“Toefuataiina o le Faatulagaga Anamua,” Faaaliga i le Talaaga (2016)
“Toefuataiina o le Faatulagaga Anamua,” Faaaliga i le Talaaga
Toefuataiina o le Faatulagaga Anamua
Ia Me o le 1829, sa tootutuli ai Iosefa Samita ma Oliva Kaotui e latalata i le Vaitafe o Susikuana. Faatoa uma lava ona la faitau e uiga i le papatisoga i le 3 Nifae ma mananao ia iloa po o fea e mafai ona la maua ai le pule na tuu atu e Iesu i Ona soo anamua. I le tali mai i a la tatalo, na faaali mai ai Ioane le Papatiso ma faaee lima i luga o o la’ua ulu e faaee atu ai le pule la te manaomia e papatiso ai e le tasi le isi. ”Mafaufau mo sina taimi,” na uunaia mulimuli ane ai e Kaotui lana uo o W. W. Phelps, ”oka se olioli na faatumulia ai o ma loto ma le mea na faateia ai i ma’ua i lo ma punonou ifo … ina ua ma mauaina i lalo o lona aao le perisitua paia.”
Ae o le toefuataiga o le pule o le perisitua sa lei vave mai ona o faatasi ma se toefuataiga o le faatulagaga o le perisitua. E mafai e i latou taitoatasi e umia le perisitua ona faatino ia sauniga, ae faapefea ona latou galulue faatasi e faia le galuega a le Alii?
Puleaina o le Konafesi
O le tele o ekalesia sa faagaoioiina i le setete o Niu Ioka i le vaitau o le 1830 sa taulimaina pisinisi e ala i konafesi faalekuata a toeaina, ma i lona tausaga muamua sa mulimuli ai le Ekalesia toefuataiina i lena mamanu masani. Ina ua maea ona faatulagaina ia Aperila, sa faia e taitai o le Ekalesia ia konafesi ia Iuni ma Setema e lipoti atu ai e uiga i le alualu i luma o le Ekalesia ma faatautaia pisinisi. O lenei faiga o konafesi faalekuata sa aofia ai i Tusiga ma Feagaiga a le Ekalesia (lea ua avea nei ma Mataupu Faavae ma Feagaiga 20) ina ua tusia i le tusi o faaaliga tusilima a le Ekalesia.
Ae i le 1831, sa oo ina faateleina le manino faapea o konafesi a le Ekalesia o le a sili atu nai lo sauniga masani. I le taimi o le konafesi muamua o le tausaga, sa maua mai ai se faaaliga (lea ua avea nei ma Mataupu Faavae ma Feagaiga 38) lea na faataatia mai ai ni galuega faatino ma ni sini patino mo le Ekalesia e galulue agai i ai. E lei umi ae faateleina le aofai o konafesi e faatulaga ma faamanino faauigaga o le galuega a le Alii: mai ia Aokuso e oo ia Tesema o le 1831, na faamaumauina ai minute mo konafesi e 26—o se averesi o le silia ma le tasi le konafesi i le vaiaso.
I se tasi o nei konafesi, sa faamamafa mai ai e le Perofeta le manaomia ona agai i tala atu o mamanu masani ma ia ”malamalama i le ala anamua e taitai ai sauniga e pei ona taitaiina ai i latou e le Agaga Paia.” O fuafuaga eseese ma mataupu aoai e feagai ma le Ekalesia talavou sa manaomia ai se taumafaiga fefaasoaai ma musuia. Ae afai e tele naua pisinisi e taulimaina e konafesi a toeaina uma, o ai e tatau ona nafa ma soo se mataupu na tuuina atu?
O Le Fatulagaga o Aufono
O se faaaliga na maua i le aso 11 Novema, 1831 (lea ua avea nei ma Mataupu Faavae ma Feagaiga 107:60–100), na fesoasoani i le Au Paia ia malamalama i le auala e faaaoga ai le mana o musumusuga fefaasoaai a o vavaeeseina manaoga faigata o le taitaiga a le Ekalesia. O nisi ituaiga o mataupu sa tofia i le epikopo, o e na mafai ona valaauina ni fesoasoani e fesoasoani ia te ia i ona tiute. O se peresitene o le perisitua maualuga o le a iloiloina ni mataupu e sili atu ona faigata, e lagolago i ai faitaulaga sili e toa 12 o ni fesoasoani. O peresitene o toeaina, ositaulaga, aoao, ma tiakono o le a valaauina foi e fono faatasi ma a latou vaega.
Ae o le faaopoopo atu i le polokalama masani o le konafesi faatasi ai ma se polokalama a le aufono e le masani ai, na faamaonia o se faagasologa faifai malie. Sa lei vave ona filifilia peresitene mo vaega taitasi, ma sa le ogatusa ia failautusi ma le eseesega i le va o se konafesi ma se aufono. Ia Iulai o le 1832, sa ”foia ai” e tagata o le ekalesia i Misuri ”lena tulaga ma le ala e pulea ai le Ekalesia a Keriso,” e pei ona faaalia i le faaaliga o Novema, ”e faaaogaina mai i lenei taimi,” ae latou te lei filifilia se peresitene o toeaina seia oo ia Setema. Ma e ui ina sa lagolagoina o ia o se peresitene o le perisitua maualuga ma filifilia ni fesoasoani se toalua, ae sa tatau ia Iosefa Samita ona faapotopoto faitaulaga sili o loo avanoa e galulue i se aufono atoa a le peresitene atoa i taimi taitasi e tulai mai ai se tulaga manaomia.
Sa i ai foi faafitauli i amioga a tagata auai i fonotaga. Peitai, o nisi sa auai ai, “e femusua’i le tasi i le isi, e iu ina iloagofie le fememeai, pe iu lava ina tuua i le ogatotonu o se sauniga a le aufono. O le manatu faapito faaletagata ma vaivaiga na faigata ai foi ona saili le finagalo o le Alii.
Na tauaveina e Iosefa Samita le tiutetauave mo nei vaivaiga fefaasoaai. ”Ou te lei faia lava mea uma ia sa tatau ai a o avea au ma taitai o le aufono,” sa ia saunoa ai i se fonotaga a le aufono ia Fepuari 1834, ”atonu, na aveesea mai ai mai le Au Fono nisi, po o le tele o faamanuiaga.” Ona ia taumafai lea e ”faaali atu le faatulagaga o aufono i aso anamua e pei ona faaali atu ia te ia e ala i se faaaliga.” O le faaaliga a le Perofeta e uiga i se aufono i Ierusalema sa pulefaamalumalu ai le Aposetolo o Peteru ma fesoasoani e toalua na avea ma faataitaiga mo le faatulagaina o le uluai aufono masani a le aufono maualuga, i lea taimi e avea o se faataitaiga mo isi aufono i le Ekalesia atoa. O minute o loo faaalia ai nisi o vaega taua o le aufono—e pei o le aia tatau a se tagata ua molia ina ia i ai le afa o le aufono o ni fautua—na faamaonia mulimuli ane i le Mataupu Faavae ma Feagaiga 102.
A o lei faataitaia e le aufono maualuga lana faamasinoga muamua, sa faamanuia ai e Iosefa Samita ona fesoasoani e toalua. Na soso’o ai ma, tamā e toalua—Iosefa Samita le Matua ma Ioane Ioanesone—na faamanuiaina o la atalii. E pei lava ona soofaatasi ia konafesi ma le faatulagaga o aufono, o le faatulagaga faaletaitaiga o le perisitua i le Ekalesia o le a o faatasi ma le perisitua e faatotonugalemu-i-le-aiga.
O Korama
I se vaiaso talu ona faatulagaina le aufono maualuga i Katelani, na taunuu ai Pale P. Palate ma Laimani Wight mai Misuri e talosagaina se taitaiga e fai ma sui mo le Au Paia o e na tutuliese faamalosi mai o latou fale. I le avea ai ma se tali atu i le la asiasiga, na fuafua ai e Iosefa Samita ma fautua maualuga se malaga e fesoasoani ia i latou.
I le avea uma ai o le faapotopotoina o alii ma tupe i paranesi o le Ekalesia i sasae mo le mea na ta’ua o le Tolauapiga a Siona ma a o malaga ai mai Ohaio i Misuri, sa faaaluina ai e Iosefa Samita se taimi tele i paranesi toalaiti a le Ekalesia. Sa fesoasoani le faatulagaga o aufono e vaevae ai manaoga o pisinisi a le Ekalesia mo le taimi o e umia le perisitua i nofoaga autu o le Ekalesia, ae sa faaitiitia le faia mo le faatulagaina ai o le perisitua i le va faaletino, tuuina atu le laugatasia i le va o nofoaga autu e lua o le Ekalesia, po o le taulimaina o manaoga o paranesi e sili atu ona mamao. Sa manaomia nisi faaaliga.
I Misuri, lea sa faapotopoto ai le toatele o tagata o le Ekalesia e latalata i le nofoaga fuafuaina o Siona, sa faatulagaina ai se isi aufono a fautua maualuga e tusa ma le ala na faatulaga ai le aufono maualuga muamua. O lenei foi, sa faamanuia ai e Iosefa Samita.le peresitene o le aufono ma ona fesoasoani e toalua, ma faapea foi tamā e toalua—o le taimi la lea na faamanuiaina ai e Peteru Uitimera le Matua ma Iosefa Knight le Matua—o la atalii. Ae o le a le mea e tatau ona fai mo paranesi laiti a le Ekalesia? Ina ua maea ona toe foi mai Misuri i le faaiuga o le Tolauapiga a Siona, sa faavaeina ni vaega fou se lua o le perisitua: o le Korama a Aposetolo e Toasefululua, o lona tiute o le a aofia ai le auauna atu o se ”aufono maualuga femalagaai, pulefaamalumalu” mo paranesi o le Ekalesia, ma Fitugafulu, o e o le a fesoasoani i le Toasefululua. E faaopoopo atu i le auauna atu i paranesi o loo i ai nei a le Ekalesia, o le Toasefululua ma Fitugafulu e tatau ona talai atu le talalelei i le lalolagi atoa ma faatulaga ni paranesi fou.
I le tautotogo o le 1835, na auina atu ai Aposetolo e Toasefululua faatoa valaauina i se misiona e ”pulea paranesi i sasae o le Ekalesia. Ae latou te lei tuua, sa tuuina atu e Iosefa Samita ia i latou ni faatonuga auiliili e uiga i le faalapotopotoga o le perisitua, lea ua i ai nei i le Mataupu Faavae ma Feagaiga 107. O nei faatonuga i le Toasefululua ua faamanino ai sootaga i totonu o le perisitua. Sa latou faamanino atu le talafaasolopito ma matafaioi o le perisitua Mekisateko ma le Arona. Sa latou folasia atu le manatu faavae o se ”korama” e faamalamalama ai galuega tulaga ese ma pule fesiliai o le Au Peresitene Sili, Aposetolo e Toasefululua, Fitugafulu, ma fautua maualuga. Sa latou faatulaga foi mo le tofiga o peteriaka e faaauau ai le faatulagaga o le perisitua e tuufaasolo mai le tamā i le atalii e lalago faatasi ai ma le faatulagaga faalepulega.
Lagolagoina o le Faalapotopotoga Fou
I le tautotogo ma le taumafanafana o le 1835, e fa vaega i le faatulagaga o le perisitua na aoina mai i le amataga o le Mataupu Faavae ma Feagaiga fou, i le faatoa maea ai o le faatomuaga ua faaalia mai. O le mea muamua o Tusiga ma Feagaiga a le Ekalesia (lea ua avea nei ma Mataupu Faavae ma Feagaiga 20). O le isi mea na sosoo ai na oo mai ai le anomea fou mai le faatonuga i le Toasefululua, lea na tuufaatasia ma se lomiga ua toe faafouina o le faaaliga ia Novema 1831 e uiga i aufono a le perisitua i se vaega e tasi (lea ua avea nei ma Mataupu Faavae ma Feagaiga 107). O se faaaliga o loo i ai le tautoga ma le feagaiga o le perisitua (lea ua avea nei ma Mataupu Faavae ma Feagaiga 84) na faaali mai lona tolu. Ona oo mai lea o minute o le uluai faalapotopotoga a fautua maualuga, ua toefaafouina ma se faasinoga manino i le matafaioi a le Korama a Aposetolo e Toasefululua. I le tuufaatasiga, o nei vaega na avea o se ituaiga o tusitaulima mo le faatautaiga o le Ekalesia.
I le aso 17 Aokuso, 1835, sa faamaonia aloaia ai e tagata o le Ekalesia le Mataupu Faavae ma Feagaiga, ma taliaina ai lenei faatulagaga faaalia o le perisitua. I le isi fitu masina na sosoo ai, sa amata ona faauuina tagata i tofi o le persitua ina ia mafai ai ona faatulagaina atoatoa ia korama o le perisitua mo le lagolagoina i le faapaiaga o le Malumalu o Katelani.