Kapitulo 39
Agasan ni Jesus ti Bulsek a Lalaki
Maysa nga aldaw magmagna ni Jesus a kaduana dagiti disipulona. Nakitada ti maysa a lalaki a nayanak a bulsek. Dinamag dagiti disipulo no bulsek ti lalaki gapu ta nagbasol isuna wenno gapu ta nagbasol dagiti nagannak kenkuana.
Kinuna ti Mangisalakan a saan a nagbasol dagiti nagannak wenno ti lalaki. Bulsek ti lalaki tapno maagasan isuna ni Jesus ken maipakita kadagiti tao ti bileg ti Dios.
Nangaramid ni Jesus iti pitak iti natupraan. Insapsapona daytoy kadagiti mata ti bulsek a lalaki. Imbaga ni Jesus iti lalaki a mangugas kadagiti matana.
Apaman nga inugasan ti lalaki ti pitak manipud kadagiti matana, makakitan isuna!
Idi makita dagiti kaarrubana, saanda a sigurado no asino isuna. Imbagana kadakuada a ni Jesus ti nangagas kenkuana. Dagiti kaarruba ti nangipan iti lalaki kadagiti Fariseo. Imbaga ti lalaki kadagiti Fariseo a ni Jesus ti nangagas kenkuana.
Napanunot dagiti sumagmamano kadagiti Fariseo a nalinteg a tao ni Jesus. Impagarup dagiti dadduma a managbasol isuna. Idi kinuna ti lalaki a nalinteg a tao ni Jesus, nakapungtot ti sumagmamano kadagiti Fariseo ket pinaruarda ti tao.
Nasarakan ni Jesus ti lalaki. Dinamagna iti lalaki no mamati isuna iti Anak ti Dios. Dinamag ti lalaki no asino ti Anak ti Dios. Kinuna ni Jesus nga Isu ti Anak ti Dios, ket nagdaydayaw ti lalaki Kenkuana.