Kapitulo 50

Dadduma Pay a Pannursuro iti Maudi a Pangrabii

Kalpasan ti pannanganda, imbaga ni Jesus kadagiti Apostolna a nasken nga aggiinnayatda kas iti panagayatna kadakuada. No aramidenda daytoy, maammuan dagiti tao nga isuda dagiti disipulona.

Juan 13:34–35

Kinunana a no agayat dagiti Apostol Kenkuana, agtungpalda kadagiti bilinna. Inkarina kadakuada ti sagut ti Espiritu Santo. Ti Espiritu Santo ti mangisuro kadakuada iti amin a masapul a maammuanda. Tulongan ti Espiritu Santo dagiti Apostol a manglagip kadagiti banag nga insuro ni Jesus kadakuada.

Juan 14:15–18, 26

Kinuna ni Jesus a maipada Isuna iti maysa nga ubas. Maipada dagiti disipulona kadagiti sanga ti ubas. Ti laeng sanga a sititibker a nakasilpo iti ubas ti makapagbunga iti nasayaat a bunga.

Juan 15:1–2, 5

Inkari ni Jesus kadagiti Apostolna a no agbiagda iti ebanghelio, agbalinto a nasayaat ti bungada (dagiti aramidda). No saanda a sumurot Kenkuana, maipadadanto kadagiti sanga a naputed manipud iti maysa a kayo ken awan ti bungada.

Juan 15:3–8

Inkararag ni Jesucristo nga agkaykaysa koma dagiti Apostolna. Tinarigagayanna kadakuada nga isuroda dagiti tao a mamati Kenkuana ken maammuanda nga ay-ayaten ida ti Nailangitan nga Ama.

Juan 17:1–4, 6, 11, 20–23

Kalpasanna nagkanta iti himno ni Jesus ken dagiti Apostol ket pimmanawda iti siled.

Mateo 26:30