“O Se Misiona i Kanata,” Faaaliga i le Talaaga (2016)
“O Se Misiona i Kanata,” Faaaliga i le Talaaga
O Se Misiona i Kanata
I le tautoulu o le 1833, sa tietie atu ai se tagata o le Ekalesia e 54 tausaga le matua e igoa ia Freeman Nickerson i Katelani, Ohaio, faatasi ma se taavale solofanua ma saili Iosefa Samita. O Nickerson ma lona faletua, o Huldah, o Perrysburg, Niu Ioka, sa papatisoina i ni nai masina na muamua atu. CONTINUE Na talosagaina e Nickerson le Perofeta e malaga faatasi ma ia i le Mauga o Pleasant, i Kanata Pito i Luga, e talai atu le talalelei i ona atalii e toalua, o Mose ma Eleasa Freeman. O le Mauga o Pleasant o se nuu laitiiti pe tusa ma le 100 maila i sisifo o Pafalo, Niu Ioka, i le eria i le va o le Vaituloto o Erie ma le Vaituloto o Ontario.
Sa ta’ua mulimuli ane e Mose Nickerson e faapea, sa ia tuuina atu le uunaiga mo le talosaga a lona tamā: “I le masina o Iuni [1833], a o i ai i se asiasiga i le fale o o’u matua [sa ou] faalogo ai mo le taimi muamua i le mea sa ta’ua i lena taimi o le FaaMamona; sa fiafia lava i le aoaoga faavae na talai atu, ma sa talosagaina ou matua ia asiasi mai nisi o faifeautalai ia i matou i Kanata. … I le masina o Setema o lenei tausaga 1833, sa asiasi atu ai lo’u tama ma lo’u tina i Katelani, Ohaio, o le laumua o nei tagata, ma faaosofia Iosefa Samita ma Sini Rikitone latou te o faatasi i Kanata.”
Popolega Muamua o Iosefa
Ia Setema 1833, sa nonofo ai Iosefa Samita i Katelani faatasi ma lona faletua, o Ema, ma lana fanau laiti e toalua—o Iulia, e 2 tausaga; ma Iosefa le III, toeitiiti aulia lona aso fanau muamua. Sa maliliu muamua le la fanau laiti e toafa. Sa talai atu e le Perofeta, 27 tausaga le matua, le savali o le talalelei i le tele o malaga na muamua atu ae sa lei faia seia oo mai i le taimi lea se misiona talai sili atu.
E le itiiti ifo ma le lua ni atugaluga sa i ai i le gauai a le Perofeta i le taimi lea semanu e faigata ai ia te ia ona tuua lona fale ma lona aiga mo se vaitaimi umi. I le aso 9 o Aokuso, 1833, sa ia iloa ai o taumafaiga a le Ekalesia e fausia le aai o Siona i Initipene, Itumalo o Siakisone, Misuri, sa matuai ogaoga se faaleaogaina. Sa faamalosia e se au faatupu faalavelave ia tagata o le Ekalesia e malilie e tuua le Itumalo o Siakisone i le tautotogo o le 1834. Sa fesootai sa’o atu Iosefa i le Au Paia mafatia i Misuri: “Uso e ana faapea ou te i ai faatasi ma outou e tatau ona ou auai atu i o outou mafatiaga & e ui lava ina solomuli le natura ae o le a le tuua lava a’u e lo’u agaga e lafoai outou e oo i le oti, o loo fesoasoani mai le Atua ia te a’u ia ou lototele mo lo tatou togiola ua latalata mai, Le Atua e lavea’i o’u Uso i Siona.”
O le taimi lea, sa feagai ai foi Iosefa ma se taufaamata’u e lalata mai i le aiga. O se tagata sa avea muamua ma tagata o le Ekalesia e igoa ia Doctor Philastus Hurlbut, ina ua uma ona tape le igoa ia Iuni 1833 mo amioga le mama, sa amata ona faia se faatosinaga malosi e faaleaga ai Iosefa ma le Ekalesia. O lana faiga na aofia ai le faaosoina o sauaga i le lotoifale, malaga lautele atu e ao mai faamatalaga e faitio ia Iosefa, ma faamata’uina ai le ola o Iosefa. O pepa o loo i ai nei a le Perofeta mai lenei vaitau e atagia mai ai le popole tele e uiga i gaoioiga a Hurlbut. I se tusi ia Aokuso 1833 i tagata o le ekalesia i Misuri, sa ia lipoti atu ai e faapea o Hurlbut sa “pepelo i se tulaga matagofie ma o loo taufetuli atu tagata ia te ia ma tuuina atu ia te ia ni tupe ia faataape ai le faamamona lea ua sili ona lamatia ai o tatou olaga.” I se tusiga i se api talaaga i ni nai masina mulimuli ane, sa ta’ua ai e le Perofeta faapea o Hurlbut sa “saili le faaumatiaina o le au paia i lenei nofoaga ma aemaise lava a’u iinei ma lo’u aiga.” Sa taufaafefe lea tulaga ma sa le mautonu se taunuuga.
O Se Tatalo mo le Faamafanafanaga
E ui i nei atugaluga, sa taliaina e Iosefa le valaaulia a Nickerson e talai atu le talalelei i ona aiga i Kanata, ma sa malie Sini Rikitone e o faatasi ma i latou. O le api talaaga a Iosefa na taua ai le tulaga moni i le aso 4 o Oketopa: “O le faia o sauniuniga e o ai i Sasae ma Freeman Nickerson.” Ma i le aso 5 o Oketopa: “O le aso nei na amata ai se Malaga i Sasae.” O le misiona e tasi le masina e ala atu i matusisifo o Penisilevania ma sautesisifo o Niu Ioka ma i le mea ua iloa i aso nei o le itu i lalo o Ontario, Kanata, o le a aofia ai le 500 maila faataamilo ma e aofia ai le malolo i taulaga e le itiiti ifo ma le 10, e iai galuega talai faatulagaina i le tele o ia taulaga. Sa aumai e le Perofeta lana api talaaga e ofi i le taga ma ia, ma sa feauauai o ia ma Sini i le faia o ni tusiga pupuu i totonu e faamaumau ai a la faigamalaga ma la la’ua talaiga.
E oo atu i le aso 12 o Oketopa, ua sopoia e le malaga toalaiti le tumutumu o matusisifo o Penesilevania agai atu i Niu Ioka ma taunuu atu i le fale o Freeman ma Huldah Nickerson i Perrysburg. Sa tusia e Iosefa Samita sa ia lagonaina le “manuia tele” i lona mafaufau ae sa ia te ia le “popole tele” e uiga i lona aiga, atonu o se vaega o lena popole ona o le tetee na faaosoina e Hurlbut i Katelani. O lena popolega atonu na taitai atu ai Iosefa ma Sini e tatalo mo le faamafanafanaga. O le faaaliga i lena aso (lea ua avea nei ma Mataupu Faavae ma Feagaiga 100) na folafola atu ai, “E moni, ua faapea ona fetalai mai o le Alii ia te oulua, aʼu uo, o Sini & Iosefa, o loo manuia o oulua aiga; ua i ai i latou i oʼu lima, ma o le a Ou faia ia te i latou e pei ona lelei ia te aʼu; ona ua i ai ia te aʼu le mana uma.” O le popolega o le Perofeta e manino lava e le’i aveesea—o le aso na sosoo ai sa ia ole atu ai i le Alii e “faamanuia [lona] aiga ma faasaoina i latou”—ae sa manino lava lona maua o le mafanafana i nei upu, e pei ona molimauina i le tusiga i le api talaaga sa ia tusia ina ua ia taunuu atu i le fale i Katelani i le aso 4 Novema i le faaiuga o le misiona: “Na maua atu o manuia lo’u aiga e tusa ai ma le folafolaga a le Alii. mo ia faamanuiaga ua ou lagona e faafetaia ai i lona suafa paia; Amene.”
O le faaaliga ia Oketopa 12 na talanoaina ai isi mataupu e lua. I le maua ai e faapea “O A’u o le Alii ua Ou faatagaina oulua e toe foi mai i lenei nofoaga ona sa faapea ona tatau ai ia te a’u mo le faaolataga o agaga,” sa folafola atu ai e le Alii ia Iosefa ma Sini e faapea “o le a tatalaina se faitotoa aoga i eleele lata ane i lenei laueleele i sasa’e.” Afai o le a “sii a’e” e faifeautalai o latou leo ma le “faamaoni o le loto i le agaga o le agamalu” ma folafola atu upu e tuu e le Atua i o latou loto, o le a “liligi atu [le Agaga Paia] e molimau atu i soo se mea lava” sa la fai mai ai. O le faaaliga foi na tuuina atu ai ia Iosefa ma Sini le faamautinoaga o Siona o le a “togiolaina o ia e ui e aoaiina o ia mo se vaitau itiiti.”
Taunuu i le Mauga o Matagofie
I le aso 18 o Oketopa, na taunuu ai le malaga i le nofoaga o le tamai nuu o le Mauga o Matagofie, Kanata Pito i Luga. Na tuuina mai e Sini Rikitone ni faamatalaga auiliili i le api talaaga a Iosefa Samita: “Na taunuu i le nofoaga o [Eleasa] Freeman Nickerson i Kanata pito i luga i le mavae ai o lo matou o mai i Kanata ma mauga se aafiga e ui atu i se atunuu lelei tele ma atiinaeina lelei ma sa tele ni lagona tulaga ese e faatatau i le atunuu ma tagata na matou mauaina na taliaina ma le agalelei i matou.”
Sa faaalu e Iosefa ma Sini le vaiaso na sosoo ai ma le afa e talai atu ai i le Mauga o Matagofie [Pleasant] ma nisi o nuu e tu lata ane ma i faapotopotoga tetele ma le mataala. Na foliga mai le api talaaga a le Perofeta e atagia ai le faanatinati na fesootai ma le pisi o le latou malaga. I le aso 24 o Oketopa, ina ua uma ona faia e Iosefa ma Sini se fonotaga i le Mauga o Matagofie, sa “tautino mai ai le talitonuga atoa i le moni o le galuega.” e Eleasa Freeman Nickerson. O ia, sa faamaumauina i le api talaaga, “faatasi ai ma lona faletua o le ua faatalitonuina foi ina ia papatisoina i le Aso Sa ma sa i ai le fiafia tele i nofoaga uma sa matou i ai.” I lena Aso Sa, 27 Oketopa, na papatiso ai ni tagata se toasefululua. E toalua isi na papatisoina i le aso na sosoo ai. O latou o e na papatisoina o Eleasa Freeman Nickerson, o lona faletua o Elisa, ma Mose Nickerson.
I le afiafi o le aso 28 o Oketopa, sa faia ai e faifeautalai le la fonotaga mulimuli ma le la tamai lafu i le Mauga o Matagofie. I le api talaaga a le Perofeta i le taeao na sosoo ai, Sa tusia ai e Sini Rikitone: “Sa faia se fonotaga i le afiafi ua tuanai na faauuina ai le uso o E[leazer] F[reeman] Nickerson i le tofi o le Toeaina, sa i ai se fonotaga lelei ma se tasi o tuafafine na maua ai le meaalofa o le tautala i gagana, lea na olioli ai le au paia ina ia mafai e le Atua ona faatupuina ia meaalofa ia i latou mo ona atalii i lenei taeao, ma agai atu le matou malaga mo le aiga, atonu ia mafai e le Alii ona faamanuiaina la matou malaga Amene.” Na toe foi Iosefa ma Sini i le sopoiaina o le Vaituloto o Erie ma taunuu ai i Katelani i le aso 4 o Novema.
E lua vaiaso mulimuli ane, na auina atu ai e Iosefa se tusi ia Mose Nickerson e faailoa atu ai ia te ia lona toe foi saogalemu mai ma faailoa atu ona lagona mo le paranesi faatoa faavaeina ma ua tuputupu a’e o Mauga o Matagofie. “O le a ou faamoemoeina se fesootaiga mai ia te oe i le mauaina o lenei mea, ma faamoemoe o le a e tuuina mai ia te au ni faamatalaga e faatatau i le usoga, lo latou soifua maloloina, faatuatua, &isi.,” na tusi atu ai Iosefa. Sa ia faaauau: “E mafai ona ou fai atu moni lava, faatasi ai ma le naunautai tele ua ou valaau atu ai i le Alii e fai ma sui o o tatou uso i Kanata. Ma pe a ou tomanatu i lou mafaufau i lo latou saunia ia maua le upu moni e ala i le auaunaga a uso. Sini, ma a’u nei, ua ou i ai moni lava i lalo o se matafaioi tele e faamaualaloina a’u lava i le faafetai i ona luma.”
Ona aioi atu lea o Iosefa ia Nickerson ia tumau faamaoni i ona talitonuga fou: “E te manatua le molimau na ou tuuina atu i le suafa o le Alii o Iesu, e uiga i le galuega tele na ia faaalia mai i aso e gata ai. Ua e iloa la’u ituaiga o fesootaiga, le ala na ou tautino atu ai ia te oe i le vaivaiga ma le faatauvaa mea na aumai e le Alii e ala i le auaunaga a ana agelu paia ia te a’u, mo lenei tupulaga. Ou te tatalo ina ia mafai e le Alii ona faatauaina nei mea i lou mafaufau; ona ua ou iloa o le a molimau mai lona Agaga i tagata uma o e saili ma le filiga i le malamalama mai ia te ia. Ou te faamoemoe o le a e suesue i tusitusiga paia, e vaai pe le o ogatusa foi nei mea ma na mea na tusia e perofeta ma aposetolo anamua.”
Sa faaauau pea ona tuputupu ae le aulotu a Mauga o Matagofie ina ua mavae le malaga ese atu o Iosefa ma Sini. E oo atu ia Tesema 1833, e 34 tagata na lipotia mai iina. Atonu na ausia e le potopotoga le toatele e tusa ma le 50 i totonu o nai tausaga na sosoo ai. Mulimuli ane, o le toatele o e na talitonu iina a le na malaga mai e auai i le Au Paia i le Iunaite Setete pe ua o ese mai le Ekalesia.
O Freeman Nickerson, o le alii sa malaga atu i Katelani e fai atu i le Perofeta e talai atu i ona atalii, sa auai i le malaga a le Tolauapiga a Siona i le 1834 (e toalua atalii, o Uriel ma Levi, na malaga faatasi ma ia), faapotopoto faatasi ma le Au Paia i Navu, ma maliu ai i le amataga o le 1847 i le Teritori o Aioua i le malaga agai i sisifo.
Sa faatasi atu Mose Nickerson ma Eleasa Freeman Nickerson ma le Au Paia i sisifo o le Iunaite Setete mo se taimi i le faaiuga o le vaitau o le 1830, ae sa taufai toe foi atu i Kanata i le amataga o le vaitau o le 1840. O Eleasa, o le na maliu i le 1862, e foliga mai sa faaauau pea ona mafaufau ia te ia lava o se Tagata o le Au Paia o Aso e Gata Ai. Sa auai atu Mose i isi lotu e lua a o lei maliu o ia i le 1871. I se faamaumauga faamomoiloto na tusia i le taufaaiuiuga o lona olaga, sa ia faaalia ai le faamemelo mo Iosefa Samita, o le na ia fetaiai ina ua asiasi atu i Navu i le amataga o le vaitau o le 1840: “Sa ou maua iina Iosefa Samita i se faleie, ina ua tuu atu lona fale e fai ma falemai mo e mama’i! Sa ia faia mea uma na te mafaia e faaitiitia ai o latou mafatiaga.”
O le misiona a Iosefa Samita i Kanata na tatalaina ai “se faitotoa aoga” mo le talaiga o le talalelei ma le faasaoina o agaga i le tele o auala nai lo le tasi. I le 1836, na malaga ai le Aposetolo o Pale P. Palate i Kanata Pito i Luga e talai atu le talalelei iina. I lana malaga, sa malaga faatasi ai Palate ma lona uso o Orson ma Eleasa Freeman Nickerson. I Hamilton, i Kanata Pito i Luga, na masani ai Pale P. Palate ia Mose Nickerson. Na tuuina atu e Mose ia Palate se tusi e faailoa atu ai o ia i se tagata sailiili lotu mai Toronto e igoa ia Ioane Teila.