Kapitulo 46
Ti Maikadua a Yaay
Imbaga ni Jesus kadakuada a sakbay ti Maikadua a Yaayna, ibaganto dagiti palso a propeta nga isuda ti Cristo. Adunto a tao ti sumurot kadakuada. Ngem no agtungpal dagiti pasurotna kadagiti balikasna, saan a maallilaw ida dagiti palso a propeta. Maisalakandanto.
Kinuna pay ni Jesus a sakbay nga umay Isuna manen, adunto ti gubgubat, panagbisin, ken nakaro a saksakit, ken gingginned. Adunto a tao ti agsardeng a mangtulong iti dadduma ket agbalinda a nadangkes.
Maikasabanto ti ebanghelio iti sibubukel a lubong, ngem adunto ti saan a dumngeg.
Ti init agsipngetto, ti bulan dinto aglawag, dagiti bituen matnagdanto manipud langit.
Inton umay ni Jesus, makitanto dagiti tao a bumabbaba Isuna manipud kadagiti ulep nga addaan iti bileg ken naindaklan a gloria. Ibaonnanto dagiti anghelna a mangummong kadagiti nalinteg a sangkamaysa.
Makapagsaganatayo para iti Maikadua a Yaay babaen ti panagaramid no ania ti umno. No makitatayo dagiti tanda nga inkari ni Jesus, ammotayonto nga asidegen ti yaay ti Mangisalakan. Awan ti makaammo ti eksakto no kaano ti yaayto manen ni Jesus. No nakasaganatayo, makapagnaedtayo Kenkuana.