1 Ug nahitabo nga human sa duha ka adlaw ug duha ka gabii dad-on na unta nila ang iyang lawas ug ipahimutang kini sulod sa usa ka lubnganan, nga ilang gihimo alang sa katuyoan sa paglubong sa ilang mga patay.

2 Karon kay ang rayna nakadungog sa kabantogan ni Ammon, busa nagpadala siya ug nagtinguha nga siya moduol kaniya.

3 Ug nahitabo nga gibuhat ni Ammon ang gisugo kaniya, ug miadto sa rayna, ug nagtinguha nga masayod unsa ang gusto niya nga iyang buhaton.

4 Ug siya miingon kaniya: Ang mga sulugoon sa akong bana nagpahibalo kanako nga ikaw usa ka ^apropeta sa balaan nga Dios, ug nga ikaw adunay gahom sa pagbuhat og daghan nga gamhanang buhat pinaagi sa iyang ngalan;

5 Busa, kon kini mao ang sitwasyon, ako magtinguha nga ikaw mosulod ug motan-aw sa akong bana, kay siya naghigda sa iyang higdaanan sulod sa duha ka adlaw ug duha ka gabii; ug ang uban miingon nga siya dili patay, apan ang uban miingon nga patay na siya ug siya nabaho, ug nga siya angay na nga ibutang sa lubnganan; apan alang kanako, siya wala mabaho.

6 Karon, mao kini ang gitinguha ni Ammon, kay nasayod siya nga si hari Lamoni anaa ubos sa gahom sa Dios; nasayod siya nga ang ngitngit nga ^atabil sa pagkawalay pagtuo gikuha gikan sa iyang hunahuna, ug ang ^bkahayag nga nagdan-ag sa iyang hunahuna, nga mao ang kahayag sa himaya sa Dios, nga usa ka kahibulongan nga kahayag sa iyang kaayo—oo, kini nga kahayag nakapatuhop niana nga kamaya nganha sa iyang kalag, ang panganod sa kangitngit nawala, ug nga ang kahayag sa kinabuhi nga walay kataposan mihayag sulod sa iyang kalag, nasayod siya nga kini nakabuntog sa iyang kinaiyanhon nga bayanan, ug giagak siya ngadto sa Dios—

7 Busa, unsa ang gitinguha sa rayna kaniya mao lamang ang iyang gitinguha. Busa, misulod siya aron tan-awon ang hari sumala sa gitinguha sa rayna kaniya; ug nakita niya ang hari, ug nasayod siya nga siya dili patay.

8 Ug miingon siya sa rayna: Siya dili patay, apan natulog siya diha sa Dios, ug sa pagkaugma mobangon siya pag-usab; busa ayaw siya ilubong.

9 Ug si Ammon miingon kaniya: Motuo ka ba niini? Ug siya miingon kaniya: Ako walay mga saksi gawas sa imong pulong, ug ang pulong sa among mga sulugoon; bisan pa niana ako motuo nga kini mahimo sumala sa imong gisulti.

10 Ug si Ammon miingon kaniya: Bulahan ikaw tungod sa imong hilabihan kadako nga pagtuo; moingon ako kanimo, babaye, wala pay ingon niini ka dako nga ^apagtuo taliwala sa tanang katawhan sa Nephita.

11 Ug nahitabo nga nagtukaw siya sa higdaanan sa iyang bana, gikan niana nga panahon gani hangtod niana nga panahon sa pagkaugma nga gitakda ni Ammon nga siya mobangon.

12 Ug nahitabo nga siya mibangon, sumala sa mga pulong ni Ammon; ug sa dihang mibangon siya, mipatuyhad siya sa iyang kamot ngadto sa babaye, ug miingon: Bulahan ang ngalan sa Dios, ug bulahan ikaw.

13 Kay sama ka tinuod nga ikaw buhi, tan-awa, ako nakakita sa akong Manunubos; ug siya moanhi, ug ^amatawo sa usa ka ^bbabaye, ug siya motubos sa tanang katawhan nga motuo sa iyang ngalan. Karon, sa dihang nasulti niya kini nga mga pulong, ang iyang kasingkasing napuno, ug natumba siya pag-usab uban ang kamaya; ug ang rayna usab natumba, nga gidaog sa Espiritu.

14 Karon si Ammon nga nakakita nga ang Espiritu sa Ginoo gibu-bo sumala sa iyang ^amga pag-ampo diha sa mga Lamanita, nga iyang kaigsuonan, kinsa mao ang hinungdan sa hilabihan nga pagbangotan taliwala sa mga Nephita, o taliwala sa tanang katawhan sa Dios tungod sa ilang mga kadaotan ug sa ilang ^bmga tradisyon, miluhod siya, ug misugod sa pagbu-bo sa iyang kalag sa pag-ampo ug pagpasalamat sa Dios alang sa unsay iyang nabuhat sa iyang kaigsoonan; ug siya usab gidaog uban sa ^ckamaya; ug sa ingon niana silang tulo ^dnatumba sa yuta.

15 Karon, sa dihang ang mga sulugoon sa hari nakakita nga nangatumba sila, nagsugod usab sila sa pagpangamuyo sa Dios, kay ang kahadlok sa Ginoo miabot usab kanila, kay ^asila man kadtong mibarog atubangan sa hari ug nagpamatuod ngadto kaniya kabahin sa dakong gahom ni Ammon.

16 Ug nahitabo nga sila mitawag sa ngalan sa Ginoo, sa ilang tibuok kusog, gani hangtod nga silang tanan nangatumba sa yuta, gawas sa usa sa mga babaye nga Lamanitanhon kansang ngalan mao si Abish, kay siya nakabig ngadto sa Ginoo sulod sa daghan nga tuig, tungod sa usa ka talagsaong panan-awon sa iyang amahan—

17 Sa ingon niana, kay nakabig ngadto sa Ginoo, ug wala gayod kini ikapahibalo, busa, sa dihang nakita niya nga ang tanan nga sulugoon ni Lamoni nangatumba sa yuta, ug usab ang agalon nga babaye, ang rayna, ug ang hari, ug si Ammon naghapa sa yuta, nasayod siya nga kini mao ang gahom sa Dios; ug nagtuo nga kini nga kahigayonan, pinaagi sa pagpahibalo sa katawhan unsa ang nahitabo kanila, nga pinaagi sa pagtan-aw niini nga talan-awon kini mahimo nga ^ahinungdan nga sila motuo sa gahom sa Dios, busa midagan siya ngadto sa usa ka balay ug ngadto sa lain nga balay, nagpahibalo niini ngadto sa katawhan.

18 Ug misugod sila sa pagpundok sa ilang mga kaugalingon ngadto sa balay sa hari. Ug dihay miabot nga pundok sa mga tawo, ug sa ilang katingala, sila nakakita sa hari, ug sa rayna, ug sa ilang mga sulugoon nga naghapa diha sa yuta, ug silang tanan nagbuy-od sama sa mga patay; ug sila usab nakakita kang Ammon, ug tan-awa, siya usa ka Nephita.

19 Ug karon ang mga tawo misugod sa pagbagulbol sa ilang mga kaugalingon; ang uban nag-ingon nga kadto usa ka dakong daotan nga miabot kanila, o sa hari ug sa iyang balay, tungod kay siya mitugot nga ang Nephita ^amagpabilin diha sa yuta.

20 Apan ang uban mibadlong kanila, nga nag-ingon: Ang hari nagdala niini nga daotan nganha sa iyang balay, tungod kay siya mipatay sa iyang mga sulugoon kinsa mipatibulaag sa iyang mga gagmayng pundok sa kahayopan didto sa ^akatubigan sa Sebus.

21 Ug gibadlong usab sila niadtong mga tawo kinsa mibarog didto sa mga tubig sa Sebus ug ^amipatibulaag sa mga panon nga gipanag-iya sa hari, kay sila nasuko ni Ammon tungod sa gidaghanon sa iyang gipamatay sa ilang kaigsuonan didto sa katubigan sa Sebus, samtang nanalipod sa mga panon sa hari.

22 Karon, ang usa kanila, kansang igsoon nga lalaki ^anapatay gamit ang espada ni Ammon, kay hilabihan ang iyang kasuko ni Ammon, miibot sa iyang espada ug miduol aron tigbason si Ammon, sa pagpatay kaniya; ug sa iyang paghuyad sa iyang espada aron pagtigbas kaniya, tan-awa, nahagsa siya nga patay.

23 Karon makita nato nga si Ammon dili mapatay, kay ang ^aGinoo nag-ingon ngadto kang Mosiah, nga iyang amahan: Ako mopanalipod kaniya, ug kini mahimo ngadto kaniya sumala sa imong pagtuo—busa, siya ^bgisalig ni Mosiah ngadto sa Ginoo.

24 Ug nahitabo nga sa dihang ang pundok sa mga tawo nakakita nga ang tawo namatay, kinsa mihulbot sa espada aron sa pagpatay kang Ammon, ang kahadlok miabot kanilang tanan, ug wala sila mangahas sa paggamit sa ilang mga kamot aron sa paghikap kaniya o bisan kinsa niadtong kinsa nangatumba; ug misugod na usab sila sa pagkahibulong sa ilang mga kaugalingon kon unsa kaha ang hinungdan niining dako nga gahom, o unsa ang gipasabot niining tanan nga butang.

25 Ug nahitabo nga dihay daghan taliwala kanila kinsa miingon nga si Ammon mao ang ^aGamhanang Espiritu, ug ang uban miingon nga siya gipadala niana nga Gamhanang Espiritu;

26 Apan ang uban mibadlong kanilang tanan, nga nag-ingon nga siya usa ka mangtas, kinsa gipadala gikan sa mga Nephita aron sa paghasol kanila.

27 Ug dihay uban kinsa miingon nga si Ammon gipadala sa Gamhanang Espiritu aron sa pagsakit kanila tungod sa ilang mga kadaotan; ug nga kining Gamhanang Espiritu sa kanunay nagbantay sa mga Nephita, kinsa mao ang nagluwas kanila gikan sa ilang mga kamot; ug miingon sila nga kini mao ang Gamhanang Espiritu kinsa naglaglag sa daghan sa ilang kaigsuonan, ang mga Lamanita.

28 Ug sa ingon niana nagsugod sa pagkagrabe ang panagbingkil taliwala kanila. Ug samtang nagkabingkil sila, ang sulugoon nga ^ababaye kinsa nakapahimo sa pundok sa mga tawo nga magpundok miabot, ug sa dihang nakita niya ang panagbingkil sa pundok sa mga tawo hilabihan ang iyang kasubo, gani mihilak.

29 Ug nahitabo nga miduol siya ug migunit sa kamot sa rayna, basin iyang mapatindog siya gikan sa yuta; ug sa dihang iyang nagunitan ang iyang kamot mibangon siya ug mibarog sa iyang mga tiil, ug misinggit sa makusog nga tingog, nga nag-ingon: O bulahan nga Jesus, kinsa miluwas kanako gikan sa ^amakahahadlok nga impiyerno! O bulahan nga Dios, ^bkaloy-i kini nga katawhan!

30 Ug sa dihang nasulti niya kini, mihakgom siya sa iyang mga kamot, kay napuno sa kamaya, namulong og daghan nga pulong nga dili masabot; ug sa dihang nahimo niya kini, iyang gigunitan ang hari, si Lamoni, sa kamot, ug tan-awa mibangon siya ug mibarog sa iyang mga tiil.

31 Ug siya, dihadiha, nga nakakita sa panagbingkil sa iyang katawhan, milakaw ug misugod sa pagbadlong kanila, ug sa pagtudlo kanila sa mga ^apulong nga iyang nadungog gikan sa ba-ba ni Ammon; ug ang kadaghanan nga nakadungog sa iyang mga pulong mituo, ug nakabig ngadto sa Ginoo.

32 Apan dihay daghan kanila kinsa dili mamati sa iyang mga pulong; busa nanglakaw sila.

33 Ug nahitabo nga sa dihang si Ammon mibangon siya usab nangalagad ngadto kanila, ug usab ang tanan nga mga sulugoon ni Lamoni; ug silang tanan mipahayag ngadto sa katawhan sa sama nga butang—nga ang ilang mga kasingkasing ^anausab; nga sila wala nay tinguha sa pagbuhat og ^bdaotan.

34 Ug tan-awa, daghan ang mipahayag ngadto sa katawhan nga sila nakakita og mga ^aanghel ug nakigsulti kanila; ug sa ingon niana sila misulti kanila sa mga butang sa Dios, ug sa iyang pagkamatarong.

35 Ug nahitabo nga dihay daghan nga mituo sa ilang mga pulong; ug ang kadaghanan nga mituo ^anabunyagan; ug nahimo silang usa ka matarong nga katawhan, ug mitukod sila og simbahan taliwala kanila.

36 Ug sa ingon niana nagsugod ang buluhaton sa Ginoo diha sa mga Lamanita; sa ingon niana ang Ginoo misugod sa pagbu-bo sa iyang Espiritu diha kanila; ug nakita nato nga ang iyang bukton gitunol ngadto sa ^atanang katawhan kinsa mohinulsol ug motuo sa iyang ngalan.