Vahe 38
Oku lotu a Tevita ki he Otua ke ne aloofa kiate ia i he ene mamahi lahi.
Koe Same a Tevita, koe fakamanatu.
¶ 1 E JIHOVA, oua naa ke valoki‘i au i ho houhau: bea oua naa ke valoki‘i au i ho houhau vela.
2 He oku tau mau iate au hoo gaahi gahau, bea oku taomia fakamamahi au e ho nima.
3 Oku ikai ha haohaoa i hoku kakano koe mea i ho houhau; bea oku ikai ha fiemalie i hoku hui koe mea i he eku agahala.
4 He kuo hake a eku gaahi hia o ufiufi hoku ulu: o hage koe kavega mamafa oku taomia ai au.
5 Oku eho hoku gaahi lavea o fakalielia koeuhi ko eku vale.
6 Oku ou mamahi; oku ou mabelu ki lalo aubito; oku ou alu mamahi be i he aho kotoa.
7 He oku fonu hoku jino i he mahaki kovi: bea oku ikai ha moui haohaoa i hoku kakano.
8 Oku ou vaivai mo mafeji i he mamahi: naaku kalaga koe mea i he mamahi o hoku loto.
9 E Eiki, oku i ho ao eku holi kotoabe; mo eku gaahi to‘e oku ikai fufu iate koe.
10 Oku tatube hoku mafu, kuo oji eku malohi: bea koe māma o hoku mata kuo mole foki ia iate au.
11 Ko hoku kaumea ofa mo hoku gaahi kaiga oku nau tutuu i he mamao mei hoku teia; mo hoku kaugaabi oku nau tutuu i he mamao.
12 Ko kinautolu foki oku kumi ki he eku moui oku nau to ae gaahi tauhele kiate au: ko kinautolu oku kumi keu kovi oku nau lea aki ae gaahi mea kovi, mo nau fakakaukau ki he mea kākā i he aho kotoa.
13 Ka ko au, hage ko ha tuli, oku ikai teu ogo‘i; bea naaku hage koe tagata oku noa aia oku ikai mafaa hono gutu.
14 Bea naaku hage koe tagata tae ogo‘i, bea oku ikai ha valoki i hono gutu.
15 He oku ou amanaki lelei, E Jihova, kiate koe: te ke ogo‘i, E Eiki ko hoku Otua.
16 He naaku behe, Fanogo kiate au, telia naa nau fiefia kiate au: i he hekea a hoku va‘e, oku nau hiki hake akinautolu kiate au.
17 He oku ou meimei nofo, bea oku tuu mau be eku mamahi i hoku ao.
18 He teu fakaha eku hia; beau mamahi koeuhi ko eku agahala.
19 Ka oku moui hoku gaahi fili, bea oku nau malohi: bea oku fakaaau o toko lahi akinautolu oku fehia tae totonu kiate au.
20 Bea ko hoku gaahi fili foki akinautolu oku totogi kovi ki he lelei; koeuhi oku ou muimui ki he lelei.
21 Oua naa ke liaki au, E Jihova: E hoku Otua, oua naa ke mamao iate au.
22 Ke ke fakatootoo ke tokoni au, E Eiki ko hoku fakamoui.