Faatalitali mo le Upu a le Alii

Tavita W. Grua

o tagata faatupu faalavelave o loo faaleagaina le falelomitusi ma le faleoloa i Initipene

I le aso 20 o Iulai, 1833, sa taloina ai e taitai o le au faatupu faalavelave i le Itumalo o Siakisone, Misuri, se fonotaga ma Viliamu W. Phelps ma isi taitai o le Ekalesia. Sa i ai i taitai o le au faatupu faalavelave ni faitioga e uiga i le Au Paia. Sa latou lagonaina le faamata’uina i le talitonuga o le Au Paia e faapea o le Itumalo o Siakisone o se nuu folafolaina sa latou faaigoaina o Siona. Sa latou tetee atu i le toatele o tagata, o le toatele o i latou e matitiva, o e na o mai i lo latou itumalo i le lua tausaga talu ai e fausia Siona. Ma ona o se tusiga na lomia talu ai nei e Phelps i le Evening and the Morning Star [Fetu o le Afiafi ma le Taeao]—o le talanoaina o tulaga manaomia faaletulafono na mamanuina e taofia ai le malaga mai o tagata uli saoloto i Misuri—sa fefefe le au faatupu faalavelave i le vave amata faapotopotoina o tagata uli saoloto o le Ekalesia i Siona, ma faalavelaveina ai le malosi o le faailoga tagata i lo latou setete e i ai pologa.

I se tulitatao faalefaatonu, sa taumafai ai Phelps e faaitiiti le vevesi i le va o le Au Paia ma taitai o le Itumalo o Siakisone, ae sa leai se mea na ia tusia na suia ai o latou mafaufau e uiga i faamoemoega o le Au Paia. E tusa ai ma manatu o le au faatupu faalavelave, ua uma le taimi mo faamalamalamaga. Sa latou tuuina atu ia Phelps ma ona uso a taitai o le Ekalesia le 15 minute e ioe ai e siitia ese atu le nuu atoa o le Au Paia o Aso e Gata Ai i le tautotogo e sosoo ai—po o le a mafatia i taunuuga.

Sa faatuai Phelps ma isi taitai o le Ekalesia. O faaaliga ia Iosefa Samita na tautino mai ai o le Itumalo o Siakisone o “le nofoaga lea mo le Aai o Siona.” Na valaauina e faaaliga ia Phelps e sii atu lona aiga iina, faatu se faleoloa lomitusi, ma “faatuina o se Lomitusi i le Ekalesia.” Sa ositaulagaina e le Au Paia se taumafaiga tele e fausia Siona. Mata e mafai ona latou tuua?

I le aunoa ma se folafolaga o le a o ese le Au Paia, na amata ai e le au faatupu faalavelave se faatosinaga o le taufaafefe matautia. Sa latou talepeina i lalo le faitotoa o le fale o Phelps, togi le masini lomitusi i fafo mai le fogafale lona lua i le auala i lalo, ona faatamaia lea o le fale. Sa i’u ina tuua le aiga o Phelps e saili se malutaga i lena po i se fale o manu na lafoa’ia. Sa mafatia foi isi Au Paia i lena aso: Sa valitaina ma faafulumoaina ia Epikopo Eteuati Paterika ma Salesa Aleni, ma sa osofaia le faleoloa a Sini Gilbert. E tolu aso mulimuli ane, na ioe aloaia ai Paterika, Phelps, ma isi taitai o le Ekalesia, e leai se isi auala, na ioe aloaia ai o le a o ese uma le Au Paia mai le itumalo ia Aperila 1834.

“I lo matou tulaga i le taimi nei, e leai se mea ou te tusia,” sa tusi atu ai Phelps (o se tagata e masani ona fiafia e tusitusi ma e tele ina tele ana upu e fai) i le Perofeta o Iosefa Samita i Katelani, Ohaio, i ni nai aso mulimuli ane. Sa manao Phelps e faataunuu lona valaauga e fausia Siona ae sa le mafai ona vaai pe faapefea ona ia faia i lalo o tulaga o i ai nei. “Ou te faatalitali mo le upu a le Alii,” na fai atu ai Phelps, ma le faamoemoe o le a sailia e Iosefa ni tali faafaaaliga pe aisea na faatagaina ai e le Alii nei mea e tutupu i Siona. “Afai o le a fetalai mai le Alii i lana fanau, atonu e lelei le fesili atu i mataupu uma e faatatau i le faatafunaga o le ofisa lomitusi,” na ia fautua atu ai. I le taimi lea, sa taumafai Phelps e vaai i ona tofotofoga i se malamalama lelei. “Ou te iloa mai le aafiaga na ou oo i ai,” na ia faamautinoa atu ai i le Au Paia i Katelani i se tusi, “o se mea lelei le tofotofoina atoatoa o lo tatou faatuatua.”

Mauaina o le Taitaiga Faalelagi

Sa lei mauaina e Iosefa Samita se tala auiliili o nei mea na tutupu seia oo i le aso 9 o Aokuso, 1833, ina ua taunuu Oliva Kaotui—le avefeau a le Au Paia i Misuri—i Katelani ina ua mavae se malaga e lua ma le afa vaiaso. O le 900 maila e va a’i Initipene mai Katelani na faamautinoa ai o tala tusitusia na auina atu e ala i le meli po o le lolomiina i nusipepa e lei oo atu i Ohaio seia oo i le ogatotonu o Aokuso. I le taimi lea, na maua ai e Iosefa Samita ni faaaliga se lua (Mataupu Faavae ma Feagaiga 97 ma le 98) i le amataga o Aokuso e faapea, e ui e lei faatatau ia faaaliga e lua i faigata patino na aafia ai tagata o le Ekalesia i le Itumalo o Siakisone i le Aso 20 o Iulai, ae, sa ofoina mai ai upu o le faamafanafanaga ma le taitaiga faalelagi lea na mafai ona faaaoga mulimuli ane e Phelps ma isi Au Paia i Misuri e fesoasoani ai ia i latou ia malamalama i o latou aafiaga ma mafatiaga.

I le aso 2 o Aokuso, 1833, na faalau mai ai e Iosefa Samita le uluai faaaliga, lea ua avea nei ma Mataupu Faavae ma Feagaiga 97. I lea faaaliga, sa viia ai e le Alii le a’oga a le Ekalesia i le Itumalo o Siakisone ma toe ta’ua ai le poloaiga e faapea “ia fausia se fale mo a’u i le laueleele o Siona.” Na ta’ua i le faaaliga e faapea “afai e fai e Siona nei mea o le a uluuluola o ia ma faalauteleina o ia lava ma avea ma nuu mamalu tele. … Ia olioli Siona (aua o Siona lenei o e loto mama).” Peitai, sa lapatai mai le Alii e faapea “e vave ona oo mai o le tauimasui i luga o e ua le amio atua.” Na pau le auala o le a aloese ai Siona mai nei mala i “pe afai e vaai o ia ua fai mea uma o soo se mea ua Ou poloaiina ai o ia” Afai e leai, “o le a Ou asiasi atu ia te ia e tusa ma ana galuega uma, i se puapuaga tiga.”

Ua maua e Iosefa Samita le faaaliga lona lua, lea ua avea nei ma Mataupu Faavae ma Feagaiga 98, i le aso 6 o Aokuso, 1833. E ui ina sa fautuaina e le Alii le Au Paia e lagolago le Faavae o le I.S. ma le pule a le tulafono, ae sa lapatai mai le faaaliga e faapea “a pule e amioleaga e faanoanoa le nuu.” I le iloa ai e oo mai sauaga, na poloaiina ai e le faaaliga ia tagata o le Ekalesia e “tetee i taua ma folafola atu le filemu.” Ina ua latou puapuagatia i sauaga mai fili o le Ekalesia, sa poloaiina le Au Paia ia “talia ma le onosai,” faamagalo i e na faasaua mai ia te i latou, ma faataga le Alii e tauia le mea sese. O nei faaaliga na auina atu i se tusi i le Au Paia i Misuri i le aso 6 o Aokuso, tolu aso a o lei taunuu atu Kaotui i Katelani. Ina ua maua i le Itumalo o Siakisone i le amataga o Setema, o faaaliga sa le masalomia lava o se punavai o le faamafanafanaga ma le taitaiga mo le Au Paia e pei o Phelps, o lē sa faatalitali mo le mauaina o le taitaiga faalelagi.

“A Mavae Puapuaga e Tele … Ona Oo Mai ai lea o Faamanuiaga”

O le mauaina o fautuaga mai faaaliga a Iosefa, sa galulue ai taitai o le Ekalesia i Misuri e saili le puipuiga faaletulafono mai le au faatupu faalavelave ma mai ona manaoga e faapea e latou te o ese i le tautotogo. Ia Setema ma Oketopa 1833, sa latou sailia ai se totogi mai taitai o setete ma loia na faafaigaluegaina e fai ma sui o Au Paia o Aso e Gata Ai e tulai atu mo le galuega a le Alii i le faamasinoga. O faatinoga faaletulafono a le Au Paia na faatalitonuina ai le au faatupu faalavelave faapea o le a le o ese lava tagata o le Ekalesia sei vagana ua tutuliesea. A o lei mafai ona fofogaina la latou mataupu i le faamasinoga, sa toe tulai mai sauaga a le au faatupu faalavelave.

I le faaiuga o Oketopa ma le amataga o Novema, na faamata’uina ai e tagata leaga o le Itumalo o Siakisone le Au Paia ona latou tutuliesea loa lea o i latou mai o latou fale. E ui ina sa faia e tagata o le Ekalesia ni taumafaiga e puipuia ai i latou lava, ae sa manino lava lo latou saili e mulimuli i le fautuaga a le Alii i le faaaliga o le aso 6 o Aokuso (Mataupu Faavae ma Feagaiga 98) ia talia ma le onosai o latou puapuaga. I le aso 6 ma le 7 o Novema, a o nofo ai o se tagata sulufai i le Itumalo o Kalei, i matu tonu lava o le Itumalo o Siakisone, sa tusia ai e Phelps le uluai tala auiliili ia Iosefa Samita o sauaga, faamatalaina o le sasaina o tagata o le Ekalesia, faatafunaga o o latou fale, ma oo lava ina faamasaatoto i itu uma e lua. Sa ia sainia, “O lou lava i lo’u puapuaga.” I le aluga o le vaiaso na sosoo ai, a o faaauau pea ona mafaufau Phelps i le mea na tupu, sa oo mai se fuaitau mai le Feagaiga Fou i lona mafaufau. “Na fetalai le Faaola, Amuia outou pe a inosia foi outou e tagata uma ona o lo’u igoa,” na ia tusi atu ai i le aso 14 o Novema, “ma ou te manatu ua matou oo mai i lena mea.”

A o oo malie mai lenei tusi ma isi lipoti o le tutulieseina i Katelani i le faaiuga o Novema ma le amataga o Tesema, sa saili atu ma le agaga tatalo e Iosefa Samita le taitaiga faafaaaliga lea na matua mananao i ai Phelps ma isi Au Paia. I se tusi i le aso 10 o Tesema, sa faamanatu atu ai e Iosefa i taitai o le Ekalesia i Misuri e faapea, i le 1831, sa lapataia muamua ai tagata o le Ekalesia “a mavae puapuaga e tele ona oo mai lea o faamanuiaga.” E ui lava e lei faaalia mai e le Alii le mafuaaga o “le malaia tele” ua oo mai i “luga o Siona” po o “le a le ala o le a ia [le Alii] toe faafoi atu ai o ia i lona tofi,” ae sa tumau pea le mautinoa e Iosefa o le a laveaiina Siona i le ”taimi tatau ai a le Atua lava ia.” Sa fautuaina e le Perofeta le Au Paia e aua nei faatauina atu o latou laueleele i Siona ma uunaia i latou e saili se totogi faaletulafono mai taitai o setete ma le malo. Afai e le tali mai le malo i le Au Paia, e tatau ona latou aioi atu i le Alii i le ”ao ma le po” mo le faamasinotonu paia. Sa faaiuina e Iosefa i se tatalo faapea o le a manatua e le Atua Ana folafolaga e faatatau ia Siona ma laveai le Au Paia.

I le aso 16 ma le 17 o Tesema, na faalau mai ai e Iosefa se faaaliga ua faateleina, lea ua avea nei ma Mataupu Faavae ma Feagaiga 101, lea na tuuina mai ai tali i fesili na fesili ai o ia, Phelps, ma isi Au Paia. Na faatagaina e le Alii le malaia e oo mai “ona o a latou [a le Au Paia] soligatulafono.” E ui i lea, sa faapea mai le Alii, “E ui i a latou agasala, ua tumu oʼu lagona i le agaalofa ia te i latou.” E ui ina sa faataapeapeina le Au Paia, ae o Siona o le a “le aveesea i fafo mai lona nofoaga.” E faatatau i le laveaiina o Siona, na faamatalaina e le faaaliga se faataoto i “se alii sili” o le na tofia ana auauna e puipui lona tovine. A o fefinauai auauna ia i latou lava, “sa sau le fili i le po” ma “sa faaleaga a latou galuega ma gaui i lalo laau olive.” Na poloaiina e le Alii lana auauna e “ave le malosi uma o lo’u fale” ma “toe faaola mai lo’u tovine.” I le toe ta’ua ai o le faamautuuga o le Faavae o le I.S. mai le Mataupu Faavae ma Feagaiga 98, na toe ta’ua ai e le faaaliga le fautuaga muamua a Iosefa Samita e faapea, e saili e le Au Paia i Misuri se totogi mai pulega faalemalo, faatasi ai ma se folafolaga afai e teena e taitai o le malo aioiga a tagata o le Ekalesia, o le Alii o le a “afio mai lona Afioaga lilo & i lona toasa ua lutia ai le atunuu.” O leMataupu Faavae ma Feagaiga na tuuina mai ai i le Perofeta se fuafuaga musuia faalelagi mo le togiolaina o Siona—o se galuega faatino o le a ia gauai atu i ai mo le taimi o totoe o lona olaga.

E oo atu i le amataga o le 1834, ua taunuu mai se kopi o le faaaliga o le a avea ma Mataupu Faavae ma Feagaiga 101 i Misuri, ma tuuina atu ai ia Viliamu W. Phelps le “afioga a le Alii” lea sa ia faatalitali i ai. I le aso 27 o Fepuari, sa ia tusi atu ai ia Iosefa Samita, ma tuuina atu ia te ia le tala lata mai o taumafaiga a le Au Paia ia maua le faamasinoga tonu i le faatulagaga o le faamasinoga a Misuri. A o faaiuina e Phelps lana tusi, sa ia ta’ua le faaaliga. Sa taumanatunatu Phelps pe “o auauna a le Alii o le tovine, o e ua valaauina ma filifilia e teuina mo le taimi mulimuli” o le a “fefefe e faia mea e tele mo Iesu e pei ona ia faia mo i tatou”? “Leai,” na ia tali atu ai, “o le a tatou usiusitai i le siufofoga o le Agaga, ina ia mafai ona manumalo le lelei i le lalolagi.”