Kapitulo 22

Ti Lalaki a Naluganan kadagiti Dakes nga Espiritu

Maysa a tao a nagnaed iti sementerio iti igid ti Baybay ti Galilea nga addaan iti dakes nga espiritu a namagbalin kenkuana a narungsot. Imbaod dagiti tao isuna iti kawar tapno mapengdan isuna, ngem winarwarna dagiti kawar.

Marcos 5:1–4

Binubos ti lalaki ti agmalem ken agpatnag iti kadagiti bantay ken kueba. Nagikkis iti amin a gundaway ket dinunorna ti bagina iti bato.

Marcos 5:5

Maysa nga aldaw binallasiw ni Jesus ken dagiti disipulona ti Baybay ti Galilea a nakasakay iti bilog. Idi dimsaag ti Mangisalakan iti bilog, nagtaray ti lalaki a napan Kenkuana.

Marcos 5:1–2, 6

Imbaga ni Jesus iti dakes nga espiritu a pumanaw iti lalaki. Ammo ti dakes nga espiritu nga Anak ti Dios ni Jesus. Indawatna ken ni Jesus a saanna a dangran isuna.

Marcos 5:7–8

Idi saludsoden ti Mangisalakan no ania ti nagan ti dakes nga espiritu, kinunana, “Sangarbaanan ti naganko,” a kayatna a sawen ti adu. Adu a dakes nga espiritu ti adda iti lalaki. Indawatda ken ni Jesus a palubosanna ida a sumrek iti bagi ti sumagmamano a baboy iti asideg.

Marcos 5:9–12

Immanamong ni Jesus. Pinanawan dagiti dakes nga espiritu ti lalaki ket napanda iti bagi ti agarup a 2,000 a baboy. Nagtaray dagiti baboy iti turod a nagturong iti baybay ket nalmesda.

Marcos 5:13

Napan dagiti lallaki a nangtaraken kadagiti baboy iti siudad ket imbagada kadagiti tao no ania ti napasamak. Immay dagiti tao ket nakitada ni Jesus ken ti narungsot a tao. Ngem saanen a narungsot ti tao.

Marcos 5:14–15

Daytoy ti namangbuteng kadagiti tao ken ni Jesus. Indawatda Kenkuana a pumanaw. Nagsubli Isuna iti bilog.

Marcos 5:15–18

Kayat ti lalaki a napaimbag ti kumuyog Kenkuana. Imbaga ketdi ti Mangisalakan kenkuana nga agawiden ket ibagana kadagiti gagayyemna no ania ti napasamak kenkuana.

Marcos 5:18–19

Imbaga ti lalaki kadagiti gagayyemna, ket nasdaawda iti naindaklan a bileg ni Jesus.

Marcos 5:20