Vahe 59
1 Oku lotu a Tevita ke moui ia mei hono gaadi fili. 6 Oku hanu ia i he e nau fai fakamamahi. 8 Oku ne falala ki he Otua. 11 Oku lotu ia telia akinautolu, 16 bea fakamalo ki he Otua.
Ki he Takimua, Ali‐tasikiti, koe Same mahuiga a Tevita, i he fekau a Saula ke nau leohi ae fale ke tamate‘i ia.
¶ 1 E HOKU Otua, ke ke fakahaofi au mei hoku gaahi fili: malu‘i au meiate kinautolu oku tuu hake kiate au.
2 Ke ke fakahaofi au mei he kau fai kovi mo ke fakamoui au mei he kau tagata bani toto.
3 Vakai, oku nau tatali o lama ki hoku laumalie: E Jihova, kuo katoa fakataha ae kau malohi kiate au: ka oku ikai i he eku talagataa, be ko eku agahala.
4 Oku nau felele‘i o teu‘i akinautolu, ka oku ikai haaku kovi: ke ke a ke tokoni au, bea ke afio‘i.
5 Bea ko koe, E Jihova, koe Otua, oe gaahi toko lahi, koe Otua o Isileli, ke ke a hake o ahiahi ki he hiteni kotoabe: oua naa ke aloofa ki he kau agakovi kākā. Sila.
6 Oku nau liu mai i he efiafi: oku nau logoaa o hage koe kuli, bea alu fakatakamilo i he kolo.
7 Vakai, oku nau hake i ho nau gutu: oku i ho nau lougutu ae gaahi heleta: he oku nau behe, kohai oku ne fanogo?
8 Ka ko koe, E Jihova, te ke kata kiate kinautolu; te ke manuki ki he hiteni kotoabe.
9 Bea koeuhi ko ene malohi koia teu tatali ai kiate koe: he ko hoku hufaga ae Otua.
10 Koe Otua oku aloofa kiate au te ne tokoni au: e tuku kiate au e he Otua keu mamata ki he eku holi ki hoku gaahi fili.
11 Oua naa ke tamate‘i akinautolu, telia naa galo i hoku kakai; fakahe‘i akinautolu ke mamao i ho malohi; bea o hifo ki lalo akinautolu, E Eiki, ko ho mau fakaū,
12 Koe mea i he agahala a ho nau gutu, moe gaahi lea a ho nau lougutu, tuku ke moua ai akinautolu i he e nau laukau: koeuhi koe kabe moe loi oku nau lea aki.
13 Fakaauha akinautolu i he houhau, fakaauha akinautolu ke oua naa kei ai akinautolu: bea tuku ke ilo ekinautolu oku bule ae Otua ia Jekobe, o a‘u ki he gaahi gataaga o mamani. Sila.
14 Bea tuku ke nau liu mai i he efiafi; tuku ke nau logoaa o hage koe kuli, o alu fakatakamilo i he kolo.
15 Tuku ke nau alu o he fano ai be o kumi kai, bea lāuga o kabau e ikai te nau makona.
16 Ka teu hiva au ki ho malohi; io, teu hiva malohi i hoo aloofa i he bogibogi: he ko hoku ugaaga koe moe hufaga kiate au i he aho o eku mamahi.
17 E noku malohi, teu hiva kiate koe: he ko hoku kalofaga ae Otua, koe Otua oku aloofa kiate au.