“O Malo ma Tulafono,” Faaaliga i le Talaaga (2016)
“O Malo ma Tulafono,” Faaaliga i le Talaaga
O Malo ma Tulafono
Sa vaai atu Laimani Wight ma le faamemelo i le tautua faamiliteli a lona tamā i le taimi o le Fetauaiga Tetee a Amerika. Ia Wight, o le manumalo o Amerika i lena feteenaiga sa tele atu mea na ia faia nai lo le puipuia o le tutoatasi mo le Iunaite Setete; sa faamautu ai aia tatau mo le ola ma le saolotoga mo tagata Amerika. Sa talitonu Wight o na tulaga faatauaina o le talatuu tumau lea o le Taua Tetee a Amerika ma sa auai ai e tau i le Taua o le 1812 e puipuia ai i latou.
Peitai, o le vaaiga lelei a Wight i nei mataupu lelei faaAmerika sa matuai luitauina lava i ona aafiaga o se tagata o le Ekalesia sa nofo i Misuri i le vaitaimi o le 1830. Ina ua siitia atu o ia ma le silia ma le tasi le afe o isi Au Paia o Aso e Gata Ai i le Itumalo o Siakisone, Misuri, i le va o le 1831 ma le 1832, e toatele tagata na nonofo i le itumalo na lē fiafia i talitonuga o le Au Paia o Aso e Gata Ai ma sa fefefe i a latou faatosinaga e ono i ai i tulaga faaupufai i le lotoifale. Ae nai lo le faamamaluina o aia tatau a tagata o le Ekalesia e tapuai ma palota e tusa ai ma o latou lava lotofuatiaifo, sa faaaoga e tagata o le Itumalo o Siakisone ni sauaga faaopoopo e faamalosia ai le Au Paia e lafoai lo latou faatuatua pe tuua le itumalo. I le avea ai ma tagata leaga, sa sauaina faaletino ai e nei tagatanuu Misuri ia tagata o le Ekalesia sa nonofo i le itumalo, faatamaia a latou meatotino, ma iu ai ina faatonuina i latou e o ese.
Sa lē fiafia Wight ona o le talia e taitai o le setete ma le malo tutotonu ma faamalosiauina ai foi na ituaiga o faatinoga e faasaga i tagata o le Ekalesia. I se talosaga i le Senate a le Iunaite Setete i ni nai tausaga mulimuli ane, na te tautino atu ai o lona ”tamā o se fitafita sa tau i le taua tetee a Amerika” ma o nei soliga o aia tatau a tagatanuu o le Ekalesia ”e le o saolotoga ia na ia [tuuina mai] mo a’u ma a’u fanau.” O le talosaga a Wight na faaalia ai se vevesi i le va o le faamaoni na ia lagonaina i lona atunuu, o lona le fiafia i faatinoga a le toatele o alii na filifilia e pulea lena atunuu, ma lona tuuto atu i se faatuatua sa ia talitonu o le a i ai pea lava nai lo malo uma faalelalolagi.
Toe Totogi
E pei o Laimani Wight, sa i ai i taitai o le Ekalesia se sootaga faigata ma malo uma e lua, i le lotoifale ma le atunuu. Ina ua tutuliese tagata o le Ekalesia mai le Itumalo o Siakisone mai o latou fale ia Novema 1833, sa talitonu taitai o le Ekalesia sa le mafai e malo o Misuri ma le Iunaite Setete ona puipuia aia tatau a tagatanuu o le Au Paia i Misuri ma lagonaina le faamalosia e tetee atu i faatinoga (ma le le faatinoina) e taitai filifilia lea na taitai atu ai i le tutulieseina o le Au Paia. I le taimi lava lea, sa amata ai ona latou faia ni talosaga faaletulafono ma faaupufai i nei lava faigamalo e tasi mo le toefuataiga o a latou meatotino ma aia tatau o tagatanuu i le Itumalo o Siakisone.
Sa i ai ni nai tagatanuu iloga sa tigāalofa i le tulaga pagatia o le Au Paia, ae o le toatele sa masalosalo i faamoemoega o le Au Paia. O le tautinoga a le Ekalesia i le pule o faaaliga ma le televave o le faapotopotoina o tagata o le Ekalesia i Ohaio ma Misuri na tulai mai ai ni atugaluga i nisi o tagata Amerika e faapea na faamoemoe le Ekalesia e faavae lana lava sosaiete e le amanaiaina tulafono ma le pule a le Iunaite Setete. E mafai faapefea e taitai o le Ekalesia ona tetee atu i a latou faiga le lelei e le malo a o faailoa atu foi la latou lagolago mo le malo ma e oo lava i le talosagaina o le malo mo se fesoasoani?
O Le Tautinoga
I le aso 17 Aokuso, 1835, i le lotolotoi o taumafaiga a le Au Paia e talosagaina le malo mo se fesoasoani, sa tuuina atu ai e Oliva Kaotui ma Sini Rikitone se pepa o faamatalaga ua faaulutalaina ”Declaration of Government and Law” [Tautinoga o Malo ma Tulafono] i tagata o le Ekalesia i Katelani, Ohaio. O le tautinoga—ua avea nei ma Mataupu Faavae ma Feagaiga 134—sa saili e talanoaina popolega uma o le Au Paia. I le ta’ua ai faapea ”sa faatutuina e le Atua malo mo le lelei o tagata” ma o le a faamasinoina e le Atua tagata taitoatasi ”mo a latou mea e fai” o ni taitai o le malo, na faamatala atu e le tautinoga ia malo faalemalo o ni faalapotopotoga faalelalolagi o a latou faatinoga e i ai taunuuga faaleagaga. E ala i le faamalamalama atu faapea o taitai uma o le malo ”e tatau ona faamamaluina i lona lava tulaga” ma ”e tatau i tagata uma ona ava ma faaaloalo i tulafono,” sa faamamafa mai ai e le tautinoga ia aoaoga a le Ekalesia e faapea, o ona tagata e tatau ona avea ma tagatanuu usiusitai i tulafono o e saofaga i le ”filemu ma le lotogatasi” o nuu o loo latou nonofo ai. Sa finau mai e tatau i le malo ona aumaia le aia tatau a ona tagatanuu e tapuai ai e tusa ai ma o latou lava lotofuatiaifo ma o vaega faalelotu o loo aafia i sauaga faatautala ona o a latou faiga faalelotu sa faamaonia i le talosagaina o le malo mo le toe totogi mai. O le tau faailoa atu o aafiaga talu ai nei a le Au Paia i le Itumalo o Siakisone, sa faamautu atu ai pea e le tautinoga aia tatau a tagatanuu e puipuia ai i latou lava mai sauaga faalelotu pe afai e le o tali mai le malo i a latou talosaga mo se fesoasoani.
Sa taliaina e tagata o le Ekalesia le tautinoga ma faaaofia ai i le uluai lomiga o le Mataupu Faavae ma Feagaiga. E le pei o isi vaega o lena tusi lea na faaali mai ai e le Atua Lona finagalo i le Au Paia, o lenei vaega sa aofia ai le faamalamalamaina atu a Au Paia o la latou vaaiga ma talitonuga i tagata lautele. Sa ono tusia e Oliva Kaotui, ona sa ia tusia ai i le tele o autu na talanoaina i tusiga lata mai nei a le nusipepa i tusi i le faatonu. E ui sa toesea Iosefa Samita i le Teritori o Michigan ina ua tuuina atu le tautinoga i le Ekalesia, ae sa ia taliaina ma ta’ua mulimuli ane i lana lauga ma tusitusiga.
Auala na Faaaoga ai le Tautinoga
Aemaise lava ina ua mavae le 1838, ina ua tutuliese le Au Paia mai Misuri e le poloaiga faapitoa a le malo, sa talosagaina e Iosefa ma isi taitai o le Ekalesia e ala i mataupu faavae o le tautinoga a o latou finau mo aia tatau a tagatanuu o le Ekalesia. Mo se faataitaiga, i le 1840 a o i ai Iosefa i le itu i sasae o le Iunaite Setete e talosagaina le malo tutotonu mo le toe totogiina mai ina ua mavae le faatamaiaina o meatotino a tagata o le Ekalesia i Misuri, sa ia tusia ai se tusi i le faatonu o se nusipepa i Penesilevania lea na ia tali atu ai i faamatalaga na faia e nisi o fili o le Ekalesia i lena eria. Peitai, i le fatuina o le tusi, sa na ona kopiina ai e Iosefa le anotusi o le tautinoga e uiga i le malo, ma suitulaga i le ”Ou te talitonu” i tulaga uma o loo i ai i le tautinoga le fasifuaitau ”matou te talitonu.”
I ni nai masina mulimuli ane, sa maua mai ai e Iosefa, Sini Rikitone, ma Elias Higbee se Iloiloga faafaamasinoga i luma o se komiti o le Iunaite Setete o le au senatoa e taulimaina ai sauaga a Misuri. I lena iloiloga, sa taumafai ai le alii Konekeresi o Ioane Jameson o Misuri e tauamiotonuina sauaga ua mavae e faasaga i tagata o le Ekalesia e ala i le faapea mai na tuuina atu e Iosefa i e na mulimuli ia te ia le faatanaga e le amanaia ai tulafono o le laueleele. Sa mausali le teena e Elias Higbee o lenei faamatalaga, i le finau atu faapea o le Ekalesia ”sa lei taofi i se aoaoga faavae faapena pe sa talitonu foi i soo se mea faapena,” ma sa faasino atu le komiti i le ”Tautinoga o Malo ma Tulafono” i le Mataupu Faavae ma Feagaiga o se faamaoniga sa latou ”lolomiina ua leva talu ai [lo latou] talitonuga e uiga i lena mataupu.” Sa teena e lenei komiti o le Senate i le 1840 le toe totogiina atu o le Ekalesia mo o latou sauaga, ae sa taofimau taitai o le Ekalesia i tulaga faatauaina o loo faamatalaina i le tautinoga.
I le lua tausaga mulimuli ane, ina ua tusia e taitai o le Ekalesia lea ua lauiloa nei o le ”Wentworth Letter” [Tusi a Wentworth] o se faamatalaga puupuu o le talafaasolopito ma talitonuga o le Ekalesia, o mataupu faavae ua tuuina mai i le tautinoga e uiga i le malo e foliga mai ua musuia ai le anotusi o faamatalaga eseese e lua. O na faamatalaga, lea ua lauiloa nei o mataupu faavae o le faatuatua lona sefulutasi ma le sefululua, ua faamautu ai le tulaga o le Ekalesia i le saolotoga o alii ma tamaitai uma e tapuai i le Atua e tusa ai ma o latou lava lotofuatiaifo ma ana aoaoga e faapea o tagata o le Ekalesia e tatau ona usitai i taitai o le malo ma e tatau ona usiusitai i tulafono o le laueleele o loo latou nonofo ai.
Tuu atu ia Kaisara
Sa moomia e taitai o le Ekalesia i le vaitau o le 1830 ona faatautaia se vaaiga faigata faaupufai, ae o lo latou tulaga sa faigata ona e lei tupu muamua. O vaega faalelotu o loo saili e faatu se malo o le Atua i le lalolagi e manaomia i taimi uma ona fegalegaleai ma le faaeteete ma ”mana faalelalolagi o i ai.” Na feagai Iesu Keriso ma luitau talitutusa i le taimi o Lana galuega i la le tino. Ina ua tuuaia o Ia i le taumafai e faaaoga le mana faaupufai mai taitai Iutaia ma Roma, sa Ia tautino atu o Lona ”malo e le mai lenei lalolagi” ma sa faatonuina Ona soo e ”avatu ia Kaisara mea a Kaisara; ma i le Atua mea a le Atua.” I lenei tulaga, o le ”Tautinoga o Malo ma Tulafono” o le 1835 na toe ta’ua ai le ala a Iesu i le fausiaina o Lana Ekalesia i totonu o tuaoi o malo faalemalo.
”Sa ou ofo atu e puipui lo’u malo i le taua mulimuli [o le Taua o le 1812],” na tusia ai e Laimani Wight i se talosaga i le 1839 i le Senate a le Iunaite Setete, ”ae e le mafai ona ou [ola] i le Setete o Misuri e aunoa ma le teenaina o la’u tapuaiga.” Ma o lea na tagitu’i ai le tagata lotonuu lea na ia le ”lagona ai le faamalieina i le ola ai i le nofopologa faapena i le mea ua ta’ua o se malo saoloto.” O le talosaga a Wight na faamaonia ai se tasi o mataupu faavae autu i le ”Tautinoga o Malo ma Tulafono”—e faapea o tagata o le Ekalesia e nofo aitalafu i le faamaoni i lo latou atunuu ae e tatau ona galulue i le taimi lava e tasi e fausia malo ia e puipuia le saolotoga ma aia tatau a tagatanuu uma.