Kapitulo 18
Pilien ni Jesus dagiti Apostolna
Maysa nga aldaw sinuruan ni Jesus dagiti tao manipud iti bilog iti igid ti Baybay ti Galilea. Kukua ti maysa a lalaki nga agnagan iti Pedro ti bilog.
Nagala iti ikan ni Pedro ken dagiti gagayyemna iti agpatnag nga awan ti naalada nga ikan. Kalpasan ti panangisuro ni Jesus, imbagana ken ni Pedro nga ipanna ti bilog iti adalem a danum. Kalpasanna imbagana ken ni Pedro ken kadagiti gagayyemna nga iwayatda dagiti iketda iti danum.
Nakaalada iti nagadu unay nga ikan ta nangrugi a napigis dagiti iketda.
Inawagan ni Pedro dagiti gagayyemna iti sabali a bilog tapno umay ken tumulong. Napno iti kasta unay nga ikan ti agpada a bilog ta nangrugidan a lumned.
Nasdaaw ni Pedro ken dagiti gagayyemna. Ammoda a ni Jesucristo ti nangaramid iti daytoy a pasamak.
Nagparintumeng ni Pedro iti sakaanan ti Mangisalakan. Kinunana a saan a maikari isuna nga umasideg ken ni Jesus. Kinuna ni Jesus ken ni Pedro a saan nga agbuteng.
Agkabsat ti dua kadagiti gagayyem ni Pedro, da Santiago ken Juan. Imbaga ni Jesus kada Pedro, Santiago ken Juan a sumurotda Kenkuana ket pagbalinenna ida a “dumadaklis kadagiti tao.” Pinanawan dagiti lallaki ti amin a banag nga adda kadakuada ket simmurotda ken ni Jesus. Indawat pay ti Mangisalakan iti dadduma pay a lallaki a sumurot Kenkuana.
Pinili ni Jesus ti sangapulo-ket-dua nga Apostol a mangidaulo iti Simbaanna. Nagkararag iti nagpatnag tapno mapilina dagiti umno a lallaki. Kabigatanna pinili ken inordenanna dagiti sangapulo-ket-dua a lallaki, nga inted kadakuada ti priesthood ken ti turay nga agbalin nga Apostol.
Nagdaliasat dagiti Apostol iti adu a siudad. Nangisuroda iti ebanghelio ken nangagasda kadagiti tao. Nagsublida a mangibaga ken ni Jesus no ania ti inaramidda.