“I Totonu o Puipui o le Falepuipui o Liperate,” Faaaliga i le Talaaga (2016)
“I Totonu o Puipui o le Falepuipui o Liperate,” Faaaliga i le Talaaga
I Totonu o Puipui o le Falepuipui o Liperate
I le aso 1 o Tesema, 1838, sa faafalepuipuiina ai se Au Paia o Aso e Gata Ai e igoa ia Caleb Baldwin i le fogafale a lalo o le Falepuipui o Liperate i le Itumalo o Kalei, Misuri, i moliaga o “solitulafono o le Faalata Maoae.” O ana soa i le falepuipui sa aofia ai uso o le Au Peresitene Sili o Le Ekalesia a Iesu Keriso o le Au Paia o Aso e Gata Ai: o Iosefa Samita, Ailama Samita, ma Sini Rikitone, faapea foi ma Laimani Wight ma Alexander McRae. O le toaono na taofia ai toetoe lava fa masina na avea ma vaega mulimuli o se talafaasolopito mata’ina ma sa masani ona faapopoleina ai le talafaasolopito o le Au Paia o Aso e Gata Ai i Misuri.
I totonu o puipui o le Falepuipui o Liperate, sa tusia ai e Baldwin nisi o manatunatuga sili ona loloto o Iosefa Samita na tusi atu ai i Au Paia o Aso e Gata Ai—o loo taape ma le matitiva---o ni vaega o ia tusi sa faamaonia mulimuli ane ma avea ma Mataupu Faavae ma Feagaiga Mataupu Faavae ma Feagaiga vaega 121, 122, ma le 123. O nisi o nei fuaitau ua avea ma maa taua faaletusitusiga paia, e masani ona ta’ua i lauga a le Au Paia o Aso e Gata Ai i le aluga o tausaga.
E ui ina sa faamatalaina ma toe faamatalaina le tala i le Falepuipui o Liperate mai le vaaiga a Iosefa Samita, ae o le aafiaga o isi alii na faafalepuipuiina ua maua ai se malamalamaaga faaopoopo. O Baldwin, o le sa sili ona sinia i le vaega, sa tauivi faaletino ma faalelagona i le sela o le falepuipui o Liperate. O upu musuia na oo mai ia Iosefa a o ia faalauina atu lana tusi na tuuina atu ai le faamafanafanaga ma le fautuaga ia Baldwin, le tamā e 47 tausaga o le fanau e 10 o lē sa moomoo e faatasi ma lona aiga i le taimi o le fa masina o lona taofia.
O Fevesiaiga Amata i Misuri
O le talafaasolopito mataina o le Au Paia o Aso e Gata Ai i Misuri na amata i le 1831, ina ua faailoa mai e se faaaliga ia Iosefa Samita o le Itumalo o Siakisone o le nofoaga o Siona, o le Ierusalema Fou (tagai i le MF&F 57:1–3). E oo atu i le 1833, o le Au Paia o Aso e Gata Ai i le Itumalo o Siakisone na faitauina le silia ma le afe—pe tusa ma le tasi vaetolu o le faitau aofai o le itumalo—ma o eseesega faalelotu, faaupufai, ma faaleaganuu na afua ai ni feteenaiga lemaalofia i le va o tagata fou ma tagata ua loa ona nofoia. Ina ua mavae o le lē ogosa’ia o ni talosaga filemu ina ia toe suia le nofoaga o le faatuatuaga o le Au Paia o Aso e Gata Ai ma aiga, sa osofa’ia ai e se vaega faatulagaina e toatele o tagata Misuri le fale o Viliamu W. Phelps, sa faaleagaina le masini lomitusi o le Evening and Morning Star [Fetu o le Afiafi ma le Taeao], ma valitaina ma faapipii fulumoa ia Eteuati Paterika ma Salesa Aleni.
A o saili e Au Paia o Aso e Gata Ai se toe totogi mai e ala i talosaga tusitusia, sa latou faatulagaina foi i latou lava faamiliteli e puipuia ai o latou aiga pe a tulai mai ni feteenaiga faaauupegaina. E oo lava ina ua mavae le siitia atu o le Au Paia o Aso e Gata Ai i le Itumalo o Caldwell i matusisifo o Misuri, lea na fatuina e le fono faitulafono a le setete mo i latou lava, a e o “taua” sa tau i Kalatini, DeWitt, Blue River, ma le Hawns Mill, lea na ta’ua o le Taua a Misuri-Mamona.
Ia Oketopa ma Novema 1838, sa faafalepuipui ai e Taitai Samuelu D. Lucas, o se taitai i le Militeli a Misuri, ni nai Au Paia o Aso e Gata Ai iloga, e aofia ai Iosefa Samita, Ailama Samita, Sini Rikitone, Pale P. Palate, Siaosi W. Robinson, ma Amasa Laimani. O Kalepo Baldwin, Laimani Wight, ma isi tagata o Au Paia o Aso e Gata Ai na molia sa faatasi atu ma Iosefa ma i latou na molia faatasi, i le fofogaina o le mataupu i le faamasinoga i Richmond, Misuri, ma maua ai le aofaiga atoa o Au Paia o Aso e Gata Ai i le 64 ua aumaia i le faamasinoga e tali i moliaga faasolitulafono. I le gasologa o le fofogaina i le faamasinoga, sa faailoa mai ai e Faamasino Austin A. Tupu ia Baldwin ma ofo atu ia te ia lona saolotoga pe afai o le a ia teena lana tapuaiga ma lafoai le Perofeta o Iosefa—o se ofo na teena e Baldwin. O le mea lava lea e tasi na faia i isi tagata na taofia, o i latou uma na “toe faafoi maia se tali e pei o le tali a le Susuga a. Baldwin.”
Na iu lava ina maua e Faamasino Tupu se mafuaaga talafeagai e faafalepuipui ai se vaega o taitai o le Au Paia o Aso e Gata Ai. O Iosefa Samita, Ailama Samita, Sini Rikitone, Laimani Wight, Alexander McRae, ma Kalepo Baldwin e tatau ona aveatu i le Falepuipui o Liperate i le Itumalo o Kalei, ona o falepuipui i itumalo ia na tutupu ai solitulafono e le lava avanoa mo le toatele o ia pagota. I le aso 1 o Tesema, 1838, na ulu atu ai Iosefa Samita i le falepuipui ma i le “sii ai o lona pulou, sa ia fai mai, i se leo ma’oti, ‘Talofa, alii.’ O le isi taimi na sosoo ai, sa le iloa atu ai. Sa suigi le faitotoa mamafa i ona sooga malolosi ma sa lilo atu le Perofeta mai le vaai a tagata fiailoa o e sa matamata atu ma le naunautai tele.”
Falepuipui o Liperate
O le faaaluina o le silia ma le fa masina i le falepuipui pu moomoo na faamaonia ai se aafiaga faavaivai loto. O puipui maa mafiafia e fa futu, o se taualuga e ono futu, ma le faavevesi faifai pea a leoleo na mafua ai ona faamatalaina e Iosefa ma ana soa le fausaga o se “seoli o loo siomia i temoni.” Sa tuuina i totonu o le sela pito i lalo e na taofia, lea e pa’u maualalo ai le fua vevela, mumu vaivai moli, sau le manogi leaga mai fafo, ma sa foliga mai ua telegese le taimi. E na o “nofoa vao palapala” na taofia ai pagota mai le momoe i luga o le fola ma’a, ae e oo lava i na mea na tuuitiitia le aoga i le gasologa o taimi.
E pei foi o le tulaga i isi falepuipui o le itumalo o le seneturi lona 19, na mama’i pagota i meaai. Sa faamatalaina e Iosefa ma ana soa a latou meaai i aso taitasi o ni “meaai e sili ona leaga ma eleelea tele sa le mafai ai ona matou aai ai seia oo ina uunaia i matou i le fia aai.” Ina ua iu ina aai pagota i a latou meaai na avatu, o meaai na mafua ai ona latou faasuati “a tali oti ai.” Sa masalomia e nisi o tagata na taofia le faa’onaina o a latou meaai ma vai pe fafagaina foi i latou i tino o tagata.
Na salalau le tala o pagota o le Au Paia o Aso e Gata Ai i le Falepuipui o Liperate, ma “na i ai se vaaiga i lea nofoaga o se vaega o pa e tuu ai meaola.” Sa asiasi atu tagata o le lotoifale i le falepuipui i vaega toatele ma faataupupula ma le maofa i pagota, ma a latou taufaifai o tauemuga e lagona atu mai puipui maa. Sa faitio Ailama Samita, “E masani ona asiasia i matou e tagata valelea o e o a latou faatinoga ua pei matou o ni elefane po o ni kamela e ’oso patua po o ni puaa sami po o ni tafola sauai po o gata sami.”
O lea aso ma lea aso, sa pagatia ai tamaloloa i le falepuipui, ma o le tiga faalelagona sa faifaimalie ma faaauau pea ona tofotofoina ai lo latou faatuatua. “Ua punonou ifo o matou agaga ma ua matou puapuaga i le tele o mafatiaga … ma e moni lava sa matou tigaina i le tele o puapuaga ma tofotofoga,” na tusi ai e Iosefa.
“O le fa masina na saisaitia ai i totonu o le Falepuipui i Liperate sa sili foi ona faigata faaletino i pagota. Sa tau le suluia e le la ia faamalama uamea laiti e lua sa faapea ona maualuluga tele mo le vaai atu ai, ma o itula uumi o le pouliuli na mafua ai ona tiga mata o alii e pei ona toe manatua ai mulimuli ane e se tasi na faafalepuipuiina. E ui ina sa faatagaina se afi laitiiti, ae o le leai o se alāasu e alu ai le asu, sa faapea ona faateteleina ai le afaina o mata o pagota. Sa tiga o latou taliga, sa gatete o latou neura, ma i ai foi se taimi na oo ai le gase atoa o le tino o Ailama Samita. O Sini Rikitone, e lona lua le matua i le kamupani e sosoo ma Baldwin, sa i ai i se tulaga sili ona lē lelei o le soifua maloloina lea, i le taoto ai i se moega e faasasasasa i luga, sa ia talosagaina ai le vave tatala i tua. O lana tautala faamomoi loto ma le ma’i tuga na mafua ai ona tatala i tua e le faamasino ia Rikitone a o lei o’o i le taimi faatulagaina.
Ae atonu o le mea na sili ona faalotovaivaia ai pagota na totoe, o le manatu lea e faapea, o aiga o le Au Paia o Aso e Gata Ai, e aofia ai ma o latou lava aiga, na taapeape solo, augapiu ma se mea, ma fetulina’i solo i le setete o Misuri. Sa lagona e Baldwin ma ona uso a pagota le tuuatoatasi ma le faanofoesea i le Falepuipui o Liperate, ae o isi pagota sa faamautinoa soo atu i ai i a latou uo ma aiga o loo manuia e ala i asiasiga ma tusi, sa na o le tasi se asiasiga puupuu na maua e Baldwin mai lona faletua, o Nancy, a o lei oo i le Kerisimasi i le 1838, ma e leai se faamaumauga o nisi fesootaiga ma ia po o le la fanau e toa 10 i le tolu masina na sosoo ai.
Sa foliga mai na leai se faamoemoe, na taumafai faalua pagota e sosola ese mai le falepuipui, i le aso 6 Fepuari ma le aso 3 o Mati, 1839, ae sa taofi e leoleo mataala a latou taumafaiga malolosi e sosola ese. E lua vaiaso mulimuli ane, i le aso 15 o Mati, na talosaga ai alii e toalima ina ia tatala i tua mo le taofiga faasolitulafono o i latou. O le talosaga e lua itulau a Baldwin na faamaonia ai lona manao tele ia toe faatasia ma lona aiga, o e na “tuliesea mai le Setete talu mai lona taofia e aunoa ma se auala mo lo latou tausiga.” E le gata i lea, sa iloa foi e Baldwin o lona atalii, e igoa foi ia Kalepo, sa “sasaina toetoe lava ina oti e tagata Misuri i laau o le hickory.” O lea, ina ua taofia “e aunoa ma se faamaoniga e faasaga ia te ia,” na fesili atu ai Baldwin ia taofia “sauaga faifaipea” ma ia soloia moliaga uma mai ia te ia. E ui lava i talosaga a pagota, ae na foliga e lava faamaoniga na i ai e taofia ai i latou.
E lua aso mulimuli ane, i le aso 17 o Mati, sa asiasia ai e Samuelu Tillery, o se tasi o leoleo falepuipui le sela maualuga ma maua ai se meafaigaluega e vilivili e eli ai pu, lea sa ia talitonu sa faaaoga e pagota e eli ai lo latou ala i puipui mafiafia. Sa faatonuina e Tillery ni alii se toa 25 i lalo e faauma le sailiga, ona faatonuina lea o lana vaega e saisai i filifili Iosefa Samita ma pagota i le fola. I le faaputu ai o le tolu ma le afa masina o le atuatuvale, popole, ma le le fiafia, sa tulai ae ai ma le malosi Baldwin i ona vae, tilotilo sa’o atu i mata o le leoleo falepuipui, ma faamautu atu, “Tillery, afai e te tuuina na filifili ia te a’u ou te fasiotia oe, o lea ia fesoasoani mai ia te a’u le Atua!” I upu a Ailama Samita, “sa lei pine ae toafilemu Tillery ma ioe e toe asiasi atu ma foia le mataupu.” E ui o le taufaamatau aasa a Baldwin na foia ai mo se taimi le tumau le finauga, sa faapea ona tuu ai pagota i lalo o se vaavaaiga mamafa atu.
I le na o le tolu aso talu ona uma le vevesi ma Samuelu Tillery, sa i ai pea Baldwin i le lototiga ma manatunatu ai pe o afea o le a ia toe vaai pe faalogo foi i ai mai lona aiga. Sa amata ona faalau atu e Iosefa Samita se tusi lea na siitia ai ma le le masalomia le agaga o Baldwin—o se tusi na aumaia talu mai lena taimi le faamafanafanaga ma le fautuaga i le faitau miliona o Au Paia o Aso e Gata Ai.
Tusi i le Au Paia
Sa tusia e Alesana McRae le tele o le tusi sa faatuatusi i “le ekalesia o le au paia o Aso e Gata Ai i Quincy, Ilinoi ma salalau i fafo atu ma ia Epikopo Paterika i se tulaga faapitoa,” e ui ina sa fesoasoani Baldwin i le tusia o le 2 o itulau e 29 o le tusi. Na tusia e tusitalafaasolopito o Dean Jessee ma Ioane Welch e faapea o le tusi umi a Iosefa Samita ua pei o tusi a Paulo. Mo se faataitaiga, na ta’ua e Iosefa o ia lava “o se pagota mo le Alii o Iesu Keriso” ma sa tusia e faapea “e leai se mea e mafai ona vavaeeseina ai i tatou mai le alofa o le Atua,” o le gagana e pei o tusiga a le Aposetolo o Paulo i Efeso ma Roma. Ona auiliili lea e Iosefa ia mafatiaga o le “au paia matitiva ma manunua,” e aofia ai aiga o loo feofeoai ma le leai o se fesoasoani ma le leai o se faamoemoe i le va o Misuri ma Ilinoi, faapea ai foi ma aafiaga faanoanoa sa i ai o ia ma ana soa i le Falepuipui o Liperate.
Ina ua uma ona tuuina atu se tala faavauvau o le agaga e uiga i le saua ma faatinoga e aunoa ma se alofa mutimutivale a nisi o o latou tuaoi i Misuri, Sa tautalagia e Iosefa upu muamua ia ua avea nei ma vaega 121 o le Mataupu Faavae ma Feagaiga: “Le Atua e, o fea ea lau afio? Ma o fea o i ai le faapaologa ua ufitia ai lou lafitaga? O le a le umi e taofia ai lou aao ma silasila mai ai mai le lagi faavavau lou fofoga, ioe, lou fofoga manino, i sese ua faia i lou nuu ma au auauna, ma oo atu ai i ou fofoga o a latou tiga? Ioe, le Alii e, o le a le umi latou te mafatia ai i nei sese ma sauaga e lē tusa ai ma le tulafono ae lei faamalūlūina lou finagalo ia te i latou ma uunaia ai lou finagalo i le agaalofa ia te i latou.”
Sa lei tali vave mai le aioiga faalelagi a Iosefa. Sa faaauau pea ona ia tomanatu i amioga saua e faasaga i le Au Paia o Aso e Gata Ai ma mafaufau pe o afea o le a oo mai ai le faamasinotonu i e faasauā ia te ia. Mulimuli ane, ina ua uma ona faamatala mai itulau e fitu o le faanoanoa ma le ita, sa oo mai se faamautinoaga faamafanafana i le Perofeta o Iosefa: “Lo’u atalii e, ia filemu lou agaga; o lou tiga ma ou puapuaga o le a na o sina taimi laitiiti ma ona oo lea ma afai e te gafatia lelei, o le a faaeaina oe e le Atua i luga; o le a e manumalo i ou fili uma.” Sa toe faamautu atu e le Alii ia Iosefa e faapea “afai e tatala faamaga lautele mai e auvae lava o seoli le gutu ia te oe, ia e iloa, loʼu atalii e, o nei mea uma e te maua ai le poto masani, ma o le a avea mo ou lelei. Na afio ifo le Atalii o le Tagata i lalo o i latou uma. Ua sili atu ea oe ia te ia?”
O nei upu faamafanafana na faaosofia ai se lagona o le talitonu ia Iosefa. Sa ia fai mai o le Atua “o le a i ai se nuu tofotofoina” ma o le aafiaga o le Au Paia o Aso e Gata Ai i Misuri o “se suesueina o lo tatou faatuatua e tutusa ma aafiaga o Aperaamo.” O le tulaga na oo i ai le faasaoina o Aperaamo mai le ositaulagaina o lona atalii o Isaako, o le a faapena foi ona laveaiina Au Paia o Aso e Gata Ai mai o latou tofotofoga pe afai latou te tumau faamaoni.
Ona tuuina atu lea e Iosefa o faatonuga i nisi o mataupu faaopoopo. Muamua, sa ia faatonuina le auala e faatautaia ai konafesi ma fonotaga a le aufono o loo loma, ma tuuina atu ai i ana soa o le falepuipui le faamoemoe o le a vave ona latou toe taloina faatasi ma le Au Paia. O le isi aitema o le pisinisi o le faatauina lea o meatotino i le Teritori o Aioua. Sa talitonu Iosefa o le laueleele o le a “tele le aoga i le ekalesia” ma fautuaina Eteuati Paterika ma isi i le auala e soalaupule lelei ai le fesiitaiga, ma faamamafa atu ai le taua o le faia o lena mea e aunoa ma le faaloloto po o le sailia o mea mo le tagata lava ia. Sa ia fautuaina foi taitai o le Ekalesia ia manatua i latou o e le tagolima ma “tauaveina vaivaiga o e vaivai.”
Ona sui lea o autu o le tusi i le faapea ai, aua ua toatele e valaaulia, a e toa itiiti e ua filifilia, o upu na faaaoga e Iesu i le Feagaiga Fou (tagai i le Mataio 22:14). Sa faanoanoa Iosefa ona o ia ma le Au Paia o Aso e Gata Ai na aoaoina “e ala i aafiaga faanoanoa” o le mana faataumaoi o le faamaualuga. Atonu na tomanatu Iosefa i nisi o ana uo mamae, e pei o Viliamu W. Phelps ma Feterika G. Viliamu, o e sa lei leva ona liliuese. (O le a iu lava ina toe foi uma i laua i le faaaumeaina atoatoa i le Ekalesia.) Sa faamatala atu e Iosefa uiga patino e tatau ona sailia ia maua e i latou uma e umia le perisitua ma Au Paia uma o Aso e Gata Ai pe afai e latou te faamoemoe ia ia i latou le faaaafiaina o isi: agamaualalo, agamalu, faatauanau, loa ona tali-tiga, agalelei, alofa mama, amiomama, ma le alofa.
Ina ua lata i le faaiuga o le tusi, sa toe foi atu Iosefa i sauaga na mafatia ai le Au Paia o Aso e Gata Ai i Misuri. Sa talitonu Iosefa o le Faavae o le Iunaite Setete e avea “o se tagavai mamalu” lea na faamautinoa ai le saolotoga e tapuai ai, ma sa ia talosagaina le Au Paia e saini ni faamatalaga auiliili o o latou tiga ma le faiga faaleaga o i latou. E aunoa ma se faamaoniga o le mauaina o soo se mea e toe maua mai, sa naunau ai lava Iosefa ma le Au Paia e “tuuina atu [a latou tautoga] i faauluuluga o le malo,” ma faataunuu ai se poloaiga na tuuina mai e le Alii.
O le tusi umi a Iosefa Samita sa i ai sona aafiaga tumau. Sa le gata ina fautuaina ai Baldwin i le falepuipui ma mafatiaga o le Au Paia i le vevesi i Misuri ae sa faaauau pea ona toe lolomiina mo le tele o tausaga i le Times and Seasons, Millennial Star, ma le Deseret News. Na iu lava, ina faapaiaina ia vaega e pei o le Mataupu Faavae ma Feagaiga vaega 121, 122, ma le 123, ma o na fuaitau o loo faaauau pea ona tuuina atu le faamafanafanaga ma le taitaiga i soo se tasi e suesueina tusitusiga paia mo le uiga.
Na iu lava ina mafai e soa i le falepuipui ona “sosola” mai pulega faaletulafono a o faafeao atu i se faamasinoga i le Itumalo o Boone, Misuri, ia Aperila 1839. Sa faatagaina e leoleo o le falepuipui ia pagota e sosola ese mai le taofiga i le mavae ai ona taitai ese atu i latou mai fili o le Au Paia o Aso e Gata Ai i le Itumalo o Kalei. Sa oo ina vavaeese Baldwin mai ia Iosefa ma isi i ni nai taimi ina ua mavae le latou solaaga, ae na iu ina kolosi atu pagota uma i Ilinoi, ma iu ai ina toe faatasia ma aiga, uo, ma isi tagata sulufai uma o le Au Paia o Aso e Gata Ai.