira ’aita tō’u rima i ha’apotohia ’ia ’ore e ti’a iā’u ’ia fa’aora, nā reira ato’a ho’i tō’u mana nō te fa’aora mai.

68 Inaha, i tō’u ’avaura’a atu, ’ua marō te moana iā’u. E fa’ariro vau i te mau ’ānāvai ’ei mēdēbara ; e hau’a ’ino tā rātou mau i’a, ’e e pohe ho’i i te po’ihā.

69 E fa’a’ahu vau i te mau ra’i i te pōiri ’ere’ere, ’e e fa’ariro vau i te ’ahu ’oto ’ei vehi nō rātou ra.

70 ’E ’o teie tē noa’a ia ’outou i tō’u nei rima—e tārava ’outou i raro ma te ’oto ra.

71 Inaha, ’e ’a hi’o na, ’aore hō’ē ta’ata nō te fa’aora mai ia ’outou ; nō te mea ’aore ho’i ’outou i fa’aro’o mai i tō’u nei reo iā’u i ti’aoro atu ai ia ’outou na mai roto mai i te mau ra’i ; ’aore ho’i ’outou i ti’aturi i tō’u mau tāvini, ’e i te taime rātou i tonohia atu ai ia ’outou na, ’aore ’outou i fāri’i mai ia rātou.

72 Nō reira, ’ua tā’ati atu rātou i te ’itera’a pāpū ’e ’ua ru’uru’u atu ra i te ture, ’e ’ua tu’uhia atu ’outou i te pōiri ra.

73 E reva ’ē atu teie feiā i te pōiri ta’ota’o, tei reira ho’i te ’oto, te mihi, ’e te ’au’aura’a niho ra.

74 Inaha nā te Fatu ra tō ’outou Atua i parau mai i te reira. ’Āmene.