“Manatuaina o le Faamaturoina,” Faaaliga i le Talaaga (2016)
“Manatuaina o le Faamaturoina,” Faaaliga i le Talaaga
Manatuaina o le Faamaturoina
Ina ua o ese atu Iosefa ma Ailama Samita mo se falepuipui i Karefasi, Ilinoi, e faatali mo se faamasinoga faaletulafono, e toaitiiti na masalomia ua tuua e le toalua o la’ua fale mo le taimi mulimuli. Sa feagai muamua Iosefa ma le faafalepuipuiina, sauaga a le au faatupu faalavelave, ma taufaamatau o le oti, ma sa ia toe foi mai i taimi uma e taitai i luma le Au Paia. O Ailama foi, sa onosaia vaitau o sauaga ma le Au Paia ma sa tulai mai lava ma sauni e toefausia ma fetaomi atu i luma.
Ae i le afiafi o le aso 27 o Iuni, 1844, sa osofaia ai e se au faatupu faalavelave le Falepuipui o Karefasi ma fasiotia i la’ua uma.
O le tala i le maliliu matautia o le uso e toalua na faateia ai le Au Paia i Navu. I le aso e tasi, ua maliliu ai lo latou perofeta ma lo latou peteriaka. Mo le toatele, o Iosefa ma Ailama o se uo foi ma ni faataitaiga lelei, o ni alii sa fesoasoani ma faamanuiaina i la’ua i taimi sa manaomia ai. I aso, vaiaso, ma masina ina ua mavae le faamaturoina, sa tauivi ai le Au Paia ma le auala e faamatala ai lo latou tali atu i le maliliu ai. O a latou tusi, api talaaga, ma tusitusiga faalauaitele e tutu faatasi ma saafiafiga na lolomiina ia Iosefa ma Ailama, e pei o lea ua faamaonia nei i le Mataupu Faavae ma Feagaiga 135, o ni molimau i le misiona a alii e toalua o e na auauna atu ma le faamaoni lava ona faamaufaailogaina lea o le la molimau i o la toto.
O Tusi
E toatele Au Paia o Aso e Gata Ai i Navu sa i ai ni uo ma tagata o aiga o e sa mamao ese mai le aai i le taimi o le faamaturoina. Sa tuua i latou ma le galuega faigata o le ta’u atu o le talafou i e pele ia i latou.
”O le a ou le taumafai e faamatalaina le vaaiga ua uma ona matou uia,” na tusi atu ai Vilate Kimball i lona toalua, o Heber, o le sa i le itu i sasae o le Iunaite Setete o fesoasoani i le faalauiloaga o Iosefa e avea ma Peresitene. “Tau ina ia faasa e le Atua ona ou toe molimauina se isi tulaga faapenei.” Ua tutumu loto uma i le faanoanoa, ma o magaala tonu o Navu ua foliga ua faavauvau. E pei o le toatele, sa ia faaalia foi le popole e uiga i le taufaamatau o le faaauau pea o sauaga e faasaga i le Au Paia. ”O le mea o le a muta ai,” sa ia lapataia ai Heber, ”ua na o le Alii lava e silafia.”
Sa tusi atu Almira Mack Covey, o se tausoga i le au uso Samita, i lona aiga e uiga i le vaai i tino o Iosefa ma Ailama ua faafoi atu i Navu. ”E mafai ona sili atu lou silafiaina o o matou lagona nai lo le mea e mafai ona ou faamatala atu,” sa ia tusi atu ai, ”ae o le tele lenei o mea e mafai ona ou fai atu ai, o le leai ma ni laufofoga mātū na ou vaaia i lena aso i lena faapotopotoga tele o tagata. E oo lava i tagata e le ono mafatia faaleloto na matua aafia lava faalelagona e vaai atu i Perofeta e toalua a le Alii ua taooto mai.
O Sara M. Kimball, o le sa faatinoina se matafaioi autu i le faavaeina o le Aualofa, sa i ai foi ma i latou na vaai i tino ua faafoi mai i le aai. ”O le vaaiga o le oo mai o na tino maliu i navu e mafai ona sili atu ona mafaufauina nai lo le faamatalaina,” sa ia tusi atu ai i se uo, ”aua e leai se tasi e ono mafai ona pueina tusitusia tulaga faalelagona o lena vaaiga. E ui semanu e le mafai ona pueina le faavauvau o le aai atoa, ae sa taumafai Kimball e faamatala le faavauvau o se tamaitai e toatasi: o le aso na sosoo ma le fasiotiga, sa ia alu ai e nonofo faatasi ma Lusi Maka Samita. Sa manatua e Sara Kimball le uuina o le lima gatete o Lusi Maka Samita ma faalogo atu i lana fesili i le va o māsūsū, ”E mafai faapefea ona latou fasiotia a’u tama matitiva, E faapefea ona latou fasiotia i la’ua a e ua matua taua tele i la’ua?”
O Api Talaaga
Sa taumafai isi tusitala e faamaumau auiliiliga e uiga i le faamaturoina ma a latou tali i ai e ala i le tusia o faamatalaga e manatunatu i ai i a latou api talaaga. Nai lo le taulai atu i le mea o loo tupu i lea taimi ma popolega ua i ai, e pei ona masani ona faia e tusi, o tusiga i api talaaga e masani ona taumafai e faavasega faamatalaga taua mo tupulaga i le lumanai ma ia maua ai se lagona faaleagaga o le faalavelave. I le sailia o se faamalamalamaga po o se faataitaiga mo le toesea o o latou taitai, sa masani ona liliu atu le Au Paia i le Tusi Paia. E toatele na faatusatusaina le fasiotiga i mea faatusi paia na tutupu, mai le fasiotia o Apelu i le Faasatauroga o Iesu Keriso. Sa tele ina latou faailoaina Iosefa ma Ailama o ni isi o le toatele o maturo ”sa fasiotia ona o le afioga a le Atua, ma le mau na latou taofimau ai” o loo ta’ua i le tusi o Faaaliga. O lea, sa latou talitonu ai ua faitaulia nei uso e toalua faatasi ma i latou o loo aioi atu i le lagi, ”O le a le umi, le Alii e, ua paia ma moni, pe e te le faamasino atu ea ma tauia lo matou toto i luga o i latou o e o nonofo i le lalolagi?”
O mea na tutupu i Karefasi na taitai atu ai Iosefa Filitia e faatumu ni nai itulau o lana api talaaga i faamatalaga o le soifuaga, misiona, ma le maliu o Iosefa Samita. Na tusia e Filitia faapea o le taunuu mai o tino o maturo e toalua ”o le vaaiga aupito sili lea ona paia na vaai i ai o’u Mata.” E ui ”sa tele ina ia toe faitau i maturo anamua,” sa tusia e Filitia faapea ua avea nei o ia ma se molimau mo le ”2 o tagata silisili o e na faamauina le Upumoni sa la umia ma aoaoina i o la’ua Toto.” I le iuga, sa ia talitonu, o Iosefa ma Ailama o le a ”faatulagaina faatasi ma le Maturo o Iesu Keriso.”
E le gata i le vaavaai atu i maturo o le taimi ua tuanai mo le malamalama, ae sa tagai foi Filitia i le lumanai o le galuega a le Alii. ”Sa faia e Iosefa ma Ailama mea uma sa mafai ona la faia,” na ia tusia ai, ”ma na faataatia ai le Faavae o le Galuega tele o Aso mulimuli.” O le atiaeina i luga o lena faavae, sa mautinoa ai e Filitia, o le galuega na soifua ma maliliu ai Iosefa ma Ailama ”e mafai ona faamaeaina e Aposetolo e 12 o e sa faatonuina i mea uma e faatatau i le Malo o le Atua i luga o le Fogaeleele.”
Sa tusia e Zina Huntington Jacobs, o le sa faamauina ia Iosefa Samita o se ava faaautaunonofo, lona te’i i le vaaia ”o Tino ua leai se ola se leo o Maturo [toalua],” ma matauina e faapea ”sa itiiti se mea na manatu lo’u loto e tatau ona molimauina e o’u mata lenei vaaiga leaga.” I lana api talaaga, sa faitauina ai e Iakopo le tau o le faamaturoina mo aiga o ia alii, o le nuu, ma le tagata faapea foi mo le Ekalesia, e faamatala ai Iosefa ma Ailama e le gata o ”le Perofeta ma le Peteriaka o le Ekalesia a le Au Paia o Aso e Gata Ai,” ae faapea foi ”o ni tane agalelei,” ”Tamā agaalofa,” ”tamalii lotomaualalo,” ma ”Uo a tagata uma.”
Mo Iakopo, o le fasiotiga o Iosefa ma Ailama o faamaoniga ia o le amioleaga o le lalolagi. I lana api talaaga, sa ia tatalo ai ina ia faailoa mai e le Atua ”le toto le sala ua faamaligiina” ma fesili atu ”o le a le umi e tagi ai fafine ua oti a latou tane ma fanau matuaoti ae e te lei tauimasui i le Lalolagi ma afua ai loa ona taofia le amioleaga”? I le aso 4 o Iulai, pe tusa ma se vaiaso talu ona mavae le faamaturoina, sa ta’ua ai e Iakopo o le Aso Tutoatasi mo le Iunaite Setete, ma sa ia faatusatusaina le folafolaga o le saolotoga o Amerika ma le faamasinotonu i le fasiotiga faamanu o le uso e toalua. ”Ua pa’ū le fu’a tautupu o le saolotoga,” sa ia tusi atu ai. ”O le femitai i le laueleele o le saolotoga ua pisipisia nei i le toto lē sala.”
O Viliamu Clayton, o se tagata malaga mai Peretania ma se tasi o failautusi a Iosefa Samita, na tusia i lana api talaaga se tala auiliili sa’o i le ala na fasiotia ai Iosefa ma Ailama, o se tala na tuufaatasia mai faatalanoaga ma Uiliata Risati, Ioane Teila, ma isi sa i ai. Ina ua uma ona iloiloina le faamaoniga, sa tuu e Clayton le tele o tuuaiga mo le fasioti tagata i taitai o le malo, e aofia ai ma le kovana o Ilinoi, o Tomasi Ford. ”Sa ia tautino atu lona faatuatua ma le faatuatua o le Setete e faapea e tatau ona puipuia i latou mai mea uma e afaina ai,” na taua ai e Clayton. Ae peitai, o le vaegaau sa tatau ona puipuia Iosefa ma Ailama sa galulue faatasi ma le au faatupu faalavelave. E pei o Zina Jacobs, sa vaaia e Clayton se eseesega tele i le va o manatu faaAmerika o le saolotoga o tautapuaiga ma le mea moni na oo i ai le Au Paia. ”Ua sola le Saolotoga,” na ia tusia ai. Sa ia faaopoopo mai ma le to’amalie e faapea sa ”leai se faamanatuina faalauaitele i Navu” i le aso 4 o Iulai. I le nutimomoia ai o lona faatuatua i le atunuu, sa liliu atu Clayton i le Atua. ”Matou te vaavaai atu ia te oe mo le faamasinotonu,” na ia tusia ai.
Solo
O nisi Au Paia o Aso e Gata Ai na faasoa mai a latou tali e ala i le lolomiina o solo i le Times and Seasons, o se nusipepa na faatautaia e le Ekalesia. Sa faaaofia ai e tusitala ia tusi solo iloga e pei o Eliza R. Snow, Viliamu W. Phelps, Ioane Teila, ma Pale P. Palate faapea foi ma le Au Paia o Aso e Gata Ai e le faailoaina o latou igoa. Sa taulai atu tusitala eseese i lagona eseese. O le ”Viia Le na Fetaia’i ma Ieova” a Viliamu W. Phelps na atagia mai ai le talatuu na tuua e Iosefa ma tulimatai atu i lana galuega i le isi itu o le veli. O le ”E, Toe Aumai Ia Te Au La’u Perofeta Pele” a Ioane Teila na saunoa mai le faananau e uiga i le maliliu ai o taitai pele e toalua. O nei pese ma isi solo sa lolomiina o ni upu faatasi ai ma fati lauiloa ua fautuaina mai. E i ai ni isi o nei solo na aofia mulimuli ane i tusipese a le Au Paia o Aso e Gata Ai ma o loo faaauau pea ona lagiina i aso nei.
O le tele o solo na fefiloi ai le faavauvau ma le tiga i le fasiotiga e faasino i maturo ua mavae, ma Iesu Keriso lava. I lana solo na lolomiina i le lomiga i le aso 1 Iulai, 1844, o le Times and Seasons, lea na faasilasila mai ai le fasiotiga, na tusia ai e Eliza R. Snow:
O lea la ua faanoanoa Siona—ua ia faavauvau i se taitai faalelalolagi:
Ua maliliu le Perofeta ma le Peteriaka!
O le galuega aupito uliuli ua iloa e tagata po o temoni
Talu mai le vaaiga i Kalevaria, ua tuu maualalo ai le au uso!
O lo la autasi i le olaga, ma le autasi i le oti—ua la faamaonia
Oka se malosi o la latou faauoga—le ala latou te alolofa moni ai:
Faamaoni i la la’ua misiona, seia oo i le oti, sa la tutu ai,
Tusi i Faatonu
E pei ona mamanuina e le toatele o le Au Paia ma faasoa atu a latou tali patino i le faalavelave i tusi, api talaaga, ma solo, sa lagona e taitai ma sui o le Ekalesia se matafaioi e lipoti atu ma tuuina atu ni manatu faaalia e uiga i maliu i tusi i faatonu, ma saili i le faia o lena mea ina ia maua ai se talafou ma se faamafanafanaga i Au Paia o Aso e Gata Ai i soo se mea. I le aso 1 o Iulai, na faapipii ai e Aposetolo Uiliata Risati ma Ioane Teila, o e sa faatasi ma le au uso i le Falepuipui o Karefasi ina ua osofaia e le au faatupu faalavelave, o la igoa i se faaaliga i le Times and Seasons e le faatonu o le nusipepa o Viliamu W. Phelps. Na uunaia e lo la tusi i le faatonu ia Au Paia o Aso e Gata Ai ina ia ”taofi mau i le faatuatua ua tuuina atu ia i latou i aso e gata ai” ma tuu Iosefa ma Ailama i totonu o se laina umi o maturo faatusi paia. Sa faamanatu atu e nei alii e toatolu i Au Paia o Aso e Gata Ai e faapea ”o le fasiotiga o Apelu; o le tagatavaleina o le faitau selau; o le toto amiotonu o perofeta paia uma, mai ia Apelu ia Iosefa, na sausauina faatasi ma le toto sili o le Alo o le Atua, e fai ma faailoga susulu o le faamagaloga, ua na ona tauaveina ai o le talitonuga maumaututu i le pisinisi ma loto o tagata uma, e faapea ua tonu ma o le a faaauau pea le galuega; ma amuia lava i latou o e e tumau faamaoni e oo i le iuga.”
I le lomiga e sosoo ai o le Times and Seasons, sa lolomi ai e Phelps se tusiga umi e uiga i le fasiotiga lea na aofia ai se lipoti o upu a Iosefa a o ia tuua mo Karefasi. “Ou te alu atu e pei o se tamai mamoe a fasia,” na saunoa ai le Perofeta, “ae ou te filemu e pei o le taeao i le tauvevela; o ia te au le loto fuatiaifo e mama i le Atua, ma tagata uma: Ou te oti e aunoa ma le sala.” Na lipotia mai foi e Phelps e faapea ”o le ’alaga mulimuli a Iosefa o le ’Le Alii e lo’u Atua!’” Pe tusa o le taimi lava lea na lolomi ai e Phelps lana faatonu, sa tusia ai e Uiliata Risati lana lava tala auiliili e uiga i le fasiotiga, lea na aofia ai mo le taimi muamua le lipoti o upu mulimuli a Ailama: ”O au o se tagata oti.” Sa lolomiina le tala a Risati i le aso 24 Iulai, 1844, i le nusipepa a Navu i le lotoifale.
O Le Mataupu Faavae ma Feagaiga
E ui o le toatele o le au maimoa i fafo na faamoemoe e soloia le Ekalesia ina ua mavae le fasiotiga o Iosefa ma Ailama, ae sa faaauau pea le galuega a le Ekalesia e ui lava i lo la maliliu. I le lua tausaga talu ai o le soifuaga o Iosefa, sa galulue ai taitai o le Ekalesia i se lomiga fou o le Mataupu Faavae ma Feagaiga. A o lei maliliu Iosefa ma Ailama, sa la faasilasila atu se aso faamoemoeina e lolomi ai mo le ogatotonu o Iulai o le 1844.
O le lomiga sa na o sina faatuai teisi lava e le vevesi na muamua atu ma mulimuli ane ai i mea na tutupu i le Falepuipui o Karefasi. E lei leva ona mavae le faamaturoina, ae faia loa le faaiuga e faaauau le lomiga ae ia faaopoopo se vaega faaiu e ”tapunia” ai le tusi i se faamatalaga e faatatau i maliu. E peiseai na tusia le faamatalaga ia Iulai po o Aokuso, a o lolomiina le tusi ma faaaogaina ia Setema. O lenei faamatalaga, ua faaautuina ”Faamaturoina o Iosefa Samita ma Ailama Samita,” ua faapaiaina o le Mataupu Faavae ma Feagaiga 135.
Talu mai le amataga o le seneturi lona 20, sa manatu ai le au faitofa ma taitai o le Ekalesia o le faamatalaga na tusia e Ioane Teila, o se Aposetolo ma le faauluuluga o le ofisa lomitusi. Peitai, o le vaega sa lei faatatau lava ia Teila i lona soifuaga atoa, ma atonu o le galuega a Teila, Risati, Phelps, po o se isi tagata e tusi atu soo i le ofisa lomitusi o Navu. E tusa lava po o ai na tusia, o faamatalaga sa matua mamafa lava le faamatalaga i molimau vaaitino ia Teila ma Risati ma sii mai tusiga ma faasilasilaga na muamua atu a nusipepa na lolomiina e le Ekalesia sa la fesoasoani e tusitusia. E pei o na tala na lolomiina muamua, o lenei faamatalaga na toe ta’ua ai autu o le faamaturoina, taumamaina, ma le faamasinoga paia—o autu na faapena foi ona faaalia i tusitusiga patino a Au Paia o Aso e Gata Ai.
Ona sa tatau i le ’au lomitusi ona faafetaui le faamatalaga i se voluma ua uma ona taina (e ui e lei lolomiina), ae sa lolomiina le vaega i mataitusi matua laiti lava nai lo le vaega o totoe o le voluma ma ofi ai i totonu o le itulau ma le afa o avanoa i le va o le vaega na muamua atu ma le faasino upu. O se taunuuga o lona tulaga i le tuuina i totonu o le Mataupu Faavae ma Feagaiga, o lenei faamatalaga sa faitauina lautele ma sii mai ma ua avea ma faamatalaga faailoa aloaia mo Iosefa Samita ma lona uso o Ailama.