Kapitulo 33: Panagparang iti Gloria: Ti Panagbalbaliw iti Langa

Da Jesus, Pedro, Santiago, ken Juan a magmagna

Intugot ni Jesus da Pedro, Santiago, ken Juan iti tuktok ti maysa a nangato a bantay tapno agkararag.

Mateo 17:1; Marcos 9:2; Lucas 9:28

Da Moises ken Elias nga agparparang ken ni Jesus

Bayat ti panagkararag ni Jesus, immay Kenkuana ti gloria ti Dios. Naraniag ti rupana a kas iti init. Nagparang ti dua a propeta iti Daan a Tulag nga agnagan iti Moises ken Elias. Pinagsaritaanda maipapan iti umasideg nga ipapatay ken panagungarna.

Mateo 17:2–3; Marcos 9:3–4; Lucas 9:29–31 (kitaen iti footnote 31a)

Da Pedro, Santiago, ken Juan a matmaturog

Kabayatan ti panagkararag ni Jesus, nakaturog dagiti Apostolna.

Lucas 9:32

Da Jesus, Moises, ken Elias nga agparparang kadagiti Apostol

Idi nakariingda, nakitada ti gloria ni Jesucristo, ni Moises, ken ni Elias. Nangngegda ti timek ti Nailangitan nga Ama a mangipaneknek, “Daytoy isu ti anakko a dungdunguek, isu a pakaidayawak; isu ti denggenyo.”

Mateo 17:5; Marcos 9:7; Lucas 9:32, 35

Ni Jesus a mangdandanon kadagiti Apostol

Nagbuteng dagiti Apostol ket nadalupoda iti daga. Sinagid ida ni Jesus ken imbagana kadakuada a saanda nga agbuteng. Idi kumitada, awanen dagiti nailangitan a mensahero. Imbaga ni Jesus kadagiti Apostol a saanda nga ibaga iti asino man no ania ti nakitada agingga a di kalpasan ti ipapatay ken panagungarna.

Mateo 17:6–9; Marcos 9:8–9