“E Ao Ina Faia Mea Uma i le Faatulagaga Tatau”

Jeffrey G. Cannon

I le taumafanafana o le 1830, sa tusi atu ai Oliva Kaotui ia Iosefa Samita mai le fale o Pita Uitimera, lea na faatulagaina ai le Ekalesia i le amataga o lena tausaga: “Ou te poloai atu ia te outou i le suafa o le Atua e aveese na upu, ina ia leai se faitaulaga pepelo i totonu o i tatou.” Sa manino lona faanaunauga, ae o le a le mea na matua faapopoleina ai le Toeaina Lona Lua o le Ekalesia o le a ia matuai malosi ai i ana fesootaiga ma le Perofeta?

I lalo o le poloaiga paia, sa tusia ai e Oliva se pepa o faamatalaga ua ta’ua o “Mataupu Faavae o le Ekalesia a Keriso” lea na mulimuli ane suia i se pepa lona lua na tusia e Iosefa, ua faaautuina “Mataupu Faavae ma Feagaiga o le Ekalesia a Keriso.” O le pepa o faamatalaga a Iosefa sa faaaoga ai le tele o le gagana lava e tasi ae sa faaopoopo i ai ni fuaitau taua e faamanino ma faalauteleina ai le uluai tusiga a Oliva. O le pepa o faamatalaga mulimuli ane a Iosefa sa taliaina e le Ekalesia i lana konafesi ia Iuni 1830 ma noatia ai le Ekalesia ia soifua e tusa ai ma lea pepa o faamatalaga. E ui i le taliaina e tagata o le Ekalesia, sa le faamaonia e Oliva se fasifuaitau i le lisi o mea e manaomia mo le papatisoga: “Ma faaali moni mai ia latou galuega ua latou maua le Agaga o Keriso mo le faamagaloina o a latou agasala.”

Atonu na lagona e Oliva lona aafia ai i le atinaega o le pepa o faamatalaga na agavaa ai o ia e faia ni faatonuga e faatatau i le tusiga. Peitai, sa le ioeina e Iosefa, ma finau mai o le tulaga manaomia na oo mai e ala i faaaliga. I lana tali, sa fesili ai Iosefa “po o le a le pule na ia aveina i ona luga e poloaiina ai a’u e suia, pe tapeese, e faaopoopo pe aveese mai se faaaliga po o se poloaiga mai le Atua Silisili Ese.”

I ni nai aso mulimuli ane, sa amata ai e Iosefa se malaga mai lona fale i Haramoni, Penesilevania, e vaai ia Oliva i le fale o Uitimera i Feiete, Niu Ioka. O faamaumauga o le talafaasolopito o Iosefa, “Sa ou maua le aiga o [Uitimera] i se tulaga lautele e lagolagoina manatu [o Oliva] … ma sa manaomia uma taumafaiga ma le faapalepale ia faatalitonuina soo se tasi o i latou ia malamalama filemu e uiga i le mataupu.” I le faaiuga, “Sa faamanuiaina au i le aumaia e le gata o le aiga o Uitimera, ae faapea foi Oliva Kaotui e faailoa mai sa sese i latou.”

Faatasi ai ma le faamanuiaina i le poto masani o tausaga e tele, na toe tomanatu ai Iosefa i le mea na tupu, i le tusiaina, “Ma sa faapea ona aveesea ai lenei mea sese, lea na mafua i le manatu o le sa’o lea ma se faaiuga faananati, ma faapitoa le fuafuaina (ina ua malamalama lelei i ai) e aoao i tatou taitoatasi ma i tatou uma i le tatau ai o le lotomaualalo, ma le agamalu i luma o le Alii, ina ia mafai ona ia aoao mai tatou i ona ala, ia mafai ona tatou savavali i ona ala ma ola ai i afioga uma e tulei mai i lona fofoga.”

Peitai, o le lesona, e foliga mai e le faigofie ona aoaoina. I totonu o ni masina, sa toe manaomia foi e Iosefa ona faamamafa atu lana pule o le fofogatulei o faaaliga. O sauaga na siomia ai lona fale i Haramoni, Penesilevania, na faamalosia ai Iosefa ma lona faletua, o Ema, e nonofo faatasi ma le au Uitimera ia Aokuso 1830. Ina ua taunuu atu, sa iloa e Iosefa o Hiram Page, le tane a se tasi o afafine o le au Uitimera, sa ia faaaogaina se tasi o maa e maua ai ni faaaliga se lua e faatatau i le Ekalesia.

Atonu o le manatuaina o lona faamanuiaina na faatauanauina ai Oliva Kaotui ma le au Uitimera i lo latou sese e faatatau i “Mataupu Faavae ma Feagaiga,” sa faamoemoe Iosefa e talatalanoa ma i latou seia oo i se konafesi o le a taloina ia Setema. Peitai, sa vave ona ia iloaina, o lena talitonuga i faaaliga faafoliga a Hiram Page sa sili atu ona salalau atu nai lo le mea sa ia mafaufau i ai, o lea sa ia sailia ai se faaaliga e uiga i le mataupu.

O le faaaliga na faatatau ia Oliva Kaotui. Sa faamautinoa atu ia Oliva o le a i ai le avanoa e faafofogaina lona leo ae sa lapataia e faapea “e leai se tasi e tofia e Mauaina poloaiga & Faaaliga i le Ekalesia lenei vagana ai la’u Auauna o Iosefa aua na te Mauaina i latou e faapei o Mose & e ao ona e usitai i mea o le a Ou tuu atu ia te ia.”

O Oliva ia Iosefa e faapei foi o Arona ia Mose, e avea o se faiaoga ma se failauga. O lona tofiga muamua lava i lena matafaioi o le faatalitonuina lea o Hiram Page e uiga i lona sese e faatatau i faaaliga mai lana maa. Lona lua, sa tatau ona ia faia se misiona i Initia Amerika.

Ina ua taloina le konafesi i le faaiuga o Setema, sa faamaumauina e le talafaasolopito na tusia mulimuli ane a Iosefa Samita e faapea, “O le mataupu o le maa o loo ta’ua i luga, sa talanoaina, ma ina ua mavae se suesuega tele, na lafoaia e Uso Page, faapea foi ma le ekalesia atoa sa i ai, le maa na ta’ua, ma mea uma na fesootai atu i ai, lea na mafua ai lo matou faamalieina ma le fiafia moni.” O minute pupuu (o le konafesi) na tusia e Oliva Kaotui o loo faamauina ai o Iosefa Samita “sa tofia e i latou na auai i le konafesi e mauaina ma tusia Faaaliga & o Poloaiga mo lenei Ekalesia.”

Sa masani ona maua e Iosefa ia faaaliga ma poloaiga, ae o le tele o ia faaaliga sa le’i lolomiina mo ni nai tausaga, ma faatapulaaina ai lo latou avanoa mo tagata o le Ekalesia. I le taimi lava lea e tasi, o taumafaiga faafaifeautalai a le Ekalesia na maua ai se aofaiga tele o tagata fou liliu mai. E toatele tagata o le ekalesia pe le’i iloaina, malamalama sese, pe sa filifili e le amanaiaina ia faaaliga na faamanino ai le matafaioi a Iosefa Samita, ma o faamatalaga sese i faaaliga mo le Ekalesia sa faaauau pea i nisi taimi.

E lei leva ona mavae le toe sii atu o le Ekalesia i Katelani, Ohaio, ae oo mai se “fafine e igoa ia Hubble” ma faailoa mai ana lava faaaliga. Sa toe faamautu mai foi e se faaaliga (lea ua ta’ua nei o le Mataupu Faavae ma Feagaiga 43) e faapea o Iosefa o ia lea e toatasi “ua tofia ia e outou e maua poloaiga & Faaaliga mai lo’u lima” ma faaopoopo i ai “ia leai se isi e ese mai ai e tofia i lenei meaalofa vagana ai ua auala mai ia te ia.”

O le aoaoga faavae a le Au Paia o le faafouina, Feagaiga Fou–e pei o faaaliga a le Agaga Paia na valaaulia ai tagata o le au paia e saili le meaalofa o faaaliga mo i latou lava. Peitai, mo le Ekalesia atoa, o le fausaga atiae ma le faiga ua atofaina Iosefa Samita o le leo tuuatoatasi o le pule e fofogaina ai faaaliga o le a noatia ai tagata uma o le Ekalesia. “Aua,” e pei ona ta’u mai e le faaaliga ia Setema 1830 ia Oliva Kaotui, “e ao ina faia mea uma i le faatulagaga tatau.”