“O Le Malaga a le Paranesi a Kolasavile,” Faaaliga i le Talaaga (2016)
“O Le Malaga a le Paranesi a Kolasavile,” Faaaliga i le Talaaga
O Le Malaga a le Paranesi o Kolasavile
Atonu o Iosefa Samita sa na o ia ina ua ia iloa lana Uluai Faaaliga ma mulimuli ane feiloai ma le agelu o Moronae, ae sa lagolagoina o ia e lona aiga. Sa fatuina e lona tina, tamā, ma nai ona tei se upegafesootai lagolagosua faaleaiga. Sa mafai ona ia faatuatuaina ona matua. Sa mafai ona ia faalagolago i ona tei. O le faletua o Iosefa, o Ema, na tauaveina ma Iosefa ia avega ma faigata o le taitaiga, tetee, ma sauaga. O isi uo, e pei o Matini Harisi, Oliva Kaotui, ma Tavita ma Ioane Uitimera, sa lagolagoina Iosefa a o ia aumaia le Tusi a Mamona, faatulaga le Ekalesia, ma amatalia ana taumafaiga e fausia se nuu o Siona.
E tutusa lava le taua ia i latou o e na faamalosia ma lagolagoina Iosefa i le tele o ona tofotofoga ma mafatiaga, o le aiga lautele lea o Knight ma o latou tuaoi i Kolasavile, Niu Ioka. I le auai o i latou lava faatasi ma Iosefa Samita talavou, sa latou mulimuli atu ai ia te ia i le Ekalesia tuputupua’e, puipuia o ia, ma faatuina amataga o se tasi o uluai paranesi o le Ekalesia. O le tala i le Au Knights ma le Paranesi a Kolasavile o loo molimau mai i le mana o le sootaga ma le faauo i le Toefuataiga o le talalelei ma le fausiaina o le malo o le Alii.
O le tala i le Au Paia i Kolasavile na amata i asiasiga a Iosefa i lea itulagi i le ogatotonu o le 1820, ina ua amata ona faigaluega o ia mo Iosia Stowell o le tuaoi o Peniperise i Saute, Niu Ioka, i se taumafaiga le manuia o le sailiga oa sa tanumia. E ui ina sa le manuia lena sailiga, ae na maua ai e Iosefa Samita le faauoga vavalalata ma Iosefa Knight le Matua ma lona atalii o Newel Knight. Mulimuli ane, sa fesoasoani ai Iosefa Knight le Matua ia Iosefa i lana faamasaniga o Ema Hale. Sa i ai o ia i le fale o le au Samita i le po na aumaia ai e Iosefa Samita, faatasi ai ma le fesoasoani a Ema, papatusi auro mai le Mauga o Kumora, ma sa ia tuuina atu taumafa ma anomea tusitusi ia Iosefa Samita i le gasologa o le faaliliuga o le Tusi a Mamona.
O tagata o le aiga o Knight ma nisi o o latou tuaoi o nisi na muamua auai i le Ekalesia i le 1830. Mulimuli ane i lena tausaga sa avea i latou ma amataga o se tasi o paranesi muamua (pe afai e le o paranesi muamua) na faatulagaina i le Ekalesia. Ia Iulai 1830, sa fautuaina ai Iosefa i ni faaaliga se lua, lea ua maua nei i le Mataupu Faavae ma Feagaiga 24 ma le 26, e asiasi i tagata o le ekalesia i Kolasavile, e aofia ai ma le au Knight, e tuuto atu lona taimi i le “suesueina o Tusitusiga Paia & talai atu ai & ina ia faamautu le Ekalesia i Kolasavile.” Sa nofo Ailama Samita i le eria i le faaiuga o le 1830 ma sa pulefaamalumalu i le paranesi mo ni nai masina. O le na suitulaga ia te ia o le atalii o Iosefa Knight le Matua o Newel.
O Le Siitia Atu i Ohaio
Ina ua tuuina atu faatonuga ia Tesema 1830 ma Ianuari 1831 (tagai i le Mataupu Faavae ma Feagaiga 37 ma le 38) mo tagata o le ekalesia i Niu Ioka e siitia atu i le itulagi o le Vanu o Ohaio, sa faia e tagata o le Paranesi o Kolasavile ni osigataulaga maoae tautupe ma saunia i latou lava mo le malaga atu i sisifo. O aiga e fesootai ma le Paranesi a Kolasavile na aofia ai, faatasi ai ma isi, o le au Knight, Pecks, DeMilles, Stringhams, Culvers, Slades, Badgers, Hineses, ma Carters. Sa faamoemoeina tagata uma ia faapotopoto i Ohaio, ma o e matitiva e le tatau ona tuulafoaiina e nonofo. O le tuueseina o o latou olaga ma fale sa i ai muamua, i lalo o le taitaiga a Newel Knight, na amata ai e le paranesi le malaga atu i le eria o Katelani ia Aperila 1831. Ina ua latou taunuu ia Me, sa fautuaina i latou ia “nonofo faatasi pea, ma o atu i se taulaga tuaoi e igoa ia Tomasone, o se tagata e igoa ia [Limani] Copley sa i ai se fasi fanua tele iina lea na ia ofo atu e tuu atu i le usoga e nonofo ai.”
Sa ofo atu e Copley lona laueleele atonu e tali atu ai i se faaaliga na muamua atu (tagai i le Mataupu Faavae ma Feagaiga 48) na tuuina mai e tali ai se fesili autu i le Au Paia i Ohaio i le amataga o le 1831: “O a ni sauniuniga o le a tatou faia mo o tatou Uso mai Sasae & o afea & pe faapefea?” Na tali mai le faaaliga, ”O le tulaga e oo i ai lo outou mauaina o laueleele o le a outou faasoa atu i le Au Uso i Sasa’e.” Sa faafeiloai e Copley ia tagata o le Paranesi a Kolasavile, ma e lei leva ona latou taunuu i Tomasone, ae amata ona latou totoina o laau o faatoaga ma fausia fale i luga o lana faatoaga e lava ma totoe e 759-eka.
I le aso 20 o Me, na maua ai e Iosefa Samita se isi faaaliga, lea ua faailoa mai nei o le Mataupu Faavae ma Feagaiga 51, na faatonuina ai i latou o e na faamautu i Tomasone ina ia avea ma se tasi o tagata muamua e faataitaia mataupu faavae na faaalia mai talu ai nei o le faapaiaga ma le tausimea. O Epikopo Eteuati Paterika faatoa valaauina o le a ”talia meatotino a lenei Nuu ua osifeagaiga ai ma a’u” ma & tofi atu i lenei Nuu la latou vaega e tutusa ai tagata taitoatasi e tusa ma o latou aiga e tusa ma o latou manaoga.” E ui ina faamanino mai e le faaaliga e faapea o Ohaio o le a avea ma nofoaga le tumau e faapotopoto i ai, ae sa faamanatu atu ia i latou o le ” itula & ma le aso e lei tuuina atu ia te i latou” mo lo latou siitia atu i le aai o Siona i le lumanai. Sa tatau ona latou ”galulue i luga o lenei laueleele e pei o ni tausaga.”
Peitai, sa itiiti se taimi taua o tagata o le Paranesi o Kolasavile e usitaia ai le poloaiga e faatino le tulafono o le faapaiaga. O le faaiuga a Limani Copley e faasoa atu lona fanua sa faia i le suega i le amataga o Me ina ua ia auai i se misiona i lana aulotu o Sieka sa i ai muamua. O lea aafiaga na foliga mai na tulai mai ai ni masalosaloga na faavaivaia ai lana molimau, ma e lei leva mulimuli ane ona toe foi atu o ia i Tomasone, sa ia solia ai lana maliega ma faamalosia le tafiesea ai le Au Paia mai ana meatotino. Ia Iuni 1831, faatasi ai ma tulaga o o latou lumanai e lē mautinoa ma le faaletonu o o latou olaga, sa sailia ai e le au Knight ma isi tagata o le Paranesi a Kolasavile se fautuaga ma se taitaiga mai ia Iosefa Samita po o le a le isi mea e soso’o e tatau ona latou faia.
Na oo mai faatonuga i le tulaga o se faaaliga ua iloa nei o le Mataupu Faavae ma Feagaiga 54: ”Ave a outou Malaga i itulagi i sisifo i Misuri [sic] i tuaoi o sa Lamana & pe a uma ona outou faia o le Malaga Faauta Ou te fai atu ia te outou, ia outou saili se olaga e pei o tagata seia ou saunia se nofoaga mo outou & ia toe onosai ai i puapuaga.” Sa faamatala mulimuli ane e Newel Knight le tulaga: ”Ua matou malamalama nei o [Ohaio] e le o le fanua o lo matou tofi—o le laueleele o le folafolaga, aua sa faailoa mai i se faaaliga e faapea o Misuri o le nofoaga ua filifilia mo le faapotopotoina o le ekalesia, ma e toatele na valaauina e taitai atu le ala i lena setete.” I le toe fusi faatasia, sa saunia ai tagata o Kolasavile mo la latou malaga. Sa latou filifilia Newel Knight e faaauau pea ona pulefaamalumalu ia i latou e ui lava i lona valaauga talu ai, e ala i faaaliga, e auauna atu i se misiona talai (tagai i le Mataupu Faavae ma Feagaiga 52). I se faaaliga ua faamaonia nei o le Mataupu Faavae ma Feagaiga 56, sa faatagaina ai Knight e faataatia ese lona valaauga faamisiona ae malaga atu i Misuri o le taitai o le Paranesi a Kolasavile.
O Le Siitia Atu i Misuri
O le tuua ai o Tomasone i le amataga o Iuni 1831, e onosefulu tagata o le paranesi na taunuu atu i le Taulaga o Kaw i le Itumalo o Siakisone, Misuri, i le aso 26 o Iulai ina ua mavae se malaga pe tusa ma le afe ono selau maila. E ui ina sa lei leva ona taunuu Iosefa Samita e muamua atu i le Au Paia aKolasavile, ae sa i ai lo latou tulagaese i le avea ai ma uluai paranesi o le Ekalesia e nofoia le laueleele sa faapaiaina e avea ma Siona i le aso 2 o Aokuso, 1831, e Sini Rikitone. O le mea e faanoanoa ai, na maliu le faletua o Iosefa Knight le Matua, o Polly, i ni nai aso talu ona latou taunuu. O Iosefa Samita, e tusa ai ma lana talafaasolopito na tusia mulimuli ane, sa ia ”auai i le falelauasiga o tuafafine Polly [Peck] Knight. … O le maliu muamua lea i le ekalesia i lenei laueleele, ma e mafai ona ou fai atu o se tagata agavaa o le ekalesia o loo moe ona o Iesu seia oo i le toetu.”
O lena lava aso, na maua ai e Iosefa le faaaliga lea ua iloa nei o le Mataupu Faavae ma Feagaiga 59, o loo otooto mai ai le ala e tatau ona tausia ai e le Ekalesia ia aso o le Alii. I lena faaaliga, sa faaaofia ai e le Alii upu faamafanafana mo le aiga ma uo a Polly Knight: ”Amuia … i latou ia o e ua o mai i luga i lenei laueleele ma le manatu tasi i lo’u mamalu e tusa ma a’u Poloaiga mo i latou o e e ola, o le a fai mo o latou tofi le lalolagi ma o i latou o e e oti o le a malolo mai ia latou galuega uma & e mulimuli atu ia te i latou, o le a latou maua se pale i fale o lo’u Tamā ua Ou saunia mo i latou.”
Na toe asiasi atu Iosefa Samita i ana uo i le Paranesi a Kolasavile i Misuri ia Aperila 1832. I lena taimi, sa faamauina ai e Iosefa ia tagata o le paranesi mo le ola e faavavau. I le taimi o le faalavelave mai le Itumalo o Siakisone i le 1833, sa sosola ese ai le Paranesi a Kolasavile ma le toatele o isi Au Paia i le Itumalo e lata ane o Clay. Sa latou nonofo faatasi iina mo se taimi, e oo lava i le fausiaina o se falesa. Peitai, ina ua siitia atu le Ekalesia i le Itumalo o Caldwell i le 1836, sa faataapeapeina tagata o le paranesi, ma o lo latou taimi faatasi o se tasi o uluai iunite faatulagaina i le Ekalesia na faamutaina.
Sa auai le au Knight ma isi mai le paranesi muamua i le toatele o le Au Paia i le sosola atu i Ilinoi o le taunuuga o le taua i le va o le Au Paia ma nisi o o latou tuaoi i Misuri i le 1838. Sa faamautu le au Knight i le eria o Navu ma tumau faamaoni ai o ni tagata o le Ekalesia ma uo a Iosefa Samita. Ina ua mavae le faamaturoina o Iosefa i le 1844, sa mulimuli le aiga o Knight i le taitaiga a le Korama a Aposetolo e Toasefululua. Na maliliu uma Iosefa Knight le Matua ma lona atalii o Newel i le 1847 i le taimi o le malaga tele mai Navu i le Vanu o Sate Leki.