¶ 1 E JIHOVA, ke ke fofoga mai, o fanogo kiate au: he oku ou majiva mo mamahi.

2 Fakamoui hoku laumalie; he oku ou maonioni: akoe ko hoku Otua, fakamoui hoo tamaioeiki aia oku falala kiate koe.

3 E Eiki, ke ke aloofa kiate au: he oku ou tagi kiate koe i he aho kotoabe.

4 E Eiki, fakafiefia‘i ae laumalie o hoo tamaioeiki: he oku ou hiki hake hoku laumalie kiate koe.

5 He ko koe, E Eiki oku ke agalelei, bea faa fakamolemole; bea mohu aloofa kiate kinautolu kotoabe oku ui kiate koe.

6 Fanogo, E Jihova, ki he eku lotu; bea tokaga ki he le‘o o eku gaahi lotu tāumau.

7 I he aho o eku mamahi teu ui kiate koe; he te ke talia au.

8 E Eiki, oku ikai ha toko taha i he gaahi otua oku tatau mo koe; bea oku ikai ha gaue o hage ko hoo gaahi gaue.

9 E Eiki, e ha‘u o hu i ho ao ae gaahi buleaga kotoabe naa ke gaohi; bea te nau fakaogoogolelei‘i ho huafa.

10 He oku ke lahi, bea oku ke fai ae gaahi mea mana: ko koe be koe Otua.

11 E Jihova, ako kiate au ho hala; teu eveeva i hoo mooni: gaohi ke taha be hoku loto ke manavahe ki ho huafa.

12 E Eiki ko hoku Otua, teu fakafetai kiate koe aki hoku loto kotoa: bea teu fakaogoogolelei ho huafa o taegata.

13 He oku lahi hoo aloofa kiate au: bea kuo ke fakamoui hoku laumalie mei he loto heli.

14 E Otua, kuo tuu hake kiate au ae kau fielahi, bea nae kumi hoku laumalie e he gaahi fakataha oe kau fakamalohi; bea oku ikai te nau fokotuu a hoo afio i ho nau ao.

15 Ka ko koe, E Eiki, koe Otua oku fonu i he manavaofa, moe agalelei, oku ke kataki fuoloa, bea mohu aloofa moe mooni.

16 Ke ke tafoki mai kiate au, bea aloofa kiate au; foaki ho malohi ki hoo tamaioeiki, bea fakamoui ae tama a hoo kaunaga.

17 Fakaha kiate au ae fakailoga oe lelei; koeuhi ke mamata ki ai akinautolu oku fehia kiate au, bea ma ai: koeuhi kuo ke tokoni‘i au, E Jihova, o fakafiemalie‘i au.