Suesuega o le Mataupu Faavae ma Feagaiga
O Le Nofoaga Tutotonu

“O Le Nofoaga Tutotonu,” Faaaliga i le Talaaga (2016)

“O Le Nofoaga Tutotonu,” Faaaliga i le Talaaga

O Le Nofoaga Tutotonu

MF&F 52, 57, 58

Jed Woodworth

Initipene, Misuri

I le taimi atoa o le talafaasolopito i Sisifo, o Kerisiano o soo se ituaiga sa faananau mo se lagi fou ma se lalolagi fou. I le faaaliga maoae a Ioane le Tali Faaaliga o “le aai paia, o Ierusalema fou, ua alu ifo mai le Atua i le lagi,” e saunia le ala mo le toe afio mai o Iesu Keriso o le Alii ma le Tupu, ua faafiafiaina ai faamoemoega ma manaoga o le toatele o tagata. O le a la le Ierusalema Fou? Pe, pei na tautino e St. Augustine, o se faatusa mo le faamanuiaina i le “tino ola pea ma le faavavau o le au paia”? Pe o se mea e faaupuina sa’o, e pei ona talitonu i ai Tagata Porotesano Amerika o le seneturi-lona 17 a o latou mafaufau i le latou nuu o se puna o le faafouina faalelotu, o se Egelani “Fou”?

O le Ekalesia toefuataiina a Iesu Keriso sa i ai pea i lona tulaga tamameamea—e lei atoa le ono masina le matua—ina ua amata ona vaai atu le Au Paia o Aso e Gata Ai i le Ierusalema Fou i la latou lava ala. O faaaliga a Iosefa Samita i popofou na faamatalaina ai lea faalapotopotoga e le o se faatusa po o se potopotoga. Sa avea lava, o se aai e tatau i Au Paia ona fausia. O le Ierusalema Fou, e faaigoa foi o Siona, na tatau ona avea o se sulufaiga, o se nofoaga o le filemu, o se “nofoaga tutotonu.”

E lua fesili na oo mai i le mafaufau i le taimi lava lena mo le Au Paia. Muamua po o fea e finagalo le Alii e fausia ai le Ierusalema Fou. Lona lua o ai o le a faataga i le aai. O se faaaliga na tuuina atu i a Iosefa Samita ia Aokuso 1830 na tuu mai ai ni uluai tali, faatonuina ai Oliva Kaotui, Pale P. Palate, ma nai isi e o atu i sisifo a o talai atu i le ala. “Ia e alu atu i Sa Lamana,” o le poloaiga lea a le Alii, e faatatau i le igoa na faaigoaina ai e uluai Au Paia ia Initia Amerika, “ma talai atu la’u talalelei ia te i latou….[ma] faia ia faatuina la’u ekalesia i totonu o i latou.” O le nofoaga mo le aai, na faapea mai ai faaaliga, o le a i ai “i totonu o sa Lamana.”

O le vaega a Kaotui na talai i totonu ma faataamilo i Katelani, Ohaio, ma faaliliu mai le toatele o tagata iina. Ona latou malaga ai lea mo le faitau selau maila i saute ma sisifo, ma faaiu atu ai i taufaasiusiuga i sasae o tuaoi o le Iunaite Setete, i le tuaoi i le va o le setete o Misuri ma le Teritori a Initia. Sa latou talai atu i nisi o ituaiga o Initia Amerika, ae e lei umi ae poloaiina i latou e o ese mai le teritori e sui o le malo o le Iunaite Setete ma molia i le puleaina o sootaga i le va o tagata papae ma Initia. O se tala fou faalotovaivaia lenei mea, ae sa maua’a Iosefa Samita, sa le fefe, ma lagolagoina o ia i le siufofoga o le Atua. I se faaaliga ua iloa nei o le Mataupu Faavae ma Feagaiga 52, na tuuina mai ia Iuni 1831, sa poloaiina ai e le Alii ia Iosefa Samita e malaga atu i Misuri i “le laueleele o le a Ou faapaiaina mo lo’u nuu.” O iina o le a faailoa atu ai le nofoaga mo le aai o Siona.

E pei ona sa Ia faia muamua i le laueleele o Kanana anamuā, sa faailoa mai e le Atua le laueleele e paia a o lei faamautu ai iina Lona nuu o le feagaiga, ma e pei o Kanana muamua, sa lei gaogao Misuri ina ua taunuu mai tagata o le feagaiga. O le nofoaga sa valaauina ai le Au Paia e faapotopoto i ai sa i ai se talafaasolopito umi ma faigata o le nofoia.

Tuaoi Finauaia

I le taimi lava na taunuu ai i Misuri, na iloa e Iosefa Samita e ala mai i se faaaliga o le nofoaga mo le aai o Siona sa i luga o se fanua e tu i lalo ifo o se gauga o le Vaitafe o Misuri, e tusa ma le 10 maila i le itu i sasae o le laina teretori a Misuri-Initia (i le taimi nei o le tuaoi o Misuri-Kansas). Mo le tele o augatupulaga sa avea lenei eria o Misuri i sisifo ma nofoaga tumau mo au Initia tutotonu e ta’u o Siouan. I taimi mulimuli e pei o le gasologa o le 1600, o Initia mai lea vaega o gagana na malaga i saute mai le Vaitafe o le Vanu o Ohaio, agai i lalo o le Vaitafe o Misisipi, ma i sasae i le pito i lalo o Misuri, ma nofoia aega lafulemu ma eleele lelei i le va o vaomatua i sasae ma Laufanua Maoae i sisifo.

Mulimuli ane i se seneturi o le le malolo ina ua fasiotia le toatele o tagata nuu i faamai o Europa, eseese mai Europa, o tagata o Siouan Tutotonu sa toe faatulaga i ni ituaiga eseese. O le au Wah-haz-he (“o tagata o vaitafe laiti i luga”)—lea sa faapuupuuina e le au Farani o Osage—na alia’e o ni tagata nofomau autu o le vaega maualalo o le Vaitafe o Misuri. Sa faamatalaina o ni tagata “uumi, malosi, lautele tauau e faafoliga i sauai,” sa fausia e tagata Osage ni nofoaga tumau i le va o le Vaitafe o Osage i Misuri Tutotonu i matu ma le Vaitafe o Misuri e lata i Initipene i le taimi nei. O o latou fale, e tu tu i luga o maupu’epu’e maualuluga e iloa atu ai laufanua o nu’u, sa fauina fale e ala i le faapi’oina o laau laiti i luga o pou autafa e faatulaga ai le faaofuofu o se taualuga ma o nisi taimi e fuaina i le 100 futu le umi. O lenei aganuu o tagata e ola i tuli manu, fagogota ma meaai o le vao, ma se faatulagaga o agafesootai ma faapolokiki lavelave sa toatele i le itu pito i lalo o le Vaitafe o Misuri mo le tele o seneturi.

O le eria lata ane i Initipene, Misuri, sa le o se “nofoaga tutotonu” mo tagata Osage, e pei ona avea ai mo tagata o le Au Paia- o Aso e Gata Ai. I taimi mulimuli o le gasologa o le 1800, sa pulea ai e Osage pe tusa ma le tasi le afa o Misuri o aso nei, Okalahoma, Arkansas, ma Kansas. O le totonugalemu o le latou malo sa i ai i saute tutotonu o Misuri, ae le o le tuaoi i sisifo o le setete.

O nisi o vaega sa finau tutusa ma le au Osage mo le fanua e mulimuli ane ta’ua e Au Paia o Aso e Gata Ai o Ierusalema Fou. O le lautele o le tele o le togavao i Matu o Amerika sa uunaia ai miti tetele mo ni malo i ni vaega o atunuu Europa. O Sipaniolo na lagolagoina le latou puleaga i totonu atoa o Amerika i Matu i le 1539, ma e le fia toilalo ai, o Farani na pulea i le 1682 Amerika i Matu atoa i le va o Mauga Appalachian i sasae ma Mauga Maa i sisifo. O nei faamatalaga na itiiti se vaaiga mo ituaiga tagata initia e pei o le Osage, ma leai se gauai atu i laueleele mamao i tafatafa o le Vaitafe o Misuri e lata i Initipene. O le gauai atu o Europa sa i ai lea i tuaoi o o latou malo, i nofoaga sa i ai pisinisi e tamaoaiga ma faigofie e vaa ona saofaga atu i ai—i autafa o le Vaitafe o Saint Lawrence, i le mea o le a avea ma Kanata, ma motu o le Atu Keripiane.

O Farani sa faaigoaina le aofaiga tele o fanau na latou pulea mo i latou lava o Luisiana, i le latou tupu Farani. Sa iu lava ina pasi atu le laueleele i lima o Sipaniolo ona toe foi mai lea i Farani, lea sa latou faatauina atu i le Iunaite Setete i le Fefaatauaiga a Luisiana i le 1803. Ma o lena faatauga sa oo mai ai le nofoaga lumanai mo le aai o Siona.

O le fefaatauaiga o Luisiana na aumaia ai ni tagata nofomau fou a o masii atu tagata nofomau o le I.S i Misuri, lea na avea ma setete i le 1821. O faiga malo lava e tasi sa i ai i isi setete na ave atu i Misuri. O tagata nofomau i autafa o le tuaoi i sisifo sa talosaga i faitulafono a Misuri mo le faatulagaina o itumalo, ma i le 1827, sa fatuina ai e le au faitulafono le Itumalo o Jackson. O le aai fou faatoa nofoia o Initipene, o loo tu i le itu i saute o le Vaitafe o Misuri i autafa o auala o fefaatauaiga e igoa o le Auala o Santa Fe, sa avea ma aai tutotonu o le itumalo.

O le Mataupu Faavae ma Feagaiga 57, na tuuina mai ina ua taunuu Iosefa Samita i Misuri i sisifo, na faamatalaina le tulaga tau faapolokiki ma agafesootai o le Au Paia i lea eria. O le “nofoaga tutotonu” mo Siona, na fai mai ai le faaaliga, o le a i ai i “le nofoaga ua ta’ua nei o Initipene,” lea e le silia ma le selau tagata na nonofo ai i lena taimi. O tagata papae i le taimi lea e masani ona nofoia mau ai fanua, i le manatu faalemafaufau e le’i umia muamua i le mulimuli ane lesitalaina la latou aia i le falefaamasino o le itumalo. Sa taua e le faaaliga lenei fale faamasino—o se malumalu, na faapea mai le faaaliga, e tatau ona fausia i le itu i sisifo [o le malumalu]. I le taimi na tuuina mai ai le faaaliga, o le tele o le laueleele ua nofoia e tagata, e manaomia ai le Au Paia e fetuutuunai ma i latou e ona eleele i le tulafono. Sa faapea mai le faaaliga o le a le finauaia e le Au Paia o Aso e Gata Ai laueleele paia e ala i le faamalosia e pei ona faia i Kanana e Isaraelu anamua. “O se mea poto le tatau ona faatau o le laueleele e le au paia,” na fetalai ai le Alii.

Tagata Paia

Mo le tele o augatupulaga, o se vaega toalaiti o tagata Europa—na matele lava i le au faifaafetauaiga Sipaniolo ma Farani—sa nonofo faatasi ma Initia i le faasologa o le Vaitafe o Misuri, faaipoipo atu i ai, ma faia ni fefaatauaiga faapisinisi ma i latou. Ae a o faaauau ona masii atu aiga papae agai i sisifo, ma nonofo i laueleele o loo nofoia e Initia, sa mata’utia lo latou teenaina o nei fesuiaiga faaleaganuu. Sa faatonuina ai e tagata papae le aveesea o ituaiga uma o Initia mai le setete. I le va o le 1824 ma le 1830, o ituaiga lea sa nonofo i totonu o tuaoi o Misuri mo le tele o seneturi na tuuina atu uma le latou teritori. Sa faatau atu e le au Osage malosi o latou laueleele i le 1825 ma malaga atu i sisifo mamao i Kansas ma Oklahoma. E oo atu i le taimi na taunuu atu ai le Au Paia o Aso e Gata Ai i le Itumalo o Siakisone i le 1831, ua tu’ua e Initia o latou nofoaga ma o ese atu i talaatu o se laina na faatoa faatuina e vavaeina ai teritori Initia ma teritori papae.

O le Mataupu Faavae ma Feagaiga 57 sa matauina ai le i ai o lenei laina o le nofoia e aunoa ma le faamaoniaina. Na ta’ua i le faaaliga e faapea e tatau ona fausia Siona i le gasologa “o le laina o loo tosiina i le va o Iutaia ma Nuuese,” po o le laina o loo vavaeese ai le setete o Misuri mai le Teritori o Initia i le itu i sisifo. Peitai, sa teena e le faaaliga ia vaega faaituaiga masani, e ala i lona faaaogaina patino o faaupuga Iutaia ma Nuuese. O faaupuga masani la sa faaaogaina e le au Amerika—o [tagata] papae ma Initia po o [tagata] papae ma [tagata] mumu---e faailoa ai se vavaega faailoga lanu ma faaleaganuu. E va va mamao a lalolagi o ia vaega e lua, ma o tagata papae e tele lava ina latou faaaogaina nei upu e faamalosia ai lenei va lē talafeagai.

O vaega o Iutaia ma Nuuese, e ui i lea, sa faailoa mai ai se eseesega i le va o nei vaega ae lē o se va lē talafeagai ia i latou. E tusa ai ma le Tusi a Mamona, o Iutaia ma Nuuese sa i ai se tiute taua i le fuafuaga tuputupu ae o le Atua. Sa valauliaina i latou e le Atua e galulue faatasi. O le talalelei mai anamua o le a o atu mai Iutaia, o tagata o le feagaiga a le Atua mai anamua, agai atu i Nuuese, lea o le a ulu atu i le feagaiga. I aso e gata ai o le a fesuia’i ai le sootaga—o le a aga atu le talalelei mai Nuuese i tagata Iutaia, o ē o le a o mai e iloa Iesu o le Mesia. O le Mataupu Faavae ma Feagaiga 57 o loo toe ta’ua ai lenei faatulagaga faalefeagaiga e ala i le atofaina o Initia o ni Iutaia, i lenei ala o le iloaina o le vaega o se vaega o le nuu o le feagaiga a le Atua. O Initia o le aiga o Isaraelu, filifilia, pele, ma manatuaina e le Atua.

I le taimi na aveesea ai Initia—o le vavaeeseina o le tasi ituaiga mai le isi—ua avea ma se aiaiga faavae faaleatunuu a le malo o le I.S., a o faaaliga a Iosefa Samita na faia se mea ese ai. Nai lo le vaai atu i tagata Initia o ni tagata e lē taua, ma uunai atu latou i tuaoi o se nuu, o faaaliga na aumaia ai Siona ia i latou, ma tuu ai le aai paia o le Atua i lo latou lotolotoi. E tatau ona maua Siona i le va o Iutaia ma Nuuese, i le va o ituaiga o tagata. I lenei faatulagaga, e mafai e tagata o ituaiga e tele ona faia se matafaioi taua i le galuega a le Atua. O tagata uma po o fea lava o i ai mai le nofoaga tutotonu, afai e latou te naunau, e mafai ona avea ai ma “e loto mama” ma nonofo i Siona i le saogalemu ma le filemu.

O le Mataupu Faavae ma Feagaiga 58, na tuuina mai a o i ai pea Iosefa Samita i Misuri, na tuuina mai ai le lautele o lenei faaaliga. E le’i tau maia e faaaliga se mea e uiga i Initia ma [tagata] papae. E oo foi i Iutaia ma Nuuese sa le’i taua i lea taimi. Nai lo lena, na tautala le faaaliga e uiga i “e o nonofo i le lalolagi,” ma tuufaatasia ai fanau uma a le Atua. O Siona, na faamalamalama mai e le faaaliga, o se nofoaga “o le a valaaulia i ai atunuu uma.”

O le upu atunuu e ono i ai se aafiaga i le au faitau o le 1830, ona o le upu lea sa faaaogaina e Initia ma [tagata] papae e faamatala ai se iunite pito sili ona toatele o lo latou faatulagaga faapolokiki. Sa faaauau ona faapea mai le faaaliga o Siona e aofia ai “o e ua mauoa ma e ua aoaoina, o e ua atamamai ma e ua tamalii”—o tagata o loo i ai le mana faaleagafesootai. Ae o le a faaaofia ai foi o tagata o e sa masani ona leai se mana faapena, o i latou o e sa masani ona faagaloina ma ta’ua soo: “o e matitiva, o e pipili, ma e tauaso, ma e ua logonoa.” I le iuga, o fanau uma a le Atua o le a maua uma avanoa ma faamanuiaga e tasi. Fusia i se fesootaiga o le feagaiga, o latou uma o le a maua le avanoa i le nofoaga paia o le Atua.

Faaiuga

I totonu o le lua tausaga o nei faaaliga i le Itumalo o Jackson, sa mu ai Siona, o ona tagata nuu na sosola ese mai le au faaoolima. O le Au Paia na tuumuli ese mai le Itumalo o Jackson, ae sa le [tuumuli] mai le galuega o le atinaeina o Siona i autafa o le laina i le va o Iutaia ma Nuuese, sa maumau i Navu ona, oo lea i le taimi mulimuli, i le toafa o Great Basin. Po o fea lava e faamautu ai le Au Paia, latou te valaaulia tagata i soo se mea ina ia auai faatasi ma i latou. E oo lava i aso nei, o le faaaliga vaaia o se nuu o Siona lea “o le a valaaulia ai atunuu uma” e nonofo ai i le sulufaiga ma le filemu e musuia Au Paia o Aso e Gata Ai. O sini, o folafolaga, ma faamoemoega o uluai faaaliga o Misuri e tumau pea.

  1. Faaaliga 21:2–5, 7.

  2. Mo lenei ma isi manatu, tagai i le David Lyle Jeffrey, faatonu, A Dictionary of Biblical Tradition in English Literature (Grand Rapids, MI: William B. Eerdmans, 1992), “New Jerusalem,” 546–48.

  3. John Winthrop, “Model of Christian Charity” [1630], Collections of the Massachusetts Historical Society, vol. 7 (1838), 47; ua faaonaponei le sipelaga; Francis J. Bremer, Building a New Jerusalem: John Davenport, a Puritan in Three Worlds (New Haven, CT: Yale University Press, 2012), 174–79.

  4. O Ierusalema Fou o loo ta’ua i totonu o le Tusi a Mamona, ma amata ona talanoa mai faaaliga e uiga i se nofoaga patino i le vave e pei o Fepuari 1831, (tagai i le 3 Nifae 21:23–24; Eteru 13:3–6; Mataupu Faavae ma Feagaiga 42:35, 62).

  5. Mataupu Faavae ma Feagaiga 45:66–71;; 57:3.

  6. Mataupu Faavae ma Feagaiga 28:8; tagai foi i le Ronald E. Romig, “The Lamanite Mission,” John Whitmer Historical Association Journal, vol. 14 (1994), 25–33.

  7. “Revelation, September 1830–B [D&C 28],” i le Revelation Book 1, 41, josephsmithpapers.org. O le fuaitau sa toe iloiloina e faitauina faapea “i luga o le tuaoi ma Sa Lamana”; tagai i le Book of Commandments [1833] 30:9 [Mataupu Faavae ma Feagaiga 28:9]).

  8. O nei ituaiga na aofia ai le au Shawnee ma le au Delaware, o e na aveesea mai sasae. (Tagai i le Documents, Volume 1: July 1828–June 1831, vol. 1 o Pepa o faamatalaga o le faagasologa o le The Joseph Smith Papers faatonu. Dean C. Jessee, Ronald K. Esplin, ma Richard Lyman Bushman (Aai o Sate Leki: Church Historian’s Press, 2013), 288–94.

  9. Mataupu Faavae ma Feagaiga 52:2–3.

  10. Numera 33:53; 34:2.

  11. Tanis C. Thorne, The Many Hands of My Relations: French and Indians on the Lower Missouri (Columbia: University of Missouri Press, 1996), 13–14, 16–17, 20; Louis F. Burns, A History of the Osage People (Tuscaloosa: University of Alabama Press, 2004), 3, 22.

  12. William E. Parrish, Charles T. Jones, ma Lawrence O. Christensen, Missouri: The Heart of the Nation, 3rd ed. (Wheeling, IL: Harlan Davidson, 2004), 13.

  13. Willard H. Rollings, The Osage: An Ethnohistorical Study of Hegemony on the Prairie-Plains (Columbia: University of Missouri Press, 1992), 23–26, 45–66; Gilbert C. Din ma A. P. Nasatir, The Imperial Osages: Spanish-Indian Diplomacy in the Mississippi Valley (Norman: University of Oklahoma Press, 1983), 11–14.

  14. Burns, History of the Osage People, 25–28, 30, 46.

  15. O le eria o Initipene e le i faaigoaina pe iloa foi i luga o faafanua o le seneturi-18. Tagai i le Din ma Nasatir, The Imperial Osages, 40–41, 64, 288–89, 338–39.

  16. O le igoa Misuri e oo atu i le 1670, ina ua tusitusi e se misionare Farani o Jacques Marquette se faafanua ma le igoa Ou-Misuri e lata ane i le vaitafe o loo faaigoaina ai, o lana faaliliuga o le ituaiga sa nofoia autafa o le vaitafe. O le au Osage na iu lava ina latou avea le laueleele i le itu i saute o le vaitafe, o le au Misuri o laueleele i matu.

  17. Mataupu Faavae ma Feagaiga 57:3.

  18. Mataupu Faavae ma Feagaiga 57:4. O le fale faamasino o le vaega pito i maualuga lea o le eria. E ala i le faatuina o le malumalu lata i ai, sa faailoa mai e le faaaliga se faatusatusaga o le malumalu o Ierusalema Fou agai i le malumalu o Ierusalema, lea sa faatuina foi i se tulaga maualuga. Mark Roscoe Ashurst-McGee, “Zion Rising: Joseph Smith’s Early Social and Political Thought” (PhD diss., Arizona State University, 2008), 233.

  19. Thorne, Many Hands, 76–86, 96–97, 135–76.

  20. O nei ituaiga e aofia ai, e faapena foi le au Osage, o Misuri, Sac, Fox, Ioway, Delaware, ma Shawnee, ma isi. E lei faamatuuina atu e le au Misuri o latou eleele mulimuli i le setete seia oo i le 1854. Tagai i le Billy J. McMahon, “‘Humane and Considerate Attention’: Indian Removal from Missouri, 1803–1838” (master’s thesis [pepa o le matuaofaiva], Northwest Missouri State University, 2013), 7–8, 75–83; John P. Bowes, Exiles and Pioneers: Eastern Indians in the Trans-Mississippi West (Niu Ioka: Cambridge University Press, 2007); Charles J. Kappler, tuufaatasia, Indian Affairs: Laws and Treaties (Washington, D.C.: Government Printing Office, 1904), 217–21.

  21. Mataupu Faavae ma Feagaiga 57:4.

  22. Tagai, mo se faataitaiga, Nancy Shoemaker, A Strange Likeness: Becoming Red and White in Eighteenth-Century North America (New York: Oxford University Press, 2004).

  23. 1 Nifae 15:13–17; 22:8–9; 3 Nifae 21:2–5.

  24. O faaaliga i isi nofoaga sa faapea mai “i tagata Iutaia, o e o sa Lamana o so latou toe vaega” (Mataupu Faavae ma Feagaiga 19:27). I ona uiga eseese o le upu Iutaia i tusitusiga paia faaonapo nei, tagai i le Victor L. Ludlow, “Jew(s),” i le Dennis L. Largey, faatonu, Book of Mormon Reference Companion (Aai o Sate Leki: Deseret Book, 2003), 463–64; Thomas R. Valetta, “Jew(s),” i le Dennis L. Largey ma Larry E. Dahl, o faatonu, Doctrine and Covenants Reference Companion (Aai o Sate Leki: Deseret Book, 2012), 315–16.

  25. E pei lava o le uluai Iutaia i Amerika o Thomas Thorowgood, o faatuiese Igilisi ma Amerika sa latou fautuaina atu o Initia e tupuga mai i ituaiga leiloloa o Isaraelu. O nei faatulagaga o mafaufauga e tele lava ina le umi ona i ai. O faaaliga a Iosefa Samita na liliuina ai le tulaga faatauaina o faamatalaga o le seneturi-19 e uiga i uluai tagatanuu ua “leiloloa” e ala i le tuuina atu e “tupuga mai ia Iakopo” se tiute faaola i aso e gata ai o le talafaasolopito o le lalolagi. Tagai i le Jared Hickman, “The Book of Mormon as Amerindian Apocalypse,” American Literature, vol. 86, nu. 3 (Sete. 2014), 429–61; tagai foi i le Andrew Delbanco, The Puritan Ordeal (Cambridge, MA: Harvard University Press, 1989), 110.

  26. I lalo o le Tulafono o le Aveeseina o Initia, o le aveeseina o Initia sa avea o se tulafono a le malo i le 1830. Tagai i le Ronald N. Satz, American Indian Policy in the Jacksonian Era (Norman: University of Oklahoma Press, 2002).

  27. Mataupu Faavae ma Feagaiga 57:4.

  28. Mataupu Faavae ma Feagaiga 97:21.

  29. Mataupu Faavae ma Feagaiga 58:48.

  30. Mataupu Faavae ma Feagaiga 58:9.

  31. Mataupu Faavae ma Feagaiga 58:8, 10–11. O lenei fasi fuaitau sa toe faaliliuina mai ai le faataoto a Iesu i le faaipoipoga o le atalii o le tupu (Tagai i le Mataio 22:1–14) i se tusiga faaonaponei.

  32. E ui lava e lei faatino i taimi uma e le Au Paia o Aso e Gata Ai o latou talitonuga i a latou fesootaiga ma Initia, o le matafaioi tulaga ese sa tuuina atu i uluai tagatanuu i totonu o faaaliga sa tele lava ina faigata ai auala na taulima ai e le Au Paia o Aso e Gata Ai ia Initia. Tagai i le Ronald W. Walker, “Seeking the ‘Remnant’: The Native American During the Joseph Smith Period,” Journal of Mormon History, vol. 19, nu. 1 (1993), 1–33; “Peace and Violence among 19th-Century Latter-day Saints,” Autu o le Talalelei, topics.churchofjesuschrist.org.