Vahe 108
1 Oku eginaki‘i e Tevita hono loto ke fakamalo ki he Otua. 5 Oku ne kole ki he tokoni ae Otua o fakatatau mo ene talaofa. 11 Ko ene tui ki he tokoni mei he Otua.
Koe Hiva be koe Same a Tevita.
¶ 1 E OTUA, kuo mau hoku loto; teu hiva mo atu ae fakamalo aki hoku nāunāu.
2 Ke a hake ae saliteli moe haabe: teu a hegihegi hake be au.
3 E Jihova, teu fakamalo kiate koe i he ao oe kakai: bea teu hiva fakamalo kiate koe i he gaahi buleaga.
4 He oku lahi hoo aloofa o maoluga hake i he gaahi lagi: mo hoo mooni oku a‘u atu ki he gaahi ao.
5 E Otua, ke maoluga lahi hake koe i he gaahi lagi: bea ke maoluga hake ho nāunāu i mamani kotoabe;
6 Koeuhi ke hao aia oku ke ofa ai: ke ke fakamoui aki ho nima toomatau, o talia au.
7 Kuo folofola ae Otua i he ene maonioni; teu fiefia, teu vaeua a Sikemi, o fuofua ae luo o Sukote.
8 Oku ooku a Kiliati; oku ooku mo Manase; ko hono malohi foki o hoku ulu a Ifalemi; ko eku fai fono a Juta;
9 Ko eku ibu kaukauaga a Moabe; teu li hoku tobuva‘e ki oluga ki Itomi; teu vikiviki koeuhi ko Filisitia.
10 Kohai te ne omi au ki he kolo malohi? kohai te ne autaki au ki Itomi?
11 E Otua, e ikai, te ke fai ia, akoe kuo ke liaki akimautolu? bea ikai te ke alu atu, E Otua, moe mau gaahi kau tau?
12 Ke ke tuku kiate kimautolu ae tokoni i he mamahi: he oku taeaoga ae tokoni ae tagata.
13 Koe mea i he Otua te tau fai malohi ai: he koia ia te ne malaki hifo ho tau gaahi fili.