Uputomua

E talitonu Au Paia o Aso e Gata Ai i se Atua alofa o le e fetalai mai i Ana fanau “e faapei taimi nei o taimi anamua, ma e faapei foi taimi anamua o taimi o le a oo mai” (1 Nifae 10:19). O lenei mataupu faavae autu o le talalelei toefuataiina o loo atagia mai i tusitusiga paia a le Au Paia o Aso e Gata Ai, lea o loo i ai faamaumauga o feutagaiga a le Atua ma Ana fanau i aso ua mavae, faapea foi Ana afioga ia Iosefa Samita ma isi perofeta o aso e gata ai.

O le tusi o Mataupu Faavae ma Feagaiga o se molimau o anoanoa’i o faaaliga faifai pea. O vaega taitasi e taliina ai fesili taua, faaalia ai upumoni taua, pe tuuina mai ai taiala o faatinoga. O nei faaaliga o taui po o faamanuiaga o se talanoaga faifai pea i le va o le Alii ma Lona nuu. Ae i le tele o tulaga, o le Mataupu Faavae ma Feagaiga o loo i ai na o le afa o le talanoaga—o tali faaalia a le Alii. I lenei auala, e tulaga ese lava i tusi o tusitusiga paia a le Au Paia o Aso e Gata Ai. I le Tusi Paia, Tusi a Mamona, ma le Penina Tau Tele, o le aoaoina atu o le talalelei e tele lava ina i ai i se faamatalaga. O le faamatalaga tatou te maua ai ni faaataataga e fesoasoani ia i tatou e faaliliu ai aoaoga ma iloa ai pe na faapefea ona latou faatosinaina olaga o alii ma tamaitai o tusitusiga paia. Ae e le o i ai i le Mataupu Faavae ma Feagaiga ia tala i tua atu o faaaliga.

E ui o ulutala o vaega, ua faafouina i le 2013, o loo maua ai sina talaaga mo faaaliga, faatonuga, ma tautinoga i le Mataupu Faavae ma Feagaiga, latou te le faamatalaina le tala atoa. O a fesili na uunaia ai faaaliga? O le a le uiga o tali a le Alii ia i latou sa talanoa atu i ai? Na faapefea ona tali atu i latou na faalogo i faaaliga i aoaoga fou? Faaaliga i le Talaaga o se tuufaatasiga o tala e taumafai e tali nei fesili. Na faamatalaina mai le manatu o tagata o e na oo ia i latou aafiaga i lo latou talaaga i lea taimi, o nei faamatalaga tatou te maua ai se malamalamaaga i le uiga o faaaliga ma fesoasoani ia tatou malamalama i faaaliga mai se vaaiga fou.

O tala i lenei tuufaatasiga, lea e toetoe lava o vaega uma i le Mataupu Faavae ma Feagaiga, na tusia e tusitalafaasolopito i le Matagaluega o Talafaasolopito o le Ekalesia. I le faamatalaina o nei tala, na faaaoga ai e tusitala le faatuatua o le au tusitalafaasolopito i le talalelei toefuataiina ma a latou aoaoga faamasani ma tomai i le talafaasolopito o Amerika ma le Au Paia o Aso e Gata Ai. E faapitoa lava le taua i lenei faasologa o le Joseph Smith Papers Project [Galuega Faatino o Pepa a Iosefa Samita], lea ua saunia ai se faavae o sailiiliga sa’o auiliili lea e tatau ona fausia ai luga faauigaga faasolopito uma o le soifuaga ma galuega a Iosefa Samita. O Upusii i Joseph Smith Papers [Pepa a Iosefa Samita] i Faaaliga i le Talaaga e masani on faasino atu le o faitau i pepa o faamatalaga ma anomea ua faaavanoaina lelei i luga o le josephsmithpapers.org.

E faamoemoe taitai o le Ekalesia o nei faamatalaga o le a maua ai e tagata o le Ekalesia e le gata i se malamalama manino atili e uiga i faaaliga lava ia, ae o se agaga talisapaia loloto atu mo le ala e fetalai mai ai le Atua i Ana fanau “i o latou vaivaiga, e tusa ma le ala o la latou gagana, ina ia latou malamalama” (MF&F 1:24).