1 Era olwatuuka oluvannyuma lw’ebbanga lya myaka ebiri Abinadi n’ajja mu bo nga yeefudde, ne batamumanya, era n’atandika okuwa obunnabbi mu bo, nga abagamba nti: Bw’atyo Mukama bw’andagidde, ng’agamba; Abinadi, genda owe obunnabbi eri abantu bange bano, kubanga bakakanyazza emitima gyabwe eri ebigambo byange; tebeenenyezza bikolwa byabwe ebibi; n’olwekyo, naabakyalira mu busungu bwange, weewaawo, mu busungu bwange obw’entiisa ndibakyalira mu bubi bwabwe n’ebivve byabwe.

2 Weewaawo, zibasanze mwe ab’omulembe guno! Era Mukama n’aŋŋamba nti: Golola omukono gwo era owe obunnabbi, ng’ogamba nti: Bw’atyo bw’ayogera Mukama, kijja kutuukirira omulembe guno, olw’obubi bwabwe, gujja kuleetebwa mu buddu, era gunaakubwa ku ttama; weewaawo, era gunaagobebwa abantu, era gunaattibwa; era ensega ez’omu bbanga, n’embwa, weewaawo, n’ensolo ez’omu nsiko, birirya emibiri gyabwe.

3 Era kinaatuukirira nti obulamu bwa kabaka Nuuwa bujja kubalibwa nga ekyambalo mu ttanuulu eyokya; kubanga alimanya nti nze Mukama.

4 Era kirituukirira n’abakuba bano abantu bange n’okubonaabona okw’amaanyi, weewaawo, n’enjala era ne kawumpuli; era ndibaleetera okubaaluuka olunaku lwonna.

5 Weewaawo, era ndibaleetera okubinikibwa emigugu egisibiddwa ku migongo gyabwe; era banaagobebwa ng’endogoyi etavaamu ddoboozi.

6 Era kirituukirira nti ndisindika omuzira mu bo, era gulibakuba; era nate balikubibwa empewo ey’ebuvanjuba; era ebiwuka biribonyaabonya ensi yaabwe, era ne birya emmere yaabwe ey’empeke.

7 Era balikubibwa kawumpuli ow’amaanyi; era bino byonna ndibikola olw’obubi bwabwe n’ebizira byabwe.

8 Era kiirituukirira nti bwe batenenye ndibazikiririza ddala okuva ku nsi; naye balireka ekiwandiiko emabega waabwe, era ndibikuuma eri amawanga amalala agalisenga ensi; weewaawo, ddala ne kino ndikola nsobole okumanyisa ebivve by’abantu bano eri amawanga amalala. Era ebintu bingi Abinadi bye yawaako obunnabbi ku bantu bano.

9 Era olwatuuka ne bamusunguwalira; era baamutwala era ne bamusitula nga asibiddwa mu maaso ga kabaka, era ne bagamba kabaka nti: Laba, tuleese omusajja mu maaso go awadde obunnabbi obubi obukwata ku bantu bo, era agamba nti Katonda ajja kubazikiriza.

10 Era nate awa obunnabbi obubi obukwata ku bulamu bwo, era agamba nti obulamu bwo buliba ng’ekyambalo mu ttanuulu ey’omuliro.

11 Era nate, agamba nti oliba ng’ekikolo, ddala ng’ekikolo ekikalu eky’omu kisambu, ekiddukirwako ensolo ne kirinnyibwa wansi w’ekigere.

12 Era nate, agamba nti oliba ng’ebimuli by’amatovu, bwe biba nga byengeredde ddala, empewo bw’efuuwa, bisaasanyizibwa ku nsi. Era yeebuzabuza nti Mukama yayogedde. Era agamba bino byonna bijja kukutuukako okuggyako nga weenenyezza, era kino olw’ebibi byo.

13 Era kaakano, ayi kabaka, kibi ki ekinene ky’okoze, oba bibi ki ebinene abantu bo bye bakoze, nti tusalirwe omusango Katonda oba tulamulwe omusajja ono?

14 Era kaakano, ayi kabaka, laba, tetulina musango, era ggwe, ayi kabaka, tonnayonoona; n’olwekyo, omusajja ono alimba akuwayirizza, awadde obunnabbi era nga ateganidde bwereere.

15 Era laba, tuli ba maanyi, tetuli bakujja mu busibe, wadde okutwalibwa mu buwambe abalabe baffe; weewaawo, era ggwe okulakulaanye mu nsi, era ojja kukulaakulana.

16 Laba, wuuno omusajja, tumuwaayo mu mikono gyo; ggwe oyinza okumukolera nga bwosiima.

17 Era olwatuuka kabaka Nuuwa n’alagira Abinadi okusuulibwa mu kkomera; era n’alagira bakabona okukuŋŋaanira awamu asobole okutuuza n’abo olukiiko ku kiki ky’aba amukolera.

18 Era olwatuuka ne bagamba kabaka nti: Muleete wano tusobole okumubuuza ebibuuzo; era kabaka n’alagira aleetebwe mu maaso gaabwe.

19 Era ne batandika okumubuuza ebibuuzo, asobole okutamattama, balyoke basobole okufuna eky’okumuvunaana; naye n’abaddamu n’obuvumu, era n’atta ebibuuzo byabwe byonna, weewaawo, ne beewuunya; kubanga tebaamusobola mu bibuuzo byabwe byonna, era n’abaswaza mu bigambo byabwe byonna.

20 Era olwatuuka omu ku bo n’amugamba nti: Bitegeeza ki ebigambo ebyawandiikibwa, era ebyasomesebwa bajjajjaffe, nga bigamba nti:

21 Nga birungi ku nsozi ebigere by’oyo aleeta amawulire amalungi; oyo alangirira emirembe; oyo aleeta amawulire amalungi ag’ebirungi; oyo alangirira obulokozi; oyo agamba Sayuuni nti, Katonda wo afuga;

22 Abakuumi bo baliyimusa waggulu eddoboozi; baliyimbira wamu mu ddoboozi; kubanga baliraba maaso ku maaso Mukama bw’alikomyawo Sayuuni nate;

23 Mubagukire waggulu mu ssanyu; muyimbire wamu mmwe ebifo eby’e Yerusaalemi ebyazika; kubanga Mukama akubagizza abantu be, anunuudde Yerusaalemi;

24 Mukama afungizizza omukono gwe omutukuvu mu maaso g’amawanga gonna, era n’enkomerero ez’ensi zonna ziriraba obulokozi bwa Katonda waffe?

25 Era kaakano Abinadi n’abagamba nti: Muli bakabona, era mwefuula abayigiriza abantu bano, era n’okutegeera omwoyo ogw’okuwa obunnabbi, so nga ate mwagala okumanya okuva gye ndi ebintu bino kye bitegeeza?

26 Njogera gye muli, zibasanze mmwe olw’okukyamya empenda za Mukama! Kubanga singa ebintu bino mubitegeera temubiyigirizizza; n’olwekyo, mukyamizza empenda za Mukama.

27 Mmwe temuttaddeyo mitima gyammwe kutegeera; n’olwekyo, temubadde bagezi. N’olwekyo, muyigiriza ki abantu bano?

28 Era ne bagamba nti: Tuyigiriza etteeka lya Musa.

29 Era nate n’ayogera gye bali: Bwe muba nga muyigiriza etteeka lya Musa lwaki temulikuuma? Lwaki mwesigamya emitima ggyammwe ku by’obugagga? Lwaki mukola obwenzi, ne mumala amaanyi ga mmwe n’abenzi, weewaawo, era ne muleetera abantu bano okukola ekibi, nti Mukama alina ensonga okuntuma okuwa obunnabbi eri abantu bano, weewaawo, ddala ekibi ekinene eri abantu bano?

30 Temumanyi nti njogera mazima? Weewaawo, mumanyi nti njogera mazima; era musaana okukankana mu maaso ga Katonda.

31 Era kirituukirira nti mulikubibwa olw’ebibi byammwe, kubanga mugambye nti muyigiriza etteeka lya Musa. Era kiki kye mumanyi ku tteeka lya Musa? Obulokozi bujja lwa tteeka lya Musa? Mugamba ki mmwe?

32 Era ne baddamu era ne bagamba nti obulokozi bwajja lwa tteeka lya Musa.

33 Naye kaakano Abinadi n’abagamba nti: Nkimanyi bwe munaakuuma ebiragiro bya Katonda mujja kulokolebwa; weewaawo, bwe munaakuuma ebiragiro Mukama bye yawa Musa ku lusozi Sinaayi, nga mugamba nti:

34 Nze Mukama Katonda wo, eyakuggya mu nsi ey’e Misiri, okuva mu nnyumba ey’obuddu.

35 Tobanga na Katonda mulala we ndi.

36 Tewekoleranga ekifaananyi ekyole, oba ekintu kyonna kyonna ekyefaananyiriza ekiri waggulu mu ggulu, oba ebintu ebiri wansi ku ttaka.

37 Kaakano Abinadi n’abagamba nti, Mukoze bino byonna? Mbagamba nti, Nedda, temubikoze. Era muyigirizza abantu bano okukola ebintu bino byonna? Mbagamba nti, Nedda, temukikoze.