Kapitulo 10
Nabuniagan ni Jesus
Nagnaed ni Juan iti disierto iti adu a tawen. Nagkawes iti pagan-anay a dutdot ti kamelio, ket nangan kadagiti dudon ken diro ti uyokan. Naggapu dagiti tao manipud kadagiti siudad tapno dumngeg kenkuana a mangisuro. Maam-ammo isuna a Juan Bautista.
Sinuruan ni Juan Bautista dagiti tao maipapan ken Jesus. Imbagana kadakuada nga agbabawi kadagiti basolda ket agpabuniagda. Binuniagan ni Juan dagiti nagbabawi kadagiti basolda.
Sinaludsod dagiti tao ken ni Juan no kasano ti agbiag a nasaysayaat. Imbagana kadakuada a mangibinglay kadagiti napanglaw, mangibaga iti kipapudno, ken saan a mangidaddaduma kadagiti sabali. Kinunana nga umayton iti mabiit ni Jesucristo. Ikkanto ida ni Jesus iti sagut ti Espiritu Santo.
Maysa nga aldaw idi bumbuniagan ni Juan Bautista dagiti tao iti karayan Jordan, immay kenkuana ni Jesucristo. Indawatna ken Juan a mangbuniag Kenkuana. Ammo ni Juan a kanayon a tinungpal ni Jesus dagiti bilin ti Dios ket saanna a kasapulan ti agbabawi. Impagarup ni Juan a saan a kasapulan ni Jesus a mabuniagan.
Ngem binilin ti Dios ti amin a tao a mabuniagan, isu nga imbaga ni Jesus ken ni Juan a buniaganna Isuna. Impakita ni Jesus ti pagwadan para kadatayo babaen ti panangtungpal iti bilin nga agpabuniag.
Idi simmang-at ni Jesus manipud iti danum, immay ti Espiritu Santo Kenkuana. Nagsao ti Dios manipud iti langit, a kunkunana, “Daytoy ti Anakko a dungdunguek, isu a pakapnekak unay kenkuana.” Pinaneknekan pay ni Juan Bautista nga Anak ti Dios ni Jesus.
Mateo 3:16–17; Juan 1:33–36; Jesus the Christ, 150