Kapitulo 43

Isubli ni Jesus ti Biag ni Lazaro

Maysa a lalaki nga agnagan iti Lazaro ti nagnaed iti Betania a kadennana dagiti kakabsatna a babbai a da Maria ken Marta. Inayat ni Jesus ni Lazaro ken dagiti kakabsatna a babbai, ket inayatda ni Jesus.

Juan 11:1–2, 5

Nagsakit iti nakaro unay ni Lazaro. Adda iti sabali nga ili ti Mangisalakan. Impadamag da Maria ken Marta Kenkuana a masakit ni Lazaro.

Juan 11:3

Kiniddaw ti Mangisalakan kadagiti disipulona a sumurotda Kenkuana a mangtulong ken ni Lazaro. Nagbuteng dagiti disipulo a mapan iti Betania. Asideg ditoy ti Jerusalem. Kayat dagiti sumagmamano a tao iti Jerusalem a patayenda ni Jesus.

Juan 11:6–8, 18

Imbaga ni Jesus kadagiti disipulona a natayen ni Lazaro. Kinunana nga isublina ti biagna. Daytoy a milagro ti mangtulong kadagiti disipulo a mangammo nga Isu ti Mangisalakan. Napan ni Jesus iti Betania. Idi makadanon idiay, natayen ni Lazaro iti uppat nga aldaw.

Juan 11:11–17, 19

Imbaga ni Marta ken ni Jesus a sibibiag koma pay ni Lazaro no immay Isuna a nasapsapa. Kinuna ni Jesus nga agbiag manen ni Lazaro. Dinamagna ken ni Marta no mamati Kenkuana. Kinuna ni Marta a wen. Ammona a ni Jesus ti Mangisalakan.

Juan 11:20–27

Pinanawan ni Marta ni Jesus tapno alaenna ti kabsatna, ni Maria. Napan met ni Maria simmabat ken ni Jesus. Adu a tattao ti simmurot kenkuana. Nagparintumeng ni Maria, nga agsangsangit, iti sakaanan ti Mangisalakan. Nakipagsangsangit met dagiti tao kenkuana. Dinamag ni Jesus no sadino ti bagi ni Lazaro.

Juan 11:28–34

Napan ni Jesus iti kueba a nakaitaneman ni Lazaro. Adda bato iti sangona. Imbaganna kadagiti tao a mangikkat iti bato.

Juan 11:38–39

Timmangad ni Jesus.Nagyaman iti Nailangitan nga Ama iti panangdengngegna kadagiti kararagna.

Juan 11:41–42

Kalpasanna, iti napigsa a timek, imbaga ni Jesus ken ni Lazaro a rummuar iti kueba. Rimmuar ni Lazaro. Adu kadagiti tao a nakakita iti milagro ti mamati itan a ni Jesus ti Mangisalakan.

Juan 11:43–45