Kapitulo 5
Mayanak ni Jesucristo
Saan a nalaka nga agdaliasat ni Maria a mapan iti Betlehem. Asidegen a maipasngay ti maladagana.
Idi makadanon da Jose ken Maria iti Betlehem, napno ti amin a siled iti tattao. Nasken nga agtalinaed da Maria ken Jose iti maysa a kuadra. Ti kuadra ket maysa a lugar a pagyanan dagiti ayup.
Idiay a naipasngay ti maladaga. Binungon ni Maria Isuna iti lampin ket impaiddana Isuna iti maysa a kulluong. Ninaganan da Jose ken Maria ti maladaga iti Jesus.
Iti sardam a nayanak ni Jesus, ay-aywanan dagiti pastor ti karneroda kadagiti talon nga asideg ti Betlehem. Immay ti anghel kadakuada. Nagbuteng dagiti pastor.
Imbaga ti anghel kadakuada a saanda nga agbuteng. Adda napintas a padamagna: Nayanak ti Mangisalakan, ni Jesucristo, iti Betlehem. Masarakandanto Isuna a nakaidda iti maysa a kulluong.
Napan dagiti pastor iti Betlehem, a nakakitaanda iti maladaga a ni Jesus.
Naragsak dagiti pastor a makakita iti Mangisalakan. Imbagada iti dadduma a tao maipapan iti nangngegan ken nakitada.