Vahe 72
1 Ko Tevita i he ene hufia a Solomone oku ne fakaha ko ene bule koe fakailoga oe agalelei, mo hono nāunāu, moe mooni oe bule a Kalaisi. 18 Oku fakafetai ia ki he Otua.
Koe Same ma a Solomone.
¶ 1 E OTUA, tuku ki he tu‘i a hoo gaahi fakamāu, mo hoo maonioni ki he foha oe tu‘i.
2 Te ne fakamāu hoo kakai i he maonioni, mo hoo kau majiva aki ae fakamāu.
3 E omi e he gaahi mouga ae melino ki he kakai, moe maonioni mei he gaahi tafugofuga.
4 E fakamāu eia ae kakai mamahi, te ne fakamoui ae fānau ae majiva, bea te ne fejifeji ae fakamalohi.
5 Te nau manavahe kiate koe i he lolotoga ae kei tuu ae laa moe mahina, i he toutagata kotoabe.
6 E alu hifo ia o hage koe uha ki he mohuku kuo tutuu: o hage koe uha tuu mo to oku fakaviviku ae fonua.
7 E tubu be ae kau maonioni i hono gaahi aho; moe melino lahi aubito i he kei tologa ae mahina.
8 E bule eia foki mei he tahi ki he tahi, bea mei he vaitafe o au ki he gaahi gataaga o mamani.
9 E bunou i hono ao akinautolu oku nofo i he toafa; bea e emo ae efu e hono gaahi fili.
10 E omi ae gaahi mea ofa e he gaahi tu‘i o Tasisi bea moe gaahi motu: e atu ae gaahi mea foaki e he gaahi tu‘i o Siba mo Seba.
11 Io, e bunou i hono ao ae gaahi tu‘i kotoabe: e tauhi ia e he buleaga kotoabe.
12 He te ne fakamoui ae majiva i he ene tagi; ae mamahi foki, mo ia oku ikai hano tokoni.
13 Te ne fakamoui ae vaivai moe majiva, o fakamoui ae laumalie oe kau majiva.
14 E huhui eia ho nau laumalie mei he kākā moe fakamalohi: bea e mahuiga ho nau toto i hono ao.
15 Bea e moui be ia, bea e foaki kiate ia ae koula o Siba: e fai mau ai be ae lotu koeuhi ko ia; bea e fakamalo kiate ia i he aho kotoabe.
16 Bea e i ai ae falukuga oe uite i he fonua i he tumutumu oe gaahi mouga, e gau‘eu‘e hono fua oia o hage ko Lebanoni: bea ko kinautolu i he kolo e tubu be o hage koe mohuku oe fonua.
17 E tuu mau hono huafa o taegata: e tologa mau ai be hono huafa o hage koe laa: bea e monuia ae kakai iate ia: e ui ia koe monuia e he buleaga kotoabe.
18 Fakafetai kia Jihova koe Otua, koe Otua o Isileli, aia toko taha be oku fai ae gaahi mea fakaofo.
19 Bea fakafetai mau ai be ki hono huafa ogoogolelei o taegata: bea tuku ke bito a mamani kotoabe i hono nāunāu; Emeni, mo Emeni.
20 Kuo gata ae gaahi lotu a Tevita koe foha o Jese.