Tufa’a 21
E heheura’a tei hōro’ahia mai ia Iosepha Semita te peropheta, i Fayette, i New York, i te 6 nō ’Ēperēra 1830. ’Ua hōro’ahia mai teie heheura’a i te taime i fa’ati’ahia ai Te ’Ēkālesia a Iesu Mesia i te Feiā Mo’a i te mau Mahana Hope’a nei, i te tai’o mahana i fa’a’itehia i ni’a nei, i te fare o Peter Whitmer, metua. To’oono ta’ata, ’o tei bāpetizohia nā mua atu, tei rave i taua ’ohipa ra. ’Ua tāhō’ē mau rātou i te fa’a’itera’a i tō rātou hina’aro ’e te ’ōpuara’a pāpū ho’i ’ia fa’ati’a i te ’Ēkālesia mai te au i te fa’auera’a a te Atua (’a hi’o i te tufa’a 20). ’Ua mā’iti ato’a ho’i rātou ’ia fāri’i ’e ’ia pāturu ia Iosepha Semita, tamaiti, ’e ia Oliver Cowdery ’ei nā ti’a peresideni nō te ’Ēkālesia. Nā roto i te tu’ura’a rima, ’ua fa’atōro’a atu ra Iosepha ia Oliver Cowdery ’ei peresibutero nō te ’Ēkālesia, ’e ’ua nā reira ato’a atu ra Oliver i te fa’atōro’a ia Iosepha. I muri a’e i te ha’amaita’ira’a ’e te ’ōperera’a i te ’ōro’a, ’ua tu’u atu ra Iosepha rāua Oliver i tō rāua pu’e rima i ni’a iho i taua mau ta’ata tāta’ihō’ē ra, nō te hōro’a i te Vārua Maita’i ’e nō te ha’amaura’a ho’i ia rātou ’ei melo nō te ’Ēkālesia.
1–3, ’Ua pi’ihia Iosepha Semita ’ia riro ’ei hi’o, ’ei ’īriti parau, ’ei peropheta, ’ei ’āpōsetolo, ’e ’ei peresibutero ; 4–8, Nā tāna parau e arata’i i te fa’atupura’a ia Ziona ; 9–12, E ti’aturi te feiā mo’a i tāna mau parau ’a parau ai ’oia nā roto i te Fa’aa’o.
1 Inaha, e pāpa’ihia te hō’ē pāpa’a parau i rotopū ia ’outou na ; ’e i roto i te reira e pi’ihia ’oe ’ei hi’o, ’ei ’īriti parau, ’ei peropheta, ’ei ’āpōsetolo nā Iesu Mesia, ’ei peresibutero nō te ’ēkālesia nā roto i te hina’aro o te Atua te Metua, ’e te maita’i o tō ’oe Fatu ’o Iesu Mesia,
2 Ma te fa’auruhia e te Vārua Maita’i ’ia ha’amau i te niu nō te reira, ’e ’ia fa’atupu mai i te reira ē tae noa atu i te fa’aro’o mo’a roa ra.
3 ’Ua fa’ati’ahia ’e ’ua ha’amauhia ho’i taua ’ēkālesia nei i te matahiti o tō ’oe ra Fatu, hō’ē tauatini ’e va’u hānere ’e toru ’ahuru, i te maha o te ’āva’e, ’e i te ono o te mahana nō te ’āva’e tei parauhia ’Ēperēra.
4 Nō reira, e tō te ’ēkālesia ē, e ha’apa’o ’outou i tāna mau parau ’e i tāna mau fa’auera’a ato’a ’o tāna e hōro’a atu ia ’outou mai te au i tāna e fāri’i, ma te haere nā roto i te mo’a i mua iā’u nei ;
5 ’Ia fāri’i ho’i ’outou i tāna parau ma te fa’a’oroma’i ’e te fa’aro’o, mai te mea ra ē nō roto atu i tō’u iho nei vaha.
6 Nā roto ho’i i te ravera’a i teie nei mau mea, e ’ore roa ’outou e noa’a i te mau ’ūputa o hade ; ’oia ïa, e nā te Fatu ra te Atua e ha’apurara ’ē atu i te mau mana nō te pōiri mai mua atu ia ’outou, ’e nāna ho’i e fa’a’āueue i te mau ra’i ’ei maita’i nō ’outou na, ’e nō te hanahana o tōna ra i’oa.
7 Tē nā ’ō mai ra ho’i te Fatu ra te Atua : ’O ’oia tā’u i fa’auru ’ia fa’atere i te ’ohipa nō Ziona nā roto i te mana rahi nō te fa’atupu i te maita’i ; ’e ’ua ’ite au i tōna ra itoito, ’e ’ua fa’aro’o ho’i au i tāna mau pure.
8 ’Oia ïa, ’ua ’ite au i tōna ’otora’a nō Ziona, ’e e fa’a’ore au i te reira ’ia ’ore ’oia ia ’oto fa’ahou iāna ; nō te mea ’ua tae te mau mahana nō tōna ’oa’oara’a ē tae noa atu i te ha’amatarara’a i tāna mau hara, ’e te fa’a’itera’a ho’i i tā’u mau ha’amaita’ira’a i ni’a iho i tāna mau ’ohipa.
9 Inaha ho’i, e ha’amaita’i au ia rātou ato’a ’o tē rave i te ’ohipa i roto i tā’u nei ’ō vine i te hō’ē ha’amaita’ira’a rahi roa, ’e e ti’aturi rātou i tāna mau parau, ’o tā’u i hōro’a atu iāna nā roto i te Fa’aa’o, ’o tē fa’a’ite mai nei ē, ’ua fa’asātaurohia Iesu e te mau ta’ata rave hara nō te mau hara a tō te ao nei, ’oia ïa, nō te ha’amatarara’a i te mau hara a te feiā ’ā’au tātarahapa ra.
10 Nō reira, e mea ti’a ïa iā’u ’ia fa’atōro’ahia ’oia e ’oe, ’o Oliver Cowdery, tā’u ’āpōsetolo ;
11 ’Ua riro teie ’ei ’ōro’a ia ’oe na, ’ei peresibutero ho’i ’oe i raro a’e i tōna rima ; ’ua riro ho’i ’oia ’ei mātāmua ia ’oe na, ’ia riro ’oe ’ei peresibutero nō teie nei ’ēkālesia a te Mesia, ’o tei mau i tō’u nei i’oa—
12 ’E te ’orometua mātāmua nō teie nei ’ēkālesia i te ’ēkālesia ra, ’e i mua ho’i i tō te ao nei, ’oia ïa, i mua i te mau ’Ētene ; ’oia ïa, ’e tē nā ’ō mai nei te Fatu ra te Atua, inaha, ’e ’a hi’o na ! i te mau ’āti Iuda ato’a. ’Āmene.