1 Kaakano Mosiya bwe yali akoze kino yatuma mu nsi yonna, mu bantu bonna, nga ayagala okumanya okusalawo kwabwe ku bikwata ku ani eyalina okuba kabaka waabwe.

2 Era olwatuuka eddoboozi ly’abantu ne lijja, nga ligamba nti: Twagala Alooni mutabani wo abe kabaka waffe era omufuzi waffe.

3 Kaakano Alooni yali ayambuse mu nsi ya Neefi, n’olwekyo kabaka yali tasobola kumuwa bwakabaka; era nga ne Alooni yali tayinza kukkiriza bwakabaka; Era tewali n’omu ku batabani ba Mosiya abaali abeetegefu okukkiriza obwakabaka.

4 N’olwekyo kabaka Mosiya yaddamu nate okutuma mu bantu; weewaawo, ddala n’ekigambo ekiwandiike kye yasindika mu bantu. Era bino bye bigambo ebyawandiikibwa, nga bigamba nti:

5 Laba, Wattu mmwe abantu bange, oba baganda bange, kubanga mbatwala okubeera ekyo, njagala mufumiitirize ku nsonga gye muyitiddwa okufumiitirizaako; kubanga muyaayaana okuba ne kabaka.

6 Kaakano nnangirira gye muli nti oyo agwanidde obwakabaka mu nkola entuufu abugaanye, era tajja kutwala bwakabaka.

7 Era kaakano singa wabeerawo omulala alondebwa mu kifo kye, laba ntya nti wandibalukawo enkaayana mu masekkati gammwe. Era ani amanyi ki mutabani wange, nnyini bwakabaka, bw’alimala nanyiiga era n’asendasenda ekitundu ky’abantu bano okumugoberera, ekiyinza okuleetawo entalo n’enkaayana mu mmwe, ekiyinza okuvaako okuyiwa omusaayi omungi n’okukyamya ekkubo lya Mukama, weewaawo, n’okuzikiriza emyoyo gy’abantu bangi.

8 Kaakano mbagamba tubeere bagezigezi era tufumiitirize ku bintu bino, kubanga tetulina buyinza kuzikiriza mutabani wange, era tetulina kuba na buyinza bwonna kuzikiriza mulala singa aba nga waakulondebwa mu kifo kye.

9 Era singa mutabani wange aliddamu nate okuba n’amalala ge era ne ebintu eby’obutaliimu nsa yandijjukira ebintu bye yali ayogedde, era n’ayagala addizibwe obuyinza bwe eri obwakabaka, ekiyinza okumuviirako ye era n’abantu bano okukola ebibi ebingi.

10 Era kaakano tubeere bagezigezi era tulindirire ebintu bino, era tukole ekyo ekijja okuleeta emirembe mu bantu bano.

11 N’olwekyo nja kuba kabaka wammwe mu nnaku zange ezisigaddeyo; wabula, muleke tulonde abalamuzi, okulamula abantu bano okusinziira ku mateeka gaffe; era tujja kutegeka bujja ensonga z’abantu bano, kubanga tujja kulonda abasajja abagezigezi okuba abalamuzi, abanalamula abantu bano okusinziira ku biragiro bya Katonda.

12 Kaakano kisingako omuntu okulamulwa Katonda okusinga omuntu, kubanga okulamula kwa Katonda olubeerera kwa bwenkanya, naye okulamula kwa bantu si kwa lubeerera.

13 N’olwekyo, singa kibadde kisoboka nti muyinza okuba n’abantu abenkanya okuba bakabaka bammwe, abanditaddewo amateeka ga Katonda, ne balamula abantu bano okusinziira ku biragiro bye, weewaawo, singa muyinza okuba n’abantu nga bakabaka bammwe olubeerera abasobola okukola nga kitange Benyamini bwe yakolera abantu bano; Mbagamba nti, singa kino olubeerera yeebeera ensonga olwo kyandibadde kirungi mmwe okuba ne bakabaka olubeerera okubafuga.

14 Era ddala nange kennyini nkoze n’amaanyi gonna era n’obusobozi bwonna bwe nnina, okubayigiriza ebiragiro bya Katonda, n’okussaawo emirembe mu nsi yonna, nti waleme okubaawo entalo wadde okukaayana, tewali kubba, wadde okunyaga, wadde okutemula, wadde engeri yonna ey’obubi;

15 Era oyo yenna akoze obutali butuukirivu, ye gwe mbonerezza okusinziira ku musango gw’akoze, okusinziira ku mateeka agaatuweebwa bakitaffe.

16 Kaakano mbagamba, nti olw’okuba abantu bonna si benkanya si kirungi mmwe okuba ne kabaka oba bakabaka okubafuga.

17 Kubanga laba, obutali butuukirivu bwenkana ki kabaka omu omubi bwayinza okuviirako okukolebwa, weewaawo, era ako nga kaba katyabaga kamaanyi okusaanyizibwawo!

18 Weewaawo, mujjukire kabaka Nuuwa, obubi bwe n’ebizira bye, era n’obubi n’ebizira by’abantu be. Laba nga kw’amaanyi okuzikirizibwa okwabatuukako; era nate olw’obutali butuukirivu bwabwe baatwalibwa mu buddu.

19 Era singa si lwa Mutonzi waabwe nnyini magezi gonna kuyingira mu nsonga, era kino yakikola olw’okwenenya kwabwe okw’amazima, awatali kukyewala bandibadde basigala mu buddu n’okutuusa kaakano.

20 Naye laba, yabanunula kubanga beetoowaza mu maaso ge; era olw’okuba baamukaabirira nnyo bw’atyo n’abanunula okuva mu buddu; era Mukama bw’atyo bw’akola n’amaanyi ge mu nsonga zonna mu baana b’abantu, ng’agolola omukono ogw’okusaasira eri abo abateeka obwesige bwabwe mu ye.

21 Era laba, kaakano mbagamba nti, temuyinza kuggya mu ntebe ya buyinza kabaka atali mulongoofu okuggyako okuyita mu kukaayana okungi, era n’okuyiwa omusaayi omungi.

22 Kubanga laba, alina emikwano gye mu butali butuukirivu, era n’abakuumi be bamubeera kumpi; n’asazaamu amateeka g’abo abaamusookawo abaafuga mu butuukirivu; era n’alinnyirira wansi w’ebigere bye ebiragiro bya Katonda;

23 Era akola amateeka, era n’agaweereza mu bantu be, weewaawo, amateeka agasinziira ku ngeri y’obubi bwe; era buli yenna atagondera mateeka alagira n’azikirizibwa; era nabuli oyo yenna amujeemera alituma amagye ge okumukolako olutalo, era bw’aba nga asobola ajja kubazikiriza; era bw’atyo kabaka atali mutuukirivu bw’akyamya amakubo ag’obutuukirivu bwonna.

24 Era kaakano laba mbagamba nti, tekiba kirungi ebizira ng’ebyo okubatuukako.

25 N’olwekyo, mulonde nga musinziira ku ddoboozi ly’abantu bano, abalamuzi, mulyoke mulamulwe okusinziira ku mateeka agabaweebwa bakitaffe, amatuufu, era agaabaweebwa omukono gwa Mukama.

26 Kaakano si kya bulijjo eddoboozi ly’abantu okuyaayanira ekintu kyonna ekikontana n’ekyo ekituufu; naye kya bulijjo ekitundu ky’abantu ekisembayo obutono okuyaayanira ekyo ekitali kituufu; n’olwekyo kino mulikikuuma era ne mukifuula etteeka lyammwe; okutuukiriza obuvunanyizibwa bwammwe nga musinziira ku ddoboozi ly’abantu.

27 Era ekiseera bwe kituuka eddoboozi ly’abantu ne lironda obutali butuukirivu, olwo kye kiseera okulamulwa kwa Katonda lwe kulijja ku mmwe; weewaawo, olwo kye kiseera ky’ajja okubakyalira n’okusaanyizibwawo okunene ddala nga bwe yali akyaliddeko ensi eno okutuusa kati.

28 Era kaakano singa muba nga mulina abalamuzi, era nga tebabalamula kusinziira ku mateeka agaweereddwa, munasobozesa balamulwe omulamuzi ow’oku ntikko.

29 Singa abalamuzi bammwe ab’oku ntikko tebalamula mu nnamula za butuukirivu, mulisobozesa omuwendo omutono ogw’abalamuzi bammwe aba wansi okukuŋŋaanira awamu, era baliramula abalamuzi bammwe ab’oku ntikko, okusinziira ku ddoboozi ly’abantu.

30 Era mbalagira okukola ebintu bino mu kutya Mukama; era mbalagira okukola ebintu bino, era nti temulina kabaka; ddala singa abantu bano bakola ebibi era n’obutali butuukirivu ebyo alibiteeka ku mitwe gyabwe.

31 Kubanga laba mbagamba nti ebibi by’abantu bangi bivudde ku butali butuukirivu bwa bakabaka baabwe; n’olwekyo ebibi byabwe biri ku mitwe gya bakabaka baabwe.

32 Era kaakano njagala obutenkanankana buno buggwewo mu nsi eno, naddala mu bantu bange bano; Naye njayaana ensi eno ebeere ensi ey’eddembe, era buli muntu asobole okunyumirwa eddembe lye n’emikisa gye kyenkanyi, kasita Mukama alaba nga kisaanidde tusobole okubeera mu nsi era n’okugisikira, weewaawo, ddala kasita kinaaba nga yenna ku b’ezzadde lyaffe alisigala ku lukalu lw’ensi.

33 Era ebintu ebirala bingi kabaka Mosiya bye yabawandiikira, ng’abannyonnyola okugezesebwa kwonna n’ebizibu bya kabaka omutuukirivu, weewaawo, obuyinike bwonna obw’omwoyo eri abantu baabwe, era n’okwemulugunya kwonna okw’abantu eri kabaka waabwe; era byonna yabibannyonnyola.

34 Era n’abagamba nti ebintu bino tebisaanidde; naye obuvunanyizibwa bwa kubeera ku bantu bonna, era buli muntu asaana yettike ekitundu kye.

35 Era n’abannyonnyola obukyamu bwonna bwe bataambulirangamu, nga balina kabaka atali mutuukirivu okubafuga;

36 Weewaawo, obubi bwe bwonna era n’ebizira, era n’entalo zonna, era n’okukaayana, era n’okuyiwa omusaayi, era n’okubba, era n’okunyaga, era n’obwenzi, era n’engeri zonna ez’obutali butuukirivu ezitayinza kubalibwa; ng’ababuulira nti ebintu bino tebisaanidde, nti byaali mu buli ngeri bikontana ne biragiro bya Katonda.

37 Era kaakano olwatuuka, oluvannyuma nga kabaka Mosiya asindise ebintu bino mu bantu ne bakakasibwa amazima g’ebigambo bye.

38 N’olwekyo baaleka okuyaayaana kwabwe okw’okuba ne kabaka, era ne bafuna okuyaayaana okw’amaanyi ennyo buli muntu asaana okuba nga alina omukisa ogw’enkanankana mu nsi yonna; weewaawo, era buli muntu n’alaga obweteefuteefu okuvunaanyizibwa ku bibi bye.

39 N’olwekyo, olwatuuka beekuŋŋaanyiza awamu mu bibinja ebye’njawulo mu nsi yonna, okuwanyisiganya endowooza zaabwe ku byekuusa ku baani abali bagwanidde okubeera abalamuzi baabwe, okubalamula okusinziira ku tteeka eryali libaweereddwa; era baasanyusibwa bya nsusso olw’eddembe eryali libaweereddwa.

40 Era okwagala kwabwe kweyongera okuba okw’amaanyi ennyo eri Mosiya; weewaawo, baamussaamu ekitiibwa okusinga omusajja omulala yenna; kubanga tebaamutunuulira nga nnakyemalira eyali anoonya eby’enfuna, weewaawo, olw’omulugube ogwo ogwonoona emmeeme; kubanga yali teyasaba byabugagga okuva gye bali, era teyasanyukira kuyiwa musaayi; naye yali ataddewo emirembe mu nsi, era yali awadde abantu be okuba nga bateebwa okuva mu buddu obw’engeri zonna; n’olwekyo baamussaamu ekitiibwa, weewaawo, ekyali kisukkulumye ennyo.

41 Era olwatuuka baalonda abalamuzi okubafuga, oba okubalamula okusinziira ku mateeka; era kino baakikola mu nsi yonna.

42 Era olwatuuka Aluma yalondebwa okubeera ssabalamuzi eyasooka, nga era ye yali kabona omukulu, kitaawe nga ye yamuwa obukulu, era nga yamuwa obuyinza ku byekuusa ku nsonga zonna ez’ekkanisa.

43 Era kaakano olwatuuka Aluma yatambuliranga mu makubo ga Mukama, era n’akuuma ebiragiro bye, era n’asala emisango mu butuukirivu; era waaliwo emirembe egitatadde mu nsi yonna.

44 Era bwe butyo obufuzi bw’abalamuzi mu nsi yonna ey’e Zalakemula bwe bwatandika, mu bantu bonna abaayitibwanga Abaneefi; Era Aluma ye yali ssabalamuzi era eyasooka.

45 Era kaakano olwatuuka kitaawe n’afa, ng’alina emyaka kinaana mu ebiri, ng’amaze okuwangaala okutuukiriza ebiragiro bya Katonda.

46 Era olwatuuka Mosiya naye n’afa, mu mwaka ogw’amakumi asatu mu esatu egy’obufuzi bwe, ng’alina emyaka nkaaga mu esatu egy’obukulu; nga mu bujjuvu kikola, emyaka ebikumi bitaano mu mwenda okuva Leki lwe yava e Yerusaalemi.

47 Era bwe kityo obufuzi bwa bakabaka eri abantu ba Neefi ne bukomekkerera; era bwe kityo ennaku za Aluma ne zikoma, eyali omutandisi w’ekkanisa yaabwe.