Vahe 34
1 Oku fakafetai a Tevita ki he Otua, bea ne eginaki‘i ae kakai ke fai ia. 8 Oku monuia akinautolu oku falala ki he Otua. 11 Oku ne eginaki ke manavahe ki he Otua. 15 Koe lelei oku i he maonioni.
Koe Same a Tevita, i he ene liliu ene tooga i he ao o Abimileki; aia naa ne kabuji ia, bea alu ia o hao.
¶ 1 TEU fakafetai kia Jihova i he kuoga kotoabe: e tuu mau be ene fakafetai i hoku gutu.
2 E vikiviki hoku laumalie ia Jihova: e fanogo ki ai ae kakai agavaivai, bea fiefia ai.
3 Ke tau fai mo au ke abai hake a Jihova, bea ke tau fakaogoogolelei fakataha hono huafa.
4 Naaku kumi kia Jihova, bea ne ogo‘i au, o ne fakamoui au mei he eku manavahe kotoabe.
5 Naa nau vakai kiate ia, bea māmagia ai: bea nae ikai ma ai ho nau mata.
6 Nae tagi ae tagata majiva ni, bea nae ogo‘i ia e Jihova, o ne fakamoui ia mei he ene mamahi kotoabe.
7 Oku nofo ae agelo a Jihova o takatakai akinautolu oku manavahe kiate ia, o ne fakamoui akinautolu.
8 Mou kamata o vakai oku lelei a Jihova: oku monuia ae tagata koia oku falala kiate ia.
9 Ke manavahe kia Jihova, akimoutolu ko ene kau maonioni: he oku ikai ha majiva kiate kinautolu oku manavahe kiate ia.
10 Oku majiva ae faga laione mui, mo fiekaia: ka ko kinautolu oku kumi kia Jihova e ikai te nau majiva i ha mea lelei e taha.
11 Ha‘u, akimoutolu koe fānau, o fanogo kiate au: teu ako kiate kimoutolu ae manavahe kia Jihova.
12 Kohai ha tagata oku holi ke moui, o manako ki he gaahi aho lahi, koeuhi ke ne mamata ai ki he lelei?
13 Taofi ho elelo mei he kovi, mo ho lougutu mei he lea kākā.
14 Afe mei he kovi, mo ke fai lelei; kumi ki he melino, bea tuli ki ai.
15 Oku afio mau ae fofoga o Jihova ki he kakai maonioni, bea oku ogo‘i e hono teliga e nau tagi.
16 Oku houhau ae fofoga o Jihova kiate kinautolu oku fai kovi, ke motuhi ho nau fakamanatu‘i mei mamani.
17 Oku tagi ae maonioni, bea ogo‘i e Jihova, o ne fakamoui akinautolu mei he e nau gaahi mamahi kotoabe.
18 Oku ofi a Jihova kiate kinautolu oku loto mafeji; oku ne fakamou akinautolu oku laumalie mafofoa.
19 Oku lahi ae gaahi mamahi oe maonioni: ka oku fakamoui ia mei ai kotoabe e Jihova.
20 Oku ne tauhi hono gaahi hui kotoabe: e ikai mafeji ha taha.
21 E fakabogi e he kovi ae kau agahala: bea ko kinautolu oku fehia ki he kau maonioni te nau malaia.
22 Oku huhui e Jihova ae laumalie o ene kau tamaioeiki: bea e ikai malaia ha toko taha okinautolu oku falala kiate ia.