¶ 1 ALOOFA mai kiate au, E Otua, o fakatatau ki hoo manavaofa: ke ke tamate‘i eku gaahi agahala o fakatatau ki hono lahi o hoo gaahi aloofa ogogofua.

2 Ke ke fufulu aubito au mei he eku hia, mo fakamaa au mei he eku agahala:

3 He oku ou fakamooni eku gaahi talagataa: bea oku tuu mau ai be i hoku ao eku agahala.

4 Naaku fai agahala kiate koe, io, kiate koe be kuou fai ae kovi ni i ho ao; koeuhi ke tonuhia be akoe oka ke ka folofola, bea maonioni oka ke ka fai ae fakamāu.

5 Vakai, nae fanau‘i au i he agakovi; bea nae tuituia eku fa‘e iate au koe agahala.

6 Vakai, oku ke finagalo ki he mooni i loto: bea i he fufu te ke gaohi ai au keu ilo ae boto.

7 Ke ke fakamaa au aki ae isobe, bea teu maa ai: fufulu au, bea teu hinehina lahi i he uha hinehina.

8 Tuku keu fanogo ki he fiefia moe nekeneka; ke fiemalie ai ae gaahi hui kuo ke feji‘i.

9 Ke ke fufu ho fofoga mei he eku agahala, mo ke tamate‘i eku gaahi hia kotoabe.

10 E Otua, ke ke fakatubu iate au ae loto maa; mo ke fakafoou iate au ha laumalie tuu mau.

11 Oua naa ke liaki au mei ho ao; bea oua naa ke too iate au ho laumalie maonioni.

12 Toe omi kiate au ae fiefia o hoo fakamoui; mo ke boubou aki au ho laumalie tauataina.

13 Bea teu akonaki aki ae kau talagataa a ho gaahi hala; bea i liliu kiate koe ae kau agahala.

14 E Otua, koe Otua o eku moui, ke ke fakamoui au mei he hia oe toto: bea e hiva kalaga a hoku elelo i hoo maonioni.

15 E Eiki, ke ke faai hoku lougutu; bea e fakaha atu e hoku gutu a hoo fakamalo.

16 He oku ikai te ke finagalo ki he feilaulau, koeuhi keu atu ia: oku ikai te ke fiemalie i he feilaulau tutu.

17 Koe gaahi feilaulau oe Otua koe laumalie mafeji: koe loto mafeji mo māfofoa, E Otua, e ikai te ke manuki‘i.

18 Fai lelei i ho finagalo lelei ki Saione: ke ke fokotuu hake ae gaahi a o Jelusalema.

19 Bea te ke fiemalie i he gaahi feilaulau oe maonioni, moe feilaulau tutu, moe gaahi feilaulau tutu kotoa: bea te nau toki atu ae faga bulu ki hoo feilaulauaga.